1 Mi̱ko 5 - Chahta Holisso Holitopa 1886

¹ Yohmi ma Taia i̱ mi̱ko Hilam ʋt in tishu ʋhleha ha̱ Solomon a̱ i̱ pila tok: (i̱ki ya̱ atobbichit yʋmmak o̱ nan ahʋmmit mi̱ko okla atokoli tuk a̱ haklo tuk okʋt:) Hilam ʋt Lewi ya̱ holitobli bilia chatuk okʋt.

² Mihma Solomon ʋt Hilam a̱ anumpa i̱ pila cha,

³ A̱ki Lewi ʋt tʋnʋp ʋt aiashʋt apakfoyupa bieka kak o̱, Chihowa ʋt iyi i̱ nutaka ik ashacho ki̱sha ma, in Chitokaka Chihowa hohchifo pulla ka chuka im ikba he keyu tok a̱, ish ithanʋshke.

⁴ Yohmi tok kia himak ano an Chitokaka Chihowa ʋt afoha a fullota moma ʋma na, tʋnʋp nana kia micha nana ik achukmo kia ikshoshke.

⁵ Yohmi ka yakeh! a̱ki Lewi ya̱ Chihowa ʋt im anumpulit, Chi atobbichit chiso chim ai ombinili holitompa ombinilichi la chi̱ kak osh, sa hohchifo ha̱ chuka im ikba hi oke, achi tuk mak o̱, an Chitokaka Chihowa ya̱ hohchifo ha̱ chuka im ikbi ka ʋm anukfilʋshke.

⁶ Yʋmohmi hoka himak a̱ ish im apesa na, Lebanon a̱ chuahla ya̱ an tʋhlashke; mikma an tishu ʋhleha hʋt chin tishu ʋhleha ha̱ apehʋt a̱ya chi̱ hoke: chin tishu ʋhleha to̱ksʋli ka kaniohmi ho̱ ish apesakma, moma chishno yak o̱ chima lashke: pi takla ya̱ Sitonian ʋhleha ha̱ chohmit iti tʋhli imponna kʋt iksho ka ish ithana hokʋt, achi tok.

⁷ Atuk o̱ yakohmi tok, Hilam ʋt Solomon im anumpa ha̱ haklo mʋt, nayukpa fehna cha, Chihowa ʋt okla chito ilʋppa pehliecha chi̱ ho̱, Lewi ya̱ ushi hopoyuksa ima tuk ʋt, himak nitak a̱ holitopashke.

⁸ Micha Hilam ʋt Solomon, a̱ anumpa pit i̱ pilʋt, Nana ahnit et is sam pila tuk a̱ anukfillit pihi̱sa lishke: iti chuahla, micha iti sha̱kolo holba nana ish ahni tuk moma ka yʋmihchi la chi̱ hoke.

⁹ An tishu ʋhleha hʋt Lebanon a̱ ai ishit okhʋta ha̱ isht onakma, okhʋta okʋchit okpalalichit kanima yo̱ ish apesakma, ont a kohcha he apesa likma, ish ishashke; micha an chuka achʋfa pinak ish im ahayucha he ahni li ka, ish yʋmihcha chi̱ hoke, achi tok.

¹⁰ Yohmi ho̱ ahni tuk mak o̱, Hilam ʋt Solomon a̱ iti chuahla, micha iti sha̱kolo holba ya̱ ima tok.

¹¹ Mihma Solomon ʋt Hilam a̱ in chuka achʋfa ʋt ʋpa chi̱ ka onush ʋlhpisa tahlepa sipokni pokoli tuklo, micha bila kashofa ʋlhpisa pokoli tuklo ho̱ ima tok: yakohmit Solomon ʋt Hilam a̱ afʋmmikma ihi̱ma tok.

¹² Mihma achi tok mak osh, Chihowa ʋt Solomon a̱ hopoyuksa ya̱ ima tok: mihma Hilam micha Solomon ʋt it i̱ nanaiyʋt aha̱shwa tok: mihma tuklo kʋt anumpa ai itibai achʋfa it im apesʋt okla tok.

¹³ Mihma Solomon mi̱ko ʋt Islael moma ka nan atokoli isht ahanta tok; mihma ʋlhtoka kʋt hatak tahlepa sipokni pokoli tuchina tok.

¹⁴ Micha ai itiakaiya ho̱ hʋshi achʋfakma, Lebanon a̱ hatak tahlepa sipokni pokoli ho̱ pila beka tok; hʋshi achʋfa ho̱ Lebanon a̱ ma̱yakmʋt, hʋshi tuklo ho̱ ilap in chuka a̱sha beka tok: mihma Atonilam ak osh ʋlhtoka yash pehliechi beka tok.

¹⁵ Mihma Solomon ʋt nʋnih foka ya̱ nan sholi ʋt tahlepa sipokni pokoli untuklokma, iti tʋhli ʋt tahlepa sipokni pokoli untuchina hosh im a̱sha tok.

¹⁶ Solomon i̱ nan ʋlhtoka ʋhleha i̱ shahli puta natoksʋli yash apistikeli ʋhleha hʋt a̱shakma, okla toksʋli apistikeli ʋt tahlepa sipokni tuchina cha, tahlepa tuchina tok.

¹⁷ Mihma mi̱ko ʋt apesa na, tʋli hochito, micha tʋli holitopa puta, micha tʋli tʋhla aboha in tola bohla chi̱ kʋt isht ʋla tok.

¹⁸ Mihma Solomon chuka im ikbi ʋhleha, micha Hilam chuka im ikbi ʋhleha aiena kʋt tʋli itilauechi atuk ʋt tʋhli tok; yohmi ho̱ aboha ikba chi̱ kʋt iti micha tʋli aiena ka atahli tok.