1 Mi̱ko 22 - Chahta Holisso Holitopa 1886

¹ Mihma afʋmmi tuchina ho̱ Silia, micha Islael itatuklo kʋt tʋnʋp ʋt ik im iksho hosh, okla aiasha tok.

² Atuk o̱ yakohmi tok, afʋmmi ont isht atuchina ma, Chutah i̱ mi̱ko Chehoshafat ʋt Islael i̱ mi̱ko ya̱ im ona tok.

³ Mihma Islael i̱ mi̱ko ʋt, in tishu ʋhleha ha̱, Lamolh‐kileat talaia kʋt pimmi ha̱ hʋsh ithana keyu cho? mikma lumʋt il a̱sha cha, Silia i̱ mi̱ko ibbak a̱ akohchit kil eshoshke, im achi tok.

⁴ Micha Chehoshafat a̱, Si awant Lamolh‐Kiliat a̱ itiba chi̱ hosh, ish ia hinla cho? im achi tok. Mihma Chehoshafat ʋt Islael i̱ mi̱ko ya̱, Ʋno ʋt chishno ak inli chohmi likma, ʋm okla hʋt chim okla akinli chohmikma, ʋm issuba puta kʋt chim issuba puta akinli chohmi hoke, im achi tok.

⁵ Micha Chehoshafat ʋt Islael i̱ miko ya̱, Himak nitak a̱ Chihowa im anumpa ha̱ ish a ponaklashke, chim asilhha lishke, im achi tok.

⁶ Yohmi ma Islael i̱ mi̱ko ʋt hopaii ʋhleha ha̱ hoyot hatak tahlepa ushta foka ho̱ itʋnahli cha, i̱ ponaklot, Lamolh‐kileat a̱ itibit ia la chi̱ cho? ak cho? ak aiyo ka chi̱ cho? im achi ma, Iá, Chitokaka yʋt mi̱ko ibbak a̱ fohki pulla chi̱ hoka, okla achi tok.

⁷ Mihma Chehoshafat ʋt Chihowa i̱ hopaii inla ʋt ilʋppa anta tuk o̱, il i̱ ponakla hinla kʋt iksho cho? achi tok.

⁸ Mihma Islael i̱ mi̱ko ʋt Chehoshafat a̱, Hatak achʋfa hosh Imlah ushi Mikaiah ʋt anta momʋshke, yʋmmak o̱ Chihowa ya̱ ai il im a ponakla hinla hoke; yohmi kia isht i̱ yukpa li keyu hoke: nana ʋm anoli kʋt achukma keyu, amba ik achukmo kak o̱, ʋm anoli chatuk oka, achi tok. Mihma Chehoshafat ʋt, Mi̱ko ʋt yʋmma ik acho kashke, achi tok.

⁹ Yohmi ma Islael i̱ mi̱ko ʋt nan ʋlhtoka ya̱ hoyo cha, Tu̱shpʋt Imlah ushi Mikaiah ya̱ ont isht ʋlá, achi tok.

¹⁰ Mihma Islael i̱ mi̱ko, micha Chehoshafat Chutah i̱ mi̱ko itatuklo kʋt nafohka holitopa ishit fohka cha, im aiombinili holitompa bi̱ka, Samalia achukowa holihta okhissa ahaiaka yo̱ on chieya tok; mihma hopaii moma kʋt itikba ya̱ tikbanli nan anolit aiasha tok.

¹¹ Mihma Chenaanah ushi Setekiah ʋt tʋli lapish ikbi tok: micha, Chihowa ʋt yak achishke, Ilʋppak o̱ Silian ʋhleha ha̱ ishit bahlit, ʋbit hʋsh tahla chi̱ hoke, achishke, achi tok.

¹² Mihma hopaii moma kʋt yohmit tikbanli anolit, Lamolh‐kiliat a̱ ish ia cha, chim aia̱hlashke, Chihowa ʋt mi̱ko ibbak a̱ fohka chi̱ hoka, okla achi tok.

¹³ Mihma anumpa shali Mikaiah i̱ howa tuk ʋt, ont im anumpuli mʋt, Yakeh! himak a̱ hopaii ʋhleha im anumpa hʋt, itih achʋfʋt achukma ho̱ mi̱ko ya̱ im anolishke: chim asilhha lishke; chim anumpa hʋt yʋmma ai achʋfa im anumpa tuk a̱ chohmashke, micha achukma ho̱ ish anumpulashke, achi tok.

