1 Mi̱ko 3 - Chahta Holisso Holitopa 1886

¹ Mihma Solomon ʋt Echip i̱ mi̱ko Feleo ya̱ it i̱ kanomi toba cha, Feleo ushetik a̱ ishi cha, Lewi in tʋmaha holihta ya̱ isht ʋla na ahanta na ilap in chuka, micha Chihowa in chuka, micha Chelusalem aholihta apakfoyupa aiena ka atahli haya tok.

² Peh okla hʋt achahaka puta ka nan ʋbit ai isht aiokpʋchi beka tok; nitak yʋmma foka ik ono ki̱sha Chihowa hohchifo ka aboha yʋt ik in tobo ki̱sha hatuk oka,

³ Mihma Solomon ʋt Chihowa ya̱ holitobli cha, i̱ki Lewi ʋt nanʋlhpisa puta ka a noho̱wa beka tok a̱ anoho̱wa tok: yohmi kia achahaka puta ka nan ʋbit ai isht aiokpʋchit nabalama a hukmi beka tok.

⁴ Micha yʋmmak o̱ mi̱ko ʋt nan ʋbit ai isht aiokpʋcha chi̱ hosh Kibeon a̱ ona tok; yʋmmak osh achahaka holitopa hatuk oka: alta yʋmma na hukmit isht aiokpʋchi tahlepa sipokni achʋfa ho̱ Solomon ʋt ai onochit isht aiokpʋchi tok.

⁵ Kibeon a̱ Solomon ʋt ninak a̱ holhpokna ma, Chihowa ʋt i̱ haiaka tok: micha Chitokaka yʋt, Nana chima la chi̱ ka is sʋm asilhhashke, achi tok.

⁶ Mihma Solomon ʋt, Chin tishu Lewi a̱ki ya̱ chi tikba ya̱ aia̱hlit, micha ai ʋlhpiesʋt, micha chu̱kʋsh apissalit chiba noho̱wa tuk mak o̱ ish i̱ nukha̱klo kʋt chito tuk oke; micha ish i̱ kana chito ilʋppa ish im ieshi moma cha, ushi yosh im ai ombinili holitompa ya̱ ombinili ka ish ima tok o̱ himak nitak a̱ yʋmohmishke.

⁷ Micha an Chitokaka Chihowa ma! himak a̱ a̱ki Lewi ya̱ atobbichit chin tishu ha̱ mi̱ko ish ikbishke; yohmi kia peh ʋlla sa fehna hoke: kohchʋt ihi̱ya, micha ant chukoho̱wa kʋt ak ithanoshke.

⁸ Micha chin tishu hʋt chim okla, okla chito ish atokolit ish ishi tok o̱, apakna kʋt holhtinʋt taha he keyu ho̱, ai iklʋna hikiʋshke.

⁹ Yʋmohmi hoka chin tishu hʋt chim okla ha̱ nan im apesa chi̱ ka chu̱kʋsh nan ithana ish ima na nana achukma, micha nana ik achukmo aiena ka akostininchi lashke: kʋta hosh chim okla chito yakohmi ka nan im apesa hinla cho? achi tok.

¹⁰ Mihma Solomon ʋt nana ilʋppa asilhha tuk anumpa ha̱, Chihowa ʋt aiokpanchi tok.

¹¹ Micha Chitokaka yʋt, Nana ilʋppak o̱ ish asilhha cha, nitak falaia chik il asilhho, micha imi̱la̱yak chito chik il asilhho, micha chin tʋnʋp ʋhleha im ilhfiopak a̱ chik asilhho hatuk osh; amba chu̱kʋsh nan ithana nan ai ʋlhpiesa kak o̱ isht ish akostinincha chi̱ kʋt ish il asilhha hoka:

¹² Yakeh! chim anumpa pulla tuk mak o̱ yʋmihchi lishke: yakeh! chu̱kʋsh hopoyuksa, nan ithana aiena ka chima lishke; yohmi ho̱ chi tikba aiasha kʋt chishno chohmi tok keyu, micha chiaka̱ya kʋt chishno chohmi kʋt wakayʋt hikia chi̱ keyu hoke.

¹³ Micha nana ish asilhha tuk keyu aiena ka chima lishke, imi̱la̱yak chito, micha hohchifo holitopa aiena ka chima lishke: yohmi ho̱ chi okcha̱yʋt ish ahanta nitak moma ka, mi̱ko nana kia chishno chiyuhmi kʋt iksho ka chi̱ hoke.

