1 Samuel 21 - Chahta Holisso Holitopa 1886

¹ Yʋmohmi ma Lewi ʋt Ahimelech ʋt Nob a̱ anta tuk o̱ im ona tok: mihma Ahimelech ʋt Lewi ya̱ itafama mʋt, nukshopa cha, Nanta katiohmi ho̱ chishno ak bano ma, hatak nana kia chi api̱hʋt ik a̱yo cho? im achi tok.

² Mihma Lewi ʋt Ahimelech naholitompa isht ʋtta ya̱, Mi̱ko ʋt nana ʋm apesa cha, Nana a kaniohmi ho̱ tohnot chi pila li, micha nana chim apesa li tuk a̱ kʋna kia ik ithano kashke: yohmi hosh an tishu ʋhleha ha̱ yʋmma, micha yʋmma achit im apesʋt tahli li tuk oke, ʋm achi tok.

³ Yʋmohmi hoka himonasi ya̱ nanta hosh chibbak a̱ fo̱ka cho? pʋska lumbo tahlapi ho̱ sʋbbak a̱ ish fohkashke, keyukmʋt kaniohmi hosh chi̱yakma, im achi tok.

⁴ Mihma naholitompa isht ʋtta ash osh afalamichit Lewi ya̱, Pʋska ik hullocho ʋt sʋbbak a̱ ik fo̱ko, amba pʋska hullochi yak illa hosh a̱sha hoke; hatak himithoa ak osh ohoyo ik ahalaio tuk okma, im achi tok.

⁵ Mihma Lewi ʋt afalamichit naholitompa isht ʋtta yash, A̱hli hoke; nitak tuchina kohchʋt minti li tuk itintakla ka pi ahalaia tuk keyu hoke, micha hatak himithoa nan im aiʋlhto puta kʋt kashofa hoke, mikma pʋska ʋt ik hullocho ohmi hosh akinli, a̱hli himak ak o̱ nan aiʋlhto fo̱ka na hullochi tuk oh kia, im achi tok.

⁶ Yʋmohmi ho̱ naholitompa isht ʋtta yash osh pʋska hullochi ya̱ ima tok: yʋmma pʋska ʋt iksho hatuk oka; amba pʋska otʋni Chihowa itikba ya̱ ai ishi tuk, micha pʋska lʋshpa talali nitak mak inli yʋmmak illa hosh a̱sha hatuk oka.

⁷ Yohmi ma Sal in tishu ʋhleha ha̱ ai achʋfa hatak achʋfa hosh Chihowa itikba nana isht ʋtta hosh nitak yʋmma anta tok; micha hohchifo kʋt Toek Etomait atok, nana ʋlhpoa apistikeli Sal ʋt im aiasha ka i̱ shahli fehna tok.

⁸ Mihma Lewi ʋt Ahimelech a̱, Micha tʋbi tʋli halupa ontʋla, keyukmʋt bʋshpo falaia ʋt chibbak a̱ fo̱ka cho? mi̱ko nana akaniohma he ahni kak osh anukwa̱ya hatuk o̱, am bʋshpo falaia, micha nahalupa nana kia ak esho tuk oka.

⁹ Mihma naholitompa isht ʋtta yash osh, Yakeh! Koliah Filistin hatak a̱ Elah okfa ha̱ isht ish ai ʋbi tok bʋshpo falaia ak osh nantʋnna abonunta hosh efot a̱shaka takanlishke: yʋmmak o̱ ish isha hinlakmʋt, ishí: inla yʋt iksho, yʋmmak illa ilʋppa itonla hoka. Mihma Lewi ʋt yʋmma chohmi kʋt iksho hoka ʋmá, achi tok.

¹⁰ Mihmʋt Lewi ʋt Sal a̱ i̱ nukshopa hatuk osh wakaya cha, nitak yʋmma malelit, Achish Kalh i̱ mi̱ko ya̱ im ona tok.

¹¹ Mihma Achish in tishu ʋhleha hʋt, Ilʋppʋt Lewi yakni yʋmma i̱ mi̱ko keyu cho? ishit hihlʋt, it in taloho̱wʋt Sal ʋt tahlepa sipokni ho̱ ʋbikma, Lewi ʋt tahlepa sipokni pokoli ho̱ ʋbishke, achi tok mak keyu̱? im achi tok.

¹² Mihma Lewi ʋt anumpa ilʋppa chu̱kʋsh fohkit ieshit a̱ya cha, Kalh i̱ mi̱ko Achish a̱ i̱ nukshopa fehna tok.

¹³ Micha nana akaniohmi chatuk ʋt itikba ya̱ im il inlʋchi cha, ibbak fo̱ka kʋt tasimbo im ilahobit, holihta okhissa isht ʋlhkʋma ya̱ kʋllit, itukchi ya̱ yanʋllichi na nutakhish a̱ o̱ yanʋlli tok.

¹⁴ Yʋmohmi ma Achish ʋt in tishu ʋhleha ha̱, Yakeh! hatak ʋt tasimbo yoke: yʋmohmi hoka nanta katiohmi ho̱ isht hʋs sʋm ʋla tuk oh cho?

¹⁵ Hatak tasimbo sa bʋnna ho̱ ilʋppa isht hʋsh la na sa tikba a ile tasimbochit anta cho? hatak ilʋppʋt ʋm aboha chukowa chi̱ cho? im achi tok.