1 Samuel 1 - Chahta Holisso Holitopa 1886

¹ Mihma hatak achʋfa kʋt Lamahlaim‐sofim Eflaim nʋnih minti hosh hohchifo kʋt, Elkanah Eflahlait hatak osh ahanta tok, yʋmmʋt Cheloham ushi, yʋmmʋt Elihu ushi, yʋmmʋt Tohu ushi, yʋmmʋt Suf ushi atok.

² Micha yʋmma tekchi ʋt in tuklo tok; achʋfa hohchifo kʋt Hannah yokma, achʋfa ʋto hohchifo kʋt Peninnah atok: mihma Peninnah ʋt ʋlla im a̱shakma, amba Hannah ʋto ʋlla ik im iksho ki tok.

³ Mihma hatak ilʋppʋt afʋmmikma in tʋmaha holihta ya̱ kohchʋt Shiloh ya̱ onʋt, ʋba nan oklu̱ha il ai eshi Chihowa aiokpʋchit nan ʋbit isht aiokpʋchi beka tok. Mihma Hofni, micha Finehas Eli ushi tuklo Chihowa nan isht im a̱shwa ʋt yʋmma a̱shwa tok.

⁴ Atuk o̱ Elkanah ʋt nan ʋbit isht ai aiokpʋchi nitak ʋt ʋla ma, tekchi Peninnah, micha ushi ʋhleha moma, micha ushetik ʋhleha aiena ka i̱ hopela tok.

⁵ Amba Hannah ano, holhpela tuklo ho̱ ima tok: Hannah ya̱ i̱ hullo hatuk okʋt; yohmi kia Chihowa ʋt im oshʋto ya̱ im okhishta tok.

⁶ Mihma ichapa yʋt Chihowa ʋt im oshʋto im okhishta kak o̱ chu̱kʋsh okpulochi fehnʋt nokowʋchi tok.

⁷ Mihma afʋmmi hosh afʋmmikma Elkanah ʋt yʋmohmi hatuk o̱, Chihowa im aboha ya̱ onakmʋt, yʋmohmit chu̱kʋsh okpulohonchi beka tok; yʋmohmi ma yaiya cha, impa he keyu tok.

⁸ Mihma i̱ hatak Elkanah ʋt, Hannah ma! nanta katiohmi ho̱ ish yaiya cha, ish impa he keyu cho? micha nanta katiohmi ho̱ chi chu̱kʋsh ʋt nukha̱klo cho? ushi pokoli kak kia chim i̱ shahli li keyu cho? im achi tok.

⁹ Yʋmohmi ma Shiloh ya̱ nan ai impʋt, micha nan ishkot issa ma, Hannah ʋt wakaya tok: (mihma Eli na holitompa isht ʋtta yʋt Chihowa in tempel toni̱k bili̱ka ai om binili hikia ho̱ om binili tok.)

¹⁰ Mihma Hannah ash osh chu̱kʋsh nukhahʋmmi cha, Chihowa im asihi̱hlʋt yaha̱ya fehna tok.

¹¹ Mihmʋt ilap im anukfila hosh Chihowa im ai a̱hlicha he anumpa il onochit, Ʋba nan oklu̱ha il aieshi Chihowa ma! chin tishu ohoyo ilbʋsha ka ish pisa pulla mʋhli, micha is sʋthaiyana cha, chin tishu ohoyo ha̱ ik chim ahakso hosh, amba chin tishu ohoyo ha̱ ʋlla nakni yo̱ ish ima pullakma, yʋmohmikma okcha̱yʋt ahanta nitak moma ka Chihowa ya̱ ima la hi oke; mikma nutakhish ishit sha̱fa yʋt noshkobo onʋtoyula hi keyu hoke, achi tok.

¹² Atuk o̱ yakohmi tok, Chihowa itikba ya̱ anumpa ilbʋsha anumpohonli imoma ma, Eli ʋt itih ha atokolit pisa tok.

¹³ Mihma Hannah ʋt chu̱kʋsh ak inli anumpohonli tok; itiʋlbi ak illa hosh ilhkoli ma, amba im anumpa hano ik haklo tok: yohmi hatuk osh Eli ʋt haksi ho̱ im ahoba tok.

¹⁴ Mihma Eli ʋt, Chi haksi na hopaki kʋt katiohma chi̱ cho? chim oka pa̱ki ya̱ ish kanʋllichashke, im achi tok.

