1 Samuel 23 - Chahta Holisso Holitopa 1886

¹ Yohmi ma Lewi ya̱ okla im anolit, Yakeh! Filistin okla hʋt Keilah ya̱ in tanampi cha, nan‐anihechi ya̱ wehpulishke, achi tok.

² Yohmi ho̱ Lewi ʋt Chihowa ya̱ i̱ ponaklot, Ia lish, Filistin ʋhleha ilʋppa issot kanchi la chi̱ cho? achi tok. Mihma Chihowa ʋt Lewi ya̱, Ia cha, Filistin ʋhleha ha̱ issot ish kanchi cha, Keilah ya̱ ish hlakofichashke, im achi tok.

³ Mihma Lewi in tʋshka ʋhleha hʋt, Yakeh! pi nukshopa hosh Chutah ilʋppa il ai asha: yohmi kʋt Keilah ya̱ onʋt Filistin tʋshka chipota itibi hokak heno il i̱ nukshopa kʋt i̱ shahli fehna ʋlhpesa keyu̱? im achi tok.

⁴ Yohmi ma Lewi ʋt himakma anonti Chihowa ya̱ i̱ ponaklo tok. Mihma Chihowa ʋt afalamichit, Wakaya cha, iʋt Keilah ya̱ ish onashke; Filistin ʋhleha ha̱ chibbak a̱ fohki la chi̱ hoke, im achi tok.

⁵ Yohmi ho̱ Lewi, micha in tʋshka ʋhleha aiena kʋt Keilah ya̱ ona cha, Filistin ʋhleha ha̱ itibi mʋt, issot kanchi na illi kʋt laua fehna tok; micha i̱ wak a̱ pehlichit ishit minti tok. Yohmi hosh Lewi ʋt Keilah okla aiasha ka hlakofichi tok.

⁶ Atuk o̱ yakohmi tok, Ahimelech ushi Abiahla ʋt malelit, Lewi ʋt Keilah ya̱ anta tuk o̱ im ona mʋt, efot ʋt ibbak a̱ foyuka hosh ona tok.

⁷ Mihma Lewi ʋt Keilah ya̱ ona ka Sal a̱ im anoli tok. Mihma Sal ʋt, Chitokaka yʋt sʋbbak a̱ fohki hoke: tʋmaha holihta okhissa, micha okhowatkʋchi isht ashana a̱sha ka chukowa kʋt im okshilita hoka, achi tok.

⁸ Mihma Sal ʋt, Keilah ya̱ ona cha, Lewi micha in tʋshka ʋhleha ha̱ in tanampit afolubla chi̱ hosh okla moma ka hoyot itʋnahli tok.

⁹ Mihma Sal ʋt lumʋt nana ik achukmo ka yʋmihchit i̱ sanali ka Lewi ʋt ithana tok: micha Abiahla naholitompa isht ʋtta ya̱, Efot a̱ isht ish lashke, im achi tok.

¹⁰ Yohmi ma Lewi ʋt, Islael in Chitokaka Chihowa ma! chin tishu ʋt Sal ʋt ʋno pulla kak o̱ Keilah ya̱ ʋla cha, tʋmaha holihta ya̱ okpʋnit tahli bʋnna ka haklo tuk pulla hoke.

¹¹ Keilah hatak ʋhleha hʋt ibbak a̱ sa fohka chi̱ cho? chin tishu hʋt haklo tuk a̱ Sal ʋt ʋla chi̱ mʋhli cho? Islael in Chitokaka Chihowa ma! chin tishu ha̱ ish im anolashke, chim asilhha lishke, achi tok. Mihma Chihowa ʋt, Ʋla chi̱ hoke, achi tok.

¹² Mihma Lewi ʋt, Keilah hatak ʋhleha hʋt ʋno, micha an tʋshka ʋhleha ha̱ Sal ibbak a̱ pi fohka chi̱ cho? achi tok. Mihma Chihowa ʋt, Chishit ibbak a̱ chi fohka chi hoke, achi tok.

¹³ Yohmi ma Lewi, micha in tʋshka ʋhleha yʋmmʋt tahlepa hannali foka hosh wakaya cha, Keilah ya̱ kohchʋt ia cha, kanima yo̱ ia hinlakmʋt, okla ia tok. Atuk o̱ Lewi ʋt Keilah ya̱ kohchʋt kʋnia ka Sal ʋt im annoa tok: micha kohchʋt ia chi̱ im anukfila tuk ʋt issa tok.

¹⁴ Mihma Lewi ʋt yakni haiaka ai atuko kʋllo ahanta cha, Sif yakni haiaka nʋnih foka yak o̱ ahanta tok. Mihma Sal ʋt nitak moma ka hoho̱yo kia, Chitokaka ʋt ibbak a̱ ik fohko tok.

