1 Samuel 17 - Chahta Holisso Holitopa 1886

¹ Yʋmohmi ma Filistin okla hʋt itiba chi̱ hosh tʋshka chipota ya̱ hoyot itʋnahli tok: micha Ephes‐tammim yakni Shochoh, yʋmmʋt Chutah immi ho̱ iti hoyot ai itʋnaha cha, Shochoh, micha Asekah ititakla yak o̱ binanchi tok.

² Mihma Sal, micha Islael hatak ʋhleha hʋt iti hoyot itʋnaha cha, Elah okfa bili̱ka yak o̱ binanchi cha, Filistin ʋhleha ha̱ itiba chi̱ kʋt achukmalit hilechit il atahli tok.

³ Mihma Filistin ʋhleha hʋt in tʋnnʋp nʋnih ho̱ hielikma, Islael ʋt in tʋnnʋp nʋnih ho̱ hieli tok: mihma okfa hosh ititakla ya̱ talaia tok.

⁴ Mihma Filistin ʋhleha im ʋlbina ha̱ hatak chito yosh hohchifo kʋt Koliah Kalh ʋtta achi hosh, chaha kʋt kubit hannali cha, span achʋfa aiena hosh kohchʋt ia tok.

⁵ Micha asonak lakna iahlipa ho̱ iahlipeli mʋt, tʋli kʋllo tʋnna nafohka isht im ʋlhtaha tok; nafohka ʋt asonak lakna yosh weki kʋt shekel tahlepa sipokni tahlapi tok.

⁶ Micha iyubi hoyolo kʋt asonak lakna shulush falaia yokma, telihpa ʋt asonak lakna yosh shinak ha ititakla alataya tok.

⁷ Mikma in tʋbi tʋli halupa ontʋla ʋpi ʋt nan tʋnna okhowata yak o̱ chiyuhmi tok; mikma in tʋbi tʋli halupa ontʋla noshkobo hʋt tʋli yosh shekel tahlepa hannali tok: mihma telihpa i̱ shoyuli kʋt itikba ya̱ a̱ya tok.

⁸ Micha hikiʋt Islael tʋshka chipota ha̱ chitolit i̱ pa̱ha̱ya cha, Katiohmi ho̱ kohchʋt hʋsh itiba chi̱ kʋt il atahlit hʋsh hieli cho? Ʋno ʋt Filistin hatak sia keyu̱? mikma hʋchishno ʋt Sal in tishu hʋchia keyu̱? hatak achʋfa ka hʋsh il ai atokoli na kohchʋt mintit ʋm ʋlashke.

⁹ Satibi cha, sʋba hinla hokma, yohmikma hʋchin tishu e tobashke: amba imaiya lish, ʋbi likma, pin tishu hʋsh toba cha, hʋsh pi̱ nutaka chi̱ hoke, im achi tok.

¹⁰ Mikmʋt Filistin ash osh, Himak nitak a̱ Islael tʋshka chipota ya̱ pa̱fi lishke; hatak achʋfa ka is sama na itibi lashke, achi tok.

¹¹ Sal, micha Islael moma kʋt Filistin ash im anumpa yʋmma haklo mʋt, chu̱kʋsh ielli cha, nukshopa fehna tok.

¹² Yohmi ka Lewi yʋmmak ash osh Eflahlait Behlem‐chutah hatak Chesse hohchifo ho̱ ushi atok: micha yʋmmʋt ushi ʋhleha hʋt untuchina hosh im a̱sha tok: mihma hatak ash osh Sal ʋt ahanta nitak a̱ hatak sipokni ʋlhpisa hosh hatak takla a̱ya beka tok.

¹³ Mihma Chesse ushi ʋhleha akni tuchina kʋt Sal a̱ iakaiyʋt itiba chi̱ hosh ia tok: ushi tuchina itiba chi̱ hosh ia tok hohchifo kʋt akni ʋmmona ʋt Eliab okma, pit iakaiya kʋt Abinatab okma, ont atuchina kʋt Shammah atok.

¹⁴ Mihma Lewi ak osh nakfish ishtaiyopi atok: mikma akni fehna tuchina kak osh Sal a̱ iakaiya tok.

¹⁵ Amba Lewi ʋto ia tuk ʋt i̱ki in chukfʋlhpoa Belh‐lehem a̱sha ho̱ ipeta chi̱ hosh Sal a̱ i̱ filʋmmit falamʋt ia tok.

¹⁶ Mihma Filistin ash osh onnahinli, micha opiakma a kʋnʋllit bili̱ka ia mʋt, nitak pokoli ushta ho̱ ile haiakʋchi tok.

