1 Pita 1 - Chahta Holisso Holitopa 1886

Shilombish nan isht i̱ kana laua pulla kak o̱ Chihowa ya̱ aiokpahanchi, 1; 10 Hopaii ʋhleha pulla ho̱ Klaist isht im ai okcha̱ya yʋt tikbanli anoho̱wa tok a̱ anoli; 13 Chihowa im anumpa ho̱ isht ai ʋtta hatuk okʋt, nan ashʋchi ikshot ma̱ya chi ka i̱ miha.

¹ Pita, Chisʋs Klaist im apostel okʋt i̱ yakni keyu ai it a fimimpʋt Pontʋs, Kaleshi Kappatosia, Asia, micha Bihlinia aiena ai asha ka pit ai okpʋchi kʋt,

² I̱ki Chihowa hak osh tikbanli ithaiyanʋt, okcha̱ya he atokoli tok yʋmmak oka Shilombish Holitopa yak osh kashoho̱fi na, nana ka im antia ho̱ Chisʋs Klaist im issish isht o̱ fima tok hʋchia hoka; Nan isht i̱ kana yʋt hʋchi anukfoyuka, micha nan isht it i̱ nanaiya yʋt hʋchin lauashke.

³ Pin Chitokaka Chisʋs Klaist I̱ki, micha in Chihowa hokʋt holitopashke, yʋmmak osh pi̱ nukha̱klo chinto hatuk osh, Chisʋs Klaist ʋt illi tuk kia, falaminchit tanichi kak osh anonti himonʋchit pikbi tok o̱, na yukpa fehna hosh,

⁴ Ai ahanta okpula himma keyu, micha liteha he keyu, micha aksha he keyu ho̱ e hoho̱yo ka, hʋchimmi hosh ʋba yakni ya̱ ai ʋlhtaiyaha hoke;

⁵ Yʋmmak oka na yimmi pulla kak o̱ Chihowa imi hlampko kʋt i̱shi na ai okcha̱ya nitak ishtaiyopi otaiyana chi̱ ka ona hoke.

⁶ Yʋmmak oka nan isht a hʋchi yukpa fehna; yohmi kia yakosi itintakla ka ai yʋmohma he ʋlhpesa ho̱ isht imomaka pisa ilaiyuka hʋsh pihi̱sa kak osh isht a hʋchi nukha̱klo hoke:

⁷ Yohmi kia na hʋchi yimmi ka isht imomaka pihi̱sa kak osh holitopa kʋt, tʋli holisso lakna okpulo chatuk, yʋmmak oka luak isht imomaka pisa chatuk ak kia i̱ shahli fehna hokʋt, Chisʋs Klaist ʋt haiakakma, isht a holitopa, micha annoa chinto aiena kʋt isht a hʋchi otaiyani hokbano;

⁸ Yʋmmak oka hʋch ik peso kia, hʋsh i̱ hullo; yʋmmak ash himonasi ka hʋsh pi̱sa keyu ak inli kia, hʋch i̱ yimmi hosh, nan isht ilaiyukpa annoa he keyu, micha isht a holitopa alotowa aiena ka isht a hʋchi yukpa:

⁹ Na hʋchi yimmi isht ʋlhtoba ka hʋsh ihi̱shi kʋt, hʋchi shilombish isht ai okcha̱ya yak fehna hoke.

¹⁰ Ai okcha̱ya yʋmmak o̱ hopaii ʋhleha hʋt a ponaha̱klo, micha achunanchit hoho̱yo tok, isht i̱ kana yosh hʋchim ʋla hi oka yʋmmʋt tikbanli anohonli kʋt;

¹¹ Nitak katiohmi, micha nitak nanta, Chisʋs imi Shilombish ʋt yʋmmak ash anukfoyuka hatuk ʋt Chisʋs ʋt isht ai ilbʋsha he puta, micha yʋmohmi hosh isht a holitopa he aiena ka tikbanli atokolit anoli tok a̱, ai ahnit hoho̱yo tok.

