1 Samuel 20 - Chahta Holisso Holitopa 1886

¹ Mihma Lewi ʋt Lamah yakni Naiolh a̱ issʋt, malelit Chonahlan a̱, Nanta ho̱ katiohmi li tuk oh cho? nana ashʋchi li kʋt nanta ho̱? micha chi̱ki itikba ya̱ nana ik ʋlhpeso yʋmohmi li kʋt nanta ho̱ ʋm ilhfiopak a̱ hoyo cho? ont achi tok.

² Mihma, Ik yʋmohmo kashke, chilla he keyushke: yakeh! a̱ki ʋt nana chito hokmá, keyukmʋt iskitini hokmá, nana kia ik sʋm anolo kʋt yʋmihcha he keyu hoke: micha nanta katiohmi ho̱ a̱ki ʋt ilʋppa an luhma hinla cho? yohma he keyú, im achi tok.

³ Mihma Lewi ʋt anumpa kʋllo il onochit anumpulit, Issa̱ kana ka chi̱ki ʋt ithana kʋt a̱hli; atuk osh achi kʋt, Chonahlan ʋt ik nukha̱klo ka chi̱ kʋt ilʋppa ik ithano kashke: yohmi kia Chihowa okcha̱ya pulla ka, micha chimi shilombish ʋt okcha̱ya pulla ka, peh ahabli achʋfa ohmi hosh aiilli, micha si ititakla ya̱ takali hoke, achi tok.

⁴ Yohmi ma Chonahlan ʋt Lewi ya̱, Nana ho̱ chimi shilombish ʋt ahnikma, chi̱ yʋmihchi lashke, im achi tok.

⁵ Mihma Lewi ʋt Chonahlan a̱, Yakeh! onna hayʋt hʋshi talali yoke, yohmi ka mi̱ko ʋt impʋt binilikma, takla binili la he ʋlhpesa: yohmi kia, Ak ia cha, yakni haiaka ya̱ ak luma na nitak ont atuchina ik opiá.

⁶ Chi̱ki ʋt iksho si ahni yobakma, yohmikma yak ish achashke, Lewi ʋt malelit Behlehem in tʋmaha holihta ya̱ ona hi a̱ achunanchit ʋm asilhha tuk oke: yʋmma in chuka achʋfa moma kʋt afʋmmikma nan ʋbit isht aiokpʋchi isht a̱sha hoka.

⁷ Yakohmikma, Ʋlhpesa, achikma, chin tishu hʋt it i̱ kana ha chi̱ hoke: amba nuklibesha fehnakmʋt, nana ik achukmo anukfilli ka ish ithaiyanashke.

⁸ Yʋmohmi hoka chin tishu ha̱ ish i̱ kanashke; Chihowa itikba ya̱ chin tishu ha̱ nana it im ʋlhpisa ish it im apihi̱sa tuk okʋt: yʋmohmi ak inli kia nan ashʋchi ʋt si atakalikma, chishno akinli hosh is sʋbashke; nanta katiohmi ho̱ chi̱ki ya̱ sʋsht ish im ona hinla cho? im achi tok.

⁹ Mihma Chonahlan ʋt, Ik chi̱ yʋmohmo kashke; nana ik achukmo kʋt chi onʋtola hi a̱ a̱ki ʋt anukfilli ka ithana li fehnakmʋt, ak chim anolo ka hinla cho? achi tok.

¹⁰ Yʋmohmi ma Lewi ʋt Chonahlan a̱, Kʋta hosh ʋm anola chi̱ cho? micha chi̱ki ʋt kʋllochi hosh chim anumpulik mʋno? im achi tok.

¹¹ Mihma Chonahlan ʋt Lewi ya̱, Inta! yakni haiaka ya̱ kil ia, im achi tok. Mihma itatuklot kohchʋt iʋt yakni haiaka ya̱ ona tok.

¹² Mihma Chonahlan ʋt Lewi ya̱, Islael in Chitokaka Chihowa ma! onna ha foka kanima, keyukmʋt nitak ont atuchina ka a̱ki im anukfila ha̱ akostininchi li ka, yakeh! achukma ho̱ Lewi ya̱ im anukfilli hokma, et chi̱ pilʋt ak chim anolokma,

¹³ Chihowa ʋt yakohmi, micha i̱ shahli fehna kia Chonahlan a̱ yʋmihchashke: amba a̱ki ʋt im ʋlhpesa cha, nana ik achukmo chi̱ yʋmihcha he ahni, yohmikma chim anoli lish, chi pila likma, chi achukma̱kʋt ish a̱yashke: mikma a̱ki ya̱ ibafoyuka chatuk a̱ chohmit Chihowa ʋt chibafoyukʋshke.