¹⁷ Mihma Chesse ʋt ushi Lewi ya̱, Onush ʋlwʋsha ilʋppa efah achʋfa ho̱, micha pʋska lumbo pokoli ilʋppa ishi cha, maleli hosh chitibapishi im ʋlbina ha̱ ish iashke.

¹⁸ Micha pishukchi palʋska pokoli ilʋppa in tahlepa sipokni i̱ kʋpitʋni ya̱ isht ish im ona cha, chitibapishi hʋt kaniohmi hosh ma̱yakma ish pisa cha, heh ahni isht akostininchi ish im isha chike, im achi tok.

¹⁹ Yohmi ka Sal, micha yʋmmak ash osh, micha Islael hatak puta moma kʋt Filistin ʋhleha ha̱ itibi hosh Elah okfa hak o̱ aiasha tok.

²⁰ Atuk o̱ Lewi ʋt onna ha onnahinli ho̱ wakaya cha, chukfʋlhpoa ya̱ apistikeli im ashachi mʋt, i̱ki ʋt im apesa tuk mak o̱ ishi cha, ia tok: micha itichanʋlli aiasha ya̱ ona ma, tʋshka chipota ʋt itiba chi̱ hosh im ʋlhtahʋt achukmʋt hiohli hosh itiba chi̱ kʋt shakapa tok.

²¹ Islael, micha Filistin ʋhleha aiena kʋt itiba chi̱ kʋt hiohlit il atahli tok; mikma tʋshka chipota laua bi̱ka hosh itichapʋt hiohli tok.

²² Mihma Lewi ʋt nan isht a̱ya tuk ʋt nan isht a̱ya apistikeli ibbak a̱ fohki cha, malelit ia hosh, tʋshka chipota ʋt itiba chi̱ hosh im ʋlhtahʋt achukmʋt hiohli ka ont ibachukowa cha, itibapishi ʋhleha ha̱ aiokpʋchi tok.

²³ Atuk osh anumpulit hikia ma, yakeh! Filistin hatak Kalh ai ʋtta Koliah hohchifo kash osh Filistin tʋshka chipota laua ya̱ kohchʋt minti tok; micha anumpa yʋmmak ash inli ho̱ anumpohonli tok: mihma Lewi ʋt haklo tok.

²⁴ Mihma Islael hatak moma kʋt hatak ash pisa mʋt, i̱ yihlepa cha, nukshopa fehna tok.

²⁵ Mihma Islael hatak ʋhleha hʋt, Hatak ilʋppʋt ʋla ka hʋsh pi̱sa cho? Islael a̱ pa̱fa chi̱ hosh ʋla pullʋshke: atuk o̱ yakohma chi̱, hatak nana hosh ʋbikma, mi̱ko ʋt imi̱la̱yak chito ishit holitobla chi̱ hoke, micha ushetik a̱ imakmʋt, i̱ki in chuka achʋfa ya̱ noshkobo atobbi ya̱ issʋcha hi oke, achi tok.

²⁶ Mihma Lewi ʋt hatak bili̱ka hieli tuk a̱ im anumpuli mʋt, Hatak kʋna hosh Filistin ilʋppa ʋbi cha, Islael ishit hofahya ka ishit kanchikma, i̱ katiohma chi̱ cho? Filistin hatak hakshup ik tapo ilʋppʋt kʋta hatuk osh Chitokaka okcha̱ya in tʋshka chipota ya̱ pa̱fa hinla cho? achi tok.

²⁷ Mihma okla hʋt afalamichit, Hatak kʋna hosh ʋbikma, ilʋppa chohmi kash o̱ yʋmihcha chi̱ hoke, im achi tok.

²⁸ Mihma akni fehna, Eliab ʋt hatak ʋhleha ha̱ im anumpuli ma, haklo tok; mihmʋt Eliab ʋt Lewi ya̱ i̱ nokowa kʋt libbi fehna cha, Nanta katiohmi ho̱ mintit ish la tuk o̱? micha kʋta hak osh apistikela chi̱ ho̱ chukfʋlhpoa kanomosi kash yakni haiaka ya̱ issʋt ish minti tuk o̱? ish ilefehnʋchi, micha chi chu̱kʋsh ik achukmo ka ithana li; itibi kak o̱ pisa ka ish ahni hosh ish la hoka, achi tok.

²⁹ Mihma Lewi ʋt, Himak a̱ nanta ho̱ katiohmi li ho̱? yʋmohma he ai ʋlhpiesa kʋt a̱sha keyu cho? achi tok.

³⁰ Micha filema mʋt, inla ho̱ anumpa yʋmmak ash inli ho̱ anumpuli tok: mihma okla hʋt tikba kash chohmichit anonti afalamichit anumpuli tok.

