1 Samuel 24 - Chahta Holisso Holitopa 1886

¹ Atuk o̱ yakohmi tok, Sal ʋt Filistin ʋhleha ha̱ iakaiyʋt a̱ya tuk ʋt falama ma, im anolit, Yakeh! Lewi ʋt En‐keti yakni haiaka yak o̱ antʋshke, achi tok.

² Yohmi ma Sal ʋt Islael moma ka hatak aiyua tahlepa sipokni tuchina ho̱ ai ishi cha, Lewi, micha in tʋshka ʋhleha aiena issi kosoma nukshopa aiasha tʋli foka ona cha, a hoyo tok.

³ Atuk osh takla ya̱ chukfʋlhpoa i̱ holihta ʋt a taloha ma, yʋmma hichukbi ʋt hikia tok: mihma Sal ʋt iyi ya̱ ompohoma chi̱ hosh pit chukowa tok: mihma Lewi, micha in tʋshka ʋhleha aiena kʋt hichukbi anu̱kaka ʋhli aiasha tok.

⁴ Mihma Lewi in tʋshka ʋhleha hʋt, Yakeh! himak nitak ak o̱ Chihowa ʋt, Yakeh! chin tʋnʋp a̱ chibbak a̱ fohki likma, nana ho̱ ʋlhpesa ish ahnikmʋt, ish yʋmihcha hi oke, achi tok mak oke, im achi tok. Yohmi ma Lewi ʋt wakaya cha, lʋmʋt Sal im anchi wishakchi ya̱ tʋbli tok.

⁵ Atuk o̱ yakohmi tok, i̱ himmak a̱ Sal im anchi wishakchi ya̱ tʋbli tuk ak osh chu̱kʋsh ʋt nʋhla tok.

⁶ Micha yʋmmak ash osh in tʋshka ʋhleha ha̱, A̱ shahli Chihowa nan ahamʋt im ʋlhtoka ya̱ sʋbbak a̱ o̱ welit im i̱ sanali la hi a̱ Chihowa ʋt ʋm olʋbashke, Chihowa nan ahamʋt im ʋlhtoka yoka, im achi tok.

⁷ Yohmi hosh Lewi ʋt anumpa yakohmi kak o̱ in tishu ʋhleha ha̱ isht im alummi cha, wakayʋt Sal a̱ im i̱ sanala hi a̱ ik im ahno tok. Amba Sal ʋto wakaya cha, kohchʋt ia tok.

⁸ Mihma Lewi ak kia i̱ himmak a̱ hichukbi ya̱ kohchʋt ia cha, Sal a̱ iakaiyachit i̱ pa̱yʋt, A̱ shahli mi̱ko ma! achi tok. Atuk o̱ Sal ʋt filemʋt olbʋl pit pisa ma, Lewi ʋt aka nashuka ishit hlipia cha, im aka chunoli tok.

⁹ Micha Lewi ʋt Sal a̱, Nanta katiohmi ho̱ hatak im anumpa hʋt, Yakeh! Lewi ʋt chi hotopali bʋnnʋshke, achi ka ish i̱ haponaklo cho?

¹⁰ Yakeh! himak nitak a̱ Chihowa ʋt hichukbi ya̱ sʋbbak a̱ chi fohki tuk a̱, himak nitak a̱ chi nishkin ʋt pi̱sʋshke: micha kanimi kʋt chibi la hi a̱ a̱ miha tuk oke; yohmi kia sa nishkin ʋt chi apoʋchi tuk oke: micha, Sʋbbak a̱ wieli lish, a̱ shahli ha̱ im i̱ sanali la he keyu, Chihowa nan ahamʋt im ʋlhtoka yoka, achi li tuk oke.

¹¹ Micha a̱ki ma! pisá, a̱hli, chim anchi wishakchi ʋt sʋbbak fo̱ka ka pisá: chim anchi wishakchi yak o̱ tʋbli lish, ak chi bo ketuk oka, nan ik achukmo, micha mi̱ko i̱ filʋmmit i̱ sanali aiena kʋt sʋbbak a̱ foyuka keyu ka ish pisa cha, ish ithaiyanashke; micha chi̱ yoshuba li tuk keyu hoke; yohmi kia ʋmi shilombish a̱ ishi chi bʋnna cha, ish im aiehinchishke.

¹² Chihowa yak osh pitititakla ya̱ nana pim apesashke, micha Chihowa ak osh chishno a̱ ʋm il aiokhashke: amba sʋbbak ʋt chi onʋtola he keyu hoke.

¹³ Nitak cha̱shpo nan achi ʋt, Nan ashʋchi ʋt nan ashʋchi yak o̱ a minti hoke, achi chatuk oka: amba sʋbbak okʋto chi onʋtola he keyu hoke.

¹⁴ Islael i̱ mi̱ko ʋt kʋta ho̱ hoyo hosh kohchʋt a̱ya ho? kʋta ho̱ iakaiyʋt ish hlioli ho̱? ofi illi yo̱ ish hoyo cho? kʋshti ho̱ ish hoyo cho?

¹⁵ Yʋmohmi hoka Chihowa ak osh nan apesa yashke, micha ʋno, mikmʋt chishno pititakla nana pim apesa cha, pisashke, micha si apehpoashke, micha chibbak a̱ si a hlakofichashke, im achi tok.

¹⁶ Atuk o̱ yakohmi tok, Lewi ʋt Sal a̱ anumpa yakohmi im anumpulit ont tahli ma, Sal ʋt, Ilʋppʋt chiteh hoh cho? sʋso Lewi ma! achi tok. Micha Sal ʋt chitoli hosh yaiya tok.

¹⁷ Micha Lewi ya̱, Chi ai ʋlhpiesa kʋt ʋno ya̱ is sa̱ shahlishke: achukma ho̱ is sa̱ falʋmminchi hokʋt, ik achukmo ho̱ chi̱ falʋmminchi li kia.

¹⁸ Micha himak nitak a̱ ai ʋlhpiesa ho̱ is si yʋmihinchi chatuk ʋt ish otʋninchishke; Chihowa ʋt chibbak a̱ sa foyuki kia, chik sʋ bo hokʋt.

¹⁹ Hatak ʋt in tʋnʋp a̱ ahayuchi kʋt, achukma̱kʋt ik iá, ahna hinla cho? yʋmohmi hoka Chihowa ʋt achukma ho̱ chi̱ falʋmminchashke, yʋmmak o̱ himak nitak a̱ is si yʋmihchi hoka.

²⁰ Micha yakeh! mi̱ko ish toba pulla chi̱, mikma Islael apehlichika yʋt chibbak a̱k o̱ kʋllot afoyuka chi̱ ka ithana li fehnʋshke.

²¹ Yʋmohmi hoka Chihowa pulla ho̱ anumpa kʋllo il onochit, ʋm ishtatiaka siakaiya ka chik hokofo ka he, micha sa hohchifo ha̱ a̱ki in chuka achʋfa ish a mosholicha he keyu ka is sa̱ mihashke, achi tok.

²² Mihma Lewi ʋt anumpa kʋllo il onochit Sal a̱ i̱ miha tok. Mihma Sal ʋt in chuka ia tok: amba Lewi, micha in tʋshka ʋhleha hʋt ai atuko ona tok.