1 Mi̱ko 4 - Chahta Holisso Holitopa 1886

¹ Mihma mi̱ko Solomon ʋt Islael moma ka i̱ mi̱ko tok.

² Mihma ilʋppa puta kak osh i̱ holitompa ʋhleha atok; naholitompa isht ʋtta Satok ushi Asaliah atok;

³ Eliholef micha Ahiah itatuklo kʋt holissochi yosh Shisha ushi atok: Ahilʋt ushi Chehoshafat ʋt holisso takalichi atok.

⁴ Mikma Chehoiata ushi Benaiah ʋt tʋshka chipota pehlichi atok: mikma Satok micha Abiahla itatuklo kʋt naholitompa isht a̱shwa atok;

⁵ Mikma Nahlan ushi Asaliah ak osh nanʋlhtoka moma pehlichi atok: mikma Nahlan ushi Sabul ak osh holitompa i̱ shahli yosh mi̱ko i̱ kana atok:

⁶ Mikma Ahisha ʋt chuka achʋfa apesʋchi atok: mikma Abta ushi Atonilam ʋt noshkobo atobbi natoksʋli apistikeli atok.

⁷ Mikma Solomon ʋt nan ʋlhtoka auah tuklo hosh Islael moma ka pehlichi hosh im asha cha, yʋmmak osh mi̱ko micha in chuka achʋfa ya̱ pinak im ahayuchi tok: afʋmmikma hʋshi achʋfa aiyuka ho̱ pinak a̱ ahayuchi beka tok.

⁸ Ilʋppak osh hohchifo hoke; Hu ushi ʋt nʋnih Eflaim a̱ a hoyo tok.

⁹ Mikma Teka ushi ʋt Makas, micha Shaal‐bim, micha Belh‐shemesh, micha Elon‐belh‐hanan aiena ka a hoyo tok.

¹⁰ Heset ushi ʋt Alubolh a̱ ahoyo tok: yʋmma Sokoh, micha Hefe yakni moma kʋt im aiena tok.

¹¹ Abinitab ushi ʋt To afullota moma ka a hoyo tok: yʋmma tekchi ʋt Solomon ushetik Tafalh ak atok.

¹² Ahilut ushi Baana ʋt Taanak, micha Mekitto, micha Belh‐shean, yʋmmʋt Satanah bili̱ka Chesleel nutaka talaia kʋt moma, Belh‐shean ʋttʋt ia hosh Abel‐meholah Choknean misha tʋnnʋp talaia ka ona ka a hoyo tok.

¹³ Kebe ushi Lamolh‐kileat ʋtta yʋt Manasseh ushi Chai in tʋmaha puta Kileat ataloha ka; micha Akob afullota Bashan talaia, tʋmaha hochito pokoli hannali hosh aholihta, micha holihta okhissa okhowʋtkʋchi ʋt asonak lakna yo̱ a hoyo tok.

¹⁴ Itto ushi Ahinatab ʋt Mahanaim ak o̱ a hoyo tok.

¹⁵ Ahimaas ʋt Naftali ak o̱ a hoyo tok; yʋmmʋt Solomon ushetik Basmalh ʋt tekchi ya chi̱ ho̱ ishi akinli tok.

¹⁶ Hushai ushi Baanah ʋt Asha, micha Alolh itatuklo kak o̱ a hoyo tok.

¹⁷ Paluah ushi Chehoshafat ʋt Issaka yak o̱ a hoyo tok.

¹⁸ Elah ushi Shimei ʋt Benchamin ak o̱ a hoyo tok.

¹⁹ Uli ushi Kebe ʋt Kileat yakni Amolait okla i̱ mi̱ko Sihon i̱ yakni, micha Bashan i̱ mi̱ko Ok i̱ yakni aiena kak o̱ a hoyo tok: micha yakni yʋmma nanʋlhtoka ʋt yʋmmak illa hosh ahanta tok.

²⁰ Mihma Chutah, micha Islael aiena kʋt apakna kʋt shinuk osh okhʋta lapalika aiasha kak o̱ chiyuhmi cha, impʋt nanishkot, nayukpʋt aiasha tok.