¹⁴ Mikma ik sʋllo ka hi a̱ si okcha̱ya itintakla ka Chihowa itikba ya̱ is sa̱ kana kak illa he keyu,

¹⁵ Amba an chuka achʋfa ak kia ish i̱ kana cha, chik isso ho̱ biliashke: keyu, Chihowa ʋt Lewi in tʋnʋp ʋhleha yakni paknaka ai asha ka mominchit ʋbit taiyahli haya̱ kia, achi tok.

¹⁶ Yohmi ho̱ Chonahlan ʋt Lewi in chuka achʋfa ya̱ nana it im ʋlhpisa it im apesa kʋt, Chihowa ak osh Lewi in tʋnʋp ʋhleha ibbak ak o̱ ai im a hoyashke, achi tok.

¹⁷ Mihma Chonahlan ʋt i̱ hullo hatuk osh, anonti Lewi ya̱ anumpa kʋllo ya̱ il onochichi tok; ilap shilombish i̱ hullo kak inli kʋt i hullo hatuk okʋt.

¹⁸ Yohmi ma Chonahlan ʋt Lewi ya̱, Onna hayʋt hʋshi talali yoke; mikma iksho hacha, chi ahna chi̱ hoke, ish ai om binili ʋt peh talaia chi̱ hoke.

¹⁹ Atuk o̱ nitak tuchina ho̱ ish ahanta tuk mʋt, tu̱shpʋt iʋt, nana isht il a̱shwa ma ish a luma tuk ʋt ish ona cha, tʋli Esel bili̱ka yak o̱ ish ahantashke.

²⁰ Atuk ma oski naki tuchina ho̱ nana ho̱ hu̱sa itilauechit ichapaka pila la chi̱ hoke.

²¹ Mikma yakeh! hatak himita chʋffichi lish, Ia cha, oski naki ont ahayuchí, achi lashke. Atokolit hatak himita ya̱, Yakeh! oski naki ʋt ish ahikia ka ola ashʋshke, ishí, im achi likma, yohmikma ish mintashke: Chihowa ʋt okcha̱ya pulla ka chi̱ kana cha, anumpa nana kia chi onocha he keyu hoke.

²² Amba hatak himita yash, Yakeh! oski naki ʋt ish ahikia ka misha a̱shʋshke, im achi likma, ish iashke: Chihowa ʋt kanima pit chi chʋffichi hoka.

²³ Micha nana ka chishno, micha ʋno il itatuklo kʋt isht il anumpuli kamo, yakeh! Chihowa ʋt chishno, micha ʋno il itatuklo ka pititakla hikia na biliashke, im achi tok.

²⁴ Yohmi ho̱ Lewi ʋt yakni haiaka ya̱ luma tok: atuk o̱ hʋshi talali ʋt ʋla ma, mi̱ko ash osh impa chi̱ hosh binili tok.

²⁵ Mihmʋt mi̱ko ash osh yohmi chatuk ʋt im ai‐ombinili, yʋmmʋt aboha okhowata bili̱ka yak o̱ om binili tok: mihma Chonahlan ʋt wakaya ma, Abne ʋt Sal a̱ apontʋt binili ma, Lewi ai asha ʋt peh talaia tok.

²⁶ Yohmi kia nitak yʋmma Sal ʋt nana ik acho tok: Nana i̱ kaniohmi tuk, ik kashofo; ik kashofo pullʋshke, ahni hatuk osh.

²⁷ Atuk o̱ onna ma yʋmmʋt hʋshi nitak atukla ho̱ yakohmi tok, Lewi ai asha ʋt peh talaia tok: mihma Sal ʋt ushi Chonahlan a̱, Nanta katiohmi ho̱ pilashash, micha himak nitak aiena ka Chesse ushi ʋt impʋt ik lo cho? im achi tok.

²⁸ Mihma Chonahlan ʋt afalamichit Sal a̱, Lewi ʋt Behlehem a̱ ia hi ʋt achunanchit ʋm asilhha tuk oke.