³¹ Mihma Lewi ʋt anumpuli tuk ʋt annoa ma, okla ʋlbitelit Sal a̱ im anoli tuk; mihma Sal ʋt pit hoyo tok.

³² Mihma Lewi ʋt Sal a̱, Yʋmmak o̱ mʋhli ho̱ hatak kʋna kia chu̱kʋsh ik iello kashke; chin tishu hak osh ia cha, Filistin ilʋppak ash itibashke, im achi tok.

³³ Mihma Sal ʋt Lewi ya̱, Filistin ilʋppa itibi ka nana ish kaniohma he keyu, peh ʋlla chia fehnakma, yʋmmʋto hatak tʋnʋp ʋlla moma isht auehinchi tok oke, im achi tok.

³⁴ Mihma Lewi ʋt Sal a̱, Chin tishu hʋt i̱ki in chukfʋlhpoa apistikeli hosh anta tuk o̱, koi chito, micha nita itatuklo kʋt alokoli achʋfa ka chukfʋlhpoa ushi achʋfa ka a kohchit ishi tok oke.

³⁵ Mihmʋt kohchʋt iakaiyʋt ʋbi lish, itakha foyuka tuk a̱ hlakofichi li tok oke: micha wakayʋt si afama ma, nutakhish a̱ hoklit ishi lish, issot ʋbi li tok oke.

³⁶ Chin tishu hʋt koi chito, micha nita ya̱ itaieninchit ʋbi li tok oke: micha Filistin hakshup ik tapo ilʋppʋt yʋmma achʋfa ka chohma chi̱ hoke; Chitokaka okcha̱ya in tʋshka chipota ya̱ pa̱fi tuk okʋt, im achi tok.

³⁷ Micha Lewi ʋt achakalinchi mʋt, Chihowa, yʋmmak osh koi chito ibbak, micha nita ibbak a̱ a sa hlakofichi tuk ʋt Filistin ilʋppa ibbak ak kia a sa hlakoficha chi̱ hoke, achi tok. Mihma Sal ʋt Lewi ya̱, Iá, mikma Chihowa ʋt chiba foyukashke, im achi tok.

³⁸ Micha Sal ʋt ilap i̱ nahalupa akinli Lewi ya̱ fohkʋchi mʋt, asonak lakna iahlipa ha̱ noshkobo iahlipelichi mʋt, tʋli kʋllo tʋnna nafohka ya̱ fohkʋchi tok.

³⁹ Micha Lewi ʋt tʋnʋp nafohka paknaka ya̱ bʋshpo falaia ya̱ il isht ʋskofʋchi mʋt, iʋt pisa tok; abʋchit ik peso ki̱sha hatuk okʋt. Mihmʋt Lewi ʋt Sal a̱, Ilʋppa ieshi li kʋt ia la he keyu, abʋchit ak peso ki̱sha hatuk okʋt. Micha Lewi ʋt shoeli tok.

⁴⁰ Mihmʋt tʋbi ya̱ ishi mʋt, bokushi tʋli halushki tahlapi ho̱ ai aiowa cha, chukfʋlhpoa apistikeli i̱ bahta, bahta i̱shi tuk mak osh apitta tok: micha ishit pila ʋt ibbak a̱ fo̱ka tok; mihmʋt Filistin ash bili̱ka ia tok.

⁴¹ Mihma Filistin ʋt minti mʋt, Lewi ya̱ bili̱ka ʋla tok; mihma telihpa i̱ sholi yash osh tikba ia tok.

⁴² Atuk o̱ Filistin ash osh filemoʋt Lewi ya̱ pisa mʋt, ik ahobalot shitilema tok: peh himita fehna cha, nashuka humma, micha pisa ha okshauanli hatuk oka.

⁴³ Micha Filistin ash osh, Ofi sia ho̱ tʋbi ish ieshi hosh is sʋm ʋla cho? im achi tok. Mihmʋt Filistin ʋt i̱ naholbʋt toba puta ka hochifot Lewi ya̱ kalakshichit mihachi tok.

⁴⁴ Micha Filistin ʋt Lewi ya̱, A̱ mintí, mikma chi nipi ya̱ hushi puta ʋba itʋnowa, micha nampoa puta yakni haiaka aiasha ka ipeta lashke, im achi tok.

⁴⁵ Yohmi ma Lewi ʋt Filistin a̱, Bʋshpo falaia, micha tʋbi tʋli halupa ontʋla, micha telihpa aiena ho̱ ish ieshi hosh is sʋm ʋlʋshke: amba ʋno ʋto ʋba nan oklu̱ha il aieshi Chihowa, micha Islael tʋshka chipota in Chitokaka ish pa̱fi tuk mak o̱ hochihi̱fo hosh chim ʋla lishke.

