1 Mi̱ko 18 - Chahta Holisso Holitopa 1886

¹ Atuk o̱ nitak laua haya̱ yakohmi tok, afʋmmi ont isht atuchina ma, Chihowa im anumpa hʋt Elichah ya̱ im ʋla mʋt, Iá, Ahab a̱ ont ish im ile haiakʋchashke; mikma yakni ya̱ umba et onochi lashke, achi tok.

² Mihma Elichah ʋt Ahab a̱ im ile haiakʋcha chi̱ hosh ia tok: mihma Samalia ya̱ hohchʋfo palʋmmi fehna tok.

³ Mihma Ahab ʋt, Obatiah ʋt in chuka achʋfa apesʋchi yatuk o̱, hoyo tok: mihma Obatiah ʋt Chihowa ya̱ i̱ nukshopa fehna yatok.

⁴ Yakohmi tok atok, Chesebel ʋt Chihowa i̱ hopaii ʋhleha ha̱ ishit kanchi ma, Obatiah ʋt hopaii tahlepa achʋfa ho̱ ishi cha, pokoli tahlapi bi̱ka ho̱ hʋchukbi ya̱ a luhmit ashachi cha, pʋska, micha oka aiena ka ipeta tok atok okʋt.

⁵ Mihma Ahab ʋt Obatiah ya̱, Ia cha, yakni ya̱ chukowʋt, oka aiateli puta, micha bokushi puta moma ka ish onashke: hʋshuk a̱ il ahayuchi yoba cha, issuba, micha issuba haksobish falaia aiena ka il okchalinchi cha, nan ʋlhpoa moma kʋt illit ik pin taho yoba ná, achi tok.

⁶ Yohmi hosh yakni ya̱ hlopulla chi̱ hosh itakashapa tok; mihma Ahab ʋt ilap bano hosh hina achʋfa ho̱ iakma, Obatiah ʋt ilap bano hosh hina inla yo̱ ia tok.

⁷ Atuk o̱ Obatiah ʋt ia hosh a̱ya ma, yakeh! Elichah ʋt afama tok: mihma ithana mʋt, nashuka ishit hlipia cha, Chishno ʋt a̱ shahli, Elichah chia mak oh cho? achi tok.

⁸ Mihma afalamichit, Mih sia hoke; ia cha, chi̱ shahli ha̱, Yakeh! Elichah ʋt antʋshke, ont im anolí, achi tok.

⁹ Mihma, Nanta ho̱ nan ai ashʋchi li tuk o̱, chin tishu Ahab ibbak a̱ is sa fohki na, sʋba chi̱ cho?

¹⁰ Chin Chitokaka Chihowa ʋt okcha̱ya pulla ka, a̱ shahli hʋt okla nana kia, micha apehlichika nana kia, pit ik chi a hoyo ka ikshoshke: micha, Yʋmma iksho, achi ma, mi̱ko apehlichika micha yakni kia ik chi ahayucho tuk ʋt, anumpa kʋllo il onochit miha he, im apihi̱sa beka tok.

¹¹ Mihma himak a̱, Iá, chi̱ shahli ha̱, Yakeh! Elichah ʋt antʋshke, ont im anolí, ish achishke.

¹² Atukma yakohma chi̱ hoke, chi̱ filʋmmit ia li makinli ho̱, Chihowa imi Shilombish ʋt kanima ithana li keyu ho̱, chisht ia chi̱ hoke; atukma yohmit Ahab a̱ ont im anoli li tuk o̱, ik chi ahayuchokmʋt, sʋba chi̱ hoke: yohmi kia chin tishu ʋno ʋt, ʋlla si amomʋt Chihowa i̱ nukshopa sia hoke.

¹³ Nana kaniohmi li tok, yʋmmʋt Chesebel ʋt Chihowa i̱ hopaii ʋhleha ha̱ ʋbit tahli ma, Chihowa i̱ hopaii hatak tahlepa achʋfa ka pokoli tahlapi bi̱ka yo̱, hʋchukbi ya̱ a luhmi lish, pʋska, micha oka aiena ka ipeta li tok ʋt, im annoa tuk keyu cho?

¹⁴ Mihma himak a̱, Ia cha, chi̱ shahli ha̱, Yakeh! Elichah ʋt antʋshke, ont im anolí, ish achishke; mikma sʋba chi̱ hoke, achi tok.

¹⁵ Mihma Elichah ʋt, Ʋba nan oklu̱ha il aieshi Chihowa ʋt okcha̱ya pulla ka, mihi yo̱ itikba hikia li kʋt, himak nitak a̱ im ile haiakʋchi li pulla chi̱ hoke, achi tok.

¹⁶ Yohmi ho̱ Obatiah ʋt Ahab a̱ ont afama cha, im anoli tok: mihma Ahab ʋt Elichah ya̱ afamʋt ia tok.

¹⁷ Atuk o̱ yakohmi tok, Ahab ʋt Elichah ya̱ pisa mʋt, Ahab ʋt, Chishno ak osh Islael a̱ ilbʋshali chia hoh cho? im achi tok.