²⁹ Micha, Ak iá, chim asilhha lishke; pin chuka achʋfa ʋt tʋmaha holihta ya̱ nan ʋbit isht aiokpʋchi isht a̱sha hoka; micha itibapishi li hʋt ona la hi a̱ a̱ miha tuk oke: yohmi ka chi̱ holhponayo hanta a chi ahayuchi li tuk okmʋt, ak a̱yá, chim asilhha lishke, micha itibapishi li ʋhleha ha̱ ont pisa lashke, achi tuk oke. Yʋmohmi tuk osh mi̱ko im ai impa ya̱ ik lo hoke, im achi tok.

³⁰ Mihma Sal ʋt Chonahlan a i̱ nokowa kʋt libbi fehna cha, Ohoyo isht acheba, micha mi̱ko im asanali ushi chia hʋt nan ishit chi hofahya he, micha chishki ʋt nipi banot ishit hofahya hi a̱ Chesse ushi ya̱ ish il ai ishi ka ithana li keyu̱?

³¹ Chesse ushi ʋt yakni paknaka ya̱ okcha̱yʋt ai ahanta ta̱kla ka, chishno, micha ish apehlichika yʋt kʋllot hikia he keyu koke. Yʋmohmi hoka himonasi ya̱ pit hoyot isht ʋm ʋlá, illi pulla chi̱ hoke, im achi tok.

³² Mihma Chonahlan ʋt i̱ki Sal a̱ afalamichit, Nanta katiohmi ho̱ illa chi̱ cho? nanta ho̱ yʋmihchi tuk o̱? im achi tok.

³³ Mihma Sal ʋt tʋbi tʋli halupa ontʋla ishit nʋhla chi̱ hosh pila tok: yʋmmak o̱ i̱ki ʋt Lewi ya̱ ʋbi pulla kak o̱ ahni ka Chonahlan ʋt isht ithaiyana tok.

³⁴ Yohmi ho̱ Chonahlan ʋt nokowa kʋt libbi fehna hosh ai impa ya̱ wakaya cha, hʋshi nitak atukla ka ik impo tok: Lewi ak o̱ ishit nukha̱klo hatuk osh, i̱ki ʋt hofahyali kak atok.

³⁵ Atuk o̱ onnahinli ma yakohmi tok, Lewi ya̱ nitak it im apesa tuk a̱ ont ai ʋlhpiesa ma, Chonahlan ʋt ʋlla nakni ya ilaueli cha, kohchʋt iʋt yakni haiaka ya̱ ona tok.

³⁶ Micha im ʋlla nakni ya, Malelit ia cha, oski naki ya̱ pila li ka ont ahayuchí, im achi tok. Atuk o̱ ʋlla nakni yash osh maleli ma, oski naki ya̱ ʋbanʋblichit pila tok.

³⁷ Atuk o̱ ʋlla nakni ash osh oski naki Chonahlan ʋt pit pila tuk a̱ ai ona ma, Chonahlan ʋt iakaiyachit i̱ pa̱yʋt, Oski naki ʋt ish a hikia ka misha keyu̱? achi tok.

³⁸ Micha Chonahlan ʋt ʋlla nakni ya̱ iakaiyachit i̱ pa̱yʋt, Pʋlhkí, tu̱shpá, ish hikia ná, achi tok. Mihma Chonahlan im ʋlla nakni ʋt oski naki yash aiowa cha, i̱ shahli ya̱ im ʋla tok.

³⁹ Yohmi kia ʋlla nakni ʋt nana ik ithano tok: Chonahlan, micha Lewi ak illa hosh nana ka ithana tok.

⁴⁰ Mihma Chonahlan ʋt im oski naki yash im ʋlla nakni ya̱ ima cha, Ia cha, tʋmaha holihta ya̱ isht oná, im achi tok.

⁴¹ Atuk o̱ ʋlla nakni ʋt ia mak inli ho̱ Lewi ʋt oka mahli imma talaia ho̱ waka̱yʋt kohcha cha, aka itulʋt nashuka ishit hlipia cha, hituchina ha akachunoli tok: micha it i̱ su̱ksowa mʋt, itiba yaha̱ya ma, Lewi ak osh isht atampa tok.

⁴² Mihma Chonahlan ʋt, Chi achukma̱kʋt ish a̱yashke; il itatuklo kʋt Chihowa hochifot anumpa kʋllo il onochit, Chihowa ʋt ʋno, micha chishno ya̱ pititakla ya̱, micha ʋm isht atiaka, micha chim isht atiaka itintakla ya̱ hikia na biliashke, il achi tuk oka, im achi tok. Mihma wakaya cha, ia tok: mihma Chonahlan ʋt tʋmaha holihta ya̱ ont chukowa tok.