¹⁴ Mihma Mikaiah ʋt, Chihowa ʋt okcha̱ya pulla ka, Chihowa ak osh nana ho̱ ʋm achikma, yʋmmak o̱ anumpuli la chi̱ hoke, achi tok.

¹⁵ Yohmi ho̱ mi̱ko ya̱ im ʋla tok. Mihma mi̱ko ʋt, Mikaiah ma! Lamolh‐kileat a̱ itibit il ia chi̱ cho? ak cho? kil aiyo ka chi̱ cho? achi tok. Mihma afalamichit, Ia chá, chim aia̱hlashke: Chihowa ʋt mi̱ko ibbak a̱ fohka chi̱ hoka, achi tok.

¹⁶ Mihma mi̱ko ʋt, Katohmi haya̱ Chihowa hochifot anumpa a̱hli bieka is sʋm anola hi a̱, anumpa kʋllo chi onochi la chi̱ cho? im achi tok.

¹⁷ Mihma, Islael moma kʋt chukfʋlhpoa apistikeli iksho chohmit, nʋnih foka ita fimimpʋt a̱ya ho̱ pisa li tuk oke: mihma Chihowa ʋt, Ilʋppak okʋt i̱ shahli iksho yoke; hatak puta kʋt achukma̱kʋt in chuka ya̱ falamʋt onashke, achi tok.

¹⁸ Mihma Islael i̱ mi̱ko ʋt Chehoshafat a̱, Ʋno ya̱ nana tikbanli anoli kʋt achukma keyu, amba ik achukmo kak o̱ anola chi̱ hoke, achit chim anoli li tuk keyu cho? achi tok.

¹⁹ Mihma Mikaiah ʋt, Yʋmohmi hoka Chihowa im anumpa ha̱ ish haklashke; Chihowa ʋt im aiombinili holitompa ya̱ ombinili tuk oke, mihma ʋba aholitopa aiasha moma kʋt bili̱ka isht impak imma, micha ʋlhfʋbek imma aiena ka hieli tuk oke:

²⁰ Mihma Chihowa ʋt, Kʋta hosh ia cha, Ahab a̱ nukfohki na ia cha, Lamolh‐kiliat a̱ akʋma chi̱ cho? achi ma, achʋfa kʋt yakohmichi hosh, achi ma, achʋfa kʋt yʋmihchi hosh, achi tuk oke.

²¹ Mihma shilombish osh kohcha cha, Chihowa itikba hikia cha, Ʋno ak osh nukfohki lashke, achi tuk oke:

²² Mihma Chihowa ʋt, Nanta ho̱ isht ish yʋmihchi hosh? achi ma, Kohchʋt ia likmʋt, shilombish holabi yosh i̱ hopaii ʋhleha moma ka, itih ha̱ foyuka lashke, achi tuk oke. Mihma Chihowa ʋt, Ish nukfohki cha, ish imaiya ak inla chi̱ hoke; kohchʋt ish ia cha, ish yʋmohmashke, achi ho̱, pisa li tuk oke, achi tok.

²³ Yʋmohmi ka himak a̱ yakeh! Chihowa ʋt chi̱ hopaii ʋhleha ilʋppa moma itih ha̱ shilombish holabi yo̱ fohki cha, chishno pulla ka ik achukmo ho̱, Chihowa ʋt anumpuli tuk oke, achi tok.

²⁴ Yohmi kia Chenaanah ushi Setekiah ʋt bili̱ka ona cha, Mikaiah itisukpi ya̱ isso mʋt, Katima yak o̱, Chihowa imi Shilombish ʋt a̱ filʋmmit chim anumpula chi̱ hosh ia tuk oh cho? achi tok.

²⁵ Mihma Mikaiah ʋt, Yakeh! nitak yʋmma lumʋt aboha anu̱kaka fehna ish chukowak mak osh, ish pisa hi oke, achi tok:

²⁶ Mihma Islael i̱ mi̱ko ʋt, Mikaiah ya̱ ishi cha, falʋmminchit tʋmaha holihta pehlichi Amon a̱, micha mi̱ko ushi Choab a̱ isht hʋsh im onashke;

²⁷ Micha, Mi̱ko ʋt yak achishke, Hatak ilʋppa aboha kʋllo fohki cha, ilbʋsha i̱ pʋska, micha ilbʋsha im oka ish ipihinta tuk o̱, achukma̱kʋt ʋla lashke, achishke, ish im achashke, achi tok.

