1 Samuel 12 - Chahta Holisso Holitopa 1886

¹ Mihma Samuel ʋt Islael moma ka, Yakeh! nana hʋs sʋm achi tuk chim anumpa moma ka hʋchi̱ haponaklo li tuk oke: micha mi̱ko hʋchi pehlichi ikbi li tuk oke.

² Yʋmohmi ka Yakeh! himak a̱ mi̱ko ʋt hʋchi tikba a nowʋshke: mikma sa sipoknit noshkobo tohbit sa taiyahʋshke: mikma yakeh! sʋso ʋhleha hʋt hʋchi takla aha̱shwʋshke: micha ʋlla sa momʋt mihintit himak nitak a̱ ont ʋhli ka hʋchi tikba a noho̱wa li tuk oke.

³ Yakeh! yak hikia lishke: kʋna i̱ wak a̱ ishi li tok o̱? keyukmʋt kʋna im issuba haksobish falaia ya̱ ishi li tok o̱? kʋta hak o̱ haksichi li tok o? kʋta hak o̱ ilbʋshali li tok o? kʋta ibbak o̱ nahʋlbina ya̱ ai ishi lish, sa nishkin a̱ isht luhmichi li tok oh cho? Chihowa, micha ahamʋt im ʋlhtoka itikba aiena ka hʋs si atokolashke; mikma hʋchi̱ falʋmminchi lashke, im achi tok.

⁴ Mihma, Ish pi haksichi tok keyu hoke, micha ish pilbʋshali tok keyu hoke, micha nana achʋfa kia hatak kʋna ibbak o̱ ish ai ishi tok keyu hoke, okla achi tok.

⁵ Mihma, Nana achʋfa kia sʋbbak a̱ fo̱ka ka hʋsh ahayuchi tuk keyu, Chihowa ʋt hʋchi atokoli yoke, micha ahamʋt im ʋlhtoka ʋt hʋchi atokoli yoke, achi tok. Mihma afalamichit, Atokoli yoke, okla achi tok.

⁶ Mihma Samuel ʋt okla ha̱, Chihowa ak osh Moses, micha Alon a̱ holitoblit hilechi tok oke, micha hʋch i̱ki ʋhleha Echip yakni ya̱ apehlichit kohcha tok oke, im achi tok.

⁷ Yʋmohmi hoka himak a̱ lumʋt hʋsh hieli na Chihowa ʋt hʋchishno, micha hʋch i̱ki ʋhleha ai ʋlhpiesa ho̱ hʋchi̱ yʋmihinchi tok a̱ Chihowa itikba ya̱ atokolit hʋchim anumpohonli lashke.

⁸ Chekob ʋt Echip a̱ ona tok; atuk o̱ hʋch i̱ki ʋhleha hʋt Chihowa ya̱ i̱ pa̱ha̱ya tok: mihma Chihowa ʋt Moses, micha Alon itatuklo ho̱ pit pila na, hʋch i̱ki ʋhleha pehlichit Echip a̱ ai ishit kohcha cha, ilʋppa binohlichi tok.

⁹ Atuk o̱ in Chitokaka Chihowa ya̱ im ahaha̱ksi ma, kanchit Sisela Haso tʋshka chipota i̱ kʋpitʋni yo̱ ibbak fohki cha, Filistin okla ibbak fohki mʋt, micha Moab i̱ mi̱ko ibbak fohki na itibit in tanahampi tok.

¹⁰ Mihma Chihowa ya̱ i̱ pa̱ha̱ya cha, Pi yoshuba tuk oke, Chihowa ya̱ e kanchi cha, Baalim, micha Ashtalolh il aiokpʋchi tuk okʋt: yohmi kia himak ano pin tʋnʋp ibbak a̱ ish pi ahlakofichikma, e chi aiokpʋchashke, achi tok.

¹¹ Mihma Chihowa ʋt Chelub‐baal, micha Betan, micha Chefhlah, micha Samuel aiena ka hʋchi̱ pila na hʋchin tʋnʋp ibbak hʋch ahlakofichit afullolichi na achukma ho̱ hʋsh aiasha tuk oke.

¹² Micha Ammon in chipota i̱ mi̱ko Nahash ʋt ant hʋchin tanampi na hʋsh pisa mʋt, hʋchin Chitokaka Chihowa ʋt hʋchi̱ mi̱ko yokak o̱, hʋchishno ʋt, Aha̱! amba mi̱ko yosh pi pehlicha chi̱ hoke, hʋsh achi tok.

