1 Mi̱ko 11 - Chahta Holisso Holitopa 1886

¹ Yohmi kia mi̱ko Solomon ʋt okla inla ohoyo laua, Feleo ushetik, micha Moabait ohoyo, Ammonait, Etomait, micha Hittait aiena ohoyo ʋhleha anushkunna tok.

² Okla yʋmma puta ka Chihowa ʋt Islael im ʋlla ʋhleha ha̱, Hʋch ik ibachukowokma, ik hʋch ibachukowo kashke: hʋchi chu̱kʋsh a̱ filimmi na, i̱ naholbʋt toba puta ka hʋsh im antia pulla hi oke, im achi hatok okak o̱, Solomon ʋt ilʋppa puta ka anushkunnʋt asitia tok.

³ Micha tekchi ʋt ohoyo holitompa tahlepa untuklokma, im itaiena tahlepa tuchina hosh im asha tok: mihma tekchi ʋhleha hʋt chu̱kʋsh a̱ filʋmmi tok.

⁴ Atuk o̱ yakohmi tok, Solomon ʋt sipoknit taiyaha ma, tekchi ʋhleha hʋt chu̱kʋsh filimmi na, oklushi inla i̱ naholbʋt toba puta ka asitia tok: in Chitokaka Chihowa ya̱ chu̱kʋsh ʋt aia̱hli tok keyu, i̱ki Lewi chu̱kʋsh atok a̱ ik chohmo tok.

⁵ Solomon ʋt Sitonian okla i̱ naholbʋt toba ohoyo Ashtolelh a̱ iakaiyʋt, Ammon okla nanashʋchi yuwalʋchi Milkom a̱ iakaiya tok.

⁶ Micha Solomon ʋt Chihowa itikba ya̱ nana ik achukmo ka yʋmihchit, Chihowa ya̱ iakaiya kʋt, aia̱hli tok keyu, i̱ki Lewi atok a̱ ik chohmo tok.

⁷ Yohmi mʋt Solomon ʋt Moab nan ashʋchi yuwalʋchi Chemosh a̱ nʋnih Chelusalem itikba hikia ka achahaka ya̱ im ai ikbi tok; micha Ammon in chipota nanashʋchi yuwalʋchi Molech a̱ im ai ikbi tok.

⁸ Micha okla inla ohoyo tekchi moma ka i̱ yʋmihchi na, nabalama a hukmit i̱ naholbʋt toba puta ka nan im ʋbit okla isht ai okpahanchi tok.

⁹ Mihma Chihowa ʋt Solomon a̱ i̱ nukhobela tok, chu̱kʋsh ʋt Islael in Chitokaka Chihowa ya̱ i̱ filʋmmi tok oka.

¹⁰ Yʋmmʋt hitukla ha̱ i̱ haiaka cha, nana ilʋppa fehna ka im apesʋt, naholbʋt toba puta iakaiyʋt a̱ya he keyu i̱ miha tok: yohmi kia Chihowa ʋt nana apesa tok a̱ ik iesho tuk atok.

¹¹ Yʋmohmi hatuk o̱ Chihowa ʋt Solomon a̱, Ilʋppa ish yʋmihchi cha, nan it im apesa li ya̱, micha a̱ nanʋlhpisa puta chi̱ miha li tuk a̱ chik iesho hoka, apehlichika yash mokofit chim ishi lish, chin tishu ho̱ ima la chi̱ pulla hoke.

¹² Yohmi akinli kia ish ahanta takla nitak okʋno, chi̱ki Lewi ak atok pulla mak o̱, yʋmihchi la he keyu: amba chiso ibbak ak o̱ mokofit a kohchi la hi oke.

¹³ Yohmi akinli kia apehlichika ya̱ mominchit mokofit im ishi la he keyu: amba an tishu Lewi atok pulla kak o̱, micha Chelusalem atokoli li tok pulla hatuk mak o̱, apehlichika achʋfa ho̱ ima la chi̱ hoke, im achi tok.

¹⁴ Mihma Chihowa ʋt Solomon a̱ i̱ sanala chi̱ ho̱ Etomait Hatat a̱ hilechi tok: yʋmmʋt mi̱ko im isht atiaka yosh Etom a̱ anta tok.