²¹ Mihma Solomon ʋt apehlichika puta moma okhina puta ʋttʋt ia hosh, Filistin okla i̱ yakni ona mʋt, Echip aiʋhli ona ho̱ a mi̱ko tok; nahʋlbina puta isht im ahanla cha, Solomon ʋt okcha̱yʋt ahanta nitak puta moma ka im antihi̱ya tok.

²² Mihma Solomon ʋt nitak achʋfa ho̱ i̱ pinak ʋt bota tohbi lipihbi ʋlhpisa pokoli tuchinakma, onush pushi ʋt ʋlhpisa pokoli hannali tok,

²³ Wak hobʋk ilhpitʋt nia pokoli, micha wak hobʋk pokoli tuklo ho̱ aiimpa holihta akochikmʋt, chukfʋlhpoa tahlepa achʋfa, micha lapitta puta, micha issi puta, micha issikosoma holba puta, micha aka̱ka ilhpitʋt nia puta aiena ka, nitak achʋfa ka ʋbi beka tok.

²⁴ Im apehlichika yʋt okhina ola in tʋnnʋp afullota moma Tifsah ya̱ ʋttʋt ia hosh Assah ya̱ ont ʋhli cha, okhina ola in tʋnnʋp mi̱ko moma ka pehliechi hatuk okʋt: micha abili̱ka fullota moma ka it i̱ nanaiya bieka tok.

²⁵ Mihma Chutah, micha Islael aiena kʋt nana im akaniohmi iksho hosh, hatak puta kʋt Solomon ʋt ahanta nitak puta moma ka, Tan ʋttʋt ia hosh Bee‐sheba ont ʋhli ka̱ i̱ pa̱kʋpi nutaka, micha i̱ fik ʋpi nutaka aiasha tok.

²⁶ Micha Solomon ʋt issuba tʋnʋp itichanʋlli halʋlli ai ilhpita ʋt tahlepa sipokni pokoli ushta, micha issuba ombinili ʋt tahlepa sipokni auah tuklo hosh im a̱sha tok.

²⁷ Mihma nanʋlhtoka yʋmma puta kash osh hʋshi ont im ai ʋlhpiesa aiyukalikmʋt, mi̱ko Solomon a̱, micha mi̱ko Solomon im aiimpa ai ʋla puta ka, pinak im ahayuchi beka tok: nan ik im ono kʋt iksho tok.

²⁸ Issuba, micha kamel holba aiena kʋt ʋpa chi̱ ka bali, micha onush ʋpi aiena ka nanʋlhtoka aiasha ka, im ʋlhpisa tuk aiyukali kʋt isht im oho̱na beka tok.

²⁹ Mihma Chitokaka yʋt Solomon a̱ hopoyuksa, micha nan ithana atampa fehna, micha chu̱kʋsh chito kʋt okhʋta lapalika shinuk aiasha kak o̱ chohmi ho̱ ima tok.

³⁰ Mihma Solomon hopoyuksa kʋt hʋshi akochaka in chipota ʋhleha moma hopoyuksa, micha Echip hopoyuksa moma ka i̱ shahli tok.

³¹ Hopoyuksa kʋt hatak moma ka i̱ shahli tok okʋt: Eslahait Ehlan, micha Heman, micha Chalkol, micha Tata, Mahol ushi ʋhleha ha̱ i̱ shahli tok: micha holitopʋt oklushi moma fullota im annoho̱wa tok.

³² Micha namiha tahlepa sipokni tuchina anumpohonli tok; mikmʋt im ilhtaloak ʋt tahlepa sipokni achʋfa cha tahlapi tok.

³³ Micha iti puta isht anumpuli kʋt, chuahla ʋt Lebanon a̱ a hikia ka ai isht iakmʋt, hissop ʋt tʋli holihta ai offot atuya ka ont ʋhlichi tok: micha nampoa puta, micha hushi puta, micha nana balahanli puta, micha nʋni puta aiena ka isht anumpohonli tok.

³⁴ Mihma okla moma ka a minti kʋt Solomon hopoyuksa ka haponakla chi̱ hosh yakni paknaka mi̱ko puta kʋt hopoyuksa ka ha̱klo puta ka a minti kʋt ʋla tok.