¹⁵ Mihma Sal ʋt im ilhfiopak a̱ hoyo hosh kohchʋt minti ka Lewi ʋt akostininchi tok: micha Lewi ʋt Sif yakni haiaka kowi ahanta tok.

¹⁶ Mihma Sal ushi Chonahlan ʋt wakaya cha, iʋt kowi Lewi ai ʋtta ka im ona tok; micha Chitokaka pulla ka ibbak a̱ ishit hlampkochi tok.

¹⁷ Micha, Chi nukshopa ná: a̱ki Sal ibbak ʋt chi ahayucha he keyu: mikma Islael a̱ ish mi̱ko yahi oke, mikma pit chi chapa la hi oke: micha yʋmmak kia a̱ki Sal ʋt ithana hoke, im achi tok.

¹⁸ Micha tuklo kʋt nan it im ʋlhpisa it im apesʋt okla tok: mihma Lewi ʋt kowi ahanta ma, Chonahlan ʋt in chuka ia tok.

¹⁹ Mihma Sifait ʋhleha hʋt, Kibeah Sal ai ʋtta ka ona cha, Lewi ʋt pi takla kowi Hachilah nʋnih, yʋmmʋt Cheshimon a̱ im oka mahli yak o̱ nʋnih paknaka ai atuko alumʋt ahanta keyu̱?

²⁰ Yʋmohmi hoka himak ano mi̱ko ma! chi chu̱kʋsh nana aiahni tuk pulla mak osh chim ʋlhpesʋt ish onashke; mikma pishno yokʋto mi̱ko ibbak a̱ e fohki kak a hi oke, achi tok.

²¹ Mihma Sal ʋt, Chihowa ya̱ i̱ holitopa hʋchia hashke; hʋs sa̱ nukha̱klo hokʋt.

²² Oh iá, hʋchim asilhha lishke, anonti hʋchim ʋlhtaha cha, ai ʋtta, aluma aiena, micha kʋna hosh yʋmma anta ka pisa tukma, hʋsh akostininchashke; i̱ kostini fehna ho̱ ʋm annoa hoka.

²³ Yʋmohmi hoka aluma in talohʋt aluma chatuk puta ka yakohmi ahnit, pisʋt hʋsh tahlikmʋt, anonti atokowa ant hʋs sʋm anolikma, hʋchi awant ia lashke: atukma yakni ya̱ ahantakma, Chutah tahlepa sipokni puta ka mominchit a hoyot hlopulli lashke, achi tok.

²⁴ Mihma okla wakaya cha, Sal a̱ tikba yʋt, Sif a̱ ona tok: yohmi kia Lewi, micha in tʋshka ʋhleha aiena kʋt Maon yakni haiaka yakni patali yosh Cheshimon im oka mahli imma yak o̱ aiasha tok.

²⁵ Sal ak kia, micha in tʋshka ʋhleha aiena kʋt hoyot ilhkoli tok. Mihma Lewi ya̱ im anoli tok: yʋmohmi ma akowʋt hichukbi ont chukowa cha, Maon yakni haiaka yak o̱ ahanta tok. Atuk o̱ Sal ʋt yʋmma haklo mʋt, Lewi ya̱ Maon yakni haiaka ai iakaiya tok.

²⁶ Mihma Sal ʋt nʋnih ha̱ ilʋppa in tʋnnʋp a̱ ia ma, Lewi, micha in tʋshka ʋhleha aiena kʋt yʋmma in tʋnnʋp a̱ ia tok: mihma Lewi ʋt Sal a̱ i̱ nukshopa hatuk osh, tu̱shpʋt i̱ filʋmmit ia tok; Sal, micha in tʋshka ʋhleha aiena kʋt Lewi, micha in tʋshka ʋhleha aiena ka isha chi̱ kʋt afolubli hatuk oka.

²⁷ Yohmi tuk kia anumpa shali ʋt Sal a̱ im ʋla mʋt, Tu̱shpʋt ish mintashke, Filistin ʋhleha hʋt yakni ya̱ iba chukowa hoka.

²⁸ Yʋmohmi ho̱ Sal ʋt Lewi ya̱ ahlioa tuk ʋt falama cha, Filistin ʋhleha ak o̱ itibit ia tok: yʋmohmi ho̱ yʋmma Sela‐hammah‐lekolh okla hohchifo tok.

²⁹ Mihma Lewi ʋt yʋmma ʋttʋt ia mʋt, ai atuko kʋllo En‐keti yak o̱ ona cha, ahanta tok.