1 Mi̱ko 21 - Chahta Holisso Holitopa 1886

¹ Atuk o̱ nana ilʋppa puta kʋt yohmi haya̱ yakohmi tok, Chesleelait Nabolh ʋt pa̱kʋpi ahollokchi, yʋmmʋt Chesleel talaia hosh, Samalia i̱ mi̱ko Ahab im aboha bili̱ka fehna talaia tok.

² Mihma Ahab ʋt Nabolh a̱ im anumpulit, Chi̱ pa̱kʋpi ahollokchi ya̱ is sʋma na, haiyu̱kpulo ahollokchi ikbi lashke, an chuka bili̱ka talaia hoka: mikma pa̱kʋpi ahollokchi achukma i̱ shahli ka chima lashke: keyukmʋt chim ʋlhpesakma, ai illi ʋlhpesa ka tʋli holisso yo̱ chima lashke, achi tok.

³ Mihma Nabolh ʋt Ahab a̱, A̱ki ʋhleha i̱ yakni ya he ʋlhpisa tok a̱ chima la hi a̱, Chihowa ʋt ʋm olʋbashke, im achi tok.

⁴ Mihma Ahab ʋt, anumpa Chesleelait Nabolh ʋt im anumpuli tuk pulla kak o̱, chu̱kʋsh wekit im okpulo hosh in chuka ya̱ ona tok; a̱ki ʋhleha i̱ yakni ya he ʋlhpesa tok a̱, chima la he keyu, achi hatuk oka; micha in topa pakna tʋshkit itoyula mʋt, nashuka ya̱ misha pit shanaia cha, pʋska ya̱ ʋpa he keyu tok.

⁵ Yohmi kia tekchi Chesebel ʋt im ona cha, Nanta katiohmi ho̱ chi chu̱kʋsh ʋt ilapissa fehna cha, pʋska ya̱ ish pa he keyu cho? im achi tok.

⁶ Mihma, Chesleelait Nabolh a̱ im anumpulit, Tʋli holisso chima likma chi̱ pa̱kʋpi ahollokchi ya̱ ʋmá; keyukmʋt chim ʋlhpesakma, pa̱kʋpi ahollokchi inla ya̱ chima lashke, achi li ma, afalamichit, A̱ pa̱kʋpi ahollokchi ya̱ chima la he keyú, ʋm achi kak oke, im achi tok.

⁷ Mihma tekchi Chesebel ʋt, Himak a̱ Islael im apehlichika ya̱ ish pehlichi hoh cho? Wakaya cha, pʋska ʋpʋt, chi̱ chu̱kʋsh ʋt yukpashke: ʋno ak osh Chesleelait Nabolh i̱ pa̱kʋpi ahollokchi ya̱ chima lashke, im achi tok.

⁸ Yohmi mʋt holissochi cha, Ahab hohchifo ha̱ takalichi mʋt, im isht inchu̱wa isht in chonli cha, asʋnonchi ʋhleha, micha holitompa ʋhleha aiena Nabolh in tʋmaha holihta ta̱kla a̱sha tuk a̱, pit i̱ pila tok.

⁹ Micha, Nahullochi ya̱ hʋsh apesashke, micha Nabolh a̱ achahaka okla ititakla hʋsh binilichashke:

¹⁰ Micha hatak Belial ushi tuklo ho̱ itikba hʋsh binohlichi na, atokolit Chihowa, micha mi̱ko ya̱ ik ahobalot ish anumpuli tuk oke, im achashke: mikma kocha isht onʋt, tʋli ishit hʋsh boli na illashke.

¹¹ Mihma in tʋmaha holihta hatak asʋnonchi ʋhleha, micha holitompa ʋhleha in tʋmaha holihta ai okla hʋt, Chesebel ʋt i̱ pila tuk holisso pit i̱ pila tuk a, holisso hatuk mak o̱, yʋmihchi tok.

¹² Nahullochi ya̱ okla apesa cha, Nabolh a̱ achahaka okla ititakla binilichi tok.

¹³ Mihma hatak tuklo Belial ushi yosh ona cha, itikba chieya tok: micha Belial hatak ash osh okla itikba ai atokolit, Nabolh a̱ atokolit, Nabolh ʋt Chihowa, micha mi̱ko ya̱ ik ahobalot im anumpuli tuk oke, achit okla tok. Yohmi ma tʋmaha holihta ya̱ kocha isht ona cha, tʋli ishit boli na illi tok.

¹⁴ Yohmi ma Chesebel a̱ anumpa okla pit i̱ pilʋt, Nabolh ʋt tʋli ishit boa cha, illishke, achi tok.

