1 Samuel 14 - Chahta Holisso Holitopa 1886

¹ Atuk o̱ yakohmi tok, nitak kaniohmi ma Chonahlan, Sal ushi ʋt hatak himita i̱ na halupa shoyuli ya̱, Inta! Filistin tʋshka chipota aiasha tʋnnʋp talaia ka kil iá, im achi tok. Yohmi kia i̱ki ya̱ ik im anolo ki tok.

² Mihma Sal ʋt Kibeah ont ʋhli pomeklanat iti Miklon hikia ka nutaka yak o̱ ahanta tok: mikma okla apehʋt a̱sha kʋt hatak tahlepa hannali foka tok.

³ Mihma Ahiah, Ikabot itibapishi Ahitʋb ushi Chihowa i̱ naholitompa isht ʋtta efot fohka hosh Shiloh ya̱ ahanta tok: Ahitʋb yʋmmʋt Finehas ushi okma, anonti yʋmmʋt Eli ya̱ ushi atok. Mihma Chonahlan ʋt kʋnia tuk a̱ okla hʋt ik akostinincho tok.

⁴ Atuk o̱ ahlopullit ia Chonahlan ʋt hlopullit Filistin tʋshka chipota ai asha ka ona bʋnna ka in tʋnnʋp a̱ tʋli halupa ʋt hikiakma, anonti in tʋnnʋp a̱ tʋli halupa ʋt hikia tok: micha achʋfa kʋt hohchifo kʋt Boses okma, achʋfa yʋt hohchifo kʋt Seneh atok.

⁵ Asanali achʋfa kʋt falʋmmi imma Mikmash ichapa hosh pit talaiakma, anonti asanali achʋfa kʋt oka mahli imma Kibeah ak o̱ ichapa hosh pit talaia tok.

⁶ Mihma Chonahlan ʋt hatak himita i̱ nahalupa shoyuli ash, Inta! hakshup ik tapo ilʋppa i̱ holihta ya̱ il onashke; Chihowa ʋt pi apela hinla yoba ká: Chihowa ʋt laua hokmá, ik lauo hokmá, nana ho̱ isht hlakoficha hi ʋt im itilaui hokʋt, im achi tok.

⁷ Mihma i̱ nahalupa shoyuli ash osh, Nana ho̱ chi chu̱kʋsh foyuka moma kʋt ish yʋmihchashke: ish iashke: yakeh! nana chi chu̱kʋsh ai ahni ka chiba foyuka li hoke, im achi tok.

⁸ Mihma Chonahlan ʋt, Yakeh! hatak ilʋppa aiasha ka il ona cha, il i̱ haiakashke, im achi tok.

⁹ Mikma, Hʋsh hinli na e hʋchim onashke, pim achi hokma, yohmikma il a hieli akinli ka lumʋt e hinli cha, oiyʋt kil im ono kashke.

¹⁰ Amba, Oiyʋt hʋsh pim ʋlashke, achi hokma, yohmikma oiyʋt il iashke: Chihowa ʋt pibbak a̱ fohki hoka: mikma ilʋppak osh nan isht pim ʋlhpisashke, achi tok.

¹¹ Mihmʋt itatuklot Filistin tʋshka chipota ya̱ ont im ile haiakʋchi tok: mihma Filistin ʋhleha hʋt, Yakeh! Heblu ʋhleha hʋt chiluk a luma tuk ʋt kocha wihʋshke, achi tok.

¹² Micha holihta hatak ʋhleha hash osh Chonahlan, micha i̱ nahalupa shoyuli itatuklo ka, Oiyʋt hʋsh pim ʋla na nana e hʋchi pisachashke, achi tok. Mihma Chonahlan ʋt i̱ nahalupa shoyuli ya̱, Is siakaiyashke, Chihowa ʋt Islael ibbak a̱ fohki hoke, im achi tok.

¹³ Mihmʋt Chonahlan ʋt ibbak, iyi aiena isht oiya hosh a̱yʋt ia ma, i̱ nahalupa shoyuli ʋt iakaiyʋt ia tok: mihma Chonahlan itikba ya̱ akakoha ma, i̱ nahalupa shoyuli ʋt iakaiyʋt ʋbi tok.

