1 Mi̱ko 20 - Chahta Holisso Holitopa 1886

¹ Mihma Silia i̱ mi̱ko Benhatat ʋt in tʋshka chipota moma ka hoyot itʋnahli tok: mihma mi̱ko pokoli tuchina akucha, tuklo hosh, micha issuba, micha tʋnʋp itichanʋlli aiena hosh apehʋt a̱ya tok: mihmʋt iʋt Samalia ya̱ abinachit afolubli cha, in tanampi tok.

² Micha anumpa shali ya̱ pit tihleli na, tʋmaha holihta ya̱ ont chukowa cha, Islael i̱ mi̱ko Ahab a̱ okla im ona mʋt, Benhatat ʋt yak achishke,

³ Chin tʋli hʋta, micha chin tʋli holisso lakna yʋt ʋmmi hoke: chin tekchi ʋhleha, micha chim ʋlla ʋhleha aiena kak kia achukma i̱ shahli kak osh ʋmmi hoke, im achi tok.

⁴ Mihma Islael i̱ mi̱ko ʋt afalamichit, A̱ shahli mi̱ko ma! nana ish achi tuk mak o̱, ʋno, micha nana ʋm a̱sha aiena kʋt chimmi hoke, achi tok.

⁵ Mihma anumpa shali ʋhleha hash osh anonti ʋla mʋt, Benhatat ʋt yak achishke, Anumpa chi̱ pila li kʋt, Chin tʋli hʋta, micha chin tʋli holisso lakna, micha chin tekchi ʋhleha, micha chim ʋlla ʋhleha aiena ka sʋbbak a̱ ish fohkashke, achi li tuk ak inli kia,

⁶ Yohmi tuk kia an tishu ʋhleha ha̱ onna ha̱ himak a̱ chohmikma, pit chi̱ pila likma, chin chuka ya̱, micha chin tishu ʋhleha in chuka aiena ka a hopo̱koya chi̱ hoke; atukma yakohma hi oke: nana kia ish pisa ka achukmakma, ibbak okla fohkikmʋt ishit minta chi̱ hoke, achi tok.

⁷ Yohmi ma Islael i̱ mi̱ko ʋt yakni yʋmma im asʋnonchi moma ka hoyo cha, Hʋch im asilhha lishke, yohmi hosh ahni cha, hatak ilʋppʋt nana ik achukmo hoyo ka hʋsh pisashke: sa tekchi ʋhleha, micha ʋm ʋlla moma, micha an tʋli hʋta, micha an tʋli holisso lakna aiena ka et a̱ hoyo ma, ak im i̱ hullo tuk oke, achi tok.

⁸ Mihma asʋnonchi ʋhleha moma, micha okla moma kʋt, Ish i̱ haponakla ná, micha ʋlhpesa ish im ahni ná, okla im achi tok.

⁹ Yʋmohmi ho̱ Benhatat im anumpa shali ʋhleha hash, A̱ shahli mi̱ko ya̱ ish im anolashke, Ʋmmona chin tishu ha̱ et ish i̱ hoyo tuk a̱, moma yʋmihchi la hinla: amba nana ilʋppak okʋno yʋmihchi la he, ʋlhpesa keyu hoke. Mihma anumpa shali ʋhleha hash osh ia cha, anonti anumpa isht im ona tok.

¹⁰ Mihma Benhatat ʋt anumpa pit i̱ pila mʋt, Samalia lukfi pushi ʋt okla siakaiya moma ka, ibbak achʋfa ʋlhto banot fullota ʋlhpesakma, chitokaka puta kʋt yakohmi, micha i̱ shahli kia si yʋmihchashke, achi tok.

¹¹ Mihma Islael i̱ mi̱ko ʋt afalamichit, Hʋsh im anolashke, Tʋnʋp a̱ya na halupa isht il ʋskofʋchit hikia hokʋto, shueli ka chohmit isht ik ilauato kashke, achi tok.

