1 Samuel 18 - Chahta Holisso Holitopa 1886

¹ Atuk o̱ yakohmi tok, Sal a̱ im anumpuli tuk ʋt ont tahli ma, Chonahlan imi shilombish ʋt Lewi imi shilombish a̱ abonutʋt kʋnia tok; micha Chonahlan ʋt heh ahni kʋt ilap imi shilombish ak inli chiyuhmi tok.

² Mihma Sal ʋt nitak yʋmma ishi cha, himmakma i̱ki in chuka ya̱ ik iá, ik im ahno ki tok.

³ Mihma Chonahlan, micha Lewi itatuklo kʋt nana it im ʋlhpisa it im apesa tok, i̱ hullo kʋt ilap imi shilombish ak inli chiyuhmichi hatuk okʋt.

⁴ Mihma Chonahlan ʋt anchi holitopa foyuka tuk ʋt shu̱fi cha, Lewi ya̱ ima tok; micha i̱ nafohka, micha i̱ bʋshpo falaia, im iti tanampo, micha im ʋskofʋchi aiena kash kia ima tok.

⁵ Mihma Lewi ʋt kanima yo̱ Sal ʋt pilakma, ihi̱ya hosh ahanta cha, ile hopoyuksʋli tok: mihma Sal ʋt hatak tʋnʋp a̱ya ya̱ pehlichi ikbi ma, okla moma kʋt pisa kʋt aiokpanchikma, Sal in tishu ʋhleha hak kia pisa kʋt aiokpanchi tok.

⁶ Atuk o̱ yakohmi tok, Filistin hatak ash ʋbit a̱ya tuk ʋt Lewi ʋt falamʋt ʋla ma, ohoyo ʋhleha hʋt Islael in tʋmaha holihta puta ka kohchʋt taloʋt, hi̱hlʋt, ahlepushi puta, micha nan isht taloa ieshi hosh, nayukpa hosh mi̱ko Sal a̱ afama chi̱ hosh minti tok.

⁷ Mihma ohoyo ʋhleha hash osh nan isht taloa olahanchit, iti falamolichit achi kʋt, Sal ʋt tahlepa sipokni ho̱ ʋbikma, Lewi ʋto tahlepa sipokni pokoli ho̱ ʋbishke, achi tok.

⁸ Mihma Sal ʋt nukhobela fehna cha, nan achi kash ik im ʋlhpeso tok; micha, Lewi ano tahlepa sipokni pokoli ho̱ i̱ hotihna hokak osh, ʋno ano tahlepa sipokni bano ho̱ a̱ hotihnʋshke, achi tok: yʋmma i̱ shahli ho̱ ishi kʋt nanta hinla cho? apehlichika yak keyu kʋt?

⁹ Micha Sal ʋt nitak yʋmma ʋttʋt isht ia ka Lewi ya̱ i̱ nuktʋhla tok.

¹⁰ Atuk o̱ onna ma yakohmi tok, shilombish okpulo ʋt, Chitokaka yʋt ik yohmí ahni na Sal a̱ ont onʋtola tok; mihma aboha iklʋna tasimbot ai anumpuli tok: mihma Lewi ʋt tikba chatuk akinli chohmit ibbak a̱ isht olachi tok: mihma Sal ibbak a̱ tʋbi tʋli halupa ontʋla ʋt fo̱ka tok.

¹¹ Mihma Sal ʋt tʋbi tʋli halupa ontʋla ya̱ pila tok; Lewi ya̱ issot aboha okhowata ya̱ anʋhlichi lashke, achi hatuk osh. Mihma Lewi ʋt hitukla ha i̱ kanʋllit kohcha tok.

¹² Mihma Sal ʋt Lewi ya̱ i̱ nukshopa tok; Chihowa ʋt ibafoyuka cha, Sal ano i̱ filʋmmi hatuk o̱.

¹³ Yʋmohmi kak o̱ Sal ʋt ilap ai ititakla ya̱ kanʋllichi cha, tahlepa sipokni pehliecha chi̱ ho̱ i̱ kʋpitʋni ikbi tok: micha okla itikba ya̱ akohchit iʋt ont chukoho̱wa tok.

¹⁴ Mihma Lewi ʋt nana a kaniohmi puta kʋt ile hopoyuksʋli tok; mihma Chihowa ʋt ibafoyuka tok.

¹⁵ Yʋmohmit ile hopoyuksali fehna na Sal ʋt pisa mʋt, i̱ nukshopa tok.

¹⁶ Yohmi kia itikba ya̱ akohchʋt iʋt, ant chukoho̱wa hatuk o̱, Islael moma, micha Chutah moma aiena kʋt Lewi ya̱ holitobli tʋk.

