1 Mi̱ko 6 - Chahta Holisso Holitopa 1886

¹ Atuk o̱ yakohmi tok, Islael ʋt Echip yakni ya̱ a kohchʋt minti tok a̱, afʋmmi tahlepa ushta, micha pokoli untuchina, micha Solomon ʋt Islael a̱ i̱ mi̱ko tok a̱ afʋmmi ont ai ushta, Sif hʋshi, yʋmmʋt hʋshi atukla ho̱ Chihowa in chuka ikbit isht ia tok.

² Mihma chuka Solomon ʋt Chihowa ya̱ im ikbi kʋt, falaia kʋt kubit pokoli hannalikma, auata kʋt kubit pokoli tuklokma, chaha kʋt kubit pokoli tuchina tok.

³ Mikma aholitopa aboha itikba ya̱ hoshontika yʋt hikia hosh, falaia kʋt kubit pokoli tuklo cha, aboha yash auata kak inli chohmi mʋt, auata kʋt aboha itikba ya̱ kubit pokoli tok.

⁴ Micha aboha ya̱ okhissushi atohwikeli ik auato puta ka ikbi tok.

⁵ Micha aboha tʋli itʋbana ya̱ ʋba potʋlhpo puta ka tikelichit apakfoblichit ikbi tok; aboha tʋli itʋbana aholitopa, micha aholitopa moma i̱ shahli aiena ka kocha yak o̱ tikelichit apakfoblichit ikbi tok: micha ʋba potʋlhpo in tola puta apakfoblichit kahpuli tok.

⁶ Ʋba potʋlhpo aka fehna kʋt auata kʋt, kubit tahlapikma iklʋnna ʋt auata kʋt kubit hannalikma, ont atuchina kʋt kubit untuklo tok: aboha tʋli itʋbana kocha ya̱, ai o̱ kaha chi̱ ka anu̱kaka pit kanʋllichit apakfoyubli ho̱, iti potʋlhpo intola puta kʋt aboha tʋli itʋbana ik shamʋllo ka chin tok.

⁷ Mihma aboha yʋt toba ta̱kla ma, tʋli ya̱ isht ik lo ki̱sha ho̱, ʋlhtaha tuk o̱ isht ikbi tok: yohmi ho̱ chofak isht ahonʋhli, micha iskifa, micha tʋli nana ishit toksʋli nana kia aboha yʋt toba ta̱kla ma ik haklo tok.

⁸ Ʋba potʋlhpo iklʋna ya̱ achukowa okhissa ʋt aboha im ishtimpak imma in tʋnnʋp ak o̱ hikia tok: micha apakfokʋchit atuya oiya hosh ʋba potʋlhpo iklʋna ya̱ ont chukowa cha, iklʋna yash a kohcha mʋt, ont atuchina ka oiyʋt ont chukowa tok.

⁹ Yohmi hosh chuka yash ikbit tahli tok; micha chuka yash chuahla in tola puta, micha chuahla bʋsha aiena ho̱ ishit homo tok.

¹⁰ Yohmi mʋt aboha tʋli itʋbana moma ka ʋba potʋlhpo puta chaha kʋt kubit tahlapi ho̱ tikelichit ikbi tok: micha chuahla in tola hosh aboha itʋbana o̱ kaha ho̱ on taloha tok.

¹¹ Mihma Chihowa im anumpa hʋt Solomon a̱ im ʋla mʋt,

¹² Chuka ikbit isht ish ahanta ilʋppak okʋno, a̱ nanʋlhpisa puta ish a noho̱wa cha, a̱ nan ai isht apesa puta kak o̱ ish yʋmihinchi cha, ʋm anumpa ʋlhpisa moma ka ish ieshit ish a noho̱wakma, yʋmohmikma chi̱ki Lewi ya̱ im achi li tok, ʋm anumpa ha̱ chim ai a̱hlichi la hi oke.

¹³ Mikmʋt Islael im ʋlla ʋhleha takla ahanta likmʋt, ʋm okla Islael a̱ kanchi la he keyu hoke, achi tok.

¹⁴ Yʋmohmit Solomon ʋt chuka yash ikbit tahli tok.

¹⁵ Mihmʋt aboha anu̱kaka ya̱ chuahla iti yo̱ isht ikbi tok; chuka anu̱kaka ya̱ iti potʋlhpo ʋttʋt ia hosh aboha ishit holmo itʋbana ont ʋhli ka isht ikbi tok; micha anu̱kaka ya̱ iti yo̱ lapalichi mʋt, aboha potʋlhpo ya̱ sha̱kolo holba bʋsha yo̱ patali tok.

¹⁶ Mihmʋt aboha ʋhli ʋttʋt ia hosh kubit pokoli tuklo ho̱ ont ʋhli, micha iti potʋlhpo ʋttʋt ia hosh ʋba potʋlhpo ont ʋhli ho̱ chuahla bʋsha yo̱ lapalichi tok; ila anu̱kaka yo̱ Chihowa ai ili haiakahanchi aholitopa moma i̱ shahli ya chi̱ ka ikbi tok.

¹⁷ Mihma yʋmmak ash itikba hikia kʋt aboha, yʋmmʋt aholitopa aboha yʋt falaia kʋt kubit pokoli ushta tok.

¹⁸ Mihma aboha anu̱kaka chuahla ya̱ chakonlichit lohbobochit napakanli bokanli puta ka hobachit ikbi tok; chuahla bieka tok; tʋli ʋt haia̱ka kʋt iksho tok.

