1 Mi̱ko 7 - Chahta Holisso Holitopa 1886

¹ Amba Solomon ʋt in chuka akinli ka ikbi kʋt afʋmmi auah tuchina ho̱ isht ahantʋt tahli tok.

² Lebanon yakni haiaka aboha ak kia ikbi tok; falaia kʋt kubit tahlepa achʋfa ma, micha auata kʋt kubit pokoli tahlapi tok, micha chaha kʋt kubit pokoli tuchina tok; chuahla toni̱k puta ai itiakaiya hosh ushtakma, okhowatkʋchi chuahla yosh toni̱k puta kash o̱ kaha ho̱ on talali tok.

³ Mihma okhowatkʋchi toni̱k pokoli ushta akucha tahlapi ai itiakaiya achʋfa ka auah tahlapit ia ho̱, o̱ kaha hʋt chuahla bʋsha yo̱ isht ompoholmo tok.

⁴ Mikma okhissushi puta kʋt ai itiakaiya yʋt tuchina tok; micha atohwikeli ʋt atohwikeli ya̱ itichapa cha, ai itiakaiya yʋt tuchina tok.

⁵ Mikma okhissa puta, micha toni̱k moma kʋt okhissushi puta ka it apissali; micha ai itiakaiya yʋt tuchina hosh atohwikeli ʋt atohwikeli ya̱ it ichapa tok.

⁶ Micha hoshontika ya̱ toni̱k puta on talaia ho̱ ikbi tok, falaia kʋt kubit pokoli tahlapi ma, auata kʋt kubit pokoli tuchina tok; mihma hoshontika yʋt itikba yak o̱ talaia tok; mikma toni̱k inla puta, micha iti okhowata sukko aiena kʋt itikba atok.

⁷ Yohmi mʋt nana ai apesa chi̱ hosh mi̱ko im ai ombinili holitompa atalaia hoshontika ikbit, nana ai apesa hoshontika ikbi tok: mihma iti potʋlhpo ʋttʋt ia hosh ʋba potʋlhpo ona ka chuahla yosh isht ompoholmo tok.

⁸ Micha hoshontika yash anu̱kaka aboha ai ʋtta ʋt wanʋta inla ʋt im atalaia hosh toba kʋt yʋmmak inli chohmi tok. Solomon ʋt tekchi yachi̱ ho̱ Feleo ushetik a̱ ishi tok ʋt, hoshontika ilʋppak inli chohmi ho̱ ikbi tok.

⁹ Ilʋppa puta kʋt tʋli tʋhla ʋlhpisa chohmi anu̱kaka, micha kocha aiena ishit bʋsha ishit bʋsha yosh, holitopa bano hosh intola ʋttʋt ia hosh paknaka ma̱ha̱yʋt ont ʋhli tok; micha yohmit ma̱ha̱ya hosh wanuta chito pilla kocha yʋt yohmi tok.

¹⁰ Mikma intola ʋt tʋli holitopa tʋli hochito atok; tʋli kubit pokoli, micha tʋli kubit untuchina tok.

¹¹ Mikma ʋba ʋt tʋli holitopa, tʋli tʋhla ʋlhpisa chohmi, micha chuahla aiena atok.

¹² Mikma wanuta chito ʋt apakfoyupa kʋt tʋli tʋhla ai itionʋtola ʋt tuchinakma, chuahla yosh itiakaiyʋt fullota, Chihowa in chuka i̱ wanuta anu̱kaka fehna, micha chuka i̱ hoshontika itatu̱klo kʋt yʋmohmi tok.

¹³ Mihma mi̱ko Solomon ʋt Hilam a̱ pit hoyot Taia ya̱ ont ai isht ʋla tok.

¹⁴ Yʋmmʋt Naftali apehlichika ai achʋfa yosh ohoyo ʋlhtakla ushi yo̱ i̱ki ʋt Taia hatak o̱ asonak lakna pilisa atok; micha hopoyuksʋt nan ithana fehna cha, asonak lakna pilisa puta ka imponna tok. Mihmʋt mi̱ko Solomon a̱ im ʋla cha, na toksʋli moma ka im atahli tok.

