1 Samuel 2 - Chahta Holisso Holitopa 1886

¹ Mihma Hannah ʋt anumpa ilbʋsha anumpulit, Sa chu̱kʋsh ʋt Chihowa ya̱ ai yukpʋshke, an lapish okʋt Chihowa ya̱ a chahʋshke; sʋtih hʋt wakamʋt an tʋnʋp ʋhleha ha̱ o̱ walʋpli hoke; is si apelʋchi tuk a̱ sai yukpa hokʋt.

² Nan ashʋchi iksho Chihowa ohmi kʋt iksho hoke: inla yʋt iksho ho̱, chishno ak bieka hokʋt: micha tʋli chaha nana kia pin Chitokaka chohmi kʋt a̱sha keyu hoke.

³ Himak pilla ka yohmit ile chahʋchi atampa fehnʋt hʋsh anumpuli ná: ilefehnʋchi anumpa hʋt chitih ha̱ ik kohcho kashke: Chihowa ʋt Chitokaka nan ithana yosh yʋmmak osh nana kaniohmi puta ka wekichi hoka.

⁴ Hatak hlampko im iti tanampo puta kʋt kobahlishke, mikma hliposhi tuk ʋt hlampko yo̱ isht ʋskofʋchishke.

⁵ Kaiya tuk ʋt pʋska ya̱ asitʋba chi̱ hosh inla im ile tohnoshke; mikma hohchʋfo tuk ʋt ik yohmoshke: yʋmohmi ho̱ ʋlla ik im iksho ʋt untuklo ho̱ eshi ma, ʋlla in laua tuk ʋt hliposhit isht iʋshke.

⁶ Chihowa ak osh illichi hoke, mikmʋt okchalinchi hoke: akowʋchit ahollopi isht ona hoke, mikmʋt wakayʋchi hoke.

⁷ Chihowa ʋt ilbʋsha ikbi hoke; mikmʋt nan in laua ikbi hoke: akanlosechi hoke, mikmʋt wakayʋchi hoke.

⁸ Hatak ilbʋsha ya̱ hituk chubbi ya̱ akohchit wakayʋchi hoke, micha hatak nan asilhha ʋt chopilhkʋsh ititakla binili tuk a̱ wakayʋchi cha, hochitoka takla binilichit ai om binili holitompa ieshichi hoke: yakni in toni̱k puta kʋt Chihowa yak o̱ immi hokʋt, micha yʋmmak osh yʋmma ʋba puta ya̱ ai on talali hoke.

⁹ Yʋmmʋt ilap i̱ holitopa ʋhleha iyi ya̱ im atona hi oke; mikma nan ashʋchi ʋhleha hʋt ai okhlilika aiashʋt chulusa hi oke; ilap imi̱ hlampko ak inli kʋt kʋna hosh imaiya he keyu hoke.

¹⁰ Chihowa i̱ sanali ʋhleha hʋt kobahlit taha hi oke: ʋba shutik o̱ et ai o̱ hiloha hi oke: Chihowa ʋt yakni ont ai ʋhli ka nan im apesa hi oke; mi̱ko ya̱ atokoli tuk ʋt hlampko ima cha, Nan ahamʋt im ʋlhtoka in lapish a̱ chahʋcha hi oke, achi tok.

¹¹ Mihma Elkanah ʋt in chuka Lamah ya̱ ona tok. Mihma ʋlla yash osh Eli naholitompa isht ʋtta itikba ya̱ ahantʋt Chihowa nan isht im ʋtta tok.

¹² Mihma Eli ushi tuklo kʋt Belial ushi atok: micha Chihowa ya̱ ik ithano tok.

¹³ Mihma naholitompa isht ʋtta yʋt okla ha̱ na kaniohmichi kʋt, yʋmmʋt hatak nana hosh nan ʋbit isht aiokpʋchi ya̱ im issakma, naholitompa isht ʋtta in tishu hʋt nipi ʋt wahlʋlli moma na, nipi ishit bihli noti tuchina ibbak foyuka hosh ʋla beka tok.