¹² Atuk o̱ yakohmi tok, Benhatat ʋt oka ishko hosh yʋmma, micha mi̱ko ʋhleha aiena kʋt, ʋlhtipo a̱sha tuk osh haklo mʋt, in tishu ʋhleha ha̱, Baiʋllit hʋsh hiohlashke, im achi tok. Mihma tʋmaha holihta ya̱ itiba chi̱ hosh okla baiʋllit hiohli tok.

¹³ Mihma yakeh! hopaii ʋt Ahab Islael i̱ mi̱ko ya̱ im ona cha, Chihowa ʋt yak achishke, Okla chito ilʋppa moma ka ish pi̱sa cho? yakeh! himak nitak a̱ chibbak fohki la chi̱ hoke, yʋmohmi ho̱ ʋno ak osh Chihowa sia ka, ish ithaiyana chi̱ hoke, achi tok.

¹⁴ Mihma Ahab ʋt, Kʋta hak o̱? achi tok. Micha, Chihowa ʋt, Yakni apehlichi puta hatak himithoa holitompa ʋhleha yak achi̱ hoke, achishke, achi tok. Mihma, Kʋta hosh itiba chi̱ ka, itafamʋcha chi̱ cho? achi tok. Mihma, Chishno yá, achi tok.

¹⁵ Yohmi ma yakni apehlichi puta hatak himithoa holitompa ʋhleha ha̱ hotihna ma, tahlepa tuklo cha pokoli tuchina akucha tuklo tok: micha iaka̱ya ka Islael ushi ʋhleha moma okla puta moma kia hotihna ma, tahlepa sipokni untuklo tok.

¹⁶ Atuk osh tʋbokoli ma okla kohchʋt ia tok: amba Benhatat ʋt oka ishkot haksit, yʋmma, micha mi̱ko ʋhleha, mi̱ko pokoli tuchina akucha tuklo apela tuk aiena kash osh ʋlhtipo ya̱ aiasha tok

¹⁷ Mihma yakni apehlichi puta hatak himithoa holitompa ʋhleha hash osh ti̱kba kohcha tok: mihma Benhatat ʋt pit tihleli tok, atuk o̱ ant im anoli mʋt, Okla hʋt Samalia ya̱ kohchʋt mintishke, okla achi tok.

¹⁸ Mihma Benhatat ʋt, Iti̱ nanaiya hosh minti hoh kia, okcha̱ya na hʋsh ishashke: keyukmʋt tanampi hosh minti hoh kia, okcha̱ya na hʋsh ishashke, achi tok.

¹⁹ Yohmi ma yakni apehlichi puta hatak himithoa holitompa ʋhleha hash osh tʋmaha holihta ya̱ kohcha ma, tʋshka chipota ʋt iakaiya tok.

²⁰ Mihma hatak achʋfa ho̱ aiyukali okla ʋbi tok: mihma Silian ʋhleha hʋt yihlepa tok; mihma Islael ʋt hlioli tok: mihma Silia i̱ mi̱ko Benhatat ʋt issuba ombinili cha, issuba ombinili ʋhleha ta̱kla malelit hlakofi tok.

²¹ Mihma Islael i̱ mi̱ko ʋt kohchʋt ia mʋt, issuba, micha tʋnʋp itichanʋlli aiena ka issot kanchi mʋt, Silian ʋhleha aiena ka issot kanchi na, illi kʋt laua fehna tok.

²² Mihma hopaii yash osh Islael i̱ mi̱ko ya̱ im ʋla cha, Iá, ish ile hlampkochashke, micha yakohmi ahnit, nana ish kaniohmi kʋt ish pihi̱sashke: ont afʋmmi kʋt ʋlakma, Silia i̱ mi̱ko ʋt ʋlʋt chin tanampa chi̱ hoke, im achi tok.

