1 Mi̱ko 2 - Chahta Holisso Holitopa 1886

¹ Mihma Lewi ʋt ai illa he nitak ʋt tahʋt mihinti tok; mihma ushi Solomon a̱ atokolit i̱ mihʋt,

² Yakni moma kʋt atia chatuk a̱ ia lishke: yʋmohmi hoka ish kʋllo cha, hatak a̱hli yosh ish il otʋnihinchaske;

³ Micha chin Chitokaka Chihowa ʋt atokolit chi̱ miha kak o̱ ish im antia cha, i̱ hina puta ish a noho̱wa cha, i̱ nan ʋlhpisa puta, micha im anumpa ʋlhpisa puta, micha i̱ nan ai isht apesa puta, micha i̱ nan ai isht il atokoli puta aiena kʋt Moses i̱ nanʋlhpisa a holisso tok a̱, ish ieshashke; yʋmohmi hosh nana ho̱ ish kaniohmikmʋt, micha kanima yo̱ pit ish fullotakmʋt, hopoyuksa hosh ish a̱yashke:

⁴ Yohmi na Chihowa ʋt im anumpa ishit si anumpulit, Chim ʋlla ʋhleha hʋt ai itʋnowa kʋt ahah! ahni cha, chu̱kʋsh aioklu̱hanchit, micha imi shilombish aioklu̱hanchit sa tikba aia̱hli hosh itʋnoho̱wakma, Islael ai ombinili holitompa ya̱ ombinila hi ʋt hatak achʋfa kia ik chim iksho ka he keyu hoke, achi tok ʋt aia̱hlichashke.

⁵ Micha Seluiah ushi Choab ʋt nana sa kaniohmichi tok, micha Islael tʋshka chipota i̱ kʋpitʋni chito tuklo, Ne ushi Abne, micha Chehle ushi Amasa itatuklo, yʋmmak oka ʋbi cha, it i̱ nanaiyʋt a̱sha ho̱, tʋnʋp issish hlatʋbli tok; micha tʋnʋp issish a̱ im ʋskofʋchi isht ʋskofaiyachi tok, micha shulush iyi hoyolo tok aiena ka, issish lapalahinchi tok a̱ ish ithaiyanʋshke.

⁶ Yʋmohmi hoka chi hopoyuksa mak osh ish kaniohmichashke, micha noshkobo tohbi hʋt ai achukma̱kʋt ahollopi ya̱ ona hi o̱ chik im ahno kashke.

⁷ Amba Kileatait hatak Basillai ushi ʋhleha hano ish i̱ kanashke; mikma chim ai impa ya̱ ai ihimpa ʋhleha ha̱ ibafoyukashke: yohmi hosh chitibapishi Absalom a̱ i̱ maleli li ma, okla ʋm ʋla tuk oka.

⁸ Micha yakeh! Kela ushi Benchamait hatak Bahulim minti Shemei ʋt chi takla antʋshke, yʋmmak okʋt Mahanaim ia li nitak a̱ anumpa kalakshichi ik achukmo fehna ho̱ ishit sa kalakshichi tok: yohmi tuk kia ʋlʋt Chatan a̱ si afama na Chihowa hochifot anumpa kʋllo ilonochit i̱ miha li mʋt, Bʋshpo falaia ya̱ ishit chibi la he keyu, achi li tok.

⁹ Yʋmohmi hoka himak a̱ na hotopa he ʋlhpesa keyu ka chik chohmecho kashke: hatak hopoyuksa chia hokʋt nana ish kaniohmicha he ʋlhpesa kʋt ish ithaiyanʋshke: amba noshkobo tohbi ya̱ issish o̱ ahollopi ya̱ isht ish onashke, achi tok.

¹⁰ Mihmʋt Lewi ʋt i̱ki ʋhleha ha̱ ta̱kla nusi cha, Lewi in tʋmaha holihta yak o̱ ahollopi tok.