¹⁸ Mihma afalamichit, Ʋno ak osh Islael a̱ ilbʋshali li tuk keyu: amba chishno, micha chi̱ki in chuka achʋfa ish aiena kak atuk oke; yʋmohmit Chihowa im anumpa ʋlhpisa puta ka ish kanchi cha, Baalim ak o̱ ish iakaiya tok okʋt.

¹⁹ Yʋmohmi hoka himak a̱, Islael moma ka, micha Baal i̱ hopaii tahlepa ushta cha pokoli tahlapi, micha iti lokoli puta hopaii tahlepa ushta, yʋmmʋt Chesebel im ai impa ai ihimpa chatuk a̱ pit hoyot, Kamel nʋnih ak o̱ is sʋm itʋnahlashke, achi tok.

²⁰ Yohmi ho̱ Ahab ʋt Islael im ʋlla moma ka pit hoyo cha, hopaii puta ka Kamel nʋnih ak o̱ itʋnahli tok.

²¹ Mihma Elichah ʋt okla moma ka im ona cha, Katiohmi foka ho̱ ai anukfilli tuklo itintakla, anuktuklot hʋsh hieli cho? Chihowa yak osh Chitokaka yokma, hʋsh im antiashke: amba Baal ak okma hʋsh im antiashke, achi tok. Mihma okla hʋt anumpa achʋfa kia afalamichit ik acho tok.

²² Yohmi ma Elichah ʋt okla ha̱, Ʋno, ʋno ak illa hosh Chihowa i̱ hopaii ʋt anta lishke: amba Baal i̱ hopaii ʋt tahlepa ushta cha pokoli tahlapishke.

²³ Yʋmohmi hokʋt wak hobʋk tuklo ho̱ okla pimashke: micha wak hobʋk achʋfa ka ilapo ʋt atokoli cha, bʋshlit tahlikmʋt, iti itʋnaha o̱ ashachi cha, nuta ya̱ luak a̱ ik bohlo kashke: mikma ʋno ʋto wak achʋfa ya̱ atahli lish, iti itʋnaha ya̱ o̱ ashachi likmʋt, luak a̱ ak bohlo kashke.

²⁴ Mikma hʋchin chitokaka puta hohchifo ha̱ hʋsh i̱ pa̱ha̱yakma, ʋno ʋt Chihowa hohchifo ha̱ i̱ pa̱ya lashke: mikma Chitokaka nana hosh anumpa falama ya̱ luak o̱ et pilak mak osh Chitokaka yashke. Mihma okla moma kʋt, Ʋlhpesa hosh anumpʋshke, achi tok.

²⁵ Mihma Elichah ʋt Baal i̱ hopaii puta ka, Ti̱kba wak hobʋk achʋfa ka hʋchishno ʋt hʋsh atokoli cha, hʋsh atahlashke, hʋchi laua hokʋt; micha hʋchin chitokaka puta hohchifo ha̱ hʋsh i̱ pa̱ha̱yashke, yohmi kia nuta ya̱ luak hʋch ik bohlo kashke, im achi tok.

²⁶ Mihma wak hobʋk ima tuk a̱, okla ishi cha, bʋshlit tahli mʋt, Baal i̱ hohchifo ha̱ i̱ pa̱ha̱ya na, onnahinli tuk ʋt tʋbokoli onʋt, Baal ma! ish pi̱ haponaklashke, ahanchi tok. Yohmi kia anumpa nana kia iksho, micha afalamichi kʋt iksho tok. Mihma alta toba tuk a̱ tullit apakfokahanchi tok.

²⁷ Atuk o̱ tʋbokoli ma yakohmi tok, Elichah ʋt ishit yopulʋt, Chitoli hosh pa̱ha̱yá; chitokaka yoka; im anukfila chitot il anumpuli hosh binili, keyukmʋt nan isht anta hosh binili, keyukmʋt kanima nowʋt ia hosh a̱ya, keyukmʋt nusi yoba ká, yohmikma okchʋla he ʋlhpesa hoke, achi tok.

²⁸ Mihma chitoli hosh pa̱ha̱ya mʋt, a yʋmihchi chatuk osh, bʋshpo, micha tʋli halupa isht ile bʋshli na, issish ʋt mitafʋt o̱ yanahanli tok.

²⁹ Atuk o̱ yakohmi tok, nitak iklʋna kʋt ont ia ma, okla anumpohonli na, opiaka nan ʋbit isht aiokpʋchit im issa chatuk okʋt, ont ʋlhpesa ma, anumpa hʋt iksho, micha afalamichi kʋt iksho, micha na yohmi ahni kʋt iksho tok.

³⁰ Mihma Elichah ʋt okla moma ka, A̱ bili̱ka hʋsh lashke, im achi tok. Mihma okla moma kʋt i̱ bili̱ka ʋla tok. Mihma Chihowa im alta kinafa tok a̱ aiiskiachi tok.