¹⁵ Asonak lakna toni̱k tuklo, chaha kʋt kubit auahtuchina bi̱ka ho̱ ikbi tok: micha ponola isht ʋlhpisa kubit auah tuklo hosh apakfopa bi̱ka tok.

¹⁶ Micha toni̱k tuklo kash pakna on taloha chi̱ ka, asonak lakna bilelit akmochit noshkobo tuklo ikbi tok: noshkobo achʋfa kʋt chaha kʋt kubit tahlapi ma, noshkobo achʋfa ʋt kubit tahlapi tok.

¹⁷ Micha nan okshichanlit tʋnna, micha nan ititakʋli itʋpana yo̱ noshkobo ʋt toni̱k tuklo kash on taloha yash im ikbi tok: noshkobo achʋfa ya̱ untuklo ma, noshkobo achʋfa ya̱ untuklo ho̱ ikbi tok.

¹⁸ Micha toni̱k tuklo kash ikbi mʋt, pomeklanat puta ai itiakaiya ʋt tuklo ho̱ nan okshichanlit tʋnna achʋfa yash on takohlichit apakfoblit toni̱k paknaka on talaia noshkobo ha̱ ompohomo tok, micha noshkobo achʋfa ya̱ yʋmihchi tok.

¹⁹ Micha toni̱k tuklo kash on taloha noshkobo ya̱ lili holbʋt inchu̱wa kubit ushta hosh tobʋt hoshontika yash itikba hiohma̱ya tok.

²⁰ Micha toni̱k tuklo kash on taloha noshkobo kibikshi bili̱ka, nan okshichanlit tʋnna ʋba pilla ha̱ pomeklanat ʋt atakohli akinli tok: micha noshkobo achʋfa ya̱ pomeklanat tahlepa tuklo hosh ai itiakaiya tuklo kʋt takohli hosh apakfoyupa tok.

²¹ Micha toni̱k tuklo kash aholitopa aboha yash hoshontika yak o̱ hiohlichi tok; micha ishtimpak imma ya̱ toni̱k a̱ hilechi mʋt Chachin hochifo tok; micha ʋlhfʋbek imma ya̱ toni̱k a̱ hilechi mʋt, Boas hochifo tok.

²² Mihma toni̱k wishakchi lili holbʋt inchu̱wa yosh aiasha tok; yohmi ho̱ toni̱k isht ʋtta tuk ʋt ʋlhtaiyaha tok.

²³ Micha bilelit akmochit okhʋta ikbi ma, itiʋlbi in tʋnnʋp ʋttʋt ia hosh in tʋnnʋp ona kʋt kubit pokoli tok: chʋnaha kʋt yohmi bat fullota mʋt, chaha kʋt kubit tahlapi tok: micha ponola isht ʋlhpisa kubit pokoli tuchina hosh apakfoyupa tok.

²⁴ Micha itiʋlbi nuta ya̱ lohboʋchi ʋt kubit achʋfakma pokolit ia hosh okhʋta hash apakfoyupa tok: bilʋt akmo ma, lohboʋchi ai itiakaiya ʋt tuklo hosh bilʋt akmo tok.

²⁵ Wak auah tuklo ho̱ ontalaia tok, tuchina kʋt falʋmmi pilla pit hopo̱koyot hieli ma, tuchina kʋt hʋshi ai okatula pilla pit hopo̱koyot hieli ma, tuchina kʋt okamahli pilla pit hopo̱koyot hieli ma, tuchina kʋt hʋshi akochaka pilla pit hopo̱koyot hieli tok: mihma okhʋta ash osh on talaia ma, im a̱shaka puta kʋt nutaka pit hiohli bieka tok.

²⁶ Mihma sukko kʋt ibbak pʋtha achʋfa mʋt, itiʋlbi ʋt isht ishko toba kak o̱ chohmi cha, lili pakanli holba isht inchu̱wʋt taiyaha tok: balh tahlepa tuklo hosh ʋlhto tok.

