1 Samuel 11 - Chahta Holisso Holitopa 1886

¹ Yohmi ma Nahash Ammonait ʋt ʋla cha, Chabesh Kileat i̱ sanalit ont binanchi tok: mihma Chabesh hatak moma kʋt Nahash a̱, Nana it im ʋlhpisa ish pit im apesa na e chim antiashke, im achi tok.

² Mihma Nahash Ammonait ash osh afalamichit, Ilʋppak ok mak o̱ Islael moma ka ishit hofahya yosh in takala chi̱ ho̱ hʋchi nishkin isht impakimma moma ka kocha wehli li hok mak osh nana it im ʋlhpisa ya̱ hʋch itim apesa la chi̱ hoke, im achi tok.

³ Mihma Chabesh im asʋnonchi ʋhleha hʋt, Nitak untuklo ho̱ ish pima na Islael aiasha fullota anumpa shaliʋhleha ha̱ e tihlelashke: yʋmohmi na hatak pi hlakoficha hinla kʋt ikshokmak o̱ e chi̱ kohchashke, im achi tok.

⁴ Yʋmohmi ma anumpa shali ʋhleha hash osh Kibeah Sal ai ʋtta ona tok; micha anumpa hash okla a ha̱klo ho̱ anoli tok: mihma okla moma kʋt chitolit yaiya tok.

⁵ Mihma yakeh! Sal ʋt wak a̱ iakaiyʋt yakni haiaka ya̱ kohchʋt minti tok; mihma Sal ʋt, Okla hʋt nanta i̱ katiohmi hosh yaiya cho? achi ma, Chabesh hatak ʋhleha hʋt anumpa anoli kash im anoli tok.

⁶ Mihma Sal ʋt anumpa yʋmma haklo ma, Chitokaka imi Shilombish ʋt onʋtola tok, mihma nukhobelʋt chu̱kʋsh libbi fehna tok.

⁷ Micha wak toksʋli yok achʋfa ho̱ ishi cha, bʋshlit tushahlichit taiyahli cha, anumpa shali ʋhleha ibbak fohkit, Islael abinili fullota ka pilʋt, Kʋna hosh Sal, micha Samuel itatuklo ka kohchʋt ik iakaiyokma, i̱ wak toksʋli ya̱ yakohmichashke, achi tok. Mihma Chihowa i̱ nukwia kʋt okla ha̱ onʋtoyula cha, achʋfa chiyuhmit okla kohcha tok.

⁸ Yʋmohmi ma Besek a̱ a hotihna ma, Islael im ʋlla ʋhleha hʋt tahlepa sipokni tahlepa tuchina ma, Chutah hatak ʋhleha hʋt tahlepa sipokni pokoli tuchina tok.

⁹ Micha anumpa shali ʋhleha ʋla kash, Chabesh Kileat hatak ʋhleha ha̱ ilʋppak o̱ hʋsh im achashke, Onnaha̱ lʋshpʋt tahakma hʋchi apela ʋt ona chi̱ hoke, im achi tok. Atuk o̱ anumpa shali ʋhleha hash osh Chabesh hatak ʋhleha ha̱ ont im anoli tok: mihma okla na yukpa tok.

¹⁰ Yʋmohmi ma Chabesh hatak ʋhleha hʋt, Onna ha ya̱ e chi̱ kohchakma, nana ho̱ ʋlhpesa hʋsh ahnikmʋt, hʋsh pi yʋmihchashke, achi tok.

¹¹ Atuk o̱ onna ma yakohmi tok, Sal ʋt okla apehlichi tuchina ho̱ hilechi tok; micha onnahinli atoni yo̱ in tʋnʋp ititakla ka iba chukowa cha, Ammonait ʋhleha ʋbit isht iʋt nitak lʋshpa taha ka isht ona tok: atuk o̱ yakohmi tok, hlako̱fi tuk ʋt itafimimpʋt taiyaha cha, tuklot itachʋnaiyʋt a̱ya kʋt iksho ki tok.

¹² Mihma okla hʋt Samuel a̱, Kʋta hosh Sal ʋt pi̱ mi̱ko ya chi̱ cho? achi tuk mʋto? yʋmma achi tuk hatak ʋhleha ha isht hʋsh la na e bashke, im achi tok.

¹³ Mihma Sal ʋt, Himak nitak a̱ hatak nana hosh illa he keyu; himak nitak a̱ Chihowa ak osh Islael a̱ hlakofichi hoka, achi tok.

¹⁴ Yʋmohmi ma Samuel ʋt okla ha̱, Inta! Kilkal ak o̱ kiloh ia cha, mi̱ko ya̱ himonʋchit il atokolashke, im achi tok.

¹⁵ Mihma okla moma kʋt Kilkal a̱ ona tok: micha Kilkal yʋmmak o̱ Sal a̱ Chihowa itikba ya̱ mi̱ko okla ai ikbi tok: micha yʋmmak o̱ it i̱ nanaiyʋchi isht aiokpʋchi ya̱ ʋbit Chihowa itikba isht ai asha tok; micha yʋmmak o̱ Sal micha Islael hatak ʋhleha moma kʋt na yukpa fehnʋt aiasha tok.