¹⁵ Atuk o̱ yakohmi tok, Nabolh ʋt tʋli ishit boa cha, illi tuk a̱, Chesebel ʋt haklo mʋt, Chesebel ʋt Ahab a̱, Wakaya cha, Nabolh i̱ pa̱kʋpi ahollokchi tʋli holisso yosh ʋlhtoba hi a̱, chima ik bʋnno tuk a̱ ish ishashke: Nabolh ʋt okcha̱ya keyu, amba illi hoka, im achi tok.

¹⁶ Atuk o̱ yakohmi tok, Nabolh ʋt illi tuk o̱ Ahab ʋt haklo mʋt, Ahab ʋt Chesleelait Nabolh i̱ pa̱kʋpi ahollokchi ya̱ isha chi̱ hosh, wakayʋt ia tok.

¹⁷ Mihma Chihowa im anumpa hʋt, Tishbait Elichah ya̱ im ʋla mʋt,

¹⁸ Wakayʋt iʋt Islael i̱ mi̱ko Ahab, yʋmmʋt Samalia anta ka ont iʋt afamashke: yakeh! Nabolh i̱ pakʋpi ahollokchi ya̱ isha chi̱ hosh, yʋmma onʋshke.

¹⁹ Mikmʋt im anumpulit, Chihowa ʋt yak achishke, Ish bi cha, ish ishi cho? ish achashke. Micha im anumpulit, Chihowa ʋt yak achishke, Nabolh im issish a̱ ofi puta kʋt a holakshi tuk akinli ho̱, chim issish a̱ chishno pulla ka, a holaksha chi̱ hoke, achi tok.

²⁰ Mihma Ahab ʋt Elichah ya̱, An tʋnʋp ma! is si ahayuchi cho? achi tok. Mihma afalamichit, Chi ahayuchi lishke: ile kanchit Chihowa itikba ya̱ nana ik achukmo ka ish toksʋli hoka.

²¹ Yakeh! nana ik achukmo ka chi onochit, chim ishtatiaka ya̱ ishit kanchit, micha Ahab in chuka achʋfa nakni moma, micha Islael yuka, micha Islael yuka keyu aiena ka ishit kanchi la hi oke.

²² Nan isht nokowʋchi isht is sa nokowʋchit Islael a̱ ish ashʋchichi tok oka, chin chuka achʋfa ya̱ Nebat ushi Cheloboam in chuka achʋfa atok mak o̱, chohmichit, micha Ahichah ushi Baasha in chuka achʋfa atok mak o̱, chohmichi la chi̱ hoke, achi tok.

²³ Mihma Chihowa ʋt Chesebel a̱ isht anumpulit, Ofi puta kʋt Chesebel a̱, Chesleel tʋli holihta bili̱ka ai ʋpa chi̱ hoke.

²⁴ Ahab ai achʋfa yosh tʋmaha holihta ai illi hokʋno, ofi puta kʋt ʋpa chi̱ hoke: mikma yakni haiaka ya̱ ai illi hokʋno, hushi puta ʋba itʋnowa kʋt ʋpa chi̱ hoke.

²⁵ Amba Ahab, yʋmma tekchi Chesebel ʋt nukfohki na, ile kanchit, Chihowa itikba ya̱ nan ashʋchi puta yʋmihchi ka, achʋfa kia chohmi kʋt iksho hoke.

²⁶ Micha naholbʋt toba puta ka iakaiya kak osh, ile yuwalʋchi fehnʋt, Amolait okla yʋmma Chihowa ʋt Islael im ʋlla ʋhleha itikba ya̱ tihlelit kocha wehli tok ʋt, yʋmohmi tok puta ka yʋmihinchi tok.

²⁷ Atuk o̱ yakohmi tok, Ahab ʋt anumpa yʋmma haklo mʋt, i̱ nafohka ya̱ hlilʋffi cha, shukcha toba ya̱ nipi atuk a̱ lapalichi mʋt na hullochit nahishi tʋnna isht anchit itoyula tok; micha lumʋt a̱ya tok.

²⁸ Mihma Chihowa im anumpa hʋt Elichah Tishbait ash im ʋla mʋt,

²⁹ Ahab ʋt sa tikba ya̱ chu̱kʋsh akanlosichi ka ish pi̱sa cho? Sa tikba ya̱ chu̱kʋsh akanlosichi hoka, i̱ nitak okʋno, nan ik achukmo ka onochi la he keyu hoke; amba ushi i̱ nitak ak o̱, nan ik achukmo ka in chuka achʋfa ya̱ onochi la hi oke, achi tok.