²⁷ Mihma asonak lakna aiontalaia pokoli ho̱ ikbi tok: aiontalaia achʋfa kʋt falaia kʋt kubit ushta cha, pʋtha kʋt kubit ushta mʋt, chaha kʋt kubit tuchina tok.

²⁸ Micha aiontaloha ha̱ ʋlhtaha kʋt yakohmi tok; apatʋssa puta kʋt a̱sha tok; micha apatʋssa puta kʋt achaha i̱ shahlit apakfopa puta ka itintakla atok.

²⁹ Mihma apatʋssa puta achaha i̱ shahlit apakfoyupa ititakla ya̱ koi hochito, micha wak, micha chelubim puta holba aiena kʋt ai inchu̱wa tok; micha achaha i̱ shahlit apakfoyupa paknaka ya̱ yʋmohmi tok: mikma koi hochito, micha wak a̱ nuta ya̱ nan itʋpana holbʋt ai inchu̱wa tok.

³⁰ Mihma ai ontalaia puta kʋt asonak lakna chʋnaha ushta, micha okhowata asonak lakna aiena hosh im a̱sha tok; micha chukbi ushta kʋt okhowata abikeli ʋt im a̱sha tok: micha ampmahaia chito nuta ya̱ okhowatʋt abikeli bilʋt, akmo ʋt nan itʋpana holbʋt ai in chu̱wa aiyukali ka apotoʋt hiohma̱ya tok.

³¹ Micha itih hʋt noshkobo yash anu̱kaka, micha ʋba pilla kubit achʋfa tok: yohmi kia itih hʋt ampmahaia chito ʋlhtaha kak inli chohmit chʋnaha cha, kubit achʋfa, micha kubit iklʋna tok: micha itih kocha apatʋssa puta ka naholbʋt ai inchu̱wa mʋt, bolukta cha, ik chʋnaho tok.

³² Micha apatʋssa puta nuta ya̱ chʋnaha hʋt ushta tok; mikma chʋnaha im okhowata ʋt ai ontalaia yak o̱ shamʋli tok; micha chʋnaha hʋt chaha kʋt kubit achʋfa cha, kubit iklʋna tok.

³³ Micha chʋnaha ʋlhtaha kʋt tʋnʋp iti chanʋlli ʋlhtaha kak inli chohmi tok; im okhowatkʋchi, micha chu̱kʋsh puta, micha achushkʋchi puta kʋt bilʋt akmo hatok.

³⁴ Aiontalaia achʋfa chukbi ushta ka okhowata abikeli ushta kʋt a̱sha tok; okhowata abikeli puta kʋt aiontalaia fehna akinli tok.

³⁵ Micha aiontalaia paknaka ya̱ chʋnahʋt fullota kubit iklʋnna kʋt hikia tok; micha aiontalaia paknaka, micha achaha i̱ shahlit apakfopa puta, micha apatʋssa puta aiena kʋt yʋmmak inli tok.

³⁶ Achaha i̱ shahlit apakfopa puta, micha apatʋssa puta aiena inchunlit chelubim puta, koi hochito, micha pam iti puta aiena, chito kʋt ai ʋlhpesa aiyukali, micha nan itʋpana holbʋt ai inchu̱wa aiena ka takalichit apakfobli tok.

³⁷ Ilʋppa chohmi bano ho̱ aiontalaia pokoli ka ikbi tok; moma kʋt ai akmo achʋfa bieka, ʋlhpisa achʋfa, micha chito kʋt itilaui achʋfa tok.

³⁸ Yohmi mʋt asonak lakna yo̱ ampmahaia chito pokoli ho̱ ikbi tok: ampmahaia chito achʋfa ka balh pokoli ushta hosh ʋlhto tok: micha ampmahaia chito ʋt kubit ushta bieka tok; micha ai ontalaia pokoli kash ampmahaia chito achʋfa hosh ontalaia bieka tok.