¹⁴ Micha Chonahlan, i̱ nahalupa shoyuli itatuklo kʋt ʋbi ʋmmona ka hatak pokoli tuklo foka tok; yakni eka iklʋna wak toksʋli yok achʋfa kʋt patʋffa hinla ohmi ho̱ a yʋmihchi tok.

¹⁵ Mihma tʋshka chipota ash osh, micha bili̱ka aiasha, micha okla moma kʋt wʋnihinchi tok: holihta aiasha, micha wehpuli ʋhleha yʋmmak kia wʋnihinchi ma, yakni ʋt winakahanchi tok; yʋmohmi ho̱ wʋnichi chito fehna tok.

¹⁶ Mihma Sal nan im atoni ʋhleha hʋt Benchamin yakni Kibeah ya̱ asha tuk osh hopo̱ko̱yo tok; mihma yakeh! okla chito ʋt bilʋt iʋt, bolit itikahanchit ia ho̱ pisa tok.

¹⁷ Yʋmohmi ma Sal ʋt okla apeha tuk a̱, Himonasi ya̱ ho hotihna cha, kʋna pi̱ filʋmmit ia tuk okma, ho pisá, im achi tok. Mihma hotihna ma, yakeh! Chonahlan, micha i̱ nahalupa shoyuli itatuklo kʋt yʋmma iksho tok.

¹⁸ Mihma Sal ʋt Ahiah ya̱, Chitokaka im itombi holitopa ya̱ isht ish lashke, im achi tok. Nitak yʋmma Chitokaka im itombi holitopa ʋt Islael im ʋlla ʋhleha hak o̱ takla talaia tok oka.

¹⁹ Atuk o̱ yakohmi tok, Sal ʋt naholitompa isht ʋtta ya̱ im anumpuli hosh isht anta moma ho̱, Filistin tʋshka chipota ʋt shakapa ishit ma̱ha̱yʋt isht i̱ shahlit ia tok. Mihma Sal ʋt naholitompa isht ʋtta ya̱, Chibbak a̱ ishí, im achi tok.

²⁰ Mihma Sal, micha okla apehʋt asha kash osh itahoba cha, ont itibi tok; mihma yakeh! hatak moma i̱ bʋshpo falaia aiyukali kʋt ilap bi̱ka yash i̱ sanali tok; mihma nukhlakanchʋt komunta fehna tok.

²¹ Mihma cha̱shpo ka Heblu kaniohmi kʋt yakni afullota ka a̱shʋt Filistin ʋhleha ha̱ takla iʋt, ont iba binanchi tuk ʋt yʋmmak kia filemʋt Islael okla yʋmmʋt Sal, micha Chonahlan apeha tuk a̱ ont ibafohka tok.

²² Mikma Islael hatak ʋhleha moma kʋt Eflaim nʋnih lumboa tuk mʋt, Filistin ʋhleha hʋt yihlepa na haklo mʋt, yʋmmak kia ahlioʋt sakkit in tanampi tok.

²³ Yʋmohmi ho̱ Chihowa ʋt nitak yʋmma Islael a̱ hlakofichi tok: mihma itin tanampi kʋt Belh‐afen a̱ isht ona tok.

²⁴ Mihma Islael hatak ʋhleha hʋt nitak yʋmma tikambit ilbʋsha tok; Sal ʋt okla ha̱ anumpa kʋllo il onochichi hosh, Opia itintakla ka nan ʋpa nana kia ʋpakmʋt, na palʋmmi kʋt onʋtolashke; yʋmohmi ho̱ an tʋnʋp a̱ il aiokha lashke, achi tuk atuk oka. Yʋmohmi ho̱ okla ha̱ kʋna kia nan ʋpa ha̱ ʋpʋt ik peso ki tok.

²⁵ Mihma yakni yʋmmak inli yatuk moma kʋt kowi ya̱ ona tok; mihma foi bila ʋt aka ya̱ aiasha tok.

²⁶ Atuk o̱ okla hʋt kowi ya̱ ona ma, yakeh! foi bila ʋt hoho̱iya tok; yohmi kia hatak kʋna kia ishit itih ha̱ isht ik ono tok: okla hʋt anumpa kʋllo yatuk a̱ i̱ nukshopa hokʋt.

