1 Mi̱ko 16 - Chahta Holisso Holitopa 1886

¹ Yʋmohmi ma Chihowa im anumpa hʋt Baasha ya̱ i̱ sanalit Hanani ushi Chesu ya̱ im ʋla mʋt,

² Lukfi pushi a kohchit achaha chisht ona li tok, micha ʋm okla Islael a̱ i̱ mi̱ko chikbi li tok a̱, Cheloboam a yʋmohmi tok mak o̱, ish a noho̱wa cha, ʋm okla Islael a̱ ish yoshublichi na, nanashʋchi ya̱ ishit sa nokowʋchi tuk oka.

³ Yakeh! Baasha im ishtatiaka, micha in chuka achʋfa im ishtatiaka ya̱ ishit kanchi la chi̱ hoke; micha chin chuka achʋfa ya̱ Cheloboam in chuka achʋfa ya̱ chohmichi la chi̱ hoke.

⁴ Baasha ya̱ ai achʋfa yosh tʋmaha holihta ai illikma, ofi puta kʋt ʋpa chi̱ hoke: micha ai achʋfa yosh yakni haiaka ai illikma, hushi ʋba itʋnowa puta yosh ʋpa chi̱ hoke, achi tok.

⁵ Yohmi ka Baasha nana akaniohmi tok inla kʋt, micha nana yʋmihchi tok, micha nan ai im aia̱hli tok puta kʋt, Islael i̱ mi̱ko ʋhleha i̱ nitak holisso ha̱ a holisso keyu cho?

⁶ Micha Baasha ʋt i̱ki ʋhleha ha̱ ta̱kla nusi cha, Tisah ak o̱ a hollopi tok: micha ushi Elah ak osh ʋlhtobʋt mi̱ko tok.

⁷ Micha Hanani ushi hopaii Chehu ya̱ tohno na, Chihowa im anumpa hʋt Baasha, micha in chuka achʋfa ya̱ i̱ sanalit ʋla akinli tok; Chihowa itikba nana ik achukmo moma ka yʋmihchit, ibbak a̱ nana ishit toksʋlit Cheloboam in chuka achʋfa ya̱ chohmi kak osh, micha yʋmma ʋbi kak osh nokowʋchi kak atok.

⁸ Asa ʋt Chutah ya̱ i̱ mi̱ko tok, afʋmmi ʋt ont ishit pokoli tuklo akucha hannali ho̱, Elah ʋt Tisah ya̱ ahantʋt, Islael i̱ mi̱kot ishtia tuk osh afʋmmi tuklo tok.

⁹ Mihma tʋnʋp im itichanʋlli puta iklʋna i̱ kʋpitʋni Simli ʋt Tisah antʋt, in chuka Tisah talaia ka apesʋchi Alsa yʋmma in chuka antʋt, oka ishkot haksi ma, i̱ sanalit anumpa luma ikbi tok.

¹⁰ Mihma Asa ʋt Chutah ya̱ i̱ mi̱ko tok afʋmmi ont ishit pokoli tuklo akucha untuklo ho̱, Simli iba chukowʋt fahama cha, ʋbi tok, mihmʋt ʋlhtobʋt mi̱ko tok.

¹¹ Atuk osh yakohmi tok, mi̱kot ishtia mʋt, mi̱ko im ai ombinili holitompa ombinili mak inli hosh, Baasha in chuka achʋfa moma ka ʋbit tahli tok; nakni achʋfa kia micha i̱ kanomi, micha it i̱ kana ya̱ achʋfa kia ik in hlakoficho tok.

¹² Yakohmichi hosh Simli ʋt Chihowa im anumpa, yʋmmʋt hopaii Chehu ya̱ tohno na, Baasha ya̱ im a sanalit anumpohonli tok mak o̱, Baasha in chuka achʋfa moma ka ishit kanchi tok.

¹³ Baasha nanashʋchi moma, micha ushi Elah ʋt nanashʋchi isht ashʋchi tok, micha Islael a̱ ashʋchichi hosh, i̱ nan ik ahobo puta ka, Islael in Chitokaka Chihowa ya̱ ishit nokowʋchi tuk ak atok.

¹⁴ Yohmi ka Elah ʋt nana a kaniohmi tok inla kʋt, micha nana yʋmihchi tok moma kʋt, Islael i̱ mi̱ko ʋhleha i̱ nitak holisso ha̱ a holisso keyu cho?

¹⁵ Asa ʋt Chutah ya̱ i̱ mi̱ko tok, afʋmmi ʋt ont ishit pokoli tuklo akucha untuklo ho̱, Simli ʋt Tisah ya̱ antʋt nitak untuklo ho̱ mi̱ko tok. Mihmʋt okla hʋt Kibbehlon yʋmmʋt Filistin okla immi hatuk o̱, in tanampit abinʋchit apakfoyupa tok.

¹⁶ Mihma okla hʋt binachit a̱sha tuk ʋt, Simli ʋt anumpa luma ikbit, mi̱ko ya̱ ʋbi tuk, achi ho̱ haklo tok: yʋmohmi hatuk o̱, Islael moma kʋt tʋshka chipota i̱ kʋpitʋni Omli ak o̱, nitak yʋmma binah ha̱ Islael a̱ i̱ mi̱ko ai ikbi tok.

¹⁷ Mihma Omli ʋt Islael moma aiena hosh, Kibbehlon a̱ asht ia mʋt, Tisah ya̱ in tanampit abinʋchit apakfoyupa tok.

