1 Mi̱ko 9 - Chahta Holisso Holitopa 1886

¹ Atuk o̱ yakohmi tok, Solomon ʋt Chihowa in chuka, micha mi̱ko in chuka, micha Solomon ʋt ʋlhpesa ai ahni cha, yʋmihcha he aiahni tuk moma ka ikbit taiyahli ma;

² Kibeon a̱ ai i̱ haiaka tok chohmit, Chihowa ʋt Solomon a̱ atukla ma i̱ haiaka tok.

³ Micha Chihowa ʋt, Sa tikba ya̱ anumpa ilbʋsha ish anumpulit, micha is sa̱ nukha̱klokbano ahnit is sʋm asilhha ka, haiyaklo li tuk oke: chuka ilʋppa ish ikbi tuk a̱ sa hohchifo ha̱ a bohli li̱ bilia chi̱ hosh, hullochi li tuk oke: mikma a̱ holhponayo, micha sa chu̱kʋsh ʋt itoyula na bilia chi̱ hoke.

⁴ Mikma chi̱ki Lewi chu̱kʋsh a̱hli, micha ai ʋlhpiesʋt a̱ya tok ak inli, chohmit sa tikba a noho̱wʋt nana chi̱ miha li tuk moma kak o̱ yʋmihchit, a nanʋlhpisa puta, micha nan ai isht apesa li puta ka ish ieshikma:

⁵ Yohmikma chi̱ki Lewi ya̱ Islael i̱ mi̱ko ai ombinili holitompa ya̱ hatak ʋt binila hi ʋt ik chim iksho ka he keyu hoke, achit i̱ miha li tok mak osh, chim apehlichika ai ombinili holitompa kʋllochit hilechi likma, Islael a̱ ish apehliechi na bilia hi oke.

⁶ Amba hʋs siakaiya tuk ʋt, hʋsh shanaiya cha, hʋchishno, keyukmʋt hʋchim ʋlla ʋhleha kanima kʋt ʋm anumpa ʋlhpisa puta, micha a̱ nan ʋlhpisa puta hʋchi tikba takalichi li tuk a̱ hʋchik iesho hosh, amba naholbʋt toba puta ka iʋt im antiʋt hʋsh aiokpʋchikma,

⁷ Yohmikma Islael a̱ yakni ima li tok ʋt ai ishit kanchi la hi oke; mikmʋt chuka ilʋppa sa hohchʋfo hʋt ai itoyula chi̱ ho̱ hullochi li tuk ʋt, sa tikba ai ishit kanchi la hi oke: mikma Islael a̱ okla moma kʋt ishit yopulit anumpuli, micha nan isht achi ya hi oke.

⁸ Mikma chuka ilʋppa, ilʋppʋt chaha ka kʋna hosh bili̱ka ant iakmʋt, nukhlakancha cha, Owí yakeh! acha hi oke: micha, Nanta katiohmi ho̱ Chihowa ʋt yakni ilʋppa, micha chuka ilʋppa yakohmichi tuk oh cho? acha hi oke.

⁹ Mikma afalamichit, In Chitokaka Chihowa, yʋmmak osh i̱ki ʋhleha ha̱ Echip yakni ya̱ a pehlichit kohcha tuk a̱ issa cha, naholbʋt toba puta ka asitia cha, aiokpʋchit im antia kak atuk oke; yʋmohmi kak o̱ Chihowa ʋt nana ik achʋkmo moma ilʋppa onochi tuk oke, acha hi oke, achi tok.

¹⁰ Atuk o̱ afʋmmi pokoli tuklo kʋt ont taha ma yakohmi tok, Solomon ʋt chuka tuklo, Chihowa in chuka yash, micha mi̱ko in chuka yash ikbit tahli ma,

¹¹ (Taia i̱ mi̱ko Hilam ʋt, Solomon ʋt ahni tuk mak o̱, chuahla iti, micha tiak holba iti, micha tʋli holisso lakna aiena ka im atahli tuk atok,) yʋmohmi ma mi̱ko Solomon ʋt Hilam a̱ tʋmaha holihta pokoli tuklo Kalili yakni talohma̱ya ka ima tok.

¹² Mihma Hilam ʋt tʋmaha holihta puta Solomon ʋt ima tuk ash, pisa chi̱ hosh Taia ya̱ a kohchʋt minti tok; atuk osh ik ahnincho tok.

