1 Pita 2 - Chahta Holisso Holitopa 1886

Nan ik ʋhlpeso isht im anukfila puta ka naksika bohla chi ka i̱ miha, 1; 5 Klaist akosh ti̱kba intola yo̱ okla ai itabana hatuk a̱ anoli; 11 haknip imma nan isht im anukfila yokʋno kano pit kancha chi̱ ka achi; 13 yakni pakna nan apesa ma̱ya ka im antia he; 18 yʋka hʋt kaniohmit i̱ nahollo ya̱ im antia hi a̱ ithʋnachi.

¹ Yʋmohmi hoka isht i̱ nukkilli, na haksichi, nan ilahobi, na potʋnno, anumpa chukushpʋli puta a moyuma ka mokofit naksika hʋsh boyuhli cha;

² Ʋllo̱si himona ʋtta chiyuhmit, yʋmmak o̱ isht a hʋchi hofahantit ai okcha̱ya ya̱ hʋsh ona chi̱ mak osh, ʋbanumpa pishukchi ai a̱hli kak o̱ bʋnna fehnʋt hʋsh hoho̱yashke.

³ Chitokaka yʋt hʋchi̱ kana achukma fehna ho̱ hʋsh akostininchi ai a̱hli hatuk okmʋt;

⁴ Yʋmmak okʋt tʋli okcha̱ya chiyuhmi ho̱ hʋsh im oho̱na ka, hatak okʋto ik ahnincho fehna tok kia, Chihowa hokʋto holitobli fehnʋt atokoli tok;

⁵ Hʋchishno ak kia tʋli okcha̱ya chiyuhmit, shilombish chuka hʋsh toba hosh, na holitompa isht ʋlla holitopa yosh Chisʋs Klaist ak atuk pulla kak o̱, Chihowa hokʋt im ʋlhpiesa ho̱, chu̱kʋsh isht aiokpʋchi puta ka pit hʋsh im ihi̱sa hi a tok.

⁶ Yʋmohmi hoka anonti Holisso Holitopa ya̱ a foyuka kʋt, Yakeh! chukbi in tola tʋli ʋlhtoka, holitopa fehna ho̱ Saion a̱ a bohli lishke: yohmi ka kʋna hosh yʋmmak oka i̱ yimmi hokʋt hofahya he keyu hoke, achi tok.

⁷ Yohmi hoka yʋmma i̱ yimmi hʋchia hokʋno hʋchi̱ holitopa fehna; amba ik im antio yokʋno, chuka ikbi ʋhleha yash ot tʋli ya̱ ik ahnincho ki tok, yʋmmak ash inli hosh chukbi in tola noshkoboka yo̱ toba hoke.

⁸ Micha ik im antio yo̱ ʋbanumpa isht ai ibetʋbli yʋmmak fehna kak osh isht ai ibetʋbla he tʋli, micha isht ai okpula he tʋli chito aiena ho̱, yʋmmak o̱ ai yʋmohma he im ʋlhpihi̱sa tok.

⁹ Amba isht atiaka ʋlhtoka, mi̱ko i̱ na holitompa isht ʋtta; oklushi holitopa, Chihowa immi ai a̱hli fehna hʋchia hoke: yohmi ka yʋmmak osh hʋchi̱ ho̱wʋt ai okhlilika ya̱ a kohchit im atohwikeli chinto ka hʋchi foyuki tuk o̱, ilap isht aiokpahancha he a̱ puta ka otʋninchit hʋsh ano̱honla he a tok:

¹⁰ Yohmi kʋt nitak tikba hokʋno Chihowa im okla hʋchia ha tok keyu kia, himak ano Chihowa im okla hʋchia hoke; isht i̱ kana ya̱ hʋch ik esho ki tok kia, himak ano isht i̱ nukha̱klo ka hʋsh i̱shi tuk oke.

¹¹ A̱ holitopa ʋhleha ma! nana hʋchim ai ahni li kʋt hatak ik ithano, micha ilap i̱ yakni keyu ai itʋnowa chiyuhmit, haknip imma nan ahni, yʋmmʋt shilombish in tanampi yoka hʋsh i̱ filaha̱mashke:

¹² Nana hʋsh a kaniohmi kʋt achukma hosh ʋbanumpa ik ithano okla ha̱ iba takla hʋsh ahantashke: yohmi na nana ik achukmo yʋmihchi chohmichit hʋchi̱ sanalit anumpohonli kia, nana achukma puta hʋsh yimihinchi ka pihi̱sakmʋt, Chihowa yʋt i̱ nowʋt a̱ya nitak oka yʋmma okla holitoblashke.

