1 Mi̱ko 19 - Chahta Holisso Holitopa 1886

¹ Yohmi ma Ahab ʋt Chesebel a̱, Elichah ʋt nana kaniohmi tuk moma, im anoli tok: micha hopaii puta moma ka bʋshpo falaia isht ʋbit tahli tuk aiena ka im anoli tok.

² Yohmi ma Chesebel ʋt Elichah ya̱ anumpa shali pit i̱ pilʋt, Yakohmi, micha i̱ shahli kia chitokaka puta kʋt si yʋmihchashke, chim ilhfiopak a̱ yʋmma achʋfa im ilhfiopak akinli ka, onna ha̱ himak a̱ chohmikma, ak chi yʋmihchokma.

³ Yohmi na pisa mʋt wakaya cha, im ilhfiopak ishit chaha̱fa tok; micha Bee‐sheba yʋmmʋt Chutah immi ho̱ ona tok; micha in tishu ha̱ yʋmmak o̱ bohli tok.

⁴ Amba ilap ʋto nitak achʋfa anowa yakni haiaka yo̱ ona cha, chuahla holba nuta ant binili tok: mihmʋt ilap ʋt illa hi ʋt asilhha tok; micha, Ʋlhpesʋshke, Chihowa ma! himak a̱ ʋm ilhfiopak a̱ ish ishashke: achukma kʋt a̱ki ʋhleha atok a̱, i̱ shahli li keyu hoka, achi tok.

⁵ Atuk osh chuahla holba nuta itoyulʋt nusi ma, yakeh! enchel ʋt ant potoli cha, Wakaya cha, impá, im achi tok.

⁶ Mihma hopo̱koyo ma, yakeh! pʋska ʋt ʋlhpusha hosh tobaksi onʋtonla ma, oka kotoba ʋlhto kʋt noshkobo bili̱ka talaia tok. Mihma impa cha, oka yash ishko mʋt, anonti itoyula tok.

⁷ Mihma Chihowa im enchel ash osh anonti atukla ma ai ʋla cha, potoli mʋt, Wakaya cha, impá; ish a nowa chi̱ kʋt chi̱ hopaki fehna ak okʋt, achi tok.

⁸ Mihma wakayʋt impa cha ishko mʋt, il impa yʋmma ishit hlampko cha ia mʋt, nitak pokoli ushta micha ninak pokoli ushta ho̱ a̱yʋt, Holeb Chitokaka i̱ nʋnih ha̱ ona tok.

⁹ Micha yʋmma ona cha, hʋchukbi yo̱ chukowa cha a nusi tok; atuk o̱ Chihowa im anumpa hʋt im ʋla cha, Nanta ish katiohmi hosh ilʋppa ish anta cho? Elichah ma! im achi tok.

¹⁰ Mihma, Ʋba nan oklu̱ha il aieshi Chitokaka Chihowa ya̱ im i̱ nuktʋhla li fehna tuk oke: Islael im ʋlla ʋhleha hʋt nana chit im apesa ya̱ kanchi cha, chim alta puta ka kinʋffit tahli mʋt: chi̱ hopaii puta ka bʋshpo falaia isht ʋbit tahlishke; mikma ʋno, ʋno ak illa hosh sa hlako̱fishke, mikma ʋm ilhfiopak isha chi̱ hosh okla hoyoshke, achi tok.

¹¹ Mihma, Kohchʋt ish ia cha, nʋnih paknaka Chihowa itikba ya̱ ish hikiashke, achi tok. Mihma yakeh! Chihowa yʋt ant a̱ya tok, mikma mahli chito kʋllo fehna hosh Chihowa itikba ya̱ a̱yʋt, nʋnih puta kash mitahlichi mʋt, tʋli hochito aiena ka mitahlichi tok; yohmi kia Chihowa ʋt mahli ha̱ ik ibafoyuko ki tok: mahli haya̱ yakni ʋt winakʋchi tok: yohmi kia Chihowa ʋt yakni winakʋchi ka ik ibafoyuko ki tok.

