1 Mi̱ko 8 - Chahta Holisso Holitopa 1886

¹ Yohmi ma Solomon ʋt Islael im asʋnonchi ʋhleha, micha apehlichi puta i̱ noshkoboka ʋhleha moma, Islael im ʋlla ʋhleha i̱ki ʋhleha holitompa ʋhleha ha̱ hoyot, mi̱ko Solomon ʋt Chelusalem a̱ anta tuk o̱, im ai itʋnahli tok; yohmi kʋt Chihowa nan it im apesa afoyuka itombi holitopa ya̱ Lewi in tʋmaha holihta, yʋmmʋt Saion a̱ a kohchit isht ʋla chi̱ hatok.

² Mihma Islael hatak ʋhleha moma kʋt impʋchi hullo hʋshi Ehlanim, yʋmmʋt hʋshi isht untuklo ka Solomon mi̱ko ya̱ im itʋnaha tok.

³ Mihma Islael im asʋnonchi ʋhleha moma kʋt ona ma, naholitompa isht asha ʋhleha hʋt itombi holitopa ya̱ sholi tok.

⁴ Micha Chihowa im itombi holitopa, micha okla moma in tabenakel, micha nan aiʋlhto hullo puta aiena tabenakel aiasha tuk, yʋmma puta ka naholitompa isht asha ʋhleha, micha Lefait ʋhleha aiena kʋt isht ʋla tok.

⁵ Mihma mi̱ko Solomon, micha Islael okla moma kʋt itombi holitopa itikba ya̱ ai im itʋnahʋt apehʋt a̱sha tuk aiena kʋt chukfʋlhpoa, micha wak aiena ka ʋbit isht aiokpahanchi ka, apakna kʋt annoa he keyu, micha holhtina he keyu tok.

⁶ Mihma naholitompa isht asha ʋhleha hʋt Chihowa nan it im apesa afoyuka itombi holitopa ya̱ atalaia, Chihowa ai ile haiakʋchi aholitopa moma i̱ shahli ya̱ isht onʋt, chelubim tuklo kash i̱ sanahchi nuta ya̱ talali tok.

⁷ Chelubim tuklo kʋt i̱ sanahchi tuklo ka itombi holitopa atalaia paknaka ya̱ ashatʋblichi cha, chelubim tuklo kʋt itombi holitopa, micha isht itibasholi tuklo ka paknaka ya̱ ompohomo tok.

⁸ Micha isht itibasholi tuklo kash okla shu̱fi na, isht itibasholi tuklo i̱ noshkobo hʋt itombi holitopa ya̱ a takohma̱ya kʋt, Chihowa ai ile haiakʋchi aholitopa moma i̱ shahli itikba aholitopa ya̱ haia̱ka tok; micha kocha ik a peso tok: micha yʋmmak o̱ aiasha na himak nitak a̱ ant ʋhli hoke.

⁹ Micha itombi holitopa ya̱ nana hosh fo̱ka tok keyu, amba tʋli patʋssa tuklo ak illa tok, yʋmmak oka Islael im ʋlla ʋhleha hʋt Echip yakni ya̱ kohcha ma, Chihowa ʋt it im apesa na Holeb a̱sha ma, Moses ʋt a fohki tok.

¹⁰ Atuk o̱ yakohmi tok, naholitompa isht asha ʋhleha hʋt aholitopa ya̱ kohcha ma, Chihowa in chuka ya̱ hoshonti kʋt alota tok.

¹¹ Yohmi ma naholitompa isht asha ʋhleha hʋt hoshonti pulla kak o̱, hielit nan isht asha he keyu tok: Chihowa im aholitopa yʋt Chihowa in chuka ya̱ alota tok oka.

¹² Yohmi ma Solomon ʋt anumpulit, Chihowa ʋt, Okhlili sukko ho̱ ahanta he, miha tok.

¹³ Ish ai ahanta he chuka, atalaia achʋfa ish ai ahanta na bilia he, chim ikbi li pulla tuk oke, achi tok.

¹⁴ Mihmʋt mi̱ko ʋt nashuka ya̱ filimmi mʋt, Islael okla moma ka anumpa yukpali onochi tok: (mihma Islael okla moma kʋt wakayʋt hieli tok.)

