1 Pita 5 - Chahta Holisso Holitopa 1886

Chukfʋlhpoba ushi a̱ achukmʋt ʋbanumpeshi ʋtta yʋt ipihinta chi̱ ka i̱ miha, 1; mihmʋt itibapishi himithoa yʋt nan im antia he, mikmʋt moma kʋt il oktamblit yichinut Setan a i̱ sanala he i̱ miha.

¹ Ʋbanʋmpuli iksa apesʋchi ʋhleha hʋch itin takla aiasha ka nana atohnochi li kʋt, ʋno ak kia ʋbanumpuli iksa ibai apesʋchi, micha Klaist ʋt ilbaha̱sha tok puta atokowa anoli, micha na holitopa kʋt otaiyana hi oka ibai isha he ak inli sia hoke.

² Chihowa in chukfʋlhpoba hʋch itin takla ai asha ka hʋsh ipihinta kʋt, yohmi la he atuk okʋt ik kaniohmi kia ahni keyu, amba yohmi likbano ahnit, ai ʋlhpiesa keyu isht a hofahya he nan isht ahayuchi bʋnna keyu, amba hʋchim anukfila hʋt ʋlhtaha achukma hosh apesʋchit hʋsh pehlichashke.

³ Yohmi kʋt Chihowa immi hoka i̱ shahli chiyuhmit ahanta he keyu, amba chukfʋlhpoba ya̱ nan isht im ʋlbʋchi ya he tuk.

⁴ Yohmi ka chukfʋlhpoba apesʋchi Mi̱ko yʋt ant il otʋninchikma, isht a holitopa iachuka okpula himma keyu mak o̱ hʋsh isha hi oke.

⁵ Yʋmmak i̱ chiyuhmit himita hʋchia hʋt asʋnonchi ya̱ hʋsh im antiashke; a̱hli, moyuma kʋt hʋsh it im antia cha, im anukfila akanlosi ho̱ isht hʋsh shemashke: yohmi ka Chihowa hokʋt ilapunla yano i̱ sanali cha, im anukfila akanlosi yokʋno isht i̱ kana ya̱ ima chatuk oka.

⁶ Yʋmohmi hoka Chihowa ibbak hlampko nuta ya̱ hʋsh im il akanlosechashke; yohmi na ont ai yʋmohma he ai ʋlhpiesak ma ʋba hʋchi wakeli mak inlashke:

⁷ Anukfila isht a hʋchi komunta puta ka yummak o̱ hʋsh onochashke: yohmi ka yʋmmʋt hʋchi anukfihinli hoka.

⁸ Ahah! ahnit, hʋchi o̱kchashke, hʋchi̱ sanali nan isht ahullo okpulo yʋt kʋna kia isht nanʋbli bʋnna kʋt, hoho̱yot, koi chito woho̱ha chiyuhmi hosh noho̱wa hoka.

⁹ Yʋmmak oka na yimma kʋllo ai a̱hli hosh hʋsh i̱ sanalashke: hʋsh itibapishi ʋhleha yakni ilʋppa ai asha hokʋt, na palʋmmi yʋmmak o̱ chiyuhmi puta ka pihi̱sa ha tok oka, hʋsh ithaiyanashke.

¹⁰ Amba Chihowa isht i̱ kana chinto yʋmmak osh Chisʋs Klaist ha tok pulla mak o̱ ilap isht aholitopa bilia yoka il esha he mak o̱ pi atokoli tok ʋt, yakosi itin takla hʋsh ilbaha̱sha ha yak o̱, ai a̱hlichit kʋllochit hilechit, hlampkohonchit, chu̱kʋsh fitikʋchi iksho ho̱ hʋchi anukfokihinchashke.

¹¹ Yʋmmak o̱ isht a holitopʋt, mi̱kot bilia yʋt immit biliashke. Amen.

¹² Silfanʋs hʋsh itibapishi ai a̱hli ahni li ha tuk osh, anumpa kanomosi ka holissochit ima li ho̱, isht hʋchim ia tok; yohmi kʋt nana hʋchi̱ miha li kʋt, hʋsh a hikia yʋmmak osh Chihowa hʋt isht i̱ kana ai a̱hli mak o̱, atokolit hʋchim anoli lishke.

¹³ Ʋbanumpuli iksa Babulon hikia kʋt, hʋch ibai ʋlhtoka ha tok ʋt hʋchi aiokpʋchishke; mikma sʋso Makʋs ʋt yohmi ak inli.

¹⁴ It i̱ hullo it i̱ su̱ksowa isht hʋsh it aiokpʋchashke. Klaist ibai achʋfa hʋsh moyuma ka isht it i̱ nanaiya kʋt hʋchi anukfoyukashke. Amen.