¹¹ Micha Lewi ʋt Islael a̱ i̱ mi̱kot nitak moma kʋt afʋmmi pokoli ushta tok: afʋmmi untuklo ho̱ mi̱kot Heblon a̱ ahanta tuk osh, afʋmmi pokoli tuchina akucha tuchina ho̱ Chelusalem a̱ a mi̱ko tok.

¹² Yohmi ma Solomon ʋt i̱ki Lewi im ai ombinili holitompa ya̱ ombinili tok; mihma im apehlichika yʋt kʋllot hikia fehna tok.

¹³ Mihma Hakkilh ushi Atonichah ʋt Solomon ishki Balh‐sheba ya̱ im ona tok. Mihma, Nanaiya hosh ish a̱ya cho? im achi tok. Mihma, Nanaiya li hoke, achi tok.

¹⁴ Micha achakalinchit, Nana chim achi la hi ʋt ʋm ashʋshke, achi tok. Mihma, Mihá, achi tok.

¹⁵ Mihma, Apehlichika yʋt ʋmmi hatok a̱, micha Islael moma kʋt ʋno ak osh mi̱ko la he ahnit, nashuka ya̱ si onochi tuk a̱ ish ithanʋshke; yohmi akinli kia apehlichika yʋt shanaiya cha, itibapishi li toba tuk oke: Chihowa yak osh ahni ho̱ immi hatuk oka.

¹⁶ Yohmi ka himak a̱ nana achʋfa ho̱ chim asilhha lishke, ahá chik sʋm acho kashke, achi tok. Mihma, Mihá, im achi tok.

¹⁷ Mihma, Solomon mi̱ko ya̱ ish im anumpulashke, (ahá chim acha he keyu hoka,) mikma Abishak Shunammait ohoyo ha̱ ʋma na sa tekchi yashke, achi tok.

¹⁸ Mihma Balh‐sheba ʋt, Ome, mi̱ko ya̱ chim it im anumpuli lashke, achi tok.

¹⁹ Yʋmohmi ho̱ Balh‐sheba ʋt Atonichah Solomon a̱ im it im anumpula chi̱ hosh im ona tok. Mihma mi̱ko ʋt wakayʋt afama cha il im akachunolit ai ombinili holitompa ya̱ ombinili mʋt, mi̱ko ishki ya̱ ai ombinili i̱ hilecha chi̱ ka, i̱ miha tok; mihma ishtimpak imma ya̱ binili tok.

²⁰ Mihma, Nana iskitini achʋfa ho̱ chim ahni lishke; ahá chik sʋm acho kashke, chim asilhha lishke, achi tok. Mihma mi̱ko ʋt, Asilhhá, hʋshki ma! ahá chim achi la he keyu hoke, im achi tok.

²¹ Mihma, Abishak Shunammait ohoyo hash o̱ chitibapishi Atonichah ya̱ ish ima na tekchi yashke, achi tok.

²² Mihma mi̱ko Solomon ʋt afalamichit, ishki ya̱, Katiohmi ho̱ Atonichah ya̱ Abishak Shunammait ohoyo ha̱ ish im asilhha cho? apehlichika yak kia ish im asilhhashke; (ʋmʋni yoka;) yʋmma, micha Abiahla naholitompa isht ʋtta, micha Seluiah ushi Choab aiena ka; im achi tok.

²³ Yohmi ma Solomon mi̱ko ʋt Chihowa hochifot anumpa kʋllo il onochit miha mʋt, Chitokaka yʋt si yakohmichit, micha i̱ shahli kia, Atonichah ʋt ilap im ilhfiopak akinli ho̱ i̱ sanali hosh, ik anumpulo ke tuk okma, si yʋmihchashke.

²⁴ Yʋmohmi hoka himak a̱ Chihowa ʋt okcha̱ya pulla cha, yʋmmak osh kʋllochit sa hilechi cha, a̱ki Lewi im ai ombinili holitompa ya̱ si ombinilichi tuk, micha miha tuk mak osh chuka ʋm ikbi tuk oka, himak nitak Atonichah ʋt illa chi̱ hoke, achi tok.

