1 Samuel 16 - Chahta Holisso Holitopa 1886

¹ Yʋmohmi ma Chihowa ʋt Samuel a̱, Katiohmi foka ho̱ Sal a̱ isht ish yaha̱ya chi̱ cho? Islael pehliechi tuk a̱ kanchi li tuk oka; chin lapish a̱ bila yo̱ alotuli cha iá; Chesse Behlehemait a̱ pit chi pila la chi̱ hoke: yʋmma ushi ʋhleha hak o̱ mi̱ko ai il ahayuchi li tuk oke, im achi tok.

² Mihma Samuel ʋt, Katiohmit ia la hinla̱? Sal ʋt haklokmʋt, sʋba hinla hoke. Mihma Chihowa ʋt, Wak tek himita ish ishi cha, ish iashke; micha, Nan ʋbit Chihowa isht aiokpʋchit a̱ya li hoke, ish achashke, achi tok.

³ Micha Chesse ya̱ ish hoyo na nan ʋbit isht aiokpʋchi ya̱ onashke; mikma nana ish kaniohma hi a̱ chim anoli la chi̱ hoke: mikmʋt kanima ho̱ chi̱ hochifo likma, nan ahʋmmit is sʋm atokola chi̱ hoke, achi tok.

⁴ Mihma Samuel ʋt Chihowa ʋt im achi tuk mak o̱ yʋmohmi cha, Behlehem a̱ ona tok. Mihma ona ma, tʋmaha hatak im asʋnonchi ʋhleha hʋt wʋnihinchi cha, Achukma ahni hosh ish a̱ya cho? achi tok.

⁵ Mihma, Achukma ahni hosh a̱ya li: nan ʋbit Chihowa isht aiokpʋchit a̱ya li hoke: hʋsh ile hullochi cha, nan ʋbit isht aiokpʋchi ya̱ si awant hʋsh onashke, achi tok. Mihmʋt Chesse, micha ushi ʋhleha ha̱ hullochi cha, nan ʋbit isht aiokpʋchi ya̱ ona chi̱ ka im anoli tok.

⁶ Atuk o̱ yakohmi tok, okla ʋla ma, Eliab a̱ atokolit pisa mʋt, Nan ahamʋt Chihowa im ʋlhtoka yʋt itikba ya̱ hikia pullʋshke, achi tok.

⁷ Yohmi kia Chihowa ʋt Samuel a̱, Nashuka, micha chahaka atokolit ish pisa ná; ak aiokpacho tuk oka: Chihowa ʋt nana pisa kʋt hatak na pisa ka chohmi keyu hokʋt; hatak ʋto nashuka ya̱ pisa hoke, amba Chihowa ʋto chu̱kʋsh oka atokolit pisa hoke, im achi tok.

⁸ Yohmi ma Chesse ʋt Abinatab a̱ i̱ howa cha, Samuel itikba ya̱ ont iachi tuk. Mihma, Ilʋppak kia Chihowa ʋt atokoli tuk keyu hoke, achi tok.

⁹ Yohmi ma Chesse ʋt Shammah ya̱ ont iachi tuk. Mihma, Ilʋppak kia Chihowa ʋt atokoli tuk keyu hoke, achi tok.

¹⁰ Anonti Chesse ʋt ushi untuklo ka mominchit Samuel itikba ya̱ ont iachi tuk. Mihma Samuel ʋt Chesse ya, Ilʋppak kia Chihowa hʋt atokoli tuk keyu hoke, im achi tok.

¹¹ Mihma Samuel ʋt Chesse ya̱, Ilʋppa a̱sha kʋt chim ʋlla moma ho̱? im achi tok. Mihma, Nakfish ishtaiyopi yosh chukfʋlhpoa apistikeli hosh antʋshke, achi tok. Mihma Samuel ʋt, Pit hoyot isht ish lashke; ilʋppa ik lo ki̱sha ka e binila he keyu hoke, im achi tok.

¹² Mihma pit hoyo cha, isht ʋla tok. Mihma nashuka hummʋt, nashuka aiokli pisa achukma tok. Mihma Chihowa ʋt, Wakaya cha, ish ahʋmmashke: ilʋppak osh mih mak oka, achi tok.

¹³ Yohmi ho̱ Samuel ʋt bila lapish ʋlhto kash ishi cha, itibapishi ai ititakla ahʋmmi tok: mihma nitak yʋmma i̱ himmak ia ka Chihowa imi Shilombish ʋt Lewi ya̱ onʋtoyulʋt isht ia tok. Yohmi ho̱ Samuel ʋt wakaya cha, Lamah ya̱ ona tok.

¹⁴ Amba Chihowa imi Shilombish ʋt Sal a̱ issʋt ia na Chihowa ʋt ik yohmi ahni na shilombish okpulo yosh nukhlakʋshli tok.

¹⁵ Mihma Sal in tishu ʋhleha hʋt, Yakeh! himak a̱ shilombish okpulo yosh Chitokaka yʋt ik yohmi ahni na chi nukhlakʋshlʋshke.

¹⁶ Yohmi ka pi̱ shahli hʋt in tishu ʋhleha ha̱ itikba aiasha ka ik im apesa na hatak hap olachi imponna ka ik im ahayuchí; atukma yakohma hi oke, shilombish okpulo yosh Chitokaka ʋt ik yohmi ahni na chi onʋtolakma, ibbak a̱ isht olacha hi oke, mikma nuktʋla hi oke, im achi tok.

¹⁷ Yʋmohmi ma Sal ʋt in tishu ʋhleha ha̱, Himak a̱ nan olachi imponna ka hʋs sʋm ahayuchi cha, isht hʋs sʋm ʋlashke, im achi tok.

¹⁸ Yʋmohmi ma in tishu ʋhleha ha̱ ai achʋfa kʋt afalaminchit, Yakeh! Behlehem hatak Chesse ushi yosh nan olachi kʋt imponna, micha hatak hlampko, chilita, nukwia iksho, micha hatak tʋnʋp, micha anumpuli kʋt imponna, micha hatak pisa achukma hoke, yohmi ho̱ Chihowa ʋt ibafoyuka hoke.

¹⁹ Yʋmohmi ho̱ Sal ʋt Chesse ya̱ anumpa shali ya̱ pit in tihleli cha, Chiso Lewi chukfʋlhpoa pehliechit ahanta ka et is sa̱ pilashke, achi tok.

²⁰ Mihma Chesse ʋt issuba haksobish falaia ya̱ pʋska shapolichi mʋt, oka pa̱ki ʋt kotoba achʋfa, micha issi kosoma ushi ʋt achʋfa ho̱ ushi Lewi ibbak a̱ fohki cha, Sal a̱ pit i̱ pila tok.

²¹ Mihma Lewi ʋt Sal a̱ im ona cha, itikba ya̱ hikia tok; mihma heh ahni fehna tok: mihma na halupa i̱ shoyuli toba tok.

²² Mihma Sal ʋt Chesse ya̱ pit im anolit, Lewi ʋt sa tikba ik hikiá, ish im ahnashke, a̱ holhponaya hanta si ai ahayuchi hoka, achi tok.

²³ Atuk o̱ yakohmi tok, shilombish okpulo ʋt Chitokaka ʋt ik yohmí ahni na Sal a̱ onʋtolakma, Lewi ʋt hap ishi cha, ibbak isht olachi beka tok: yohmi ho̱ Sal ʋt okcha cha, nuktʋlakma, shilombish okpulo ʋt i̱ filʋmmit kʋnia beka tok.