¹⁵ Micha, Islael in Chitokaka Chihowa ʋt a̱ki Lewi ya̱ itih ha̱ isht im anumpohonlit, micha ibbak a̱ isht aia̱hlichit ahanchi mʋt,

¹⁶ Ʋm okla Islael a̱ pehliechit Echip a̱ a kohchi li tok, nitak yʋmma itintakla ka chuka ʋm ikbi na, sa hohchifo hʋt a foyuka chi̱ ka, Islael apehlichi moma ka tʋmaha holihta kanima kia ak atokoloshke; yohmi kia Lewi ak osh ʋm okla Islael a̱ pehliecha chi̱ ho̱ atokoli li tok oke, ahanchi tok ʋt holitopashke.

¹⁷ Atuk o̱ a̱ki Lewi ʋt Islael in Chitokaka Chihowa hohchifo ha̱ chuka im ikba chi̱ kʋt chu̱kʋsh a̱ anukfoyuka tok.

¹⁸ Mihma Chihowa ʋt a̱ki Lewi ya̱, Sa hohchifo ha̱ chuka is sʋm ikba chi̱ kʋt, chi chu̱kʋsh a̱ anukfoyuka tuk oke; chi chu̱kʋsh a̱ anukfoyuka hoka, ʋlhpesa ho̱ ish yʋmohmi tuk oke.

¹⁹ Yohmi kia chishno ʋt chuka yash ish ikba he keyu: amba chiso hʋt chikfoka ya̱ a kohcha chi̱ kak osh, yʋmmak osh sa hohchifo ha̱ chuka ʋm ikba chi̱ hoke, im ahanchi tok.

²⁰ Atuk osh Chihowa ʋt im anumpa ha̱ anumpohonli tok ʋt ont aia̱hlichishke: micha a̱ki Lewi ya̱ ʋlhtobʋt wakaya lishke, micha Islael im ai ombinili holitompa ya̱ Chihowa ʋt miha tok mak o̱ ombinili lishke; micha Islael in Chitokaka Chihowa hohchifo ha̱ chuka im ikbi lishke.

²¹ Micha pi̱ki ʋhleha ha̱ Echip yakni ya̱ a pehlichit kohchi mʋt, Chihowa ʋt nan it im apesa tok afoyuka itombi holitopa atalaia chi̱ ka ai ikbi lishke, achi tok.

²² Mihmʋt, Islael okla moma kʋt pi̱sa ho̱, Solomon ʋt Chihowa im alta i tikba ya̱ hikia cha, ibbak a̱ ashatʋblichit ʋba pit wieli tok:

²³ Micha, Islael in Chitokaka Chihowa ma! chin tishu ʋhleha hʋt chu̱kʋsh ai oklu̱hʋt chi tikba a noho̱wa hokʋno nan it im apesa, micha nan i̱ nukha̱klo aiena aia̱hlichi chia hoke, ʋba shutik, micha nutaka yakni ya̱ chitokaka chishno chohmi kʋt iksho hoke.

²⁴ Chishno ak osh chin tishu Lewi a̱ki ya̱ nana ish im issa tok ʋt ish ai a̱hlichishke: micha chitih ha̱ isht ish anumpuli tok ʋt chibbak a̱ isht ish ai a̱hlichi na himak nitak ak kia yʋmohmishke.

²⁵ Yʋmohmi hoka himak a̱ Islael in Chitokaka Chihowa ma! chin tishu a̱ki Lewi ya̱ ish im issʋt, Sa tikba Islael im ai ombinili holitompa ya̱ om binila chi̱ kʋt ik chim iksho ka chi̱ keyu hoke: peh itʋnowa kʋt ahah! ahni cha, sa tikba ish a noho̱wa tok chohmit chim ʋlla ʋhleha hʋt sa tikba ish ai itʋnoho̱wa hokma, ish ahanchi tok ʋt himak a̱ ish ai a̱hlichashke.

²⁶ Yohmi ka Islael in Chitokaka ma! himak a̱ chim anumpa ha̱ chin tishu Lewi a̱ki ya̱ ish im anumpuli tok ʋt ai a̱hlashke, chim asilhha lishke.

²⁷ Yohmi kia Chitokaka yʋt yakni ya̱ ahanta hinla mʋhli cho? Yakeh! shutik ont aiʋhli iksho, micha ʋba yakni puta moma i̱ shutik ont ai ʋhli iksho hoh kia chiesha he keyushke; aboha ikbi li tuk ilʋppak okak heto nanta isht ahoba he keyushke.

²⁸ Yohmi kia chin tishu hʋt anumpa ilbʋsha anumpohonli ka, micha a̱ nukha̱klokbano ahnit, chim asihi̱hla ka ish aiokpanchi cha, himak nitak a̱ chin tishu hʋt chi tikba chi̱ pa̱ha̱yʋt, anumpa ilbʋsha anumpohonli ka ish haiyaklashke, an Chitokaka Chihowa ma!