²³ Atuk o̱ Silia i̱ mi̱ko in tishu ʋhleha hʋt, In chitokaka puta kʋt nʋnih foka in chitokaka puta yoke; yʋmohmi hatuk osh kʋllo kʋt pi̱ shahli tuk oke; amba yakni patali ak o̱ il ai itibashke, mikmʋt kʋllo kʋt il i̱ shali pulla chi̱ hoke.

²⁴ Micha ilʋppak o̱ ish yʋmihchashke, Mi̱ko ʋhleha ha̱ a hikia aiyukali ka ishit ish a kanʋllichashke, micha kʋpitʋni ʋhleha ho̱ atobbichit ish hiohlichashke.

²⁵ Micha tʋshka chipota ʋt, chi̱ kʋnia tuk a̱ chohmi, issuba hʋt kʋnia tokma mih makinli, micha tʋnʋp itichanʋlli ʋt kʋnia tokma chohmi ho̱, ish hotihnashke: mikmʋt yakni patali yo̱ il ai itibashke, mikmʋt kʋllo kʋt il i̱ shahli pulla chi̱ hoke, im achi tok. Mihma im anumpa ha̱ i̱ haponaklo cha, yʋmihchi tok.

²⁶ Atuk o̱ ont afʋmmi kʋt ʋla ma yakohmi tok, Benhatat ʋt Silian okla ha̱ hotihna cha, Islael a̱ itiba chi̱ hosh Afek a̱ ona tok.

²⁷ Mihma Islael im ʋlla ʋhleha hʋt holhtihna mʋt, momʋt a̱sha cha, itibit ia tok: atuk osh Islael im ʋlla ʋhleha hʋt issi kosoma ushi a̱ya iskitini tuklo chohmi hosh, itikba ont binachi tok; amba Silian okla hash osh yakni ya̱ alota tok.

²⁸ Mihma hatak Chitokaka im antia yʋt onʋt, Islael i̱ mi̱ko ya̱ im anumpulit, Chihowa ʋt yak achishke, Chihowa ʋt nʋnih foka Chitokaka yoke, amba okfa ano Chitokaka keyu, Silian okla hʋt achi hoka, yʋmohmi hoka okla chito ilʋppa chibbak fohki likma, ʋno ak osh Chihowa sia ka, ish ithaiyana chi̱ hoke, achi tok.

²⁹ Micha it ichapʋt binachit aiasha na, nitak untuklo tok. Micha yohmi kash osh nitak ont isht untuklo ma it afama cha, itibi tok: mihma Islael im ʋlla ʋhleha hʋt Silian okla ha̱ nitak achʋfa ka, hatak aka a̱ya tahlepa sipokni tahlepa achʋfa ho̱ ʋbi tok.

³⁰ Amba inlaka yʋt yihlepʋt Afek a̱ onʋt, tʋmaha holihta ya̱ chukowa tok; mihma hlako̱fi tuk ʋhleha ha̱ tʋli holihta yʋt o̱ kinafa cha, tahlepa sipokni pokoli tuklo akucha untuklo ho̱ ai ʋbi tok. Mihma Benhatat ʋt malelit, tʋmaha holihta ya̱ ont chukowa cha, aboha anu̱kaka fehna ont chukowa tok.

³¹ Mihma in tishu ʋhleha hʋt, Yakeh! himak a̱ Islael in chuka achʋfa i̱ mi̱ko ʋhleha hʋt mi̱ko nan i̱ nukha̱klo ʋhleha ho̱ e haklo chatuk oke; chim asilhha lishke, nahishi tʋnna isht il ʋskofʋchikmʋt, aseta pi noshkobo ha̱ isht e takchi cha, kohchʋt Islael i̱ mi̱ko ya̱ il im onashke; chi okchalinchi yoba ná, achi tok.

³² Yohmi ma nahishi tʋnna isht il ʋskofʋchi mʋt, aseta ha̱ noshkobo isht takchi cha, Islael i̱ mi̱ko ya̱ im ona mʋt, Chin tishu Benhatat ʋt, Ik si okcha̱yá, chim asilhha lishke, achishke, achi tok. Mihma, Okcha̱ya moma cho? itibapishi li hoke, achi tok.