¹⁵ Yohmi kʋt yakohmi tok, Lewi ʋt Etom a̱ anta ma, tʋshka chipota i̱ kʋpitʋni chito Choab ʋt Etom a̱ nakni moma issot kanchi tuk osh hohpit ia mʋt;

¹⁶ (Hʋshi hannali ho̱ Choab, micha Islael moma ai itʋpiha kʋt yʋmma aiasha cha, nakni moma Etom aiasha ka ʋbit tahli tuk okʋt:)

¹⁷ Yohmi ma Hatat ʋt malelit, yʋmma micha Etomait kaniohmi, i̱ki in tishu ʋhleha ai achʋfa aiena kʋt Echip ia hosh yihlepa tok: Hatat ʋt ʋlla iskitini moma hatok.

¹⁸ Micha Mitian a̱ a kohchʋt okla wakayʋt Palan a̱ ona tok: mihmʋt Palan a̱ hatak kanohmi ai ishi cha ia mʋt, Echip onʋt, Feleo Echip i̱ mi̱ko ya̱ im ona tok: yʋmmʋt chuka ya̱ ima mʋt, ilhpak a̱ im atahli cha, yakni ya̱ ima tok.

¹⁹ Mihma Hatat ʋt Feleo itikba ya̱ im isht i̱ kana chinto ahayuchi tok: yohmi ho̱ ilap tekchi ak inli itibapishi, Tahpenes ohoyo mi̱ko itibapishi ha̱ tekchi ya chi̱ ho̱ ima tok;

²⁰ Mihma Tahpenes itibapishi hʋt ʋlla nakni Kenubalh a̱ im eshi tok: yʋmma Tahpenes ʋt Feleo in chuka ya̱ bohlit pishi issʋchi tok: mihma Kenubalh ʋt Feleo in chuka achʋfa, Feleo ushi ʋhleha hak o̱ takla ahanta tok.

²¹ Atuk o̱ Lewi ʋt i̱ki ʋhleha ta̱kla nusi tuk, micha Choab tʋshka chipota i̱ kʋpitʋni chito ʋt illi tuk o̱, Hatat ʋt Echip a̱ antʋt haklo mʋt, Hatat ʋt Feleo ya̱, Ak ia cha, a̱ yakni akinli ho̱ ak oná, im achi tok.

²² Yohmi ma Feleo ʋt, Yohmi kia sa takla ish ahanta ta̱kla kʋt, nanta hosh ik chim ono tuk osh chi̱ yakni akinli ho̱ ia chi bʋnna cho? im achi tok. Mihma afalamichit, Nana ik sʋm ono kʋt iksho: yohmi ak inli kia, ik kaniohmi kia ak iá, achi tok.

²³ Mihma Chihowa ʋt inla yʋt i̱ sanala chi̱ ho̱, Eliatah ushi Leson, yʋmmʋt Hatat‐ese Sobah i̱ mi̱ko i̱ maleli tok a̱, hilechi tok.

²⁴ Micha hatak il ai itʋnahli cha, Lewi ʋt Sobah asha ya̱ ʋbit tahli ma, a̱ya achʋfa i̱ kʋpitʋni toba tok: micha Tamaskʋs a̱ okla ona cha, yʋmma ʋttʋt Tamaskʋs a̱ okla a pehliechi tok.

²⁵ Micha Hatat nan okpʋni kʋt a̱sha ma, Solomon ʋt okcha̱yʋt ahanta nitak moma ka Leson ash osh Islael a̱ im i̱ sanali tok: micha Islael a̱ shitilema tok; micha Silia ya̱ i̱ mi̱ko tok.

²⁶ Mihma Nebat ushi Cheloboam Eflahlait hatak Seleta yakni ʋtta, Solomon in tishu, yʋmma ishki hohchifo kʋt Seluiah, ohoyo i̱ hatak illi atok, yʋmmak kia mi̱ko i̱ sanalit ibbak a̱ wakeli tok.

²⁷ Ilʋppa yohmi kak o̱ mi̱ko ya̱ i̱ sanalit ibbak a̱ wakeli tok: Solomon ʋt Millo ya̱ ikbit i̱ki Lewi in tʋmaha holihta kinahli ya̱ aiiskiachi tok.

²⁸ Mihma hatak Cheloboam ʋt hatak hlampko chilita nukwia iksho tok: mihma hatak himita nan aiokpʋchi ho̱ Solomon ʋt pisa mʋt, Chosef in chuka achʋfa isht ahalaia moma ka apesʋchi ikbi tok.

²⁹ Atuk o̱ nitak yʋmma yakohmi tok, Cheloboam ʋt Chelusalem a̱ a kohchʋt ia ma, hina takla a̱ya na, Shilonait Ahichah hopaii ʋt ahayuchi tok: mihma nafohka himona fo̱ka tok: mihma tuklo illa hosh yakni haiaka hieli tok.

