1 Mi̱ko 14 - Chahta Holisso Holitopa 1886

¹ Nitak yʋmma Cheloboam ushi Abichah ʋt abeka tok.

² Mihma Cheloboam ʋt tekchi ya̱, Wakayá, chim asilhha lishke, micha inla ish ilahobi na, Cheloboam a̱ tekchi chia ka ik chithano kashke: micha Shiloh ha̱ ish onashke: yakeh! hopaii Ahichah ʋt yʋmma ahanta hoke; yʋmmak osh okla ilʋppa i̱ mi̱ko toba la chi̱ ka, ʋm anoli tok.

³ Micha pʋska lumbo pokoli, micha pʋsha shila, micha foebila kotoba achʋfa aiena ho̱ ish ishi cha, ish im onashke: yʋmmak osh ʋlla yʋt kaniohma chi̱ ka, chim anola chi̱ hoke, im achi tok.

⁴ Mihma Cheloboam tekchi ʋt yʋmihchi tok: micha wakaya mʋt, Shiloh ha̱ onʋt, Ahichah in chuka ya̱ ona tok. Yohmi kia Ahichah ʋt pisa he keyu tok; sipokni kak osh nishkin ʋt illi hatuk okʋt.

⁵ Mihma Chihowa ʋt Ahichah ya̱, Yakeh! Cheloboam tekchi ʋt ushi ak o̱ nana chi̱ ponakla chi̱ hosh mintishke: abeka hoka: yak im achit, micha ish yak im achashke: yakohma chi̱ hoka, ʋlakmʋt, ohoyo inla ilahoba chi̱ hoke, im achi tok.

⁶ Atuk o̱ yakohmi tok, okhissa ya̱ ʋla na iyi nowa ka haklo mʋt, Chukowá, Cheloboam tekchi chia hʋt, nanta katiohmi ho̱ inla ish ilahobi cho? sa tohno na anumpa weki ho̱ ishit chim a̱ya li hoka.

⁷ Iá, Cheloboam a̱ ish im anolashke, Islael in Chitokaka Chihowa ʋt yak achishke, Okla ai ititakla ya̱ ai ishit chi chahʋchit, ʋm okla Islael a̱ i̱ mi̱ko chikbi li tuk,

⁸ Micha apehlichika yash mokofit Lewi in chuka achʋfa ya̱ im ishi li mʋt, chima li tuk oke: yohmi tuk kia an tishu Lewi yatuk a̱ chik chohmoshke, yʋmmak okʋto ʋm anumpa ʋlhpisa puta ka holitobli tok: micha yʋmmak okʋt chu̱kʋsh aioklu̱hʋt siakaiya cha, sa tikba ai ʋlhpiesa bano kak o̱ yʋmohmi tok oke.

⁹ Amba nana ik achukmo ish yʋmihchi kʋt, chi tikba cha̱shpo a̱sha tuk moma ka ish i̱ shahlichishke: naholbʋt toba puta, micha bilʋt akmot naholbʋt toba puta aiena ka ikbit, is sa nokowʋchishke; micha chim a̱shaka is sa kanchishke.

¹⁰ Yʋmohmi hoka yakeh! nana ik achukmo ka Cheloboam a̱ in chuka achʋfa ya̱ onochi la hi oke; mikmʋt nakni kanima kia, micha Islael yuka, micha Islael yuka keyu aiena ka Cheloboam a̱ ishit kanchi lish, Cheloboam in chuka achʋfa a̱sha ka, hatak osh lukfi yo̱ ishit kanima ont kanchi na, momʋt ont taha chatuk mak o̱, chohmichit ishit kanchi la hi oke.

¹¹ Cheloboam ai achʋfa yosh tʋmaha holihta ai illi hokʋno, ofi puta hosh ʋpa chi̱ hoke; mikma yakni haiaka yo̱ ai illi hokʋno, hushi puta ʋba itʋnowa hosh ʋpa chi̱ hoke; Chihowa ak osh anumpuli tok oka.

¹² Yʋmohmi hoka wakaya cha, chin chuka ak inli ish onashke: atukma tʋmaha holihta ya̱ chiyi yʋt chukowakma, ʋlla yash osh illa chi̱ hoke.

¹³ Mikma Islael moma kʋt ishit yaiyʋt hohpa chi̱ hoke: Cheloboam a̱ ai achʋfa yʋt yʋmmak illa hosh ahollopi ya̱ ona chi̱ hoke; yʋmmak okʋto Cheloboam in chuka achʋfa ya̱, nana achukma kaniohmi ka Islael in Chitokaka Chihowa i̱ yʋmohmi hatuk okʋt.

¹⁴ Micha Chihowa ʋt Islael a̱ i̱ mi̱ko ya chi̱ ho̱, ikbit hilechi na, yʋmmak osh Cheloboam in chuka achʋfa ya̱ nitak yʋmma ishit kancha chi̱ hoke, micha katiohmik mak o̱? himonasi fehna ká.