¹⁴ Mihmʋt asonak mahaia, keyukmʋt asonak lakna, keyukmʋt shuti mahaia chito, keyukmʋt shuti iyi asha yokmá, nanakmá bihlikma, nipi ishit bihli ʋt ishit kohchikma, moma naholitompa isht ʋtta yʋt ilap achi̱ hosh ishi beka tok. Yʋmohmit Islaelait moma kʋt Shiloh ona ka okla yʋmihchi beka tok.

¹⁵ Mikmʋt nia ya̱ ik hukmo ki̱sha ho̱, naholitompa isht ʋtta in tishu hʋt ʋla cha, hatak nan ʋbit isht aiokpʋcha chi̱ kash, Naholitompa isht ʋtta yʋt apushla chi̱ ka nipi imá, honni ya̱ chim isha he keyu hoka, amba okcha̱ki yá, im achi beka tok.

¹⁶ Atuk o̱ hatak nana hosh, Chekosi nia ya̱ ik hukmo ki ná, yohmikmʋno laua kaniohmi ho̱ chi chu̱kʋsh ʋt ahnikmʋt, ish ishashke im achikma: yʋmohmikma afalamichit, Aha̱ himonasi ya̱ issʋmashke: keyukma afoa hosh ishi la chi̱ hoke, im achi beka tok.

¹⁷ Yʋmohmi hosh hatak himita tuklo kash osh nan ashʋchi kʋt Chihowa itikba ya̱ chito fehna tok: hatak ʋhleha hʋt Chihowa nan im issa ya̱ shitilema tok oka.

¹⁸ Amba Samuel ʋto Chihowa itikba ya̱ ʋlla yosh linen tʋnna efot isht ʋskofaiyachi hosh nan isht ahanta tok.

¹⁹ Yohmi ma ishki ʋt nafohka iskitini afʋmmi hosh afʋmmikma i̱ hatak ʋt afʋmmi aiyukali nan ʋbit isht aiokpʋchi im issʋt a̱yakma, isht im ona beka tok.

²⁰ Mihma Eli ʋt Elkanah, micha tekchi ya̱ yukpalit anumpulit, Chihowa ʋt ohoyo ilʋppa ai unchololi a chimashke, nan im pota yʋmma Chihowa ya̱ hʋsh im pota tuk oka, achi tok. Mihma in chuka akinli itonachi tok.

²¹ Mihma Chihowa ʋt Hannah im a̱ya na, ʋlla shahanli cha, ushi tuchina, micha ushetik tuklo ho̱ eshi tok. Mihma ʋlla Samuel ʋt Chihowa itikba ya̱ hofantit ahanta tok.

²² Mihma Eli ʋt sipokni fehna tok; micha ushi tuklo kʋt Islael moma ka kaniohmichi moma ka, micha ohoyo hʋt okla moma im ʋlhtipo holitopa okhissa ya̱ ai itahoba ka iba tʋshkit okla aiena ka haklo tok.

²³ Micha, Nanta katiohmi ho̱ ilʋppa chohmi ka hʋsh yʋmihchi cho? nana ik achukmo hʋsh yʋmihinchi ka okla ilʋppa moma ka a haha̱klo li hoka.

²⁴ Keyú, sʋso ʋhleha ma! nan annoa achukma keyu ho̱ haklo li hoka; Chihowa im okla ha̱ hʋsh yoshublishke.

²⁵ Hatak achʋfa hosh inla ya̱ nan im ashʋchi hokma, nan apesa yosh nan im apesa hi oke; amba hatak ʋt Chihowa ak o̱ i̱ yoshuba hokmʋno, kʋta hosh isht anumpula hinla cho? im achi tok. Yohmi kia i̱ki im anumpa ha̱ haponakla he keyu tok, Chihowa ʋt ʋba chi̱ kʋt ai ahni tuk oka.