²⁷ Yohmi kia i̱ki ʋt okla ha̱ anumpa kʋllo il onochichi tuk a̱ Chonahlan ʋt ik haklo tok: yohmi hatuk osh tʋbi ishi tuk ʋt welit foi bila okʋchi cha, ibbak a̱ itih ha̱ isht ona tok: micha nishkin ʋt okcha tok.

²⁸ Mihma okla hash achʋfa kʋt im afalamichit, Chi̱ki ʋt atokolit anumpa kʋllo il onochichit, Hatak nana hosh nan ilhpak ʋpakmʋt, na palʋmmi kʋt onʋtolashke, im achi tuk oke, achi tok. Mihma okla hʋt tikambit ilbʋsha tok.

²⁹ Mihma Chonahlan ʋt, A̱ki ʋt yakni ya̱ ilbʋshalishke: foi bila ilʋppa iskʋtinosi ishit ʋpa li mʋt, sa nishkin ʋt okcha ka ho pisa, hʋchim asilhha lishke;

³⁰ Okla hʋt himak nitak a̱ in tʋnʋp imi̱la̱yak na wehpoa ya̱ ʋpa fehna tuk ok makheto himak a̱ Filistin ʋhleha ha̱ ʋbi kʋt i̱ shahlichi fehna hetuk keyu̱? achi tok.

³¹ Mihma nitak yʋmma Filistin ʋhleha ha̱ ʋbi kʋt Mikmash ʋttʋt isht ia hosh Aichalon a̱ isht ona tok. Mihma okla tikambi fehna tok.

³² Mihma okla hʋt na wehpoa o̱ yihlepʋt chukfʋlhpoa, micha wak, micha wak ushi aiena ka ishi cha, yʋmmak inli ka ʋbit aka bohli tok: mihma okla hʋt issish a̱ aieninchit ʋpa tok.

³³ Yohmi ma Sal a̱ im anolit, Yakeh! okla hʋt issish a̱ aieninchit ʋpa hosh Chihowa ya̱ i̱ yoshubʋshke, achi tok. Mihma, Hʋch ik aia̱hloshke; himak nitak a̱ tʋli chito tonolichit ishit hʋs sʋm ʋlashke, achi tok.

³⁴ Micha Sal ʋt, It i̱ filamolit okla ha̱ ibachukowʋt, Hatak puta kʋt i̱ wak, micha hatak puta kʋt in chukfʋlhpoa ya̱ ilʋppa isht ʋm ʋla cha, ʋbit ʋpashke, micha issish a̱ aieninchit ʋpa hosh Chihowa ya̱ hʋch ik i̱ yoshubo kashke, achi tok. Mihma okla moma kash hatak ʋt i̱ wak aiyukali kʋt ninak yʋmma isht ʋla cha, yʋmma ai ʋbi tok.

³⁵ Mihma Sal ʋt alta ya̱ Chihowa ya̱ im ikbi tok; yʋmmʋt alta ʋmmona mak o̱ Chihowa ya̱ im ikbi tok.

³⁶ Mihma Sal ʋt, Ninak a̱ Filistin ʋhleha ha̱ kiloh iakaiya cha, keho wehponli na onnashke, mikma hatak achʋfa kia ke hlakoficho kashke, achi tok. Mihma, Nana hosh achukma chim ahobakmʋt, ish yʋmihchashke, okla achi tok. Yohmi ma naholitopa isht ʋtta yʋt, Chitokaka ak o̱ akanʋllit il onashke, achi tok.

³⁷ Mihma Sal ʋt Chitokaka im anukfila ha̱ i̱ ponaklot, Filistin ʋhleha ha̱ iakaiyʋt ia la chi̱ cho? Islael ibbak a̱ ish fohka hinla cho? achi tok. Yʋmohmi kia nitak yʋmma anumpa falama ya̱ ik emo ki tok.

³⁸ Mihma Sal ʋt, Okla pehlichi moma kʋt akanʋllit bili̱ka hʋsh lashke; micha himak nitak a̱ nan ashʋchi kʋt kanima hatukma pisʋt hʋsh ithaiyanashke.