²⁵ Mihmʋt Solomon mi̱ko ʋt Chehoiata ushi Benaiah ya̱ tohnot pila na, ont onʋtola na illi tok.

²⁶ Mihma Abiahla naholitompa isht ʋtta yano mi̱ko ʋt, Ia cha, chim osapa akinli, Anahlolh taloha kak o̱ ish onashke; chilla he ʋlhpesa hokʋt; yohmi kia himak ano chibi la he keyu, a̱ki Lewi itikba Chitokaka Chihowa im itombi holitopa ya̱ sholit ish a̱ya beka tok, micha a̱ki ʋt isht ai ilbʋsha moma ka, ish ibai ilbʋsha beka tok oka, im achi tok.

²⁷ Yʋmohmi ho̱ Solomon ʋt Abiahla ʋt Chihowa naholitompa isht im ʋtta yatuk a̱ kocha pit tobli tok; yʋmohmi hosh Chihowa im anumpa ha̱ Eli in chuka achʋfa yʋt Shiloh ya̱ a̱sha ka ai isht anumpohonli tok a̱, aia̱hlicha chi̱ hatok.

²⁸ Mihma anumpa hʋt Choab a̱ im ona tok; (Choab ʋt filʋmmit Absalom a̱ iakaiya tok keyu akinli kia, filʋmmit Atonichah ya̱ iakaiya tuk okʋt:) mihmʋt Choab ʋt malelit Chihowa in tabenakel a̱ ona cha, alta lapish puta ka hoklit ieshi tok.

²⁹ Atuk o̱ Choab ʋt malelit Chihowa in tabenakel a̱ ona cha, yakeh! alta bili̱ka ya̱ hikiʋshke, achit mi̱ko Solomon a̱ im anoli tok: mihma Solomon ʋt Chehoiata ushi Benaiah ya̱ pila mʋt, Ish ia cha, ont ish onʋtolashke, achi tok.

³⁰ Atuk o̱ Benaiah ʋt Chihowa in tabenakel a̱ ona cha, Mi̱ko ʋt, Ish kohchashke, yak achishke, achi tok. Mihma Ahá amba ilʋppak o̱ a sʋlla chi hoke, achi tok. Mihma Benaiah ʋt mi̱ko ya̱ anonti anumpa isht ʋla cha, Choab ʋt yak achishke, micha afalamichit ilʋppak o̱ ʋm achishke, achi tok.

³¹ Mihma mi̱ko ʋt, Miha tuk mak o̱ ish yʋmihchi cha, ont ish onʋtola cha, ish hohpashke; yʋmohmi hosh issish nan okpʋni keyu Choab ʋt hlatʋbli tok a̱ ʋno, micha a̱ki in chuka achʋfa ya̱ ai ishit ish kanchashke.

³² Mikma yʋmmʋt hatak tuklo hosh aiʋlhpiesa, micha achukma kʋt ilap a̱ i̱ shahli, yʋmmʋt Ne ushi Abne, Islael tʋshka chipota i̱ kʋpitʋni chito, micha Chehle ushi Amasa Chutah tʋshka chipota i̱ kʋpitʋni chito ya̱, a̱ki ʋt ik ithano ho̱, onʋtolʋt bʋshpo falaia isht ʋbi tok oka, Chihowa ʋt ilap noshkobo akinli ho̱ im issish a̱ falʋmminchit onochashke.

³³ Yʋmohmi hoka yʋmma im issish ʋt Choab noshkobo, micha im isht atiaka noshkobo ha̱ onʋtoyula na biliashke: amba Lewi, micha im isht atiaka, micha in chuka achʋfa, micha im ai ombinili holitompa aiena yano Chihowa ʋt ahni na it i̱ nanaiya na bilia chi̱ hoke, im achi tok.

³⁴ Yʋmohmi ma Benaiah Chehoiata ushi ʋt iʋt ont onʋtolʋt ʋbi tok; mihma ilap in chuka akinli yakni haiaka ya̱ a hollopi tok.

