1 Samuel 15 - Chahta Holisso Holitopa 1886

¹ Mihma Samuel ʋt Sal a̱, Nana ahʋmmit mi̱ko chi atokoli li̱, im okla Islael a̱ ish pehliecha chi̱ ho̱, Chihowa ʋt sa pila tuk oke: yʋmohmi hoka Chihowa im anumpa ola ka ish haklashke, im achi tok.

² Ʋba nan oklu̱ha il aieshi Chihowa ʋt, Amalek ʋt Islael a̱ kaniohmichi tok, Echip a̱ kohchʋt minti ma, hina takla im aiehchi tok a̱ ithaiyana lishke.

³ Himak a̱ ish ia cha, Amalek a̱ issot ish kanchashke, ʋmohminchit nana im a̱sha moma ka okpʋnit ish tahlashke: micha ish apoahanchi ná; amba hatak, micha ohoyo, ʋllo̱si, micha pi̱shi, wak, micha chukfʋlhpoa, kamel, micha issuba haksobish falaia aiena ka ʋbit ish tahlashke, achi tok.

⁴ Mihma Sal ʋt okla ha̱ hoyot itʋnahli cha, Telaim a̱ hatak aka hi̱ka ʋt tahlepa sipokni tahlepa tuklo, micha Chutah hatak ʋt tahlehpa sipokni pokoli a̱ hotihna tok.

⁵ Micha Sal ʋt Amalek in tʋmaha holihta ya̱ ona cha, okfa ha̱ im aiehchi tok.

⁶ Mihma Sal ʋt Kenait okla ha̱, Oh iá, kanima hʋsh iashke, Amalek okla ai ititakla ya̱ kohchʋt i̱ filʋmmit hʋsh iashke; keyukma aieninchit ʋbit hʋchi tahli li ná; Islael im ʋlla ʋhleha hʋt Echip a̱ kohchʋt a̱ya moma ka hʋsh i̱ kana tok oka, im achi tok. Mihma Kenait ʋhleha hʋt Amalek okla ai ititakla ya̱ kohchʋt ia tok.

⁷ Mihma Sal ʋt Amalek okla ha̱ issot kanchit, Hafilah ai isht ia mʋt, Shu ish ona Echip ont ichapaka ya̱ isht ona tok.

⁸ Micha Amalek okla i̱ mi̱ko Akak a̱ okcha̱ya ho̱ ishi cha, ʋmohminchit okla moma ka bʋshpo falaia halupa isht ʋbit tahli tok.

⁹ Yohmi kia Sal, micha okla aiena kʋt, Akak, micha chukfʋlhpoa hochukma i̱ shahli, micha wak, micha wak himithoa, micha chukfʋlhpoa ushi aiena achukma i̱ shahli ka ai ishit, micha nana achukma moma ka apoanchi cha, ʋmohminchit ʋbit ik tahlo ki tok: amba nana okpulo puta a shitilema yano ʋmohminchit okpʋnit okla tahli tok.

¹⁰ Yʋmohmi ma Chihowa im anumpa hʋt Samuel a̱ im ʋlʋt, yak ahanchi tok.

¹¹ Sal a̱ mi̱ko ikbit hilechi li tuk ʋt sa nukha̱kloshke: siakaiya he tuk ʋt a̱ filʋmmi cha, a̱ nan ʋlhpisa ya̱ ik yʋmihcho hoka. Mihma Samuel ʋt nukha̱klo tok: micha Chihowa ya̱ ilbʋshʋt i̱ pa̱ha̱ya na ninak achʋfa kʋt hlopulli tok.

¹² Micha onna mʋt onnahinli fehna moma ho̱ Samuel a̱ im anoli kʋt, Sal ʋt Kamel a̱ ʋla cha, yakeh! in tʋnʋp imaiya isht ithana ya̱ hilechi cha, fullotʋt, hlopullit iʋt, Kilkal a̱ onʋshke, achi tok.

¹³ Mihma Samuel ʋt Sal a̱ im ona tok; mihma Sal ʋt, Chihowa i̱ holitopa chia ma! Chihowa i̱ nan ʋlhpisa ya̱ yʋmihchi lishke, im achi tok.

¹⁴ Mihma Samuel ʋt, Yohmi hokak o̱ katiohmi ho̱ chukfʋlhpoa yaha̱ya kʋt sa haksobish a̱ chukoho̱wa cho? micha wak woho̱ha ka haklo li cho? achi tok.

¹⁵ Mihma Sal ʋt, Amalek okla ha̱ ai ishit okla isht ʋla tuk oke: chukfʋlhpoa hochukma i̱ shahli, micha wak hochukma i̱ shahli aiena ka chin Chitokaka Chihowa ya̱ isht aiokpʋcha chi̱ hosh okla ak osh apoanchi tuk oka; amba inla kʋno ʋmohminchit ʋbit e taiyahli tuk oke, achi tok.

¹⁶ Mihma Samuel ʋt Sal a̱, Ish hikiakma, himak nitak a̱ Chihowa ʋt nana ʋm achi tuk a̱ chim anoli lashke, im achi tok. Mihma, Anolí, im achi tok.

¹⁷ Mihma Samuel ʋt, Chishno ak inli ish ile pisa kʋt chiskitinesi mʋt, Islael apehlichi puta ka noshkobo ha̱ ish toba tok keyu ho̱? yohmi ma Chihowa ʋt nan ahʋmmit Islael i̱ mi̱ko chi atokoli tok keyu cho?