²⁹ Yohmi cha chuka ilʋppa, ilʋppa pilla ho̱, Sa hohchifo hʋt ai itoyula hi oke, ish ahanchi tok okʋt ninak, micha nitak moyuma ka, chi nishkin a̱ onochit ish pihi̱sashke; micha chin tishu hʋt ilʋppa anumpa ilbʋsha et anumpohonlikma, ish haiyaklashke.

³⁰ Micha chin tishu, micha chim okla Islael aiena kʋt ilʋppa et filema cha, pi̱ nukha̱klokbano ahnit, anumpa ilbʋsha et anumpohonlikma, ish i̱ haponaklashke: micha ʋba aholitopa ish ai ahanta kʋt et ish a haklashke; micha ish haklokmʋt, ish i̱ kashofashke.

³¹ Hatak nana kia hatak bi̱ka ya̱ nana im okpʋni na, anumpa kʋllo il onochit anumpula he im apesa na, anumpa kʋllo yash osh chim alta aboha ilʋppa hikia itikba ya̱ ʋlakma,

³² Yohmikma ʋba aholitopa ya̱ et ish a haklo cha, yʋmihchit, micha chin tishu ʋhleha ha̱ nan im apesʋt, nan ashʋchi yash anumpa onochit, ilap nana akaniohmi tuk a̱ noshkobo ha̱ ish onochashke; micha aiʋlhpiesa ya̱ aiʋlhpiesa tuk mak o̱, ahninchit ish im atobbashke.

³³ Chim okla Islael ʋt chi̱ yoshuba tuk atuk osh, in tʋnʋp itikba ya̱ akakoha cha, anonti falamʋt chim ona cha, chi hohchifo ha̱ holitoblichit anumpa ilbʋsha anumpohonlit, micha pi̱ nukha̱klokbano ahnit, aboha ilʋppa et chim asihi̱hlakma,

³⁴ Yohmikma ʋba aholitopa ya̱ et ish a haklo cha, chim okla Islael a̱ nan ashʋchi ya̱ ish i̱ kashofi cha, i̱ki ʋhleha ha̱ yakni ish ima tok ʋt, anonti isht ish lashke.

³⁵ Okla chi̱ yoshuba na, ʋba shutik ʋt okshilita cha ik umbokma, ish ilbʋshalikma, ilʋppa anumpa ilbʋsha et anumpohonlit chi̱ hohchifo ha̱ holitoblichi cha, nanashʋchi ya̱ i̱ filʋmmikma,

³⁶ Yohmikma ʋba aholitopa ya̱ ish a haklo cha, chin tishu ʋhleha, micha chim okla Islael ʋt nan ashʋchi ya̱ ish i̱ kashofi cha, ai itʋnowa he ʋlhpesa hina achukma ya̱ ish im abʋchikmʋt, chi̱ yakni ʋt i̱ yakni ya chi̱ ho̱, ish ima tok ʋt ish on umbʋchashke.

³⁷ Yakni yash hohchʋfo, ililli, shulla, lakna, ha̱wa, keyukmʋt shu̱shi nan‐tahli kanima kia aiashakma, in tʋnʋp ʋt itikonofichit apakfoyupakma, nan‐ililli nana kia, abeka nana kia aiasha na,

³⁸ Anumpa ilbʋsha nana kia, keyukmʋt a̱ nukha̱klokbano ahnit, hatak kʋna kia anumpulikmʋt, keyukmʋt Islael moma kak okma, nana hosh ilap chu̱kʋsh ik achukmo ka ithaiyana cha, ibbak ashatablichit aboha ilʋppa et wielikma,

³⁹ Yohmikma ʋba aholitopa ya̱ ish ai ahanta kʋt et ish a haklo cha, ish i̱ kashofikmʋt ish i̱ yʋmihchi cha, chu̱kʋsh a̱ ish ithaiyana kʋt, hatak moma nana akaniohmi tuk aiyukali kak o̱ ish ihi̱mashke: (chishno, chishno pulla ak illa kak osh, hatak im ʋlla ʋhleha moma chu̱kʋsh a̱ ish ithana hokʋt;)

⁴⁰ Yʋmohmi ho̱ pi̱ki ʋhleha ha̱ yakni ish ima tok a̱, okcha̱yʋt ahanta nitak moma ka, chi̱ nukwiʋt okla aiashashke.

