1 Mi̱ko 12 - Chahta Holisso Holitopa 1886

¹ Mihma Lehoboam ʋt Shechem a̱ ona tok: Islael moma kʋt yʋmma mi̱ko ikba chi̱ hosh Shechem a̱ ona tuk atok oka.

² Atuk o̱ yakohmi tok, Nebat ushi Cheloboam ʋt Echip a̱ ont anta moma hosh haklo tok, (mi̱ko Solomon a̱ Cheloboam ʋt i̱ maleli cha, Echip ak o̱ ont ʋtta tok okʋt:)

³ Mihma anumpa pit i̱ pilʋt okla hoyo tok: mihma Cheloboam, micha Islael moma kʋt ona mʋt, Lehoboam a̱ okla im anumpulit.

⁴ Chi̱ki ʋt pim ikunla abana ya̱ pi̱ wekichi tok: yʋmohmi hoka himak a̱ chi̱ki ʋt toksʋli kʋllo pi onochi tok, micha im ikunla abana weki pi onochi tok a̱ ish shohhʋlachashke, mikma e chim antiashke, okla achi tok.

⁵ Mihma, Hʋsh tisheli cha, nitak tuchinakma anonti hʋs sʋm ʋlashke, im achi tok. Mihma okla hʋt tisheli tok.

⁶ Mihma mi̱ko Lehoboam ʋt hatak sipokni ʋhleha i̱ki Solomon ʋt okcha̱yʋt ahanta moma ma, itikba hieli tok a̱ it im anumpulit, Nanta ho̱ hʋsh miha na okla ilʋppa anumpa falama ya̱ ima la chi̱ cho? achi tok.

⁷ Mihma im anumpulit, Himak nitak a̱ okla ilʋppa in tishu tobʋt, ish in toksʋla chi̱ hokma, micha anumpa falama, micha anumpa hochukma ish ima chi̱ hokma, yohmikma chin tishu ʋhleha bilia chi̱ hoke, okla achi tok.

⁸ Yohmi kia hatak sipokni ʋhleha im anumpa ima tuk a̱ kanchi cha, hatak himithoa iba hofanti tok itikba hieli kak o̱ it im anumpuli tok.

⁹ Micha, Nanta ho̱ hʋsh miha na okla ilʋppʋt ʋm anumpulit, Ikunla abana chi̱ki ʋt pi onochi tok a̱ ish shohhʋlachashke, achi tuk a̱ anumpa falama il ima chi̱ cho? im achi tok.

¹⁰ Mihma hatak himithoa iba hofanti tok ash osh im anumpulit, Okla ilʋppa yak ish im achashke, yʋmmʋt chim anumpulit, Chi̱ki ʋt pim ikunla abana ya̱ pi̱ wekechi tok, amba chishno ʋto ish shohhʋlachashke, achi tuk a̱ yak ish im achashke, Sʋbbak ushi iskitini ʋt sukko kʋt a̱ki in chʋshwa nipi ya̱ i̱ shahla chi̱ hoke.

¹¹ Yohmi ka himak a̱ a̱ki ʋt ikunla abana weki ho̱ hʋchi onochi tok kia, ʋno yokʋto chim ikunla abana ya̱ ibafohki la chi̱ hoke; a̱ki ʋt ishit‐fʋma yo̱ ishit hʋchi kostininchi tok kia, ʋno yokʋto halambia ho̱ ishit hʋchi kostininchi la chi̱ hoke, im achi tok.

¹² Yʋmohmi tuk o̱ Cheloboam, micha okla moma kʋt, mi̱ko ʋt apesʋt, Nitak ont isht atuchinakma anonti hʋs sʋm ʋlashke, achi tuk mak o̱, nitak ont isht atuchina ma Lehoboam a̱ im ona tok.

¹³ Mihma mi̱ko ʋt afalamichit okla ha̱ anumpa kʋllo im anumpuli cha, hatak sipokni ʋhleha hʋt anumpa i̱ miha tuk a̱ kanchi tok.

¹⁴ Micha hatak himithoa anumpa i̱ miha tuk ak o̱ iakaiyʋt im anumpulit, A̱ki ʋt hʋchim ikunla abana ya̱ wekichi tok a̱ ibafohki la chi̱ hoke: a̱ki ʋt ishit‐fʋma yo̱ ishit hʋchi kostininchi tok kia, ʋno ʋto halambia ho̱ ishit hʋchi kostininchi la chi̱ hoke, achi tok.

¹⁵ Yʋmohmi hosh mi̱ko ʋt okla ha̱ ik i̱ haponaklo tok: Chihowa ʋt aiahni tok oka, yʋmmʋt Chihowa ʋt Ahichah Shilonait a̱ tohno na Nebal ushi Cheloboam a̱ im anumpuli tuk ʋt aia̱hlicha he ak atok.

¹⁶ Yʋmohmi ho̱ Islael moma kʋt mi̱ko ʋt i̱ haponakla he keyu ho̱ pisa mʋt, okla hash osh afalamichit mi̱ko ya̱, Lewi ya̱ nanta isht pi ahalaia cho? micha il ai isha he ʋlhpesa yʋt Chesse ushi ya̱ ik pim ikshoshke: Islael ʋhleha ma! hʋchim ʋlbina ha̱ hʋsh iashke: himak a̱ Lewi ʋt chin chuka akinli ish apistikelashke, achi tok. Yohmi ho̱ Islael ʋt tishelit im ʋlbina ha̱ ona tok.

