1 Samuel 19 - Chahta Holisso Holitopa 1886

¹ Yʋmohmi ma Sal ʋt ushi Chonahlan, micha in tishu ʋhleha moma ka im anumpulit, Lewi ya̱ ʋba chi̱ ka i̱ miha tok.

² Yohmi kia Chonahlan, Sal ushi ʋt Lewi ya̱ ahninchi fehna tok: micha Chonahlan ʋt Lewi ya̱ im anolit, A̱ki Sal ʋt chiba chi̱ hosh chi hoyoshke: yohmi hoka himak a̱ ahah! ish il aiahni na onnahinlashke, micha ish luma cha, aluma̱ka ish ahantashke.

³ Micha kohchʋt ia lish, ish ai anta osapa ya̱ a̱ki ont apontʋt hikia lish, it im anumpuli lashke; micha nana ho̱ pisa likmʋt, yʋmmak o̱ chim anoli la chi̱ hoke, achi tok.

⁴ Mihmʋt Chonahlan ʋt i̱ki Sal a̱ im anumpulit anumpa achukma ho̱ Lewi ya̱ isht anumpuli mʋt, Mi̱ko ʋt in tishu Lewi ya̱ na kaniohmichit ik im ashʋcho kashke; nana chim ashʋchi tuk keyu hoka; micha nana isht ahanta kʋt achukma fehna kak o̱ chi ahni tuk oka.

⁵ Ilap im ilhfiopak a̱ ibbak fohkit ieshi cha, Filistin ash ʋbi tuk oka; mihma Chihowa ʋt Islael moma ka ahlakofi chito ho̱ im atahli tuk oke: chishno ʋt ish pi̱sa cha, chi yukpa tuk oke: yohmi ka nana kaniohmi keyu ka Lewi ya̱ ish bi cha, nan okpʋni keyu issish a̱ hlatʋblit chi yoshuba chi̱ cho? im achi tok.

⁶ Mihma Sal ʋt Chonahlan a̱ i̱ haponaklo tok: micha Sal ʋt anumpa kʋllo il onochit anumpulit, Chihowa ʋt okcha̱ya pulla ka illa he keyú, achi tok.

⁷ Mihma Chonahlan ʋt Lewi ya̱ i̱ howa cha, Chonahlan ʋt yʋmma moma ka im anoli tok. Micha Chonahlan ʋt Lewi ya̱ Sal a̱ isht im ona na tikba chatuk a̱ chohmit takla ahanta tok.

⁸ Atuk o̱ anonti tʋnʋp ʋt asha tok: mihma Lewi ʋt kohchʋt ia cha, Filistin okla ha̱ itibi cha, ʋbit tahli na illi kʋt laua fehna tok: mihma okla i̱ yihlepa tok.

⁹ Mihma Chihowa ʋt ik yohmí ahni na shilombish okpulo ʋt, Sal ʋt tʋbi tʋli halupa ontʋla ʋt ibbak foyuka hosh im aboha a̱sha ma onʋtola tok: mihma Lewi ʋt ibbak isht olachi tok.

¹⁰ Mihma Sal ʋt Lewi ya̱ tʋbi tʋli halupa ontʋla aboha okhowata ka isht anʋhlichi bʋnna tok: yohmi kia Sal itikba ya̱ i̱ kannakli na aboha okhowata ka tʋbi tʋli halupa ontʋla nʋhlit a hilechi tok: mihma Lewi ʋt maleli cha, ninak yʋmma hlakofi tok.

¹¹ Micha Lewi in chuka im aiehchi cha, onnahinlikma ʋba chi̱ ho̱ Sal ʋt anumpa shali ya̱ pit tihleli tok; micha Michal Lewi tekchi ʋt im anolit, Himak ninak a̱ chik il okchalinchokmʋt, onnaha ma chilla chi̱ hoke, achi tok.

¹² Yohmi mʋt Michal ʋt Lewi ya̱ okhissushi pit kohchit akowʋchi tok: mihma ia cha, malelit hlakofi tok.

