1 Pita 3 - Chahta Holisso Holitopa 1886

Hatak ʋt im ohoyo itatuklo kʋt nan ʋlhpiesa ho̱ itim anukfilʋt itapela he im abʋchi, 1; 8 it i̱ hullot it ibai achʋfa he; 14 na palʋmmi ka isht it ibai il bʋsha he; 19 Oka falama yʋt ik a̱yo ki̱sha ma okcha̱yʋt aiasha tuk a̱ Klaist ʋt nan i kanimihchi tok a̱ anoli.

¹ Anonti tekchi hʋchia hʋt hʋchi̱ hatak oka hʋsh im antiashke; yohmi na kanima kʋt ʋbanumpa ha̱ ik ahnincho hokmʋt, ʋbanumpa hash ik haklo kia, tekchi ak osh nana a kaniohmi kak o̱, yʋmmʋt ʋlhpesa ahnit isht anukfohka ak inli yoba na;

² Yohmi kʋt haui imma ai yʋmohmi ik hʋchim iksho, micha hʋsh holitobli aiena ka pihi̱sa kak osh yʋmohma hinla hoke.

³ Yʋmma isht shema yʋt pa̱shi tanʋffo, micha tʋli holisso lakna isht shema, micha na fohka fohka aiena paknali isht shema yʋmmak okʋno keyu:

⁴ Amba chu̱kʋsh anu̱kaka a toba hatak luma okpula himma keyu, anukfila yohbi, micha nuktanla isht shema yo̱ fehna yʋmmak ashke; ilʋppak osh nan ai ʋlli chinto fehna Chihowa hʋt ai ahni hoke.

⁵ Nitak tikba ma ilʋppak o̱ yakohmit ohoyo hochukma Chihowa i̱ yimmi ak inli hosh, isht ile shemahanchi kʋt, ilap i̱ hatak a̱ im antia ya tok.

⁶ Sela ak oh kia Eblaham a̱ i̱ shahli hochihi̱fot im antia tok: yʋmmak o̱ ushetik hʋchia hoke, nana ai ʋlhpiesa ka hʋsh yʋmohmi ta̱kla, micha isht a nukshopa he kia hʋch ik i̱ nukshopo hokmʋto.

⁷ Anonti i̱ hatak hʋchia hʋt nana ka ithaiyana hosh ibai ahantʋt, hlampko ik hʋchi lauwo mak o̱ chiyuhmichit, isht i̱ kana ai okcha̱ya bilia hʋsh it ibai isha he mak okʋt, hʋchi tekchi a̱ hʋsh holitoblashke; yohmi ho̱ anumpa ilbʋsha hʋsh anumpohonli kʋt ik ai ataklamo kashke.

⁸ Ai ishtaiyopi ka moyumʋt hʋchim anukfila hʋt ai achʋfa cha, it i̱ nukha̱klot, itibapishi ʋt i̱ hullo chiyuhmit, inla i̱ kanʋt chu̱kʋsh akanlosi mʋt aienashke.

⁹ Micha nana ik achukmo hʋchi yʋmihchikma, nana ik achukmo yo̱ hʋch ik falamincho kashke: micha isht ik hʋchi ahobalokma, isht ik ahobalo yo̱ hʋch ik falamincho kashke; amba ilʋppa ik holbo i̱ kanʋt hʋsh im anumpulashke; ilʋppak o̱ hʋsh yʋmohma hi osh hʋchi ʋlhtoka tok ʋt hʋsh ithana hokʋt, yohmi hosh nan isht ai yukpa ya̱ hʋsh pisa he ʋlhpesa yatok.

¹⁰ Yohmi ka kʋna hosh, Si okcha̱ya cha, nitak hochukma ho̱ pihi̱sa li hokbano ai ahnikmʋt, isunlʋsh oka nana ik achukmo ka i̱ filʋmminchi cha, itiʋlbi yoka na haksichi ya̱ isht ik anumpulo kashke.