⁴⁶ Himak nitak a̱ Chihowa ʋt chishno ya̱ sʋbbak a̱ chi fohki na issot chi kanchi likmʋt, chi noshkobo ha̱ tʋbli la chi̱ hoke; micha Filistin tʋshka chipota nipi illi ya̱ hushi puta ʋba itʋnowa, micha nampoa nukshopa puta yakni aiasha ka ipeta la chi̱ hoke; yohmi ho̱ Chitokaka ʋt Islael i̱ yakni ya̱ ahanta ka yakni moma kʋt ithaiyanashke.

⁴⁷ Micha okla ilʋppa aiasha kʋt Chihowa ʋt bʋshpo falaia, micha tʋbi tʋli halupa ontʋla ishit hlakofichi keyu ka ithaiyanashke: itibi kʋt ont a kaniohma hi a̱ Chihowa immi hokʋt, hʋchishno ya̱ pibbak a̱ hʋchi fohka chi̱ hoke, im achi tok.

⁴⁸ Atuk o̱ yakohmi tok, Filistin ash osh wakaya mʋt, Lewi ya̱ afama chi̱ hosh akanʋllit minti ma, Lewi ʋt tu̱shpa hosh malelit tʋshka chipota ʋt itiba chi̱ hosh im ʋlhtahʋt hiohli ka iʋt, Filistin ash afama chi̱ hosh ia tok.

⁴⁹ Micha Lewi ʋt ibbak a̱ bahta ya̱ pit shamʋllichi cha, tʋli ya̱ kohchit ishi cha, pila mʋt, Filistin ash ibitakla isso na tʋli ʋt ibitakla ya̱ chukowʋt oka kʋnia tok: mihma nashuka ishit hlipiʋt aka itula tok.

⁵⁰ Yohmi hosh Lewi ʋt ishit pila, micha tʋli yo̱ ieshi hosh Filistin ash imaiya cha, Filistin ash isso cha, ʋbi tok; yohmi kia Lewi ibbak a̱ bʋshpo falaia ʋt fo̱ka tok keyu hoke.

⁵¹ Yʋmohmi hosh Lewi ʋt malelit, Filistin a̱ ont o̱ hikia cha, i̱ bʋshpo falaia ya̱ i̱ shukcha ya̱ shu̱fit ishi cha, ʋbi mʋt, ishit chanlit noshkobo ha̱ tʋbli tok. Mihma Filistin ʋhleha hʋt hatak in chaha yash osh illi na pisa mʋt, yihlepa tok.

⁵² Mihma Islael hatak ʋhleha, micha Chutah hatak ʋhleha aiena kʋt wakaya cha, shakampa mʋt, hliolit isht ia hosh okfa ish ona ka, micha Eklon holihta okhissa ya̱ isht ona tok. Mihma Filistin ʋhleha hʋt nʋhlʋt chilofʋt ma̱ya kʋt, Shaalaim pilla ma̱yʋt Kalh, micha Eklon a̱ ont ʋhli tok.

⁵³ Mihma Islael im ʋlla ʋhleha hʋt Filistin ʋhleha ha̱ hlioli tuk ʋt falama cha, im ʋlhtipo puta ka wehpuli tok.

⁵⁴ Mihma Lewi ʋt Filistin ash noshkobo ya̱ ishi cha, Chelusalem a̱ isht ona tok: amba i̱ nahalupa hano im ʋlhtipo yak o̱ ashachi tok.

⁵⁵ Mihmʋt Lewi ʋt kohchʋt Filistin ash itibit ia na Sal ʋt pisa mʋt, tʋshka chipota i̱ kʋpitʋni Abne ya̱, Abne ma! hatak himita ilʋppʋt kʋta hak o̱ ushi yo̱? im achi tok. Mihma Abne yʋt, Chi shilombish ʋt okcha̱ya pulla ka anoli la he keyushke, mi̱ko ma! achi tok.

⁵⁶ Mihma mi̱ko ʋt, Hatak himita yash osh kʋna ushi yokma ponakló, achi tok.

⁵⁷ Atuk o̱ Lewi ʋt Filistin ash ʋbit falama ma, Abne ʋt ilauelit Filistin ash noshkobo ya̱ ieshi ho̱ Sal itikba ya̱ isht ʋla tok.

⁵⁸ Mihma Sal ʋt, Hatak himita chia ma! hatak nanta ushi chia ho̱? im achi tok. Mihma Lewi ʋt afalamichi mʋt, Chin tishu Chesse Behlehemait ushi sia hoke, achi tok.