1 Mi̱ko 15 - Chahta Holisso Holitopa 1886

¹ Yohmi ka Nebat ushi Cheloboam ʋt mi̱ko tok, afʋmmi ʋt ont ishit auah untuchina ho̱, Abicham ʋt Chutah ya̱ i̱ mi̱ko tok.

² Afʋmmi tuchina ho̱ mi̱kot Chelusalem a̱ ahanta tok. Mihma ishki ʋt Abishalom ushetik osh hohchifo kʋt Maachah atok.

³ Mihmʋt i̱ki ʋt itikba nan ashʋchi ai yʋmohmi tok, moma kak o̱ a noho̱wa tok: micha i̱ki Lewi chu̱kʋsh atok a̱ chohmit, in Chitokaka Chihowa itikba ya̱ chu̱kʋsh ʋt ai a̱hli tok keyu hoke.

⁴ Yohmi kia Lewi atok pulla kak o̱, in Chitokaka Chihowa ʋt Chelusalem a̱ pʋla ai imʋt, ushi iakaiya ka hilechi cha, Chelusalem a̱ kʋllochit hilechi tok.

⁵ Lewi ʋt Chihowa itikba ya̱ aiʋlhpiesa kak o̱ yʋmihchi cha, nana i̱ miha ka okcha̱yʋt ahanta nitak moma kʋt naksika ik aiyo, amba Uliah Hittait a̱ nana akaniohmi tok ak illa tok.

⁶ Micha okcha̱yʋt ahanta nitak moma ka Abicham, micha Cheloboam itatuklo kʋt itin tanampi tok.

⁷ Yohmi ka Abicham ʋt nana akaniohmi tok inla kʋt, micha nana yʋmihinchi tok moma kʋt Chutah i̱ mi̱ko ʋhleha i̱ nitak holisso ha̱ a holisso keyu cho? Mihma Abicham, micha Cheloboam itatuklo kʋt it in tanampi tok.

⁸ Mihma Abicham ʋt i̱ki ʋhleha ha̱ ta̱kla nusi tok: mihma Lewi in tʋmaha holihta ya̱ a hohpi tok: mihma ushi Asa ʋt ʋlhtobʋt mi̱ko tok.

⁹ Mihma Cheloboam ʋt Islael a̱ i̱ mi̱ko tok, afʋmmi ʋt ont ishit pokoli tuklo ho̱, Asa ʋt Chutah ya̱ i̱ mi̱ko tok.

¹⁰ Micha afʋmmi pokoli ushta akucha achʋfa ho̱ mi̱kot Chelusalem a̱ ahanta tok. Mihma ishki ʋt Abishalom ushetik osh hohchifo kʋt Maachah atok.

¹¹ Micha Asa ʋt i̱ki Lewi atok a̱ chohmit Chihowa itikba ya̱, aiʋlhpiesa kak o̱ yʋmihchi tok.

¹² Micha Sotomait ʋhleha ha̱ yakni yash ishit a kohchi tok; micha naholbʋt toba puta i̱ki ʋhleha hʋt ikbi tok a̱ ishit kanchi tok.

¹³ Micha ishki Maachah ak kia iti lokoli ya̱ naholbʋt toba ai ikbi tok atuk o̱, mi̱ko ohoyo atok a̱ kohchi tok; micha Asa ʋt i̱ naholbʋt toba ya̱ chanlit akʋchi cha, bok ushi Kitlon bili̱ka ya̱ a hukmi tok.

¹⁴ Yohmi kia achahaka puta ka ishit ik kancho tok: yohmi kia okcha̱yʋt ahanta nitak moma kʋt, Asa chu̱kʋsh ʋt Chihowa itikba ya̱ aia̱hli tok.

¹⁵ Micha i̱ki ʋt nana hullochi tok puta, micha ilap ʋt nana hullochi tuk puta aiena tʋli hʋta, micha tʋli holisso lakna, micha nan ai ʋlhto aiena ka Chihowa in chuka isht ʋla cha, anu̱kaka ashachi tok.

¹⁶ Mihma Asa, micha Islael i̱ mi̱ko Baasha itatuklo kʋt, i̱ nitak moma kʋt it in tanampi tok.

¹⁷ Mihma Islael i̱ mi̱ko Baasha ʋt iʋt Chutah ya̱ itibi tok; micha achʋfa kia Chutah i̱ mi̱ko Asa ya̱ ik im oná, ik ahno hosh, micha a kohchʋt ik mintí, ik ahno hosh, Lamah ya̱ ikbi tok.

¹⁸ Yohmi ma Asa ʋt tʋli hʋta, micha tʋli holisso lakna Chihowa in chuka na holitopa ai asha ya̱ a̱sha tuk moma, micha mi̱ko in chuka naholitopa aiasha ya̱ a̱sha tuk moma ishi cha, in tishu ʋhleha ibbak a̱ fohki tok: micha mi̱ko ʋt Tablimon ushi yʋmmʋt Hesion ushi, Benhatat Silia i̱ mi̱ko Tamaskʋs ʋtta ya̱ pit i̱ pila mʋt,

¹⁹ Ʋno, micha chishno il itatuklo, micha a̱ki, micha chi̱ki itatuklo ka anumpa ai itibai achʋfa it im apesa yʋt itonlʋshke; yakeh! nahʋlbina tʋli hʋta, micha tʋli holisso lakna aiena ka chi̱ pila lishke: minti cha, Islael i̱ mi̱ko Baasha ya̱ anumpa ai itibai achʋfa itim apesa ya̱ ish it i̱ kobʋffi na, a̱ filʋmmit iashke, achi tok.