³³ Mihma nana kia kaniohma chi̱ ka, achukmalit apistikeli tuk osh, tu̱shpʋt hahha̱klo mʋt, Benhatat ʋt chitibapishi hoke, okla achi tok. Yohmi ma, Oh ia cha, isht oh ʋlá, achi tok. Yohmi ma Benhatat ʋt im ʋla ma, tʋnʋp itichanʋlli ya̱ oiyʋchi tok.

³⁴ Mihma Benhatat ʋt, Tʋmaha holihta puta a̱ki ʋt chi̱ki ya̱ im ishi tok a̱, chi̱ falʋmminchi lashke; mikma a̱ki ʋt Samalia aiitʋnowa ai ikbi tok a̱, chohmichit Tamaskʋs a̱ aiitʋnowa ya̱ ish ai ikbashke, achi tok.

³⁵ Mihma hopaii ushi ʋhleha ai achʋfa ya̱ hatak achʋfa hosh in chuka abili̱ka yo̱, Chihowa im anumpa ho̱, Sʋssó, chim asilhha lishke, im achi tok. Mihma hatak ash osh ik bʋnno tok.

³⁶ Mihma, Chihowa im anumpa ho̱ chik im antio hoka, a̱ filʋmmit ish ia makinli ho̱, koi chito ʋt chiba chi̱ hoke, im achi tok. Mihma i̱ filʋmmit ia makinli ma, koi chito ʋt ahayuchi cha, ʋbi tok.

³⁷ Yohmi ma hatak inla yo̱ ahayuchi mʋt, Sʋssó, chim asilhha lishke, achi tok. Mihma hatak ash osh isso mʋt, yʋmihchit isso kʋt hotopali tok.

³⁸ Yohmi ma hopaii ash osh ia mʋt, hina takla mi̱ko ya̱ im aiehchi tok; mihmʋt nashuka ya̱ hituk chubbi o̱ ashachi cha, im ile luhmi tok.

³⁹ Atuk osh mi̱ko ʋt a̱ya ma, mi̱ko ya̱ i̱ pa̱ya tok; micha, Chin tishu hʋt ai itin tanampi ka iklʋna ona tuk oke; atuk o̱, yakeh! hatak ʋt fullota cha, hatak isht ʋm ʋla mʋt, Hatak ilʋppa ish halanlashke: kaniohmi hosh kʋniakma, im ilhfiopak atukma chim ilhfiopak ak osh ʋlhtoba chi̱ hoke; keyukmʋt tʋli hʋta talent achʋfa ho̱ ish atobba chi̱ hoke, achi tuk oke.

⁴⁰ Atuk o̱ chin tishu hʋt ilʋppa, micha yʋmma isht anta li ma, kʋnia tuk oke, achi tok. Mihma Islael i̱ mi̱ko ʋt, Yohmi ka na chim ʋlhpisa kʋt yʋmmak achi̱ hoke; chishno akinli hosh ish atokolishke, im achi tok.

⁴¹ Mihma tu̱shpʋt hituk chubbi ya̱ nashuka ya̱ ai ishit kanchi tok: mihma hopaii ʋhleha ha̱ ai achʋfa tuk a̱, Islael i̱ mi̱ko ʋt akostininchi tok.

⁴² Mihma hopaii ash osh, Chihowa ʋt yak achishke, Hatak yʋmmʋt illit tahʋt ʋmohma he im apesa li tuk a̱, ik iá, ish im ahni na ia tuk; yʋmohmi hoka im ilhfiopak atuk a̱, chim ilhfiopak ak osh ʋlhtoba chi̱ hoke, micha im okla hatuk a̱, chim okla hak achi̱ hoke, im achi tok.

⁴³ Mihma Islael i̱ mi̱ko ʋt chu̱kʋsh wekit, micha im okpulo hosh Samalia ya̱ onʋt in chuka ya̱ ona tok.