¹² Mihma yakni winakʋchi haya̱ luak atok: yohmi kia Chihowa ʋt luak a̱ ik ibafoyuko ki tok; mihma luak ʋt a̱ya haya̱, anumpa luma iskitini hosh takali tok.

¹³ Atuk o̱ yakohmi tok, Elichah ʋt haklo mʋt, anchi ya̱ nashuka isht ompohomo cha, kohchʋt hʋchukbi achukowa ont hikia tok. Mihma anumpa hʋt im ʋla cha, Nanta ish katiohmi hosh ilʋppa ish anta cho? Elichah ma! im achi tok.

¹⁴ Mihma, Ʋba nan oklu̱ha il aieshi Chitokaka Chihowa ya̱ imi nuktʋhla li fehna tuk oke: Islael im ʋlla ʋhleha hʋt nana chit im apesa ya̱ kanchi cha, chim alta puta ka kinʋffit tahli cha, chi̱ hopaii puta ka bʋshpo falaia isht ʋbit tahlishke: mihma ʋno, ʋno ak illa hosh sa hlako̱fishke; mihma ʋm ilhfiopak a̱ isha chi̱ hosh okla hoyoshke, achi tok.

¹⁵ Mihma Chihowa, ʋt Iá, falamʋt Tamaskʋs yakni haiaka ya̱ ish onashke: atuk osh ish onakmʋt, Hasael a̱ Silia i̱ mi̱ko yachi̱ ho̱, nan ahʋmmit ish atokolashke;

¹⁶ Micha Nimshi ushi Chehu ya̱ Islael i̱ mi̱ko yachi̱ ho̱, nan ahʋmmit ish atokolashke; micha Abel‐méholah Shafat ushi Elisha ya̱ nan ahʋmmit ish atokoli na, chi ʋlhtobʋt hopaii yashke.

¹⁷ Atukma yakohma hi oke, kʋna hosh Hasael i̱ bʋshpo falaia ya̱ i̱ hlako̱fi tukma, Chehu ak osh ʋba chi̱ hoke: mikma kʋna hosh Chehu i̱ bʋshpo falaia ya̱ i̱ hlako̱fi tukma, Elisha ʋt ʋba chi̱ hoke.

¹⁸ Yohmi kia Islael aiachʋfa yʋt tahlepa sipokni untuklo hosh moma kʋt, Baal a̱ iyi̱kalaha ya̱ isht i̱ hʋchukbihlepa tuk keyu, micha itih ha̱ isht i̱ su̱ksowa tuk keyu, aiyukali keyu yo̱ il atombi li tuk oke, im achi tok.

¹⁹ Yohmi ho̱ yʋmma ʋttʋt ia tok; atuk osh Shafat ushi Elisha ʋt yakni patʋffi hosh, wak toksʋli yok auah tuklo hosh itikba aiasha ma, ilap ak osh isht auah tuklo ka ishit patʋffichi hosh anta na, ont ahayuchi tok: micha Elichah ʋt bili̱ka a̱ya mʋt, im anchi ya̱ onochit ont ia tok.

²⁰ Mihma wak toksʋli ya̱ issa cha, Elichah ya̱ iakaiyʋt hlioli mʋt, Chim asilhha lishke, a̱ki micha hʋshki itatuklo ka i̱ su̱ksowa hayosh, chiakaiya lashke, achi tok. Mihma, Anonti falamʋt iá; nanta chi katiohmichi li cho? im achi tok.

²¹ Mihma i̱ filammit falʋmʋt, wak toksʋli yok achʋfa ho̱ ishi cha ʋbi mʋt, wak toksʋli ishit toksʋli yash nipi ya̱ ishit honi cha, okla hash ima na, okla ʋpa tok: yohmi mʋt wakaya cha, Elichah ya̱ iakaiya cha, in toksahanli tok.