1 Samuel 22 - Chahta Holisso Holitopa 1886

¹ Yʋmohmi ho̱ Lewi ʋt yʋmma ʋttʋt iʋt, Atullam hichukbi ont chukowʋt hlakofi tok: atuk o̱ itibapishi ʋhleha, micha i̱ki in chuka achʋfa ʋt haklo mʋt, yʋmmak o̱ iʋt im ona tok.

² Yohmi ma ilbʋsha puta, aheka in takanli puta, micha chu̱kʋsh ik im achukmo puta kʋt im itahoba tok; mihma i̱ kʋpitʋni toba tok; mihma hatak tahlepa ushta foka hosh apeha tok.

³ Mihma Lewi ʋt yʋmma ʋttʋt ia mʋt, Moab yakni Mispeh ak o̱ ona tok: micha Moab i̱ mi̱ko ya̱, A̱ki micha hʋshki ʋt kohchʋt ʋla cha, chi apehʋt aha̱shwa tuk o̱ Chitokaka yʋt nana ho̱ a̱ kaniohmicha chi̱ hatukma akostininchi lashke, chim asilhha lishke, im achi tok.

⁴ Micha Moab i̱ mi̱ko itikba ya̱ isht im ona tok: micha Lewi ʋt hichukbi foyuka moma ho̱ yʋmmak o̱ apehʋt aiasha tok.

⁵ Mihma hopaii Kat ʋt Lewi ya̱, Hichukbi yo̱ chik anto kashhe; ish ia cha, Chutah yakni ya̱ ish onashke, im achi tok. Yʋmohmi ma Lewi ʋt ia cha, Halelh kowi haiaka ya̱ ont chukowa tok.

⁶ Atuk o̱ Sal ʋt Lewi, micha hatak apehʋt a̱ya tuk ʋt haiaka ho̱ haklo mʋt, (mihmʋt Sal ʋt tʋbi tʋli halupa ontʋla ibbak a̱ foyuka hosh Lamah yakni Kibeah ak o̱ iti nuta ahanta tok, mihma in tʋshka ʋhleha hʋt afolublit hieli tok.)

⁷ Yʋmohmi ma Sal ʋt in tishu ʋhleha hʋt afolublit hieli tuk a̱, Himak ano hʋsh haiyaklashke, Benchamait ʋhleha ha̱ hʋchia ma! Chesse ushi ʋt hʋsh moma ka osapa, micha pa̱kʋpi ahollokchi puta ka hʋch ima cha, tahlepa sipokni i̱ kʋpitʋni, micha tahlepa i̱ kʋpitʋni hʋch ikba hinla ho̱?

⁸ Yohmi ho̱ hʋsh moyuma kʋt im anukfila achʋfʋt hʋs sʋm asanali cha, hʋsh achʋfa kia sʋso hʋt Chesse ushi ya̱ anumpa it im ai achʋfa ka hʋs sʋm anoli keyu, micha hʋsh achʋfa kia hʋs sa̱ nukha̱klo cha, sʋso hʋt an tishu ya̱ nukfohkichit ʋm i̱ sanalichi na himak nitak ak kia ʋm aiehinchi ka hʋch ik sʋm anolo cho? im achi tok.

⁹ Yohmi ma Etomait hatak Toek, yʋmmʋt Sal in tishu ʋhleha puta pehlichi ʋlhtoka ash osh afalamichit, Chesse ushi ʋt Nob a̱ ʋlʋt, Ahitʋb ushi Ahimelech a̱ im ona ka pi̱sa li tok.

¹⁰ Mihma Chihowa ya̱ im i̱ ponaklo cha, ilhpak a̱ ima mʋt, Filistin hatak Koliah i̱ bʋshpo falaia aiena ka ima ho̱ pi̱sa li tok oke, im achi tok.

¹¹ Yohmi ma mi̱ko ʋt naholitompa isht ʋtta Ahimelech, Ahitʋb ushi, micha i̱ki in chuka achʋfa, naholitompa isht asha ʋhleha Nob aiasha tuk ʋt moyuma ka pit hoyo tok: mihma okla moyuma kʋt mi̱ko ya̱ im ona tok.