⁴¹ Micha okla inla hatak ʋt chim okla Islael a̱ ai achʋfa keyu hosh, chi hohchifo pulla kak o̱ yakni hopaki kia mintit ʋlakma;

⁴² (Chi̱ hohchifo holitopa chinto, micha chibbak kʋllo, micha chi shakba ashatapa puta ka okla hakla chi̱ hokʋt,) ʋla cha, aboha ilʋppa anumpa ilbʋsha et anumpohonlikma;

⁴³ Ʋba aholitopa ya̱ ish ai ahanta kʋt et ish a haklo cha, okla inla hatak osh nana chim asilhha ka moma ish i̱ yʋmihchashke: yʋmohmi ho̱ okla moma yakni paknaka aiasha kʋt chi̱ hohchifo ha̱ ithana cha, chim okla Islael ak inli chiyuhmit okla chi̱ nukwiashke: micha aboha ikbi li tuk ilʋppʋt chi a hohchifo ka okla ithaiyanashke.

⁴⁴ Chim okla hʋt in tʋnʋp a̱ itiba chi̱ hosh kanima yo̱ ish pila na, kohchʋt ia tuk osh Chihowa ya̱ im ilbʋshʋt tʋmaha holihta ish atokoli tok, micha chi̱ hohchifo ha̱ chuka im ikbi li tuk a̱ et anumpohonlikma;

⁴⁵ Yohmikma anumpa ilbʋsha, micha pi̱ nukha̱klokbano ahnit chim anumpohonli ka, ʋba aholitopa ya et ish a haklo cha, ish apehpoashke.

⁴⁶ Okla chi̱ yoshubakma, (hatak nanta hosh yoshuba keyu kʋt iksho hoka,) mikma ish i̱ nukkilli cha, in tʋnʋp ibbak a̱ ish fohki na, yukachit isht iʋt hopaki hokma, keyukmʋt olanli hokma, nana hosh tʋnʋp i̱ yakni ya̱ isht onakma;

⁴⁷ Yohmi tuk kia yukachit yakni isht ai ona tuk a̱ a̱shʋt il anukfilli cha, nan ashʋchi tuk ʋt ishit nukha̱klo cha, yukachit ishtia tuk i̱ yakni a̱shʋt pi̱ nukha̱klokbano ahnit, chim asihi̱hla cha, Nan il ashʋchi tuk oke, naksika il itʋnowa cha, nahaksi e yʋmohmi tuk oke, okla achikmʋt;

⁴⁸ Yohmi cha in tʋnʋp ʋhleha hʋt yukachit pehlichit ia tuk i̱ yakni ya̱ a̱sha hosh chu̱kʋsh ai oklu̱hanchit, micha shilombish ai oklu̱hanchit falamʋt chim oho̱na cha, anumpa ilbʋsha ya̱ i̱ yakni i̱ki ʋhleha ish ima tok, tʋmaha holihta ish atokoli tok, micha chi̱ hohchifo chuka im ikbi li tuk ash, pilla ha̱ et anumpohonlikma;

⁴⁹ Yohmikma anumpa ilbʋsha anumpohonlit, micha pi̱ nukha̱klokbano ahnit chim asihi̱hla ka, ʋba aholitopa ya̱ ish ai ahanta kʋt et ish a haklo cha, ish apehpoashke;

⁵⁰ Micha chim okla nana chim ashʋchi tuk a̱, micha chi̱ nan ʋlhpisa ya̱ ʋbanʋbli tuk moma ka ish i̱ kashofi cha, yukachit ishtia tuk ʋt, i̱ kana chi̱ ka ish ahni na i̱ nukha̱klashke:

⁵¹ Chim okla, micha chimmi ai ʋlhpiesa yo̱, Echip a̱ apehlichit, tʋli a bila iklʋna ai ishit ish kohcha tok.

⁵² Yʋmohmi hosh chin tishu hʋt a̱ nukha̱klokbano ahnit chim asihi̱hla, micha chim okla Islael ʋt pi̱ nukha̱klokbano ahnit chim asihi̱hla aiena ka, chi̱ holhponayo ha̱ onochit ish pihi̱sa cha, nana a chim asihi̱hla moma ka ish haiyaklashke,

⁵³ Pi̱ki ʋhleha ha̱ Echip a̱ a pehlichit ish kohcha mʋt, chin tishu Moses ish tohno na, anumpuli tok mak o̱, chimmi ha chi̱ hosh, okla moma yakni paknaka moma aiasha ka i̱ filʋmmichit ish ishi tok oke, Chitokaka Chihowa ma! ahanchi tok.