¹⁵ Mihma Hannah ʋt afalamichit, Keyú, a̱ shahli ma! ohoyo chu̱kʋsh nukha̱klo sia hoke: oka pa̱ki, micha nan ishko kʋllo nana kia ishko li tuk keyu hoke, amba Chihowa itikba ya̱ sa chu̱kʋsh a kocha pit fohobli li hoke.

¹⁶ Chin tishu ohoyo ha̱ Belial ushetik chik si apeso kashke: nana a̱ nukha̱klo, micha isht a sʋlbʋsha kʋt laua kak osh anohonlit anumpohonli li himakʋshke, achi tok.

¹⁷ Mihma Eli ʋt afalamichit, Chi nuktaiyalʋt ish a̱yashke: mikma Islael in Chitokaka ʋt nan asilhha ish im asilhha tuk a̱ chimashke, achi tok.

¹⁸ Mihma, Chin tishu ohoyo hʋt chi tikba ya̱ isht i̱ kana ya̱ ai ahayuchashke, achi tok. Yʋmohmi mʋt ohoyo hash osh ia cha, impa mʋt, himmakma nashuka ik il apisso tok.

¹⁹ Mihma onna ha̱ onnahinli moma ho̱ okla wakaya cha, Chihowa itikba ai aiokpʋchi mʋt, falamʋt in chuka Lamah ha̱ ona tok: mihma Elkanah ʋt tekchi Hannah ya̱ ithana tok; mihma Chihowa ʋt ithaiyana tok.

²⁰ Yʋmohmi ho̱ ont yakohmi tok, Hannah ʋt ʋlla shali hayʋt nitak ont ai ʋlhpiesa ma, ʋlla nakni yo̱ eshi cha, Samuel hochifo tok; Chihowa ya̱ im asilhha li tuk okʋt, achi tok.

²¹ Mihma hatak Elkanah ash osh, micha in chuka achʋfa aiena kʋt afʋmmikma, nan ʋbit isht aiokpʋchi im issa chi̱, micha ilap im anukfila hosh Chihowa nan im issa he anumpa il onochit ai a̱hlicha chi̱ hosh ia tok.

²² Yohmi kia Hannah ʋt ik aiyo tok: i̱ hatak a̱, Ʋlla ʋt pishit ik isso ki̱sha ka ia la he keyu; yohmi ka yohmik mʋno, Chihowa itikba hikia he, micha yʋmmak o̱ ahanta na bilia hi o̱ isht ona la hi oke, im achi tok.

²³ Mihma i̱ hatak Elkanah ʋt, Nana chim ʋlhpesa kak osh ish yʋmihchashke; ish antʋt ʋlla pishi ka ish issʋchi ha yashke; peh Chihowa yak osh im anumpa ha̱ ai a̱hlichashke: im achi tok. Yohmi ho̱ ohoyo hash osh ahantʋt ʋlla ya̱ pishechi tuk osh issʋchi tok.

²⁴ Atuk osh pishechi tuk ʋt issʋchi mʋt, ishi cha, wak hobʋk himita tuchina, micha bota tohbi efah achʋfa, micha okapa̱ki kotoba achʋfa aiena ka ishi cha, Chihowa in chuka Shiloh ya̱ isht ona tok: mihma ʋlla yash osh himita tok.

²⁵ Mihma wak hobʋk himita achʋfa ho̱ okla ʋbi cha, ʋlla yash Eli ya̱ isht im ona tok.

²⁶ Mihma Hannah ash osh, A̱ shahli ma! chimi shilombish ʋt okcha̱ya pulla ka a̱ shahli ma! ʋno ak osh ohoyo hʋt chi̱ bili̱ka ilʋppa Chihowa ya̱ im asilhhʋt hikia tok mih sia mak oke.

²⁷ Ʋlla ilʋppak o̱ asilhha li tok oke: atuk o̱ Chihowa ʋt nan asilhha im asilhha li tok a̱ ʋma tok oke.

²⁸ Yʋmohmi hoka Chihowa ya̱ im pota li ak inli hoke: okcha̱ya ititakla ka Chihowa ya̱ im pota li hoke. Mihma yʋmmak o̱ Chihowa ya̱ ai aiokpʋchi tok.