²⁸ Mihma Mikaiah ʋt, Achukma̱kʋt falamʋt ish la yoba hokma, Chihowa ʋt sa tohno tuk keyu ho̱, anumpuli li tuk a chi̱ hoke, achi tok. Mihma, Okla hʋchia ma! momʋt achukmalit hʋsh haklashke, achi tok.

²⁹ Yohmi ho̱ Islael i̱ mi̱ko, micha Chutah i̱ mi̱ko Chehoshafat itatuklo kʋt Lamolh‐kileat a̱ ona tok.

³⁰ Mihma Islael i̱ mi̱ko ʋt Chehoshafat a̱, Il inlʋchi lish, ai itibi ka iba chukowa la chi̱ hoke; amba chishno ʋto chi̱ nafohka holitopa isht ish fohkashke, im achi tok. Micha Islael i̱ mi̱ko ʋt il inlʋchi cha, ai itibi ka iba chukowa tok.

³¹ Yohmi kia Silia i̱ mi̱ko ʋt, i̱ kʋpitʋni pokoli tuchina akucha tuklo tʋnʋp itichanʋlli puta pehlichi ʋhleha ha̱ im apesa mʋt, Chipunta, micha hochito kia hʋsh itibi ná, Islael i̱ mi̱ko ak illashke, achi tuk atok.

³² Atuk o̱ yakohmi tok, tʋnʋp itichanʋlli puta i̱ kʋpitʋni ʋhleha hʋt Chehoshafat a̱ pisa mʋt, Islael i̱ mi̱ko pulla hoke, okla achi tok. Mihmʋt itiba chi̱ hosh okla fullota tok: mihma Chehoshafat ʋt chitolit pa̱ya tok.

³³ Atuk o̱ yakohmi tok, tʋnʋp itichanʋlli puta i̱ kʋpitʋni ʋhleha hʋt, Islael i̱ mi̱ko yatuk keyu ho̱ akostininchi mʋt, hlioli tuk ʋt falama tok.

³⁴ Mihma hatak achʋfa kʋt yʋmmak fokalichi hosh, ititanampo halʋlli cha, pila tuk osh, Islael i̱ mi̱ko ya̱ ikkishi alata ititakla pit nʋhli tok: yʋmohmi hoka tʋnʋp im itichanʋlli ishta̱ya ya̱, Chibbak a̱ fullochi cha, okla ha̱ ai ishit sa kohchí, sa nʋhla hoka, im achi tok.

³⁵ Mihma nitak yʋmma itibi kʋt isht i̱ shahlit ia tok: mihma mi̱ko ya̱ halʋlli na, tʋnʋp itichanʋlli foyuka cha, Silian ʋhleha ichapaka ya̱ hikia tok: atuk osh opia ma illi tok: mihma issish ʋt anʋhla ya̱ a kohchʋt tʋnʋp itichanʋlli iklʋna ya̱ yanʋllit ona tok.

³⁶ Atuk o̱ hʋshi ʋt okatʋla foka ma, anumpa hʋt a̱yʋt tʋshka chipota aiasha ka hlopullit, Hatak moma kʋt in tʋmaha holihta aiyukali ka onashke, micha hatak moma kʋt i̱ yakni aiyukali ka onashke, achi tok.

³⁷ Yohmi ho̱ mi̱ko ʋt illi na, Samalia ya̱ isht ʋla tok: mihma mi̱ko yash Samalia yak o̱ okla hohpi tok.

³⁸ Mihma achʋfa kʋt tʋnʋp itichanʋlli ya̱ Samalia oka talaia ya̱ ai achifa tok: mihma ofi puta kʋt im issish a̱ holakshit tahli tok: mihma i̱ nahalupa ya̱ achifa tok, Chihowa im anumpa yʋmma anumpuli tok mak o̱, yʋmohmi tok.