³⁹ Yʋmmak osh Islael a̱ hlakofichi tuk osh Chihowa ʋt okcha̱ya pulla hoka sʋso Chonahlan ak atuk oh kia illi pullashke, achi tok. Yohmi kia okla moma itintakla ka hatak achʋfa kia nana ik acho ki tok.

⁴⁰ Yohmi ma Islael moma ka, In tʋnnʋp achʋfa ka hʋsh hielikma, ʋno micha Chonahlan sʋso itatuklo li kʋt in tʋnnʋp e hielashke, im achi tok. Mihma okla hʋt Sal a̱, Nana ka achukma ish aiahni kak osh ish yʋmihchashke, im achi tok.

⁴¹ Yʋmohmi ma Sal ʋt Islael in Chitokaka Chihowa ya̱, Na shoeli a̱hli kak o̱ ish imashke, im achi tok. Mihma Sal, micha Chonahlan ak o̱ ishi tok: amba okla hʋto hlakofi tok.

⁴² Mihma Sal ʋt, Ʋno, micha Chonahlan sʋso hak o̱ na shoeli ish pi onochashke, achi tok. Mihma Chonahlan ak o̱ onʋtola tok.

⁴³ Mihma Sal ʋt Chonahlan a̱, Nana ish yʋmihchi tuk ʋt ʋm anolí, im achi tok. Mihma Chonahlan ʋt im anolit, Peh foi bila iskʋtinosi ho̱ tʋbi sʋbbak fohka tuk a̱ wishakchi a̱ okʋchʋt isht ʋpa li tuk, atuk osh yakeh! sʋlla chishke, achi tok.

⁴⁴ Mihma Sal ʋt afalamichit, Chitokaka yʋt yakohmi, micha i̱ shahli kia yʋmihchashke, chilli pulla chi̱ hoke, Chonahlan ma! achi tok.

⁴⁵ Mihma okla hʋt Sal a̱, Chonahlan, yʋmmak osh Islael hlakofichi chito ilʋppa atahli tuk ʋt illa chi̱ cho? ik yohmo pullashke; Chihowa ʋt okcha̱ya pulla ka noshkobo ha̱ pa̱shi o̱ hieli kʋt achʋfa kia aka itula he keyu hoke; himak nitak a̱ Chitokaka iba toksʋli tuk oka, okla im achi tok. Yʋmohmi hosh Chonahlan a̱ okla hlakofichi na ik illo ki tok.

⁴⁶ Yʋmohmi ma Sal ʋt Filistin ʋhleha iakaiya kʋt falama tok: mihma Filistin ʋhleha hʋt ilap aiasha ya̱ ona tok.

⁴⁷ Yohmi ho̱ Sal ʋt apehlichika ishit Islael a̱ pehliechi cha, in tʋnʋp moma afolubli ka itibit, Moab, micha Ammon in chipota, micha Etom, micha Sobah i̱ mi̱ko ʋhleha, micha Filistin okla aiena ka itibi tok; micha kanima yo̱ pit filemakmʋt, imaiya tok.

⁴⁸ Micha tʋshka chipota itʋnahli cha, Amalek okla ha̱ issot kanchi cha, Islael wehpuli tuk ʋhleha ibbak a̱ hlakofichi tok oke.

⁴⁹ Yohmi ka Sal ushi ʋhleha hʋt Chonahlan, micha Ishui, micha Melchi‐shua: mikma ushetik tuklo hohchifo kʋt Melab, mikma nakfish hohchifo kʋt Michal atok.

⁵⁰ Mikma Sal tekchi hohchifo kʋt Ahinoam, Ahimaas ushetik atok: mikma tʋshka chipota i̱ kʋpetʋni ʋt Sal imoshi Ne hak o̱ ushi yosh Abne hohchifo tok.

⁵¹ Mikma Kish ak osh Sal a̱ i̱ki atok: mikma Abne i̱ki Ne ʋt Abiel ushi atok.

⁵² Mihma Sal i̱ nitak moma ka Filistin okla ha̱ itin tanampi kʋt palʋmmi fehna tok: mihma Sal ʋt hatak hlampko, keyukmʋt hatak chilita nukwia iksho kia pisakmʋt, il ai ishi beka tok.