³⁵ Mihma mi̱ko ʋt atobbichit Chehoiata ushi Benaiah yak o̱, tʋshka chipota pehlichi hilechi tok; micha mi̱ko ʋt naholitompa isht ʋtta Satok ak o̱ Abiahla ya̱ atobbichi tok.

³⁶ Micha mi̱ko ʋt Shimei ya̱ pit hoyo cha, Chelusalem ak o̱ chuka ish ai ikbi cha, yʋmmak o̱ ish ahantashke, micha yʋmma kohchʋt kanima ish ia ná.

³⁷ Yakohma hi oke, kohchʋt ish ia cha, Kitlon bokushi ya̱ ish ʋbanʋbli nitak yʋmma chilli pulla hi ʋt ish ithaiyanashke: chim issish ʋt chi noshkobo hak inli ho̱ onʋtoyulashke, im achi tok.

³⁸ Mihma Shimei ʋt mi̱ko ya̱, Anumpa hʋt achukmʋshke: a̱ shahli mi̱ko ʋt achi tuk mak o̱, chin tishu hʋt yʋmihcha chi hoke, im achi tok. Mihmʋt Shimei ʋt nitak laua ho̱ Chelusalem a̱ ahanta tok.

³⁹ Atuk o̱ yakohmi tok, afʋmmi tuchina kʋt ont taha ma, Shimei in tishu ʋhleha ha̱ tuklo kʋt tihlayʋt Kalh i̱ mi̱ko Maachah ushi Achish a̱ im ona tok: mihma Shimei ya̱ im anolit, Yakeh! chin tishu tuklo kash osh Kalh a̱ a̱shwʋshke, achi tok.

⁴⁰ Mihma Shimei ʋt wakaya cha, im issuba haksobish falaia ya̱ ompatali cha, in tishu tuklo kash hoyot a̱ya hosh Kalh a̱ onʋt, Achish a̱ im ona tok: micha Shimei ʋt in tishu tuklo kash Kalh a̱ ont ai isht ʋla tok.

⁴¹ Atuk o̱ Solomon a̱ im anolit, Shimei ʋt Chelusalem a̱ kohchʋt iʋt Kalh a̱ ona tuk osh anonti ʋlʋshke, achi tok.

⁴² Mihma mi̱ko ʋt Shimei ya̱ pit hoyo cha, Chihowa hochifot anumpa kʋllo il onochichit atokolit chi̱ miha li kʋt, Nitak yʋmma kohchʋt, kanima ish a̱yakmʋt, chilli pulla chi̱ kʋt ish ithaiyanashke, chim achi li tok keyu cho? mihma chisno ʋt, Anumpa haklo li ka achukmʋshke, is sʋm achi tok.

⁴³ Yʋmohmi hoka nanta katiohmi ho̱ Chihowa hochifot anumpa kʋllo im ilonochi, micha anumpa atokolit chi̱ miha li tuk aiena ka chik iesho tuk oh cho? im achi tok.

⁴⁴ Micha mi̱ko ʋt achakalinchit Shimei ya̱, Nahaksi moma chi chu̱kʋsh ʋt ahalaia kʋt ish ithanʋshke, yʋmmʋt a̱ki Lewi ya̱ nana ish kaniohmichi tok; yʋmohmi hoka Chihowa ʋt nana chi haksi ya̱ chishno chi noshkobo akinli ho̱ falʋmminchit onocha chi̱ hoke:

⁴⁵ Mikma mi̱ko Solomon ʋt holitopakma, Lewi im ai ombinili holitompa ʋt Chihowa itikba ya̱ kʋllot hikia na bilia hi oke, im achi tok.

⁴⁶ Yʋmohmi ma mi̱ko ʋt Chehoiata ushi Benaiah ya̱ i̱ miha ma, yʋmmʋt kohchʋt ia cha, onʋtola na illi tok: mihma apehlichika yʋt Solomon ibbak ak o̱ fohkʋt kʋllot hikia tok.