¹⁷ Amba Islael im ʋlla ʋhleha hʋt Chutah in tʋmaha holihta aiasha hokʋno Lehoboam ʋt i̱ mi̱ko tok.

¹⁸ Yʋmohmi ma Lehoboam ʋt Atolam a̱, yʋmmʋt noshkobo atobbi apesʋchi yatuk o̱ pila tok: mihma Islael moma kʋt tʋli ishit boli na illi tok. Yʋmohmi ho̱ Lehoboam ʋt malelit Chelusalem ona chi̱ hosh tu̱shpʋt tʋnʋp itichanʋlli ya̱ ont chukowa tok.

¹⁹ Yohmi hosh Islael ʋt Lewi in chuka achʋfa ya̱ i̱ filʋmmit i̱ sanali tok osh himak nitak a̱ imoma hoke.

²⁰ Atuk o̱ yakohmi tok, Islael moma kʋt Cheloboam ʋt anonti ʋla tuk o̱ haklo mʋt, pit hoyot okla itʋnaha aiasha ka isht ona cha, Islael moma i̱ mi̱ko ikbi tok: achʋfa kia Lewi in chuka achʋfa ya̱ iakaiya kʋt iksho tok, amba Chutah apehlichi ak illa tok.

²¹ Atuk o̱ Lehoboam ʋt Chelusalem a̱ ʋla mʋt, Chutah in chuka achʋfa moma, micha Benchamin apehlichi aiena hatak aiyuha tahlepa sipokni achʋfa cha, tahlepa sipokni pokoli untuchina, yʋmmʋt tʋnʋp a̱ya ya̱ itʋnahli na, Islael in chuka achʋfa ya̱ itibit, apehlichika yash anonti Solomon, ushi Lehoboam a̱ isht im ʋla chi̱ hatok.

²² Yohmi tuk kia Chihowa im anumpa hʋt hatak Chitokaka im antia Shemaiah ya̱ im ʋlʋt yak achi tok.

²³ Lehoboam Solomon ushi Chutah i̱ mi̱ko ya̱, micha Chutah in chuka achʋfa moma, micha Benchamin, micha okla hinli aiena ka im anumpulit yak ish achashke,

²⁴ Chihowa ʋt yak achishke, Hʋsh ia he keyu, micha hʋch itibapishi ʋhleha, Islael im ʋlla ʋhleha ha̱ hʋsh itiba he keyu hoke: moma kʋt falamʋt in chuka aiyukali ho̱ hʋsh onashke: nana ilʋppa ʋno ak osh ahni li tuk oka. Yʋmohmi ho̱ Chihowa im anumpa ha̱ i̱ haponaklo tok; micha Chihowa im anumpa hatuk mak o̱, falamʋt ia tok.

²⁵ Mihma Cheloboam ʋt Eflaim nʋnih ha̱ Shechem a̱ ai ikbi cha, yʋmma ʋtta tok; atuk osh yʋmma kohchʋt ia mʋt, Penuel a̱ ikbi tok.

²⁶ Mihmʋt Cheloboam ʋt chu̱kʋsh anu̱kaka ya̱ anukfihinlit, Himak a̱ apehlichika yʋt falamʋt Lewi in chuka achʋfa ya̱ im ona chi̱ hoke.

²⁷ Okla ilʋppʋt Chihowa in chuka Chelusalem a̱ atalaia ka nan ai ʋbit ont isht aiokpʋchikmʋt, okla ilʋppa chu̱kʋsh ʋt anonti falamʋt i̱ shahli Lehoboam Chutah i̱ mi̱ko ya̱ im ona chi̱ hoke; mikmʋt okla sʋbi cha, Chutah i̱ mi̱ko Lehoboam a̱ anonti im ona chi̱ hoke.

²⁸ Yʋmohmi hosh mi̱ko ʋt it im anumpuli mʋt, tʋli holisso lakna wak ushi tuklo ho̱ ikbi cha, Chelusalem a̱ hʋsh ia ka atʋpa fehnʋshke: Islael ma! chi̱ naholbʋt toba Echip yakni ya̱ pehlichit hʋchi kohchi tok a̱ hʋsh pisashke, im achi tok.

²⁹ Micha achʋfa ka Behlel ak o̱ hilechi mʋt, achʋfa ka Tan ak o̱ hilechi tok.

³⁰ Mihma nana ilʋppa isht ayoshuba tok: okla hʋt achʋfa Tan hikia ka itikba onʋt aiokpʋchi tok okʋt.

³¹ Micha achahaka aboha puta ikbi tok: micha Lefai ushi ʋhleha ak keyu, okla makali ont ishtaiyopi ak o̱, naholitompa isht asha ikbi tok.

³² Micha Cheloboam ʋt hʋshi isht untuchina, nitak ont isht auah tahlapi ka, impʋchi Chutah impʋchi akinli chohmi ho̱, apesa tok; micha alta ya̱ ai onochit im issa beka tok. Behlel ak kia yʋmihchit wak ushi ikbi tuk ʋt, nan im ʋbit aiokpʋchi tok: micha achahaka puta ikbi tuk naholitompa isht asha ʋhleha ha̱ Behlel ak o̱ hilechi tok.

³³ Yʋmohmi hosh alta Behlel ai ikbi tuk ʋt hʋshi isht untuchina, nitak isht auah tahlapi ma, ilap chu̱kʋsh akinli hʋshi apesa tuk ʋt, ai onochit im issa tok: micha Islael im ʋlla ʋhleha ha̱ impʋchi im apesa tok; micha alta ai onochit im issa mʋt, nabalama ai o̱ hukmi tok.