³⁰ Mihma Ahichah ʋt nafohka himona fo̱ka tuk a̱ hoklit ishi cha, hlillichit auahtuklochi tok.

³¹ Micha Cheloboam a̱, Pokoli ho̱ ai ishí, Chihowa Islael in Chitokaka yʋt yak achi hoka, Yakeh! apehlichika yash mokofit Solomon ibbak a̱ a kohchi likmʋt, apehlichi pokoli ho̱ chima la̱ chi̱ hoke.

³² Amba an tishu Lewi ak atok pulla kak o̱, micha Chelusalem tʋmaha holihta ya̱ Islael apehlichi puta moma ka a kohchit atokoli li tok pulla hatuk mak o̱, apehlichi achʋfa ka i̱sha chi̱ hoke.

³³ Okla sa kanchi cha, Sitonian okla i̱ naholbʋt toba ohoyo Ashtolelh, Moab okla i̱ naholbʋt toba Chemosh, micha Ammon in chipota i̱ naholbʋt toba Milkom aiena ka aiokpʋchi cha, a̱ hina puta ik ai itʋnoho̱wo, micha sa tikba ai ʋlhpiesa ik yʋmihcho, micha a̱ nanʋlhpisa puta, micha a̱ nan isht ai apesa puta aiena ka ik yʋmihcho kʋt i̱ki Lewi atok a̱ ik chohmo hoka.

³⁴ Ik yohmi kia apehlichika ya̱ mominchit ibbak a̱ a kohchit ishi la he keyu hoke: amba ʋm anumpa ʋlhpisa puta, micha a̱ nan ʋlhpisa puta aiena ka ieshi hatuk o̱, an tishu Lewi yʋmma atokoli li tok pulla hatuk mak osh, okcha̱yʋt ahanta nitak moma ka mi̱ko ikbi la hi oke.

³⁵ Amba apehlichika ya̱ ushi ya̱ ibbak a̱ a kohchit ishit, apehlichi pokoli ho̱ chima la chi̱ hoke.

³⁶ Micha ushi ak o̱ apehlichi achʋfa ho̱ ima likma, an tishu Lewi ʋt Chelusalem, tʋmaha holihta sa hohchifo a bohli la chi̱ hosh atokoli li tok a̱, pʋla hʋt i̱ hikia na bilia chi̱ hoke.

³⁷ Micha chishno ak o̱ chishi likma, chi chu̱kʋsh ahni tuk puta kʋt, mi̱kot Islael a̱ i̱ mi̱ko chia ha chi̱ hoke.

³⁸ Atukma yakohma hi oke, nana chi̱ miha li moma ka ish haiyaklo cha, a̱ hina puta ka ish a noho̱wʋt aiʋlhpiesa kak o̱ sa tikba ish a yʋmohmi cha, a̱ nan ʋlhpisa puta, micha ʋm anumpa ʋlhpisa puta ka an tishu Lewi atok a̱ chohmit ish ieshikma, chibafoyuka lish, Lewi im ikbi li tok a̱ chohmichit, chin chuka kʋllot hikia ho̱ chim ikbi lish, Islael a̱ chima la hi oke.

³⁹ Micha ilʋppak atuk mak o̱, Lewi ai unchololi ya̱ ilbʋshali li kia, bilia he keyu hoke, im achi tok.

⁴⁰ Yʋmohmi ho̱ Solomon ʋt Cheloboam a̱ ʋbi bʋnnʋt hoyo tok. Mihma Cheloboam ʋt wakaya cha, malelit Echip a̱ onʋt, Echip i̱ mi̱ko Shishak a̱ im ona cha, Echip a̱ anta na Solomon ʋt illi tok.

⁴¹ Yohmi ka Solomon nana akaniohmi tok inla kʋt, micha nana yʋmihchi tok puta, micha ahopoyuksa aiena kʋt, Solomon nana akaniohmi tok holisso ha̱ a holisso keyu, cho?

⁴² Mikma Solomon ʋt Islael moma i̱ mi̱kot, Chelusalem a̱ ahanta kʋt afʋmmi pokoli ushta tok.

⁴³ Mihmʋt Solomon ʋt i̱ki ʋhleha ha̱ ta̱kla nusi cha, i̱ki Lewi in tʋmaha holihta ya̱ a hollopi tok: mihma ushi Lehoboam ak osh ʋlhtobʋt mi̱ko tok.