¹³ Mihma Michal ʋt naholbʋt toba yo̱ topa hash bohli cha, issi kosoma hishi ʋlhpishi yo̱ ʋlhpishichichi cha, nantʋnna isht ompohomo tok.

¹⁴ Atuk o̱ Lewi ya̱ isha chi̱ ka Sal ʋt anumpa shali ya̱ tihleli ma, Abeka hoke, achi tok.

¹⁵ Mihma Lewi ya̱ pisa chi̱ ho̱ Sal ʋt anonti anumpa shali ya̱ tihleli cha, Topa ha̱ on itonla ho̱ ishit hʋs sʋm ʋla na ʋbi lashke, achi tok.

¹⁶ Atuk o̱ anumpa shali ʋhleha hʋt ont chukowa ma, yakeh! naholbʋt toba hʋt topa hash issi kosoma hishi ʋlhpishi yo̱ ʋlhpishi hosh itonla tok.

¹⁷ Mihma Sal ʋt Michal a̱, Nanta katiohmi ho̱ yakohmichit is sa haksichi cha, an tʋnʋp a̱ ish chʋffichi na hlakofi cho? im achi tok. Mihma Michal ʋt afalamichit Sal a̱, Ak iá, nanta katiohmi ho̱ chibi la chi̱ cho? ʋm achi tuk oke, achi tok.

¹⁸ Yohmi ho̱ Lewi ʋt maleli cha, hlakofit, Samuel ʋt Lamah ya̱ anta tuk o̱ im ona cha, Sal ʋt kaniohmichi tuk a̱ moma im anoli tok. Mihmʋt yʋmmʋt, micha Samuel itatuklo kʋt iʋt Naiolh ak o̱ ont a̱shwa tok.

¹⁹ Mihma Sal a̱ im anolit, Yakeh! Lewi ʋt Lamah yakni Naiolh ak o̱ antʋshke, achi tok.

²⁰ Mihma Lewi ya̱ isha chi̱ ho̱ Sal ʋt anumpa shali ya̱ tihleli tok: atuk o̱ hopaii kaniohmi kʋt Shilombish anukfoyukʋt anumpuli ma, Samuel ʋt ʋlhtoka tuk osh pehliechit hikia na okla pisa ma, Chitokaka imi Shilombish ʋt Sal im anumpa shali ʋhleha ha̱ onʋtola ma, yʋmmak kia Chihowa ya̱ aiokpahanchi tok.

²¹ Atuk o̱ Sal a̱ im anoli ma, anumpa shali inla yo̱ tihleli ma, Shilombish anukfoyukʋt okla anumpuli ak inli tok. Mihma Sal ʋt anonti ont atuchina ma, anumpa shali ya̱ tihleli ma, Shilombish anukfoyukʋt okla anumpuli akinli tok.

²² Yohmi ma ilap ak kia iʋt, Lamah ya̱ ona cha, kʋli chito yosh Sechu a hikia ho̱ ona tok: micha ponaklot, Samuel, micha Lewi itatuklo mʋto? achi tok. Mihma achʋfa hosh, Yakeh! Lamah yakni Naiolh ak o̱ a̱shwa hoke, achi tok.

²³ Mihma Lamah yakni Naiolh ak o̱ ona tok: mihma Chitokaka imi Shilombish ʋt onʋtola akinli tok, micha Shilombish anukfoyukʋt anumpulit ma̱ha̱yʋt Lamah yakni Naiolh a̱ ona tok.

²⁴ Micha im anchi yak kia shoelit tahli cha, Samuel itikba ya̱ Shilombish anukfoyukʋt anumpuli ak inli tok; micha nipi bieka chiyuhmi hosh itoyula na nitak yʋmmʋt shoyuhbi cha, ninak yʋmmʋt ont hlopulli tok. Yʋmohmi ho̱ achi kʋt, Sal ak kia hopaii ʋlhleha ha̱ ibafoyuka cho? okla achi tok.