1 Mi̱ko 13 - Chahta Holisso Holitopa 1886

¹ Mihma yakeh! hatak Chitokaka im antia yʋt Chihowa im anumpa ieshi hosh Behlel a̱ ona tok: mihma Cheloboam ʋt nabalama hukmi hosh alta bili̱ka ya̱ hikia tok.

² Micha Chihowa im anumpa ha̱ anumpulit alta ya̱ im i̱ sanalit pa̱ha̱ya cha, Alta ma! alta ma! Chihowa ʋt yak achishke; Yakeh! Lewi in chuka achʋfa ya̱ ʋlla hohchifo kʋt Chosiah yosh im ʋtta hi oke: mikmʋt yʋmmʋt achahaka puta naholitompa isht ai ashʋt nabalama chi ai onochit, hukmi ʋhleha ha̱ chi ai onochit im ihi̱sa hi oke; mikma hatak foni yosh chi onʋtolʋt lua hi oke, achi tok.

³ Mihma nitak yʋmmak inli ho̱ nan isht atokowa imʋt, Chihowa ʋt anumpohonli tuk a̱, ilʋppak osh nan isht atokowa hoke: Yakeh! alta ʋt kinafakma, hituk chubbi o̱ a̱sha tuk ʋt hlatapa chi̱ hoke, achi tok.

⁴ Atuk o̱ yakohmi tok, hatak Chitokaka im antia yash osh anumpulit, alta Behlel hikia ka im i̱ sanalit pa̱ha̱ya ka, Cheloboam ʋt haklo mʋt, ibbak ʋt alta onʋtonla tuk a̱ ishi cha, pit welit, Hoklit ishí, achi tok. Mihma ibbak a̱ isht im i̱ sanalit pit weli kash osh shilʋt taha tok: yohmi ho̱ falʋmminchit isha he keyu tok.

⁵ Nan isht atokowa hatak Chitokaka im antia yash osh, Chihowa im anumpa ieshi hosh ima tuk mak o̱, alta ak kia kinafa ma, hituk chubbi alta o̱ a̱sha tuk ʋt hlatapa tok.

⁶ Mihma mi̱ko ʋt afalamichit hatak Chitokaka im antia yash, Chin Chitokaka Chihowa itikba ya̱ himak a̱ im ilbʋshʋt is si anumpuli na, sʋbbak ʋt anonti hlakofashke, im achi tok. Mihma hatak Chitokaka im antia yash osh Chihowa ya̱ im asilhha ma, anonti mi̱ko ibbak ʋt hlakofi cha, ibbak yatuk ak inli chohmi tok.

⁷ Mihma mi̱ko ʋt hatak Chitokaka im antia yash, Si awant an chuka ona cha ish impakma, na hʋlbina chima lashke, im achi tok.

⁸ Mihma hatak Chitokaka im antia yash osh mi̱ko ya̱, Chin chuka ya̱ iklʋna ho̱ is sʋma chi̱ hoh kia, chi awant ona la he keyu, micha ilʋppa pʋska ai ʋpa la he keyu, micha oka ai ishko la he keyu hoke.

⁹ Yohma hi o̱ Chihowa im anumpa hʋt atokolit a̱ miha mʋt, Pʋska ish pa ná, micha oka ish ishko ná, micha falamʋt hina ish a minti tuk akinli, anonti ish ia ná, ʋm achi tuk oka, im achi tok.

¹⁰ Yʋmohmi hosh hina inla ho̱ ia cha, hina a mintit Belhel ʋla tuk ʋt falamʋt ik aiyo tok.

¹¹ Mihma Belhel a̱ hopaii sipokni ʋt ʋtta tok: mihma ushi ʋhleha hʋt, nitak yʋmma hatak Chitokaka im antia yash osh nana yʋmihchi tuk moma ka, ont im anoli tok: anumpa ha̱ mi̱ko im anoli tuk yʋmma aiena ka i̱ki ya̱ okla im anoli tok.

¹² Mihma i̱ki ʋt, Katima yo̱ ia tuk o̱? im achi tok; ushi ʋhliha hashot hatak Chihowa im antia Chutah minti yash osh kanima ia ka pi̱sa tuk okʋt.

¹³ Mihma ushi ʋhleha ha̱, Issuba haksobish falaia ya̱ hʋs sʋm umpatalashke, im achi tok. Yohmi ma issuba haksobish falaia im umpatali tok: mihma ombinili cha,

¹⁴ Hatak Chitokaka im antia yash iakaiyʋt ia tuk osh, nosʋpi nuta binili na, ont ahayuchi tok: micha, Chishno ak osh hatak Chitokaka im antia Chutah minti tuk mak o̱ chia hoh cho? im achi tok. Mihma, Mih sia hoke, achi tok.

¹⁵ Yohmi ma, Si awant an chuka ish ona cha, pʋska ish pashke, im achi tok.

¹⁶ Mihma, Chi awant falama la he tuk keyu, micha chi awant ona la he tuk keyu: micha ilʋppa pʋska a chibai ʋpa la he keyu, micha oka a chibai ishko la he keyu hoke.