¹³ Micha, Itibapishi li ma! tʋmaha holihta ilʋppʋt nanta ho̱ is sʋma tuk oh cho? achi tok. Mihmʋt Kabul yakni hochifo tok o̱ himak nitak a̱ moma hoke.

¹⁴ Mihma Hilam ʋt mi̱ko ya̱ tʋli holisso lakna talent tahlepa achʋfa cha pokoli tuklo ho̱ i̱ pila tok.

¹⁵ Ilʋppa yakohmi kak o̱ mi̱ko Solomon ʋt nan atokoli ya̱ apesa tok; Chihowa in chuka, micha ilap in chuka, micha Millo, micha Chelusalem in tʋli holihta, micha Haso, micha Mekitto, micha Kese aiena ka ikba chi̱ kak atok.

¹⁶ Echip i̱ mi̱ko Feleo ʋt iʋt Kese ya̱ ishi cha, luak ishit hukmit tahli mʋt, Kenan okla tʋmaha holihta yʋmma aiasha tuk a̱ ʋbit tahli cha, ushetik Solomon tekchi ya̱ habenʋchi tok.

¹⁷ Mihma Solomon ʋt Kese, micha Belh‐holon sokbish pilla,

¹⁸ Micha Baalalh, micha Talmo yakni haiaka yakni yash talaia ka,

¹⁹ Micha tʋmaha holihta ʋlhpoyak aiasha Solomon ʋt im aiasha, micha tʋmaha holihta tʋnʋp im itichanʋlli puta aiasha, micha tʋmaha holihta im issuba ombinili aiasha aiena ka ikbi tok; micha Solomon ʋt Chelusalem, micha Lebanon, micha apehlichi yakni moma ka ai ikba he aiahni tok ʋt ikbi tok.

²⁰ Micha Amolait ʋhleha, Hittait ʋhleha, Pelissait ʋhleha, Hifait ʋhleha, micha Chebusait ʋhleha okcha̱yʋt a̱sha tuk moma Islael im ʋlla ʋhleha keyu ka,

²¹ Im ʋlla ʋhleha hʋt iaka̱yʋt yakni yash aiasha tuk, yʋmma Islael im ʋlla ʋhleha hʋt ʋbit tahlit ʋmohmicha he keyu tok, yʋmma puta ka Solomon ʋt yuka toksʋli onochit i̱ hoyo tok o̱ himak nitak a̱ moma hoke.

²² Amba Islael im ʋlla ʋhleha hokʋno Solomon ʋt hatak yuka ʋhleha ik ikbo tok: amba hatak tʋnʋp a̱ya, micha in tishu ʋhleha, micha i̱ holitompa ʋhleha, micha i̱ kʋpitʋni ʋhleha, micha tʋnʋp im itichanʋlli puta isht a̱ya ʋhleha, micha issuba ombinili ʋhleha yosh im aiasha tok.

²³ Ilʋppa puta kak osh Solomon i̱ natoksʋli apistikeli nanʋlhtoka i̱ shahli atok; tahlepa tahlapi cha pokoli tahlapi, yʋmmak osh okla toksʋli nana isht aiasha ka apistikeli atok.

²⁴ Amba Feleo ushetik ʋt Lewi in tʋmaha holihta ya̱ kohchʋt Solomon ʋt im ikbi tuk in chuka ya̱ ʋla tok: yohmi ma Millo ya̱ ikbi tok.

²⁵ Micha Solomon ʋt afʋmmikma hituchina ha nahukmit isht aiokpʋchi, micha iti̱nanaiyʋchit isht aiokpʋchi ya̱ alta Chihowa im ikbi tuk ʋt onochit im ihi̱sa beka tok; micha nabalama ya̱ alta Chihowa itikba hikia ka onochit hukmi beka tok: yʋmohmit chuka ya̱ atahli tok.

²⁶ Mihmʋt mi̱ko Solomon ʋt peni hochito kohta shali kanohmi ho̱ okhʋta humma on talaka Etom yakni Elolh ichapaka Esion‐kebe ya̱ ai ikbi tok.

²⁷ Mihma Hilam ʋt in tishu ʋhleha peni hochito kohta shali isht a̱ya imponna, okhʋta ha̱ ithana puta ka Solomon in tishu ʋhleha ha̱ aieninchit pila tok.

²⁸ Mihma Ofi ya̱ ona cha, yʋmma tʋli holisso lakna talent tahlepa ushta cha pokoli tuklo ho̱, ai ishit mi̱ko Solomon a̱ isht im ʋla tok.