¹² Mihma Sal ʋt, Himonasi ya̱ ish haiyaklashke, Ahitʋb ushi chia ma! achi tok. Mihma afalamichi mʋt, Yak hikia lishke, a̱ shahli ma! achi tok.

¹³ Mihma Sal ʋt, Nanta katiohmi ho̱ chishno, micha Chesse ushi hʋsh itatuklo kʋt im anukfila hʋsh it im ai achʋfʋt hʋs sʋm asanali cho? micha pʋska, micha bʋshpo falaia aiena ka ish ima cha, Chitokaka ish im i̱ ponaklo na wakayʋt ʋm i̱ sanali cha, himak nitak ak kia aiehchi cho? im achi tok.

¹⁴ Yohmi ma Ahimelech ʋt afalamichit mi̱ko ya̱, Mikma kʋta hosh chin tishu ʋhleha puta ka chim ai a̱hli kʋt Lewi chohmi kʋt anta̱? yʋmmak okʋt mi̱ko iyup, micha, Kanima ish iashke, ish i̱ miha na ia hoke, micha chin chuka achʋfa ya̱ holitopa hosh ahanta hoke.

¹⁵ Yohmi ka yʋmmak o̱ Chitokaka ya̱ imi̱ ponaklot isht ia li tuk o̱? yʋmmak oka chik si ahno kashke. Mi̱ko ʋt in tishu ha̱, micha i̱ki in chuka achʋfa moyuma ka nana kia ik onocho kashke: chin tishu hʋt ilʋppa moma ka akostininchi tuk keyu, ola takla, micha atampa kia, achi tok.

¹⁶ Mihma mi̱ko ʋt, Chilli pulla chi̱ hoke, Ahimelech ma! chishno, micha chi̱ki in chuka achʋfa moma kʋt, im achi tok.

¹⁷ Mihma mi̱ko ʋt hatak aka hi̱ka afolublit hieli tuk a̱, Ho filema cha, Chihowa naholitompa isht asha ʋhleha ha̱ hʋsh bashke; yʋmma ibbak ak kia Lewi yak o̱ ibafo̱ka hoka, micha maleli ka okla ithana ak inli kia, ik sʋm anolo hatuk oka, im achi tok. Yohmi kia mi̱ko in tishu ʋhleha hʋt ibbak a̱ pit o̱ weli cha, Chihowa i̱ naholitompa isht asha ʋhleha ha̱ onʋtola he keyu tok.

¹⁸ Mihma mi̱ko ʋt Toek a, Chishno ak osh ish filema cha, naholitompa isht asha ʋhleha ha̱ ish onʋtolashke, im achi tok. Mihma Toek ʋt filema cha, naholitompa isht asha ʋhlehai hash onʋtola mʋt, nitak yʋmma hatak pokoli untuchina akucha tahlapi hosh linen efot ʋlbeha ha̱ ʋbi tok.

¹⁹ Mihma naholitompa isht asha in tʋmaha holihta Nob a̱ bʋshpo falaia isht issot kanchi mʋt, hatak, micha ohoyo, ʋlla, micha na pi̱shi puta, micha wak, micha issuba haksobish falaia, micha chukfʋlhpoa aiena ka bʋshpo falaia halupa ya̱ isht ʋbit tahli tok.

²⁰ Mihma Ahitub ushi Ahimelech a̱ ushi ʋhleha ha̱ achʋfa kʋt Abiahla hohchifo hosh hlakofi cha, malelit, Lewi ya̱ iakaiya tok.

²¹ Micha Abiahla ʋt Sal ʋt Chihowa i̱ naholitompa isht asha ʋhleha ya̱ ʋbi tuk a̱ Lewi ya̱ im anoli tok.

²² Mihma Lewi ʋt Abiahla ya̱, Nitak yʋmma Etomait hatak Toek ʋt yʋmma anta tuk ʋt, Sal a̱ im anoli pulla chi̱ ka ithana li tok: ʋno ak o̱ pulla ho̱ chi̱ki in chuka achʋfa puta kʋt isht illit tahʋshke.

²³ Sa takla ish ahantashke, chi nukshopa ná: ʋm ilhfiopak a̱ hoyo kʋt chim ilhfiopak a̱ hoyo hoka: yohmi kia is sʋbafoyukakma, chi atona chi̱ hoke, im achi tok.