¹⁴ Micha a̱ hina puta kak o̱ ish a̱ya cha a̱ nan ʋlhpisa puta, micha ʋm anumpa ʋlhpisa puta aiena ka ieshit, chi̱ki ʋt anoho̱wa tok mak o̱, chiyuhmit ish a̱yakma, nitak a̱ chi̱ falaiachi la chi̱ hoke, im achi tok.

¹⁵ Mihma Solomon ʋt okcha tok; mihma yakeh! holhpokna hatuk achini tok: atuk osh Chelusalem a̱ ʋla cha, Chihowa nan it im apesa afoyuka itombi holitopa itikba ya̱ hikia cha, na hukmit isht aiokpʋchi puta onochit im issʋt, iti̱nanaiyʋchi isht aiokpʋchi puta im issa mʋt, in tishu ʋhleha moma ka impʋchi tok.

¹⁶ Yohmi ma ohoyo tuklo kʋt haui yosh mi̱ko ya̱ im itonachi cha, itikba hieli tok.

¹⁷ Mihma ohoyo achʋfa kash osh, A̱ shahli ma! ʋno, micha ohoyo ilʋppa itatuklot aboha achʋfa ho̱ il a̱shwa hoke; atuk o̱ aboha il a̱shwa ho̱ ʋlla eshi li tuk;

¹⁸ Atuk o̱ yakohmi tok, ʋlla eshi li tuk nitak ont atuchina ma, ohoyo ilʋppak kia ʋlla eshi ak inli tuk: mihmʋt itatuklot il a̱shwa tuk oke: aboha ya̱ inla kia pi takla anta tuk keyu, e tuklo ak illa hosh aboha ya̱ il a̱shwa tuk oke.

¹⁹ Atuk o̱ ohoyo ilʋppa im ʋlla ʋt ninak a̱ illi tuk, onʋtola hatuk o̱.

²⁰ Mihma ninak iklʋna ma wakaya cha, chin tishu ohoyo hʋt nusi hosh itonla ma, sʋso hʋt si apotʋt itonla tuk a̱ ishi cha, shakba fohki mʋt, im ʋlla illi yash sa shakba fohki tuk oke.

²¹ Atuk o̱ onnahinli ma ʋm ʋlla ya̱ pishichi la chi̱ hosh wakaya li ma, yakeh! illi tuk atuk: yohmi tuk kia onnahinli ma achukmalit pisa li ma, yakeh! sʋso eshi li tuk a̱ keyu tuk, achi tok.

²² Mihma ohoyo achʋfa ʋt, Keyú, amba okcha̱ya yak osh sʋso hokma, illi yak osh chiso hoke, achi tok. Mihma ilʋppak ash osh, Keyú, amba illi yak osh chiso hokma, okcha̱ya yak osh sʋso hoke, achi tok. Yak achit mi̱ko itikba ya̱ ai anumpohonli tok.

²³ Yohmi ma mi̱ko ʋt, Achʋfa kʋt, Okcha̱ya yak osh sʋso hokma, chiso hʋto illi ak oke, achi ma, achʋfa ʋt, Keyú, amba illi yak osh chiso ak okma, sʋso hak osh okcha̱ya ak oke, achishke, achi tok.

²⁴ Mihma mi̱ko ʋt, Bʋshpo falaia isht oh ʋm ʋlá, achi tok. Mihma mi̱ko itikba ya̱ bʋshpo falaia ya̱ isht im ʋla tok.

²⁵ Mihma mi̱ko ʋt, Ʋlla okcha̱ya ya̱ ish ita hokofit ish tuklochi cha, iklʋna ka achʋfa ya̱ ish imakmʋt, achʋfa ya̱ iklʋna ka ish imashke, achi tok.

²⁶ Mihma ohoyo ʋlla im okcha̱ya yash osh, ushi ya̱ chu̱kʋsh ʋt o̱ kanʋlli hatuk osh mi̱ko ya̱, A̱ shahli ma! ʋlla okcha̱ya ya̱ ish imashke, micha ik kaniohmi kia chikbo kashke, achi tok: amba achʋfa kash osh, Pishno keyu bi̱kashke, amba peh ita hokofashke, achi tok.

²⁷ Yohmi ma mi̱ko ʋt afalamichit, Yʋmmak o̱ ish imashke, micha ish bi ná, yʋmmak osh ishki yoka, achi tok.

²⁸ Atuk o̱ Islael moma kʋt nan apesa mi̱ko ʋt apesa tuk a̱ okla haklo mʋt, mi̱ko ya̱ i̱ nukshopa tok: Chitokaka im ahopoyuksa nukfoyukʋt nan apesa ka pisa hokʋt.