1 Samuel 13 - Chahta Holisso Holitopa 1886

¹ Sal ʋt afʋmmi achʋfa ho̱ mi̱ko tok; mihmʋt afʋmmi tuklo ho̱ Islael a̱ i̱ mi̱ko mʋt,

² Sal ʋt Islael a̱ hatak tahlepa sipokni tuchina ho̱ il atokoli tok: yʋmma tahlepa sipokni tuklo hosh Sal a̱ apehʋt Mikmash, micha Behlel nʋnih ha̱ a̱sha ma, tahlepa sipokni achʋfa kʋt Chonahlan ak o̱ apehʋt Benchamin yakni Kibeah yak o̱ a̱sha tok: micha okla inla kʋno im ʋlbina aiyukali pit tihleli tok.

³ Mihma Chonahlan ʋt Filistin ʋhleha i̱ holihta Keba hikia ka issot kanchi tok; mihma Filistin ʋhleha hʋt haklo tok. Mihma Sal ʋt yakni moma afullota ka hlopullichit isht pu̱fa ya̱ olachit, Heblu ʋhleha hʋt haklashke, achi tok.

⁴ Mihma Islael moma kʋt, Sal ʋt Filistin ʋhleha i̱ holihta ya̱ issot kanchi na Filistin ʋhleha hʋt Islael a̱ i̱ yuwalʋshke, achi ho̱ haklo tok: mihma okla hʋt im annoʋt Sal a̱ iakaiyʋt Kilkal a̱ ai itʋnaha tok.

⁵ Mihma Filistin okla hʋt Islael a̱ itiba chi̱ hosh itihoyot, tʋnʋp itichanʋlli tahlepa sipokni pokoli tuchina, micha issuba om binili hatak ʋt tahlepa sipokni hannali, micha okla hʋt apakna kʋt shinuk osh okhʋta ʋhli aiasha kak o̱ chiyuhmi hosh itʋnaha tok: micha mintit ʋla cha, Belh‐afen i̱ hʋshi akochaka imma Mikmash ak o̱ a binachi tok.

⁶ Islael hatak ʋhleha hʋt ai itikonofa ho̱ hieli kʋt pisa mʋt, (okla komunta hokʋt,) yohmi mʋt okla hʋt hichukbi, micha kohchi foka, micha achahaka, micha yakni chiluk aiena ka a luma tok.

⁷ Mihma Heblu kaniohmi kʋt Chatan a̱ hlopullit Kat, micha Kileat a̱ ona tok. Sal ʋto Kilkal akinli ho̱ anta moma ma; okla moma kʋt wʋnihinchi hosh iakaiya tok.

⁸ Mihma nitak untuklo ho̱ Samuel ʋt apesa tuk mak o̱ ahanta tok: yohmi kia Samuel ʋt Kilkal a̱ ik ono tok mihma okla hʋt ita fimimpʋt taha tok.

⁹ Mihma Sal ʋt, Na hukmit isht aiokpʋchi, micha nan isht iti̱nanaiyʋchi isht aiokpʋchi ishit hʋs sʋm ʋlashke, achi tok. Micha na hukmit isht aiokpʋchi ya̱ im issa tok.

¹⁰ Atuk o̱ yakohmi tok, na hukmit isht aiokpʋchit issa mak inli ma, yakeh! Samuel ʋt ʋla tok: mihma Sal ʋt aiokpʋcha chi̱ hosh kohchʋt afamʋt ia tok.

¹¹ Mihma Samuel ʋt Sal a̱, Nanta mak o̱ ish yʋmihchi cho? im achi tok. Mihma Sal ʋt, Okla hʋt a̱ filʋmmʋt ita fimimpʋt taha, mihma nitak ʋlhpisa tuk ont ai ʋlhpesa ma chik lo, mihma Filistin ʋhleha hʋt iti hoyot Mikmash a̱ itʋnaha ka pisa li hokʋt,

¹² Yohmi kak o̱, Himak a̱ Filistin ʋhleha hʋt mintit Kilkal a̱ ʋlʋt, si onʋtola chi̱ hokak o̱ Chihowa ya̱ ak im asilhhoshke, achi li hosh ʋlhpesa keyu ahni li ak inli kia, nahukmit isht aiokpʋchi ya̱ im issa li tuk oke, achi tok.

¹³ Mihma Samuel ʋt Sal a̱, Im anukfila iksho chiyuhmi hosh ish yʋmihchishke; chin Chitokaka Chihowa i̱ nan ʋlhpisa chim apihi̱sa tuk a̱ chik holitobloshke: himak a̱ Chihowa ʋt Islael ish apehlichika kʋllochi na hikia kʋt bilia hetuk oka.

¹⁴ Amba himak ano ish apehlichika ʋt ma̱ha̱ya he keyushke. Chihowa ʋt hatak ilap chu̱kʋsh ak inli iakaiya yo̱ hoyo tuk oke; micha yʋmmak osh im okla i̱ mi̱ko tobʋt pehliecha chi̱ ho̱ Chihowa ʋt apesa tuk oke; Chihowa ʋt nana chim apihi̱sa tuk a̱ chik im antio tuk oke, im achi tok.

¹⁵ Mihma Samuel ʋt wakayʋt Kilkal a̱ ʋttʋt Benchamin i̱ yakni Kibeah ya̱ ona tok. Mihma Sal ʋt okla apehʋt a̱sha moma ka hotihna ma, hatak tahlepa hannali foka tok.

¹⁶ Mihma Sal, micha ushi Chonahlan, micha okla apehʋt a̱sha tuk ʋt Benchamin yakni Kibeah yak o̱ aiasha tok: amba Filistin ʋhleha hʋto Mikmash ak o̱ binachit aiasha tok.

¹⁷ Mihma na wehpuli ʋt a̱ya tuchina hosh Filistin ʋhleha i̱ binah ha̱ kohchʋt minti tok; a̱ya achʋfa kʋt fullotʋt Shual yakni Oflah ona hina hak o̱ ia tok.

¹⁸ Mikma a̱ya achʋfa kʋt fullotʋt Belh‐holon pilla ho̱ ia tok: mikma a̱ya achʋfa kʋt fullotʋt yakni ʋhli Seboim okfa pit bachaya yakni haiaka pilla hina yak o̱ ia tok.

¹⁹ Yʋmohmi ma tʋli boli ʋt Islael yakni moma ka iksho tok: (Filistin okla hʋt Heblu ʋhleha hʋt bʋshpo falaia, micha tʋbi tʋli halupa on tʋla ya̱ ikbi yoba ná, achi hatok oka.)

²⁰ Yohmi kia Islael moma kʋt i̱ yakni isht patafa, micha in chahe iskifa, micha im iskifa, micha i̱ yakni isht patafa tikba hikia aiyukali ka halupala chi̱ hosh Filistin aiasha ka ona beka tok.

²¹ Yohmi kia yakni isht patafa tikba hikia, micha in chahe iskifa, micha tʋli chulakto, micha iskifa, micha ishit bahli ishit halupacha chi̱ kʋt ishit mihlofa ya̱ ieshi tok.

²² Atuk o̱ yakohmi tok, itibi nitak a̱ okla Sal, micha Chonahlan apehʋt a̱sha ka bʋshpo falaia kia, micha tʋbi tʋli halupa on tʋla nana kia iksho tok: amba Sal, micha ushi Chonahlan ak illa hosh i̱shi tok.

²³ Mihma Filistin tʋshka chipota ʋt kohchʋt iʋt Mikmash ahlopulli ya̱ ona tok.