¹⁸ Atuk o̱ yakohmi tok, tʋmaha holihta ya̱ ishi na, Simli ʋt pisa mʋt, mi̱ko in chuka holihta ya̱ pit chukowa mʋt, mi̱ko in chuka ya̱ luak ishit hukmit, il o̱ kinʋffi cha, illi tok.

¹⁹ Chihowa itikba ya̱ nana ik achukmo ka yʋmihchit, nan ashʋchit Cheloboam a yʋmohmi tok a̱, a noho̱wa tuk, micha Cheloboam ʋt nanashʋchi cha, Islael a̱ nanashʋchichi yatuk ak o̱, yʋmohmi tuk ak atok.

²⁰ Yohmi ka Simli ʋt nana a kaniohmi tok inla kʋt, micha apehlichika yash i̱ sanalit yʋmohmi tok aiena kʋt, Islael i̱ mi̱ko ʋhleha i̱ nitak holisso ha̱ a holisso keyu cho?

²¹ Yohmi ma Islael okla hʋt it i̱ filʋmmit, kashapa tuklo tok: okla iklʋna kʋt Kinalh ushi Tibni ak o̱ mi̱ko ikbit, iakaiya ma, iklʋna kʋt Omli ak o̱ iakaiya tok.

²² Yohmi tuk kia Omli ya̱ okla hʋt iakaiya tuk ak osh, Kinalh ushi Tibni okla hʋt iakaiya tuk a̱, imaiya tok; yohmi ho̱ Tibni ʋt illi ma, Omli ʋt mi̱ko tok.

²³ Asa ʋt Chutah ya̱ i̱ mi̱ko tok, afʋmmi ʋt ont ishit pokoli tuchina akucha achʋfa ho̱, Omli ʋt Islael a̱ i̱ mi̱kot ishtia tuk osh, afʋmmi auah tuklo ho̱ mi̱ko tok: afʋmmi hannali ho̱ Tisah ya̱ antʋt mi̱ko tok.

²⁴ Samalia nʋnih ha̱ tʋli hʋta talent tuklo ho̱, Sheme ya̱ in chumpa cha, tʋmaha holihta nʋnih ha̱ ai ikbi mʋt, tʋmaha holihta ikbi tok a̱, nʋnih hʋt immi hatuk, Sheme ak o̱ a hohchifochit, Samalia achi tok.

²⁵ Yohmi kia Omli ʋt Chihowa itikba ya̱ nana ik achukmo ka yʋmihchit, micha tikba a̱sha tuk moma ka, nana ik achukmo yʋmihchi kʋt i̱ shahlichi tok.

²⁶ Nebat ushi Cheloboam ʋt nana a kaniohmi tok moma, micha nan ashʋchi Islael a̱ isht ashʋchichit, micha i̱ nan ik ahobo puta ka Islael in Chitokaka Chihowa ya̱ ishit nokowʋchi tuk a̱, a noho̱wa tok oka.

²⁷ Yohmi ka Omli ʋt nana a kaniohmi yʋmihchi tok inla kʋt, micha nan ai im aia̱hli otʋnihinchi tok puta kʋt, Islael i̱ mi̱ko ʋhleha i̱ nitak holisso ha̱ a holisso keyu cho?

²⁸ Mihma Omli ʋt i̱ki ʋhleha ta̱kla nusi cha, Samalia ya̱ a hollopi tok: mihma ushi Ahab ʋt ʋlhtobʋt mi̱ko tok.

²⁹ Micha Asa ʋt Chutah ya̱ i̱ mi̱ko tok, afʋmmi ʋt ont ishit pokoli tuchina akucha untuchina aiena ho̱, Omli ushi Ahab ʋt Islael a̱ i̱ mi̱kot isht ia tok: micha Omli ushi Ahab ʋt, afʋmmi pokoli tuklo akucha tuklo ho̱, Islael a̱ i̱ mi̱kot Samalia ya̱ ahanta tok.

³⁰ Mihmʋt Omli ushi Ahab ʋt Chihowa itikba ya̱ nana ik achukmo yʋmohmi kʋt, tikba a̱sha tuk moma ka, i̱ shahlichi tok.

³¹ Atuk osh yakohmi tok, Nebat ushi Cheloboam nan ashʋchi puta ka a noho̱wa ka, nan ik ahobo nana chohmichit, Sitonian okla i̱ mi̱ko Elhbaal ushetik Chesebel a̱ ishit itauwaya cha, iʋt Baal a̱ im antiʋt aiokpʋchi tok.

³² Micha Baal in chuka Samalia ya̱ ai ikbi tuk ʋt, Baal a̱ alta im ai ikbi tok.

³³ Micha Ahab ʋt iti lokoli ikbi tok; micha Ahab ʋt nana kaniohmit, Islael in Chitokaka Chihowa ya̱ nokowʋchi kʋt, Islael i̱ mi̱ko ʋhleha tikba a̱sha tok moma ka i̱ shahlichi tok.

³⁴ I̱ nitak o̱ Belh‐elait Hiel ʋt Cheliko ya̱ ikbi tok: Chihowa im anumpa hatok, Nun ushi Choshua ʋt anumpuli tok mak o̱, in tola ya̱ ushi tikba ʋtta Abilam ak o̱, ishit bohli mʋt, yʋmma holihta okhissa ya̱ ushi ishtaiyopi Sekub ak o̱, ishit hilechi tok.