¹² Yʋmmak ash o̱ im otaiyani kʋt, ilap ak atuk ak o̱ yohmi keyu; amba pishno ak atuk mak o̱ nana ka otʋnihinchi tok yʋmmak ash himonasi ka ʋbanumpa ha̱ Shilombish Holitopa ʋba yakni mihinti hosh awant a̱ya ho̱, isht hʋchim anumpohonli kash osh hʋchim anohonli tok; nana yʋmma puta kash enchil ʋhleha hokʋt akostininchi bahana fehna hoke.

¹³ Yʋmohmi hoka hʋchi chu̱kʋsh a̱ okchʋlit aiksiachi cha, ahah! ahnit, Chisʋs Klaist ʋt ant haiakakma, isht i̱ kana yosh hʋchim ʋla hi okʋt ai a̱hli bano hosh hʋsh hoho̱yashke.

¹⁴ Yohmi kʋt ʋlla nan im antia yo̱ hʋsh chiyuhmit, tikba hokʋno nana hʋch ik ithano hosh chu̱kʋsh nan ahni kak o̱ hʋsh yʋmohmi beka tok ʋt, hʋch ik ile hobacho kashke:

¹⁵ Amba hʋsh im antia chi̱ hʋchi̱ ho̱wa tok, yʋmmʋt nan ai ashʋchika ik im iksho hoka, nan ai ashʋchika ik hʋch im iksho ak inlashke:

¹⁶ Ʋno ʋt nan ai ashʋchika ik sʋm iksho hoka, nan ai ashʋchika ik hʋch im iksho kashke; achi hosh holihi̱so hoka;

¹⁷ Yohmi ka I̱ki ak o̱ hʋsh im asithha hokmʋt, yʋmmak okʋt hatak it i̱ shahshohlechi iksho hosh hatak puta kʋt ilap a kaniohmi tuk ak o̱ isht im apesa yoka, ilʋppa hʋsh ai ahanta ta̱kla kʋt hʋsh holitoblashke:

¹⁸ Yohmi kʋt hʋch i̱ki ʋhleha hak o̱ hʋsh im ai ithʋna tok nana hʋsh a kaniohmi ik achukmo yoka a hʋchi filʋmmichi kʋt nana okpula he tʋli hʋta, micha tʋli holisso lakna chiyuhmi ho̱ isht hʋchi ʋlhtoba tok keyu kʋt hʋsh ithanushke;

¹⁹ Amba Klaist im issish holitopa Chukfʋlhpobushi ai okpuloka iksho, micha liteha iksho yak a tok;

²⁰ Yʋmmak osh yakni intolahpi ʋt ik tobo pilla kash o̱ tikbanli ʋlhtoka tok osh, hʋchishno yak atuk pulla kak o̱ himak ont ishtaiyopi ilʋppa otaiyani tok oke;

²¹ Hʋchishno yʋt yʋmmak atuk pulla kak o̱ Chihowa ha̱ hʋch i̱ yimmi pulla kʋt, yʋmmak osh illi tuk a̱ falaminchit tanichi cha, isht a holitopa ka ima tok oka; ai okcha̱ya ya̱ Chihowa yak o̱ im ai ishi la he ai ahnit, hʋch i̱ yimmashke.

²² Yʋmohmi ka Shilombish ak osh hʋchi anukfoyuka ho̱ ʋbanumpa ai a̱hli ka hʋsh im antia hosh, hʋchi shilombish a̱ hʋsh kashofi hatuk osh, itibapishi ʋhleha hoka ilahobi keyu hosh isht i̱ shahlichi fehna hosh hʋsh it i̱ hullashke;

²³ Chihowa im anumpa, yʋmmʋt ma̱ha̱yʋt bilia yak atuk pulla kak o̱ na nihi okpula he keyu yo̱ atuklant isht hʋsh a toba hoke.

²⁴ Yohmi ka haknip puta kʋt haiyukpulo yak o̱ chiyuhmi, micha hatak isht a holitopa moma kʋt haiyu̱kpulo pakanli yak o̱ chiyuhmi hoke. Haiyu̱kpulo yash ot bʋshikma, pakanli yash ot liwelit taha hoke.

²⁵ Amba Chihowa im anumpa hokʋto ma̱ha̱yʋt bilia hoke. Yohmi ka anumpa ilʋppak o̱ ʋbanumpa hʋt isht a hʋchim anuhumpa hatuk oke.