³¹ Micha Elichah ʋt, Chekob yʋmmak oka Chihowa im anumpa hʋt im ʋlʋt, Chi hohchifo kʋt Islael achi̱ hoke, achi tok a̱ ushi ʋhleha apehlichi holhtina ka ʋlhpi̱sa ho̱, tʋli auahtuklo ho̱ ishi tok.

³² Micha tʋli yash Chihowa hohchifo ha̱ alta isht im ikbi tok; mihmʋt yakni ya̱ kullit nan‐nihi ʋlhpisa tuklo aiʋlhto ʋlhpesa ho̱, alta ya̱ apakfobli tok.

³³ Micha iti ya̱ achukmalit bohlit tahli mʋt, wak hobʋk a̱ bʋshlit tahli cha, iti yash paknaka onochi mʋt, Ishtochi ushta ho̱ oka hʋsh alotoli cha, nahukmit isht aiokpʋchi, micha iti aiena ka hʋsh o̱ fohoblashke, achi tok.

³⁴ Micha, Atukla ma hʋsh yʋmihchashke, achi tok. Mihma atukla ma okla yʋmihchi tok. Mihma atuchina ma hʋsh yʋmihchashke, achi tok. Mihma atuchina ma okla yʋmihchi tok.

³⁵ Mihma oka ʋt yanʋllit alta ya̱ apakfoyupa tok, mihma yakni kula yash kia oka alotoli tok.

³⁶ Atuk osh opiaka, nan ʋbit isht aiokpʋchi im issa he ont ʋlhpesa ma, Elichah hopaii ʋt bili̱ka ʋla cha, Eblaham, micha Aisak, micha Islael in Chitokaka Chihowa ma! chishno ak osh Islael yakni ya̱ Chitokaka chia ho̱, ʋno ʋt chin tishu sia hosh chim anumpa hatuk mak o̱, ilʋppa puta ka yʋmihchi li ka, himak nitak a̱ isht otaiyanashke.

³⁷ Is sa̱ haponaklashke, Chihowa ma! is sa̱ haponaklashke, yʋmohmi ho̱ chishno ak osh Chihowa Chitokaka chia hosh, anonti chu̱kʋsh a̱ ish falʋmminchi tuk a̱, okla ilʋppʋt ithaiyanashke, achi tok.

³⁸ Yʋmohmi ma Chihowa in luak ʋt aka itula cha, nahukmit isht aiokpʋchi, micha iti, micha tʋli, micha lukfi pushi ya̱ hukmit taiyahli cha, yakni kula oka aiasha aiena ka holakshit tahli tok.

³⁹ Mihma okla moma kʋt pisa mʋt, nashuka ishit hlipkʋchi tok: micha, Chihowa yʋmmak osh Chitokaka yoke, Chihowa yʋmmak osh Chitokaka yoke, okla ahanchi tok.

⁴⁰ Mihma Elichah ʋt, Baal i̱ hopaii ʋhleha ha̱ hʋsh ishashke: achʋfa kia ik hlakofo kashke, im achi tok. Mihma okla ishi tok: mihma Elichah ʋt bokushi Kishon a̱ isht ona cha, yʋmmak o̱ ai ʋbi tok.

⁴¹ Micha Elichah ʋt Ahab a̱, Ish wakaya cha, impʋt nan ish ishkashke; umba chito fehna kʋt fohompa hoka, achi tok.

⁴² Yohmi ma Ahab ʋt impʋt ishkot ia tok. Mihma Elichah ʋt Kamel paknaka ya̱ oiyʋt ona tok; micha aka ont itula cha, nashuka ya̱ iyi̱kalaha itintakla talali cha,

⁴³ In tishu ha̱, Himak a̱ ia cha, okhʋta pilla ha̱ pit ish hopo̱koyashke, im achi tok. Mihma ia cha, pit hopo̱koyo mʋt, Nana ak pesoshke, achi tok. Mihma, Anonti untuklo ha iá, achi tok.

⁴⁴ Atuk o̱ yakohmi tok, ont isht untuklo haya̱, Yakeh! hoshonti iskitinesi hatak ibbak chohmi kʋt, okhʋta ha̱ kohchʋt ʋba takalishke, achi tok. Mihma, Ia cha Ahab a̱, Chim itichanʋlli ya̱ ish atahli cha, ish ia na, umba kʋt ik chi̱ katʋblo kashke, Ahab a̱ ont ish im achashke, achi tok.

⁴⁵ Atuk o̱ yakohmi tok, yohmi takla ma, ʋba shutik ʋt hoshonti, micha mahli, micha umba chito ishit lusʋt kʋnia tok. Mihma Ahab ʋt itichanʋlli ombinili cha, Chesleel a̱ ona tok.

⁴⁶ Mihma Chihowa ibbak ʋt Elichah ya̱ onʋtoyula tok; mihma il ʋskofʋchit in taiyaha mʋt, Ahab itikba chaha̱fʋt Chesleel a̱ achukowa ya̱ ona tok.