¹⁵ Chihowa ʋt Islael a̱ ku̱shak osh oka hikiʋt winakahanchi kak inli chohmichit issot kancha chi̱ hoke; micha Islael a̱ yakni achukma ilʋppa i̱ki ʋhleha ima tuk ʋt, loblit ishit kancha chi̱ hoke; micha okhina mish tʋnnʋp ont ita fimimbla chi̱ hoke; iti lokoli ikbit Chihowa ya̱ nokowʋchi hoka.

¹⁶ Micha Cheloboam ʋt nanashʋchi tuk, yʋmmʋt nan ashʋchi cha, yʋmmʋt Islael a̱ nan ashʋchechi tuk aiena pulla kak o̱, Islael a̱ kancha chi̱ hoke, achi tok.

¹⁷ Mihma Cheloboam tekchi ʋt wakaya cha, iʋt Tisah ya̱ ona tok; atuk osh okhissa atuya ya̱ ona ma, ʋlla yash osh illi tok.

¹⁸ Mihma Chihowa im anumpa hatuk in tishu hopaii Ahichah ya̱ tohno na, anumpuli tuk mak o̱, okla hohpi cha, Islael moma kʋt ishit yaiya tok.

¹⁹ Mihma Cheloboam nana akaniohmi tok inla puta, kaniohmit itin tanampi tok, micha kaniohmit mi̱ko tok ʋt yakeh! Islael i̱ mi̱ko ʋhleha i̱ nitak holisso ha̱ a holisso hoke.

²⁰ Mihma Cheloboam ʋt mi̱kot ahanta na, afʋmmi pokoli tuklo akucha tuklo tok; mihmʋt i̱ki ʋhleha ta̱kla nusi tok: micha ushi Natab ak osh ʋlhtobʋt mi̱ko tok.

²¹ Mihma Solomon ushi Lehoboam ʋt Chutah yak o̱ a mi̱ko tok. Lehoboam ʋt afʋmmi pokoli ushta akucha achʋfa hosh mi̱kot ishtia tok: atuk osh afʋmmi auah untuklo ho̱ Chelusalem tʋmaha holihta Chihowa ʋt hohchifo a bohla chi̱ hosh, Islael apehlichi moma ka ai atokoli tok a̱, a mi̱ko tok: mihma ishki ʋt Ammonait ohoyo hosh hohchifo hʋt Naamah atok.

²² Mihma Chutah ʋt Chihowa itikba ya̱ nana ik achukmo ka yʋmohmit, i̱ki ʋhleha hʋt nana yʋmihchi tok moma ka, i̱ shahlichit, nan ashʋchi yʋmihinchi tuk osh nuktʋhlachi tok.

²³ Yʋmmak kia achahaka puta ikbit, micha naholbʋt toba puta, micha iti lokoli puta nʋnih chaha puta paknaka, micha iti hishi okchamali puta nuta ya̱ ai ikbi tok oka.

²⁴ Mihma yakni yash Sotomait ak kia a̱sha tok: mihma nanashʋchi yuwalʋchi oklushi puta Chihowa ʋt Islael im ʋlla ʋhleha itikba ya̱ tihlelit kocha wehli tok o̱, yʋmohmi tok ʋt moma ka yʋmohmi tok.

²⁵ Atuk o̱ yakohmi tok, Lehoboam ʋt mi̱ko tok afʋmmi ʋt ont ishit tahlapit ia ma, Echip i̱ mi̱ko Shishak ʋt Chelusalem a̱ ʋlʋt in tanampi tok.

²⁶ Micha Chihowa in chuka nana holitompa aiasha ka, micha mi̱ko in chuka nana holitompa aiasha aiena ka ant ishtia tok; moma kia ishtia tok: micha tʋli holisso lakna telihpa Solomon ʋt ikbi tok moma ishtia tok.

²⁷ Mihma mi̱ko Lehoboam ʋt atobbichit asonak lakna yo̱ telihpa puta ikbi cha, nan atoni i̱ kʋpitʋni, mi̱ko im aboha okhissa apistikeli ya̱ ibbak fohki tok.

²⁸ Atukma yakohmi beka tok, mi̱ko ʋt Chihowa in chuka ya̱ ont chukowakmʋt, nan atoni ʋt shoyuli tuk osh, falʋmminchit nan atoni im aboha isht ʋla beka tok.

²⁹ Yohmi ka Lehoboam nana akaniohmi tok inla kʋt, micha nana yʋmihchi tok moma kʋt, Chutah i̱ mi̱ko ʋhleha i̱ nitak holisso ha̱ a holisso keyu cho?

³⁰ Lehoboam, micha Cheloboam ita tuklo kʋt okcha̱yʋt aha̱shwa nitak moma kʋt, it in tanampi tok.

³¹ Mihma Lehoboam ʋt i̱ki ʋhleha ta̱kla nusi cha, i̱ki ʋhleha ta̱kla Lewi in tʋmaha holihta ya̱ ahollopi tok. Mikma ishki ʋt Ammonait ohoyo hosh hohchifo kʋt Naamah atok. Mihma ushi Abicham ʋt ʋlhtobʋt mi̱ko tok.