³⁹ Micha aiontalaia tahlapi ka aboha yash ishtimpak imma in tʋnʋp ak o̱ hiohlechi mʋt, aboha yash ʋlhfʋbek imma in tʋnnʋp ak o̱ hiohlichi tok: micha okhʋta yash aboha ishtimpak imma in tʋnnʋp hʋshi akochaka pilla, okamahli ichapaka yak o̱ talali tok.

⁴⁰ Mihma Hilam ash osh ampmahaia hochito puta, micha hituk chubbi ishit peha puta, micha ampmahaia puta aiena ka ikbi tok: yohmi hosh Hilam ash osh Chihowa in chuka ahalaia ka Solomon a̱ im ikbit isht ahanta tuk ʋt ont tahli tok.

⁴¹ Yohmi kʋt toni̱k tuklo kash, micha noshkobo tibikshi tuklo toni̱k paknaka on taloha, micha noshkobo tibikshi tuklo toni̱k tuklo kash on taloha ka ompohoma chi̱ ho̱ nan okshichanlit tʋnna tuklo kash;

⁴² Micha pomeklanat tahlepa ushta hosh nan okshichanlit tʋnna tuklo a takohla chi̱, yʋmmʋt noshkobo tibikshi tuklo toni̱k tuklo kash on taloha ka ont ompohoma chi̱ ho̱, pomeklanat ai itiakaiya tuklo hosh nan okshichanlit tʋnna achʋfa ka a takohla chi̱ hatok.

⁴³ Micha ai ontalaia pokoli, micha ampmahaia chito pokoli kash osh aiontalaia puta kash on taloha;

⁴⁴ Okhʋta achʋfa kash, micha wak auah tuklo okhʋta nuta hieli;

⁴⁵ Micha shuti puta, micha nan ishit peha puta, micha ampmahaia puta aiena ka ikbit tahli tok: micha nan aiʋlhto ilʋppa puta Chihowa in chuka ahalaia ka Hilam ash osh mi̱ko Solomon a̱ im ikbi tuk ʋt asonak lakna shohkauali bieka tok.

⁴⁶ Chatan yakni patali Sukkolh, micha Sahlan ititakla lukfi aiasha yak o̱, mi̱ko ʋt a bilelit ai akmochi tok.

⁴⁷ Mihmʋt laua kʋt atampa fehna hatuk o̱, nan aiʋlhto puta ka Solomon ʋt ik wekecho tok: micha asonak lakna weki ka ik akostinincho tok.

⁴⁸ Mihma Solomon ʋt nan aiʋlhto moma Chihowa in chuka ahalaia puta ka ikbit tahli tok: tʋli holisso lakna alta, micha aiimpa tʋli holisso lakna pʋska otʋni ai on taloha,

⁴⁹ Micha pʋla ai o̱ hikia ʋt tʋli holisso lakna bano, aholitopa moma i̱ shahli itikba tahlapi kʋt ishtimpak imma in tʋnnʋp a̱ hielikma, tahlapi kʋt ʋlhfʋbek imma in tʋnnʋp a̱ hieli tok: mihmʋt napakanli puta, micha pʋla bila aiʋlhto puta, micha tʋli holisso lakna tobaksi kiseli puta,

⁵⁰ Micha ampo puta, micha pʋla ishit tʋptuli puta, micha ampmahaia puta, micha ishtimpa puta, micha nabalama ahukmi puta aiena kʋt tʋli holisso lakna bano; micha anu̱kaka aboha aholitopa moma i̱ shahli, micha aholitopa aboha, yʋmmʋt tempel aiena okhissa puta atakali puta aiena tʋli holisso lakna yo̱ ikbi tok.

⁵¹ Yʋmohmi hosh mi̱ko Solomon ʋt Chihowa in chuka ahalaia ka ikbi tuk ʋt atahli tok. Micha Solomon ʋt i̱ki Lewi ʋt Chihowa ya̱ nana i̱ hullochi tok tʋli hʋta, micha tʋli holisso lakna, micha nan aiʋlhto puta aiena ka isht ʋlʋt, Chihowa in chuka nana holitopa ibafohkit ashachi tok.