²⁶ Mihma ʋlla Samuel ʋt hofantit ma̱ha̱ya mʋt, Chihowa, micha hatak ʋhleha aiena ka i̱ holitopa tok.

²⁷ Mihma hatak Chitokaka im antia yosh im ʋla cha, Chihowa ʋt yak ahanchishke, Chi̱ki in chuka achʋfa ya̱ Echip Feleo in chuka ahanta ma i̱ haiaka li tuk mʋhli keyu cho?

²⁸ Micha Islael apehlichi puta ka naholitompa isht ʋm ahanta yosh, ʋm alta ya̱ ai onochit ʋm issʋt, na balama hukmit, efot foyukʋt sa tikba hikia chi̱ ho̱ ai atokoli li tok keyu cho? micha chi̱ki in chuka achʋfa ya̱ Islael im ʋlla ʋhleha hʋt i̱ na hukmit isht aiokpʋchi moma ka ima li tok keyu cho?

²⁹ Yohmi ka nanta katiohmi ho̱ nan ʋbit ishit si aiokpʋchi, micha nan ʋm issa an chuka ai apihi̱sa li tuk a̱ ish habli cha, chiso ʋhleha hak o̱ ish holitobli kʋt is sa̱ shahlichi cha, ʋm okla Islael ʋt nan ʋm issa ya̱ achukma moma i̱ shahli kak o̱ isht hʋsh ile niachi cho?

³⁰ Yʋmohmi hoka Islael in Chitokaka Chihowa ʋt yak achishke, Chin chuka achʋfa, micha chi̱ki in chuka achʋfa ʋt sa tikba a noho̱wa na bilia hi oke, achi li mʋhli tok: yohmi tok kia himak ano Chihowa ʋt achi kʋt, Ak yohmo kashke; sa holitoblikma, yʋmmak oka holitobli la he, micha kʋna hosh sa shitilemakmʋt, ik ahobo ka hi oke.

³¹ Yakeh! chin chuka achʋfa ya̱ hatak sipokni ʋt iksho ka hi o̱, chi shakba ya̱ tʋbli likmʋt, chin chuka achʋfa shakba ya̱ a tʋbli la he nitak ʋt mintishke.

³² Mikma nana hochukma puta Chihowa ʋt Islael a̱ ima he tuk kia ai ʋtta li ya̱ tʋnʋp osh aiasha na ish pisa hi oke: yohmikma chin chuka achʋfa ya̱ hatak sipokni ʋt iksho ho̱ bilia hi oke.

³³ Hatak chishno akinli yosh ʋm alta ya̱ ai ahanta ka fiopa ak in tʋblo kʋt, yʋmmʋt chi nishkin illicha he, micha chi chu̱kʋsh nukha̱klocha he ak achi̱ hoke: chin chuka achʋfa ai unchololi ʋt hatak im a̱hli moma hosh ihinla hi oke.

³⁴ Mikma ilʋppak osh nan isht chim atokowa yosh chiso tuklo Hofni, micha Finehas itatu̱klo ka onʋtola chi̱ hoke: nitak achʋfa ho̱ itatu̱klot illa chi̱ hoke.

³⁵ Mikma naholitompa isht ʋtta ai a̱hli nana ʋm anukfila, sa chu̱kʋsh aiena a sa nukfoyuka kak o̱ a yʋmihchi ho̱ il atokolit hilechi la hi oke; mikmʋt chuka kʋllot hikia ho̱ im ikbi la hi oke: mikma Nan ahamʋt ʋm ʋlhtoka itikba ya̱ a noho̱wa na bilia hi oke.

³⁶ Atukma yakohma hi oke, chin chuka achʋfa kʋt a̱sha tuk puta kʋt ont im akachunolit, tʋli hʋta tushafa, micha pʋska iskitini i̱ bʋnnʋt, Naholitompa isht ʋtta ahikia achʋfa ka is sa fohkashke, yohmi na pʋska tushafa ʋpa lashke, chim asilhha lishke, acha hi oke, im achi tok.