¹⁷ Mihma Sal ʋt Lewi ya̱, Yakeh! sʋso tek akni Melab yʋmmʋt chi tekchi ya̱ chi̱ ho̱ chima la chi̱ hoke: peh nukwia ikshot is sʋm in chilitʋt Chihowa im itibi ya̱ ish itibashke, im achi tok. Sʋbbak ʋt ik onʋtolo kashke, amba Filistin okla ibbak ak osh onʋtolashke, Sal ʋt achi hatuk okʋt.

¹⁸ Mihma Lewi ʋt Sal a̱, Kʋta sia hoh cho? Islael ai ititakla ha̱ ʋm ilhfiopak, micha a̱ki in chuka achʋfa ʋt nanta hatuk o̱ mi̱ko ya̱ iyupi la hinla cho? im achi tok.

¹⁹ Atuk oh kia yakohmi tok, Sal ushetik Melab a̱ Lewi ya̱ ima he ʋlhpesa ak inli kia, Meholahlait hatak Atliel ak o̱ tekchi yachi̱ ho̱ ima tok.

²⁰ Mihma Michal Sal ushetik ʋt Lewi ya̱ anushkunna tok: mihma Sal a̱ okla im anoli ma, nana ka im ʋlhpesa tok.

²¹ Mihma Sal ʋt, Yʋmmak o̱ ima lashke, yohmikma isht ibetʋbli na Filistin okla ibbak ʋt im asanalashke, achi tok. Yʋmohmi hosh Sal ʋt Lewi ya̱, Himak nitak a̱ tuklo ka achʋfalit is sʋm iyupa chi̱ hoke, achi tok.

²² Mihmʋt Sal ʋt in tishu ʋhleha ha̱ im apesʋt, Lewi ya̱ lumʋt hʋsh im anumpulit, Yakeh! mi̱ko ʋt chi ahninchishke, mikma in tishu ʋhleha hʋt chi holitoblishke: yʋmohmi hoka himak ano mi̱ko ya̱ ish iyupashke, hʋsh achashke, achi tok.

²³ Mihma Sal in tishu ʋhleha hʋt anumpa yʋmma Lewi haksobish a̱ haklochit anumpuli tok. Mihma Lewi ʋt, Mi̱ko iyupi ka nana ik ahobo hʋchim ahoba cho? ʋno ʋto hatak ilbʋsha, holitopa keyu sia hoka, achi tok.

²⁴ Mihma Sal in tishu ʋhleha hʋt im anoli kʋt, Ilʋppak o̱ Lewi ʋt anumpulishke, achi tok.

²⁵ Mihma Sal ʋt, Ilʋppak o̱ hʋsh im achashke, mi̱ko ʋt ohoyo ʋlhtoba bʋnna keyu, amba mi̱ko ʋt in tʋnʋp a̱ ilaiokha chi̱ kʋt, Filistin tikba hakshup tahlepa achʋfa ho̱ ahni hoke, achi tok. Yohmi kia Sal ʋt Filistin okla ibbak ak o̱ isht akʋma hi a̱ ahni tok.

²⁶ Atuk o̱ in tishu ʋhleha hʋt Lewi ya̱ anumpa ilʋppa im anoli ma, Lewi ʋt mi̱ko iyupi ka im ʋlhpesa fehna tok: atuk o̱ nitak ʋlhpisa ʋt ont ik taho ki̱sha tok.

²⁷ Yʋmohmi ma Lewi, micha hatak apeha tuk aiena kʋt wakayʋt ilhkoli cha, Filistin tahlepa tuklo ho̱ ʋbi tok: micha Lewi ʋt tikba hakshup isht ʋla tok; mihma holhtina ont ai ʋlhpiesa ho̱ mi̱ko ya̱ ant okla ima tok, yohmi na mi̱ko iyupa chi̱ hatok. Mihma Sal ʋt tekchi yachi̱ ho̱ ushetik Michal a̱ ima tok.

²⁸ Mihma Chihowa ʋt Lewi ya̱ ibafo̱ka, micha Sal ushetik Michal ʋt Lewi ya̱ anushkunna ka pi̱sʋt ithana tok.

²⁹ Yohmi mʋt Sal ʋt isht i̱ shahlit Lewi ya̱ i̱ nukshopa tok: micha Sal ʋt Lewi ya̱ in tʋnʋp toba kʋt i̱ shahlit ma̱ha̱ya tok.

³⁰ Yohmi ma Filistin pehlichi ʋhleha hʋt kohchʋt ia tok: atuk o̱ yakohmi tok, kohchʋt ia haya̱, Lewi ʋt ile hopoyuksali kʋt Sal in tishu ʋhleha moma ka i̱ shahli tok: yohmi ho̱ hohchifo hʋt holitopa fehna tok.