¹⁷ Chihowa im anumpa hʋt, Yʋmma pʋska ish ai ʋpa he keyu, micha oka ish ai ishka he keyu hoke; micha anonti falamʋt hina ish a minti tuk ak inli kʋt, ish ia he keyu hoke, ʋm achi tuk oka.

¹⁸ Hopaii sipokni ash osh, Chishno chohmit ʋno ak kia hopaii sia hoke: atuk o̱ Chihowa im anumpa ho̱ enchil ʋt ʋm anumpulit, Falʋmminchit chin chuka isht ish la na, pʋska ʋpʋt, micha oka ishkashke, ʋm achi tuk oke, im achi tok. Yohmi kia i̱ holabi tok.

¹⁹ Yohmi ho̱ falama cha, in chuka pʋska ont ai ʋpʋt, oka ai ishko tok.

²⁰ Atuk o̱ yakohmi tok, ai impa a chi̱ya ma, Chihowa im anumpa hʋt hopaii falʋmminchit isht ʋla kash o̱ im ʋla tok.

²¹ Micha hatak Chitokaka im antia Chutah minti yash, chitolit im anumpuli mʋt, Chihowa ʋt yak achishke, Chihowa itih ha̱ chik im antio hosh anumpa ʋlhpisa chin Chitokaka Chihowa ʋt chim apesa tuk a̱ chik iesho hosh,

²² Amba falamʋt ish la na Chihowa ʋt chim achi kʋt, Pʋska ish pa ná, micha oka ish ishko ná, achi tuk pʋska ish ai ʋpa, micha oka ish ai ishko hokʋt, chi nipi illi ʋt i̱ki ʋhleha im ahollopi ya̱ ona chi̱ keyu hoke.

²³ Atuk o̱ yakohmi tok, pʋska ʋpʋt issa ma, micha nan ishkot issa ma, hopaii falʋmminchit isht ʋla kash osh, issuba haksobish falaia yash im umpatali tok.

²⁴ Mihma ia tuk o̱ hina takla ya̱, koi chito ʋt afama cha, ʋbi tok: micha haknip illi ya̱ hina takla pila na itoyula ma, issuba haksobish falaia ash osh bili̱ka hikia ma, koi chito ak kia haknip illi ya̱ bili̱ka hikia tok.

²⁵ Atuk o̱ yakeh! hatak ʋt itʋnoho̱wa ma, haknip illi yash osh hina lapali ka itoyula na, koi chito ʋt haknip illi yash bili̱ka hikia ho̱ pi̱sa tok: micha tʋmaha holihta hopaii sipokni ai ʋtta ya̱ ont anoli tok.

²⁶ Atuk o̱ falʋmminchit isht ʋla tuk hopaii yash osh haklo mʋt, Hatak Chitokaka im antia, yʋmmʋt Chihowa im anumpa ik im antio tuk ash oke: yʋmohmi hatuk o̱ Chihowa im anumpa hʋt im achi tuk mak o̱, Chihowa ʋt koi chito ima na hlillichit ʋbi hoke, achi tok.

²⁷ Micha ushi ʋhleha ha̱ im anumpulit, Issuba haksobish falaia ya̱ hʋs sʋm umpatalashke, im achi tok. Mihma umpatali tok.

²⁸ Mihma ia tuk osh hina takla haknip illi yash osh itoyula na, issuba haksobish falaia, micha koi chito itatuklo kʋt haknip illi bili̱ka hieli na, ont ahayuchi tok; koi chito ʋt haknip illi ya̱ ik po, micha haksobish falaia ya̱ ik hlillecho tok.

²⁹ Mihma hopaii yash osh hatak Chitokaka im antia haknip illi yash ishi cha, issuba haksobish falaia onochit falʋmminchit ishit minti tok; micha hopaii sipokni yash osh ishit yaiya cha, hohpa chi̱ hosh tʋmaha holihta ya̱ ʋla tok.

³⁰ Micha haknip illi yash ilap im ahollopi ak inli ho̱ bohli tok: mihma ishit yaiyʋt, Ikikkeh! itibapishi li ma! ahanchi tok.

³¹ Atuk o̱ yakohmi tok, hohpi hayʋt, ushi ʋhleha ha̱ im anumpulit, Sʋllikma ahollopi hatak Chitokaka im antia ʋt ahollopi tuk ak o̱ hʋs sa hohpashke; sa foni ya̱ i̱ foni ya̱ apotolit hʋsh bohlashke.

³² Chihowa im anumpa ho̱ Belhel a̱ alta hikia ka i̱ sanalit, micha Samalia ya̱ achahaka puta chuka hiohma̱ya ka i̱ sanalit chitolit anumpohonli tuk ʋt, ont ai a̱hli pulla chi̱ hoke, achi tok.

³³ Nana ilʋppʋt yakohmi haya̱ Cheloboam ʋt nana ik achukmo a̱ya tuk ʋt ik falamo hosh, amba okla makali ishtaiyopi ak o̱, achahaka puta naholitompa isht asha ikbi tok; kʋna hosh ʋlhpesa ahnikma atokoli na achahaka naholitompa isht ʋtta toba tok.

³⁴ Atuk o̱ nana ilʋppak o̱ Cheloboam in chuka achʋfa yʋt isht ayoshuba na yakni paknaka ya̱ a mosholit ai iksho ka chi̱ hatok.