¹¹ Nan ik achukmo kʋno i̱ filʋmmi cha, nana achukma kak o̱ yʋmihinchashke; it i̱ nanaiya yak o̱ hoho̱yot, achunanchit iakaiyashke.

¹² Yohmi ka Chitokaka nishkin okʋt ai ʋlhpiesa yokʋno o̱ wakaya, micha haksobish okʋt im anumpa ilbʋsha puta ka in tiwa hoka; amba nana ik achukmo yʋmihchi puta hokʋno Chitokaka nashuka yʋt i̱ sanali hoke.

¹³ Micha nana achukma yʋmihchi yak o̱ iakaiya ʋhleha hʋchia hokma, kʋta hak osh hʋchi hotopala hinla ho̱?

¹⁴ Amba nan ai ʋlhpiesa yak atuk pulla mak o̱ isht hʋsh ilbaha̱sha hokmʋt, hʋchi yukpa hoke; micha nan isht nukshobli yoka i̱ nukshopʋt isht hʋch ik komunto kashke;

¹⁵ Amba Chitokaka Chihowa yak o̱ i̱ nukshopʋt hʋchi chu̱kʋsh isht hʋsh holitoblashke; micha ai okcha̱ya pisa la he ai ahnit hʋchi anukfoyuka a kaniohmi ka hʋchi̱ ponoha̱klo puta ka anukfila akanlosit, holitoblit anumpa falama ka hʋsh ima chi̱ kʋt hʋch im ʋlhtaha kak banashke.

¹⁶ Isht il akostininchi achukma ho̱ hʋsh ieshashke: yʋmohmi ho̱ nana ik achukmo yʋmihchi chohmichit nana ik achukmo isht hʋchi anumpohonli kʋt, Klaist a̱ anukfoyukʋt nana achukma hʋsh yʋmohmi ka, anumpa a̱hli keyu hʋchi onochi tuk ʋhleha hʋt isht a hofahyashke.

¹⁷ Yohmi ka Chihowa hak osh ik yohmi ai ahni hokma, nana achukma ho̱ yʋmohmi cha, isht ilbʋsha kak osh achukma kʋt, nana ik achukmo ho̱ yʋmohmit isht ilbʋsha ka, i̱ shahli hoke.

¹⁸ Yohmi ka Klaist ak kia himonna ma nan ai ashʋchika pulla kak o̱ ai ʋlhpesa yʋt ik ai ʋlhpeso yak o̱ ʋlhtobʋt isht ilbʋsha tok; yohmi hosh pi pehliechit Chihowa ya̱ isht pim ona chi̱ ha tok: haknip okʋto illi ha tok kia, amba shilombish okʋto okcha̱ya tok:

¹⁹ Yʋmmak ash o̱ shilombish yuka ʋhleha ai asha ka iʋt ont isht im anumpohonli ak inli tok:

²⁰ Yʋmmak okʋt nitak tikba ma peni yokʋt toba itin ta̱kla Noah okʋt ahanta nitak yʋmmak ash fehna kʋno, Chihowa hʋt i̱ nukha̱klot isht i̱ nukkilli onochi sʋlaha hosh ahanta ma, im antia he keyu ki tok; peni yʋmmak ash o̱ kanimosi yʋmmʋt shilombish untuchina hosh oka ya̱ isht a hlakofi tok.

²¹ Yʋmmak ash o̱ chiyuhmi hosh himonasi ak kia baptismo yʋt, yʋmmak osh haknip liteha yoka isht kanchi keyu, amba Chihowa itikba isht il akostininchi achukma ai yʋmohma he il apihi̱sʋt, Chisʋs Klaist illi tok kia falamʋt tani tok pulla kak o̱ yʋmohmi kak osh pi okchalinchi ak inli hoke.

²² Yʋmmak okʋt ʋba yakni yoka ona tuk osh, Chihowa im isht im pakimma yak o̱ binili hoke; yʋmmak oka enchil, micha mi̱ko, micha nan ʋlhtoka puta kʋt i̱ nutʋt im antia he ya tok.