⁵⁴ Atuk osh yakohmi tok, Solomon ʋt anumpa ilbʋsha ilʋppa, micha pi̱ nukha̱klokbano ahnit, Chihowa im anumpohonlit in taiyaha mʋt, iyi̱kalaha ishit hʋchukbihlepʋt ibbak ʋt ʋba pit ashatapʋt, Chihowa im alta itikba ya̱ hikia tuk ʋt wakaya tok.

⁵⁵ Mihmʋt hikia cha, Islael moma ka chitoli hosh anumpa yukpali onochit yak ahanchi tok,

⁵⁶ Chihowa ʋt ahanchi tok mak osh, im okla Islael a̱ afoha ima kʋt, holitopashke: anumpa hochukma in tishu Moses a̱ tohno na anumpuli tok ʋt, ik aia̱hlo kʋt anumpa achʋfa kia ikshoshke.

⁵⁷ Pin Chitokaka Chihowa ʋt pi̱ki ʋhleha ha̱ ibafoyuka tok, chohmit pibafoyukashke: ik pisso, micha ik pi kancho kashke.

⁵⁸ Yohmi cha pi chu̱kʋsh a̱ pi nukfohki na, i̱ hina puta moma ka ai itʋnowʋt, im anumpa ʋlhpisa puta; micha i̱ nanʋlhpisa puta, micha nan ai isht apesa puta aiena, pi̱ki ʋhleha im apesa tok a̱ il ieshashke.

⁵⁹ Mikma Chihowa itikba pi̱ nukha̱klokbano ahnit, anumpa isht anumpohonli li tuk ilʋppʋt nitak, micha ninak moma ka pin Chitokaka Chihowa ya̱ bili̱ka itoyulashke; yʋmohmi na nana hosh a yʋmohma he ʋlhpesakma, in tishu apehpoho̱wa, micha im okla Islael a̱ apehpoho̱wa na biliashke.

⁶⁰ Yohmi ho̱ okla moma yakni paknaka aiasha kʋt, Chihowa ak osh Chitokaka ya, mikma inla ʋt iksho ka ithaiyanashke.

⁶¹ Yʋmohmi hoka hʋchi chu̱kʋsh ʋt pin Chitokaka Chihowa ya̱ im aia̱hlit, himak nitak a̱ hʋsh yʋmohmi kʋt chohmit i̱ nanʋlhpisa puta ka ai itʋnowʋt, im anumpa ʋlhpisa puta ka hʋsh ieshashke.

⁶² Mihma mi̱ko, micha Islael moma aiena kʋt Chihowa itikba ya̱ nan ʋbit isht aiokpʋchi im ihi̱sa tok.

⁶³ Mihma Solomon ʋt it i̱ nanaiyʋchit isht aiokpʋchi ʋbit Chihowa ya̱ im issa kʋt, wak tahlepa sipokni pokoli tuklo akucha tuklo, micha chukfʋlhpoa tahlepa sipokni tahlepa achʋfa cha, tahlepa sipokni pokoli tuklo tok: yʋmohmit mi̱ko, micha Islael im ʋlla ʋhleha moma kʋt Chihowa in chuka ya̱ hullochi tok.

⁶⁴ Nitak yʋmmak inli ka, mi̱ko ʋt Chihowa in chuka itikba talaia tuk, wanuta iklʋna ya̱ hullochi tok: yʋmmak o̱ nahukmit isht aiokpʋchi puta, micha ilhpak isht aiokpʋchi puta, micha it i̱ nanaiyʋchit isht aiokpʋchi yash nia aiena ka ai im ihi̱sa tok; asonak lakna alta Chihowa itikba hikia tuk ʋt iskitini hatuk o̱, nahukmit isht aiokpʋchi puta, micha ilhpak isht aiokpʋchi puta, iti̱ nanaiyʋchit isht aiokpʋchi yash nia aiena kʋt ai onʋtola he keyu hatuk o̱, yʋmohmi tok.

⁶⁵ Nitak yʋmma Solomon, micha Islael moma kʋt apehʋt, okla chito, Hamalh ont a chukowa ka ʋttʋt ia hosh Echip okhina ya̱ ont ʋhli hosh, pin Chitokaka Chihowa itikba ya̱, nitak untuklo cha nitak untuklo, nitak auah ushta ʋlhpiesa ho̱ impʋchi ha̱ isht aiasha tok.

⁶⁶ Nitak isht untuchina ma okla ha̱ tishelichi tok: mihma anumpa yukpali okla onochi cha, Chihowa ʋt in tishu Lewi ya, micha im okla Islael a̱ nana achukma puta i̱ yimihinchi tuk a̱, nayukpʋt chu̱kʋsh yukpa hosh im ʋlbina aiyukali ka ona tok.