¹³ Yʋmohmi hoka himak a̱ mi̱ko hʋsh atokoli tuk, micha hʋsh ahni tuk ʋt hʋsh pisashke, micha yakeh! Chihowa ʋt mi̱ko hʋchi pehlichi hʋchi̱ hilechishke.

¹⁴ Chihowa ya̱ hʋsh holitobli cha, i̱ nutakʋt im anumpa ha̱ im antiʋt, Chihowa i̱ nan ʋlhpisa hʋch ik kobʋffo, yʋmohmikmʋt hʋchishno, micha mi̱ko hʋchi pehlichi aiena kʋt hʋchin Chitokaka Chihowa ya̱ iakaiyʋt hʋsh ma̱ha̱ya chi̱ hoke.

¹⁵ Amba Chihowa im anumpa ha̱ hʋsh im antia keyu hosh, amba Chihowa i̱ nan ʋlhpisa ha̱ hʋsh kobʋffikma, hʋch i̱ki ʋhleha i̱ sanali tok a̱ chohmit Chihowa ibbak ʋt hʋch i̱ sanala hi oke.

¹⁶ Yʋmohmi ka himak ano hielit nana afehna Chihowa ʋt hʋchi nishkin itikba ya̱ a yʋmihcha chi̱ ka hʋsh pisashke.

¹⁷ Himak nitak ʋt onush ʋmo keyu̱? Chihowa ya̱ i̱ pa̱ya likma, hiloha, micha umba aiena ka et pila chi̱ hoke; yʋmohmi ho̱ mi̱ko hʋsh asilhha kʋt, Chihowa itikba nana hʋsh ashʋchi kʋt chinto fehna ka hʋsh ithaiyanashke, im achi tok.

¹⁸ Yʋmohmi ho̱ Samuel ʋt Chihowa ya̱ i̱ pa̱ya tok; mihma Chihowa ʋt nitak yʋmma hiloha, micha umba aiena ka et pila tok: mihma okla moma kʋt Chihowa, micha Samuel aiena ka i̱ nukshopa fehna tok.

¹⁹ Mihma okla moma kʋt Samuel a̱, Chin tishu ʋhleha ha̱ isht anumpulit, chin Chitokaka Chihowa ya̱ ish im asilhhashke, yohmi na ik pillo kashke: mi̱ko il asilhha kʋt nan il ashʋchi ya̱ il iba fohki tuk okʋt, achi tok.

²⁰ Mihma Samuel ʋt okla moma ka, Hʋchi nukshopa ná; nan ashʋchi ilʋppa moma ka hʋsh yʋmihchi tuk oke: yohmi kia Chihowa ya̱ hʋsh iakaiya kʋt, naksika hʋch ik shanaiyo hosh, amba chu̱kʋsh ai oklu̱ha hosh Chihowa ya̱ hʋsh im antiashke.

²¹ Micha naksika hʋch ik shanaiyo kashke: yʋmma hʋsh yʋmohmikmʋt, nana ik ahobo, nana apela he keyu, micha na hlakoficha he keyu aiena ka hʋsh asitia hinla hokʋt; nana ik ahobo hoka.

²² Chihowa ʋt ilap hohchifo holitopa ak atuk pulla kak o̱ im okla ha̱ kancha he keyu: Chihowa ʋt ʋlhpesa ahni pulla cha, im okla hʋch ikbi tuk okʋt,

²³ Micha ʋno ʋt anumpa ilbʋsha isht hʋchi anumpuli li kʋt issa lish, Chihowa ya̱ i̱ yoshuba la hi a̱ Chitokaka yʋt ʋm olʋbashke; amba achukma, micha aiʋlhpiesa hina yak o̱ hʋch ithʋnanchi la chi̱ hoke.

²⁴ Peh Chihowa ya̱ hʋsh i̱ nukwia cha, aia̱hlit chu̱kʋsh oklu̱ha hosh hʋsh im antiashke: nana achinto fehna hʋchim atahli tuk a̱ hʋsh anukfillashke.

²⁵ Amba nana ik ʋlhpeso hʋsh yʋmohmi kʋt imomakmʋt, hʋchishno, micha hʋchi̱ mi̱ko aiena kʋt illit taha hi oke, im achi tok.