¹⁸ Atuk o̱ Chihowa ʋt nowʋt ish a̱ya chi̱ ka chi pila cha, Iá, micha Amalek okla nan ashʋchi ya̱ ʋmohminchit ʋbit ish tahlashke, micha ish in tanahampi na ont lushumashke, chim achi tok.

¹⁹ Yʋmohmi hokak o̱ nanta katiohmi ho̱ Chihowa im anumpa ola ka chik im antio hosh, na wehpoa ya̱ o̱ yihlepʋt hʋsh ishi cha, nana ik achukmo ka Chihowa itikba ya̱ hʋsh yʋmihchi tuk oh cho? im achi tok.

²⁰ Mihma Sal ʋt Samuel a̱, A̱hli, Chihowa im anumpa ha̱ im antia li tuk, micha yʋmma pilla sa pila tuk mak o̱ ia li tuk oke; micha Amalek i̱ mi̱ko Akak a̱ isht ʋla li tuk; micha Amalek okla ha̱ ʋmohminchit ʋbit tahli li tuk.

²¹ Yohmi kia okla hak osh na wehpoa kaniohmi, chukfʋlhpoa, micha wak hochukma i̱ shahli, yʋmmʋt okpulot tahʋt ʋmohma he atuk ak o̱, chin Chitokaka Chihowa ya̱ Kilkal a̱ isht ai aiokpʋcha chi̱ hosh ishi tuk oke, im achi tok.

²² Mihma Samuel ʋt, Chihowa ʋt na hukmit isht aiokpʋchi, micha nan ʋbit isht aiokpʋchi aiena ka aiokpanchi kʋt, Chihowa im anumpa im antia ka im itilaui ho̱? Yakeh! im antia kak osh nan ʋbit isht aiokpʋchi ya̱ i̱ shahlikma, haponaklo kak osh chukfʋlhpoa nakni i̱ nia ya̱ i̱ shahli hoke.

²³ Chihowa imi sanali kʋt isht ahullo nan ashʋchi yak o̱ chohmikma, chu̱kʋsh ilapunla ʋt nan ik ʋlhpeso yʋmihchi, micha naholbʋt toba aiokpʋchi yak o̱ chohmi hoke. Chihowa im anumpa ha̱ ish kanchi tuk oka, ilap ak kia mi̱ko ish hikia tuk a̱ chi kanchishke, achi tok.

²⁴ Mihma Sal ʋt Samuel a̱, Sai yoshuba tuk oke: Chihowa i̱ nan ʋlhpisa, micha chim anumpa ha̱ kobʋffi li hokʋt: okla hak o̱ i̱ sa nukshopa cha, im anumpa ha̱ haklo li hatuk osh.

²⁵ Yʋmohmi hoka himak a̱ nan ashʋchi li ya̱ is sa̱ kashofi cha, filemʋt is sʋba fohka na Chihowa ya̱ aiokpʋchi lashke, chim asilhha lishke, im achi tok.

²⁶ Mihma Samuel ʋt Sal a, Chi awant falamʋt ia la he keyu: Chihowa im anumpa ish kanchi na Chihowa ʋt Islael i̱ mi̱ko yosh ish pehliechi tuk a̱ chi kanchi hoke, im achi tok.

²⁷ Micha Samuel ʋt ia chi̱ hosh filema ma, im anchi wishakchi ya̱ halʋlli na hlilafa tok.

²⁸ Mihma Samuel ʋt, Chihowa ʋt himak nitak a̱ Islael apehlichika ya̱ chim ai ishi cha, hatak ish ai itilaui achukma kʋt chi̱ shahli ho̱ imʋshke,

²⁹ Micha Islael imi̱ Hlampko hʋt holaba he keyu, micha im anukfila hʋt inla he keyu: hatak keyu hokʋt, im anukfila hʋt inla he keyu hoke, im achi tok.

³⁰ Yʋmohmi ma, Sai yoshubʋshke: yohmi kia himak ano ʋm okla im asʋnonchi ʋhleha itikba, micha Islael itikba ya̱ is sa holitoblit, fullotʋt si awant ish ia na chin Chitokaka Chihowa ya̱ aiokpʋchi lashke, chim asilhha lishke, achi tok.

³¹ Yohmi ho̱ Samuel ʋt fullotʋt Sal a̱ awant ia tok; mihma Sal ʋt Chihowa ya̱ aiokpʋchi tok.

³² Yohmi ma Samuel ʋt, Amalek okla i̱ mi̱ko Akak a̱ isht hʋs sʋm ʋlashke, achi tok. Mihma Akak ʋt yʋppʋlit mintit im ʋla tok. Mihmʋt Akak ʋt, Illi homi kʋt ant ia tuk pullʋshke, achi tok.

³³ Mihma Samuel ʋt, Chi̱ bʋshpo falaia ʋt ohoyo ha̱ ʋlla ik im iksho ikbi chatuk oka, chishki ʋt ohoyo takla ʋlla ik im iksho ya chi̱ hoke, achi tok. Mihmʋt Samuel ʋt Akak a̱ Kilkal ak o̱ Chihowa itikba ya̱ a chanlit tushahlichit taiyahli tok.

³⁴ Yʋmohmi mʋt Samuel ʋt Lamah ya̱ ona tok; mikma Sal ʋto in chuka Sal in tʋmaha Kibeah ya̱ ona tok.

³⁵ Mihma Samuel ʋt Sal a̱ i̱ himmak ma pisʋt a̱yʋt ik ono hosh illi tok: yohmi kia Samuel ʋt Sal a̱ ishit yaha̱ya tok: mihma Chihowa ʋt Sal a̱ Islael i̱ mi̱ko ikbi hatuk osh nukha̱klo tok.