¹⁹ Micha aboha anu̱kaka yak o̱ Chihowa nan itim apesa afoyuka itombi holitopa ya̱ talala chi̱ hosh, aholitopa moma i̱ shahli ya̱ atahli tok.

²⁰ Mihma aholitopa moma i̱ shahli itikba ʋt falaia kʋt kubit pokoli tuklokma, auata kʋt kubit pokoli tuklokma, chaha kʋt kubit pokoli tuklo tok; mihma tʋli holisso bano ho̱ lapalichit taiyahli tok: micha alta ʋt chuahla yosh toba ya̱ yʋmihchi hosh lapalichit taiyahli tok.

²¹ Yohmi mʋt Solomon ʋt aboha anu̱kaka ya̱ tʋli holisso lakna bano ho̱ lapalichit taiyahli tok: micha aholitopa moma i̱ shahli itikba ya̱ tʋli holisso lakna ititakʋli puta kak o̱ isht oktʋbli tok; micha tʋli holisso lakna yo̱ lapalichit taiyahli tok.

²² Micha aboha moma ka tʋli holisso lakna yo̱ lapalichit taiyahli tok; micha aboha moma ka yʋmihchit taiyahli tok: micha alta aholitopa moma i̱ shahli bili̱ka hikia ka mominchit tʋli holisso lakna yo̱ lapalichit taiyahli tok.

²³ Micha aholitopa moma i̱ shahli anu̱kaka ya̱, a̱lif iti yosh chelubim tuklo toba hosh, chaha kʋt kubit pokoli bi̱ka ho̱ ikbi tok.

²⁴ Micha chelubim a̱ sanahchi achʋfa kʋt kubit tahlapikma, chelubim a̱ sanahchi achʋfa ʋt kubit tahlapi tok: sanahchi achʋfa ka ont wishakchi fehna ʋttʋt ia hosh, sanahchi achʋfa ya̱ ont wishakchi fehna ona kʋt kubit pokoli tok.

²⁵ Mikma chelubim achʋfa yʋt kubit pokoli tok: chelubim itatu̱klo kʋt ʋlhpisa, micha chito aiena kʋt achʋfa tok.

²⁶ Chelubim achʋfa chaha kʋt kubit pokolikma, chelubim achʋfa ak kia yohmi akinli tok.

²⁷ Micha chelubim ash aboha anu̱kaka ai iklʋna yak o̱ hilechi tok: mihma chelubim a̱ sanahchi yash okla ashatʋblichi ma, achʋfa ka sanahchi ʋt aboha in tʋnnʋp achʋfa ka ont tikeli ma, chelubim achʋfa sanahchi ʋt aboha in tʋnnʋp achʋfa ya̱ ont tikeli tok: micha sanahchi ʋt aboha iklʋnna ya̱ ai iti tikeli tok.

²⁸ Micha chelubim ash tʋli holisso lakna ya̱ lapalichit taiyahli tok.

²⁹ Micha aboha okhowata ka puta moma anu̱kaka, micha kocha aiena ka chakonlichit chelubim puta, micha pam iti puta, micha napakanli bokanli puta chako̱wʋt holba puta ka ikbi tok.

³⁰ Micha aboha potʋlhpo ya̱ anu̱kaka, micha kocha aiena ka tʋli holisso lakna yo̱ lapalichit taiyahli tok.

³¹ Micha aholitopa moma i̱ shahli achukowa isht okshilita ya̱, alif iti yo̱ ikbi tok; mikma okhissa tahlala̱ka lapali, micha paknaka onʋtola aiena kʋt aboha okhowataka kashapa ishit tahlapi tok.

³² Micha isht okshilita tuklo kʋt alif iti yosh toba tok; micha chakonlichit chelubim puta, micha pam iti puta, micha napakanli bokanli puta, chako̱wʋt holba ikbi mʋt, tʋli holisso lakna yo̱ lapalichit taiyahli tok; micha chelubim puta, micha pam iti puta ka tʋli holisso lakna yo̱ lapalichit taiyahli tok.

³³ Micha aholitopa aboha okhissa tahlala̱ka lapali puta kʋt alif iti yo̱ ikbi tok, auata kʋt aboha okhowataka kashapa ai ushta tok.

³⁴ Mikma isht okshilita tuklo kash osh sha̱kolo holba yosh toba tok: isht okshilita achʋfa kʋt pohla tuklo yokma, isht okshilita achʋfa ʋt pohla tuklo tok.

³⁵ Micha chakonlichit chelubim puta, micha pam iti puta, micha napakanli bokanli puta hobachit ikbi tok; micha achako̱wa tʋli holisso lakna yʋt itifohka achukma ho̱ lapalichit taiyahli tok.

³⁶ Micha anu̱ka̱ka wanuta holihta ya̱ tʋli tʋhla iti onʋtola tuchina hosh fullota ma, chuahla yosh onʋtolʋt fullota ho̱ ikbi tok.

³⁷ Afʋmmi ont ai ushta hʋshi Sif ak o̱, Chihowa in chuka in tola ya̱ bohli tok.

³⁸ Atuk osh afʋmmi ont isht auah achʋfa hʋshi Bul, yʋmmʋt hʋshi ont isht untuchina ho̱ chuka, micha ai imi̱la̱yak puta kʋt ont tahʋt hlopulli tok. Yohmi hosh afʋmmi untuklo ho̱ ikbit isht ahanta tok.