¹³ Chitokaka yak atuk pulla mak o̱ hatak i̱ nan ʋlhpisa puta ka hʋsh im antiashke: mi̱ko yok má moma i̱ shahli yo̱ chohmichit hʋsh holitoblashke.

¹⁴ Micha nan ʋlhtoka ʋhleha nana ik achukmo yʋmohmi puta hokʋno nan ʋlhpisa onochikmʋt, nana achukma yʋmohmi yak okʋno aiokpʋcha chi̱ ho̱, mi̱ko yʋt atokohonli tok a̱ hʋsh holitoblashke.

¹⁵ Yohmi ka nana kʋt ai ʋlhpiesa ho̱ hʋsh yʋmohmi hosh hatak im anukfila iksho nan ik ithano itih puta ka hʋsh i̱ kamala he yak o̱, Chihowa hokʋt ai ahni hoke:

¹⁶ Yuka keyu hʋchia kia, hʋsh yʋmohmi kak osh nan ik ʋlhpeso ya̱ isht hʋsh ompohomo ná: amba Chihowa in tishu ʋhleha mak o̱ hʋsh chiyuhmashke.

¹⁷ Hatak puta ka hʋsh holitoblashke. Hʋsh itibapishi ʋhleha ha̱ hʋsh i̱ hullashke. Chihowa ya̱ i̱ nukshopʋt hʋsh holitoblashke. Mi̱ko yoka hʋsh holitoblashke.

¹⁸ Yuka hʋchia hʋt isht a holitopa he ʋlhpesa ho̱ hʋchi̱ nahullo yoka isht hʋsh im antia kʋt achukma, micha im anukfila yohbi aiena kak bano keyu, amba hʋch i̱ kʋllo aiena ka hʋsh im antia ak inlashke.

¹⁹ Yohmi ka hatak ʋt chu̱kʋsh ak osh Chihowa ya̱ isht im ʋlhpiesa kak osh isht a nukha̱klo ya̱ ʋlhpiesa ahnit, ai ʋlhpiesa keyu ho̱ isht ilbaha̱sha hokma, ilʋppʋt isht i̱ kana hoke.

²⁰ Yohmi ka nana ai ʋlhpiesa keyu ho̱ hʋsh yʋmohmi tuk osh ʋlhpiesa ahnit, isht hʋchi boho̱wa hokmʋt, yʋmmʋt nan isht annoa achukma nanta ho̱? amba nana ai ʋlhpiesa ho̱ hʋsh yʋmohmi tuk kia, ʋlhpiesa ahnit isht hʋch ilbaha̱sha hokʋno, ilʋppak o̱ Chihowa hokʋto isht im ʋlhpiesa hoke.

²¹ Yohmi ka ilʋppak o̱ hʋsh yʋmohma he osh hʋchi ʋlhtoka tok; pishno ak atuk pulla mak o̱ Klaist ak kia ilbaha̱sha kʋt, ilap a noho̱wa tok a̱ il iakaiya he mak o̱ pim abahanchi hatok oka:

²² Yʋmmʋt nan ashʋchi tok keyu, haksichi kia itih ha̱ foyuka tok keyu:

²³ Yʋmmʋt ilap a̱ isht ik ahobalot anumpuli mak o̱, afalaminchit isht ik ahobalot anumpuli keyu; na palʋmmi onochi ma, na palʋmmi onocha hé kia miha tok keyu; amba ai ʋlhpiesa apihi̱sa yak o̱ il im issa tok:

²⁴ Yʋmmak osh nan il ai ashʋchika ya̱ ilap haknip fehna ak o̱ ilap inlit il onochi hosh iti ya̱ takali tok: yohmi ho̱ nan ai ashʋchika puta il im ihinli hosh, nan ai ʋlhpiesa ya̱ il im okcha̱ya chi̱ ha tok: yʋmmʋt fahama tok ak o̱ isht hʋchi hlakofi hoke.

²⁵ Yohmi ka chukfʋlhpoba tamoa chiyuhmit hʋsh itʋnowa tok kia, himonasi kano chukfʋlhpoba Apesʋchi micha hʋchimi shilombish ma Nan im atahli yoka falamʋt hʋsh im ona hoke.