³⁹ Yohmi ka Ahab nana a kaniohmi tok inla, micha nana yʋmihchi tok moma, micha elefant noli chuka ikbi tok, micha tʋmaha holihta ikbi tok moma kʋt, Islael i̱ mi̱ko ʋhleha i̱ nitak holisso ha̱ a holisso keyu cho?

⁴⁰ Yohmi ho̱ Ahab ʋt i̱ki ʋhleha ha̱ ta̱kla nusi tok: mihma ushi Ahasiah ak osh ʋlhtobʋt mi̱ko tok.

⁴¹ Mikma Ahab ʋt Islael i̱ mi̱ko tok afʋmmi ont ai ushta ho̱, Asa ushi Chehoshafat ʋt Chutah ya̱ i̱ mi̱kot ishtia tok.

⁴² Chehoshafat ʋt afʋmmi pokoli tuchina akucha tahlapi hosh mi̱kot isht ia tok: atuk osh afʋmmi pokoli tuklo akucha tahlapi ho̱, Chelusalem a̱ mi̱kot ahanta tok: mihma ishki hohchifo kʋt Asubah yosh Shilhi ushetik atok.

⁴³ Micha i̱ki Asa a yʋmohmi tok moma kak o̱, a noho̱wa tok, naksika ik fulloto hosh, Chihowa itikba ya̱ ai ʋlhpiesa kak o̱ yʋmihinchi tok; yohmi kia achahaka puta ka ik kancho tok: okla hʋt achahaka puta ka nan ʋbit ai im issʋt, nabalama a hukmi moma hatok oka.

⁴⁴ Mihma Chehoshafat ʋt Islael i̱ mi̱ko ya̱ it i̱ nanaiya tok.

⁴⁵ Yohmi ka Chehoshafat nana a kaniohmi tok inla, micha nan ai im aia̱hli otʋninchi tok, micha kaniohmit itintanampi tok aiena kʋt, Chutah i̱ mi̱ko ʋhleha i̱ nitak holisso ha̱ a holisso keyu cho?

⁴⁶ Micha Sotomait ʋhleha atampa, yʋmmʋt i̱ki Asa i̱ nitak a̱ a̱sha moma tuk a̱, yakni yash a kohchi tok.

⁴⁷ Yʋmma foka ka Etom a̱ mi̱ko ʋt iksho tok: anumpeshi yosh mi̱ko tok.

⁴⁸ Chehoshafat ʋt Ofi ya̱ tʋli holisso lakna hoyot ia chi̱ ho̱, Hlashish peni hochito kohta shali ya̱ ikbi tok: yohmi kia peni hochito kohta shali ʋt, Esion‐kebe a tiapa tuk okʋt ik aiyo tok.

⁴⁹ Yohmi ma Ahab ushi Ahasiah ʋt Chehoshafat a̱, An tishu ʋhleha hʋt chin tishu ʋhleha takla, peni chito kohta shali ya̱ fohkʋt iashke, achi tok. Yohmi kia Chehoshafat ʋt ik haklo tok.

⁵⁰ Mihmʋt Chehoshafat ʋt i̱ki ʋhleha ha̱ ta̱kla nusi cha, i̱ki ʋhleha ha̱ ta̱kla, i̱ki Lewi in tʋmaha holihta ak o̱ ahollopi tok: mihma ushi Cheholam ak osh ʋlhtobʋt mi̱ko tok.

⁵¹ Chutah i̱ mi̱ko Chehoshafat ʋt mi̱ko tok afʋmmi ont isht auah untuklo ho̱, Ahab ushi Ahasiah ʋt Samalia ya̱ ʋttʋt, Islael a̱ i̱ mi̱kot ishtia tok: micha afʋmmi tuklo ho̱ Islael a̱ i̱ mi̱ko tok.

⁵² Micha Chihowa itikba nan ik achukmo ka yʋmihinchit, i̱ki a yʋmohmi tok ak o̱, micha ishki a yʋmohmi tok ak o̱, micha Nebat ushi Cheloboam a yʋmohmit, Islael a̱ ashʋchichi tok ak o̱ a noho̱wa tok.

⁵³ I̱ki ʋt a yʋmohmi tok moma kak o̱, yʋmohmit Baal a̱ im antiʋt aiokpahanchi cha, Islael in Chitokaka Chihowa ya̱ nokowʋchi tok oka.