²⁰ Yohmi ho̱ Benhatat ʋt mi̱ko Asa ya̱ i̱ haponaklo cha, tʋshka chipota i̱ kʋpitʋni puta im a̱sha tuk ʋt Islael in tʋmaha puta ka̱ itiba chi̱ ho̱ pila cha, Ichon, micha Tan, micha Abel‐belh‐maachah, micha Sinnelolh moma, micha Naftali yakni ʋt moma ka issot kanchi tok.

²¹ Atuk o̱ yakohmi tok, Baasha ʋt haklo mʋt, Lamah ya̱ ikbi tuk ʋt issa cha, Tisah ak o̱ ai ʋtta tok.

²² Yohmi ma Asa ʋt Chutah moma ka haklochit hlopullichi tok; achʋfa kia ik hlakofo tok: micha Baasha ʋt Lamah isht ikbi tuk tʋli, micha iti aiena ka okla isht ia tok: micha Asa ʋt Keba Benchamin yakni talaia, micha Mispah ya̱ isht ikbi tok.

²³ Asa nana akaniohmi tok moma inla ʋt, micha nan ai im ai a̱hli tok moma, micha nana yʋmihinchi tok moma, micha tʋmaha holihta puta ihi̱kbi tok ʋt, Chutah i̱ mi̱ko ʋhleha i̱ nitak holisso ha̱ a holisso keyu cho? Yohmi kia sipoknit taiyaha mʋt, iyi yʋt imomokpulo tok.

²⁴ Mihma Asa ʋt i̱ki ʋhleha ha̱ ta̱kla nusi cha, i̱ki ʋhleha ta̱kla i̱ki Lewi in tʋmaha holihta ak o̱ a hollopi tok: mihma ushi Chehoshafat ʋt ʋlhtobʋt mi̱ko tok.

²⁵ Mihma Cheloboam ushi Natab ʋt, Asa ʋt Chutah i̱ mi̱ko tok afʋmmi ont atuklʋt ishtia ho̱, Islael a̱ i̱ mi̱kot ishtia tok; micha afʋmmi tuklo ho̱ Islael a̱ i̱ mi̱ko tok.

²⁶ Mihma Chihowa itikba ya̱ nana ik achukmo ka yʋmihchi cha, i̱ki ʋt a yʋmohmi tok a̱ iakaiya tok: micha nanashʋchi Islael nan ashʋchichi tok a̱ a̱ya tok.

²⁷ Mihma Ahichah ushi Baasha, Issaka in chuka achʋfa ai achʋfa yosh, i̱ sanalit anumpa luma ikbi tok: micha Baasha ʋt Kibbehlon ak o̱ yʋmmʋt Filistin okla immi hoka ai ʋbi tok: Natab, micha Islael moma kʋt Kibbehlon a̱ in tanampit abinʋchit apakfoyupa tok.

²⁸ Asa ʋt Chutah ya̱ i̱ mi̱ko tok afʋmmi ʋt ont isht atuchina kak o̱, Baasha ʋt ʋbi cha, ʋlhtobʋt mi̱ko tok.

²⁹ Atuk osh yakohmi tok, mi̱ko mʋt, Chihowa ʋt anumpulit in tishu Ahichah Shilonait a̱ tohno na anumpohonli tok mak o̱, Cheloboam a̱ in chuka achʋfa ya̱ issot kanchi tok; achʋfa kia fiompa ka Cheloboam ik i̱ hlakoficho hosh ishit kanchi tok.

³⁰ Cheloboam nanashʋchi puta ashʋchi tok, micha Islael ashʋchichi hosh Islael in Chitokaka Chihowa ya̱ ishit nokowʋchi tok ak atok.

³¹ Yohmi ka Natab nana a kaniohmi tok puta inla kʋt, micha nana yʋmihchi tok moma kʋt, Islael i̱ mi̱ko ʋhleha i̱ nitak holisso ha̱ a holisso keyu cho?

³² Micha Asa, micha Islael i̱ mi̱ko Baasha itatuklo kʋt i̱ nitak moma kʋt it in tanampi tok.

³³ Asa ʋt Chutah ya̱ i̱ mi̱ko tok, afʋmmi ʋt ont isht atuchina ho̱, Baasha ʋt Tisah ya̱ ʋttʋt Islael moma ka i̱ mi̱kot ishtia tok, afʋmmi pokoli tuklo akucha ushta tok.

³⁴ Micha Chihowa itikba ya̱ nana ik achukmo ka yʋmihchit, Cheloboam a yʋmohmi tok, micha nanashʋchi Islael a̱ isht ashʋchichi tuk a̱ a noho̱wa tok.