1 Mi̱ko 10 - Chahta Holisso Holitopa 1886

¹ Atuk o̱ Sheba i̱ mi̱ko ohoyo hʋt Solomon ʋt Chihowa hohchifo pulla isht anoho̱wa ho̱ haklo mʋt, na ponaklo kʋllo isht imomaka pisa chi̱ hosh ʋla tok.

² Mihmʋt tishu baiʋli laua fehnʋt, kamel nabalama shali, micha tʋli holisso lakna laua fehna, micha tʋli holitopa puta aiena ho̱ ieshi hosh, Chelusalem a̱ ʋla tok: atuk osh Solomon a̱ im ʋla mʋt, nana hosh chu̱kʋsh foyuka tuk moma kʋt isht it im anumpohonli tok.

³ Mihma Solomon ʋt nana i̱ ponaklo ka moma im anoli tok; mi̱ko ʋt nana kia in luma cha ik im anolo kʋt iksho tok.

⁴ Atuk osh Sheba i̱ mi̱ko ohoyo hash osh Solomon ahopoyuksa moma, micha chuka yash ikbi tok;

⁵ Micha ilhpak im aiimpa aiasha, micha in tishu ʋhleha hʋt kaniohmit chieya, micha nan im isht asha ʋhleha hʋt kaniohmit hieli, micha i̱ nafohka aiena, micha isht ishko sholi ʋhleha, micha ai oiyʋt Chihowa in chuka ona aiena ka pisa mʋt, shilombish kʋnia chiyuhmi tok.

⁶ Micha mi̱ko ya̱, Nana annoa a̱hli ho̱ a̱ yakni ya̱ anta li mʋt, nana ish akaniohmi, micha chim ahopoyuksa aiena ka ha̱klo li tuk oke.

⁷ Yohmi akinli kia anumpa ha̱ ik sai yimmo ke tuk osh, ʋla lish sa nishkin a̱ ishit pisa li kak osh sai yimmishke: yohmi ka yakeh! iklʋna kʋt ʋm annoa tuk keyushke; chim ahopoyuksa, micha nana chim ʋlhtaha kʋt annoa na, ha̱klo li tuk a̱, i̱ shahli atampʋshke.

⁸ Chin tʋshka ʋhleha hʋt nayukpʋshke, chin tishu ʋhleha hʋt chi tikba hieli na bilia, ilʋppʋt chim ahopoyuksa haha̱klo kʋt nayukpʋshke.

⁹ Chin Chitokaka Chihowa yʋmmak osh chi ahninchi cha, Islael ai ombinili holitompa ya̱ chi binilichi tuk ʋt holitopashke; Chihowa ʋt Islael a̱ i̱ hullo na bilia hatuk osh, nan im apesʋt ai ʋlhpiesa ish yʋmihcha chi̱ ho̱, mi̱ko chikbi tuk oke, im achi tok.

¹⁰ Mihmʋt mi̱ko ya̱ tʋli holisso lakna talent tahlepa achʋfa cha pokoli tuklo aiena ho̱, micha nabalama laua fehna, micha tʋli holitopa puta aiena ka ima tok: nabalama apakna Sheba i̱ mi̱ko ohoyo hʋt mi̱ko Solomon a̱ ima tuk, ilʋppa chohmit i̱ himmakma ik im ʋlo tok.

¹¹ Mikma Hilam i̱ peni hochito kohta shali ʋt, tʋli holisso lakna ya̱ Ofi ya̱ ont ai isht ʋla tuk ʋt, almuk iti laua fehna, micha tʋli holitopa puta ho̱ Ofi ya̱ ai isht ʋla tok.

¹² Mihma mi̱ko ʋt almuk iti ya̱, Chihowa in chuka, micha mi̱ko in chuka toni̱k puta im ikbi mʋt, taloa ʋhleha ha̱ hap puta, micha salteli puta aiena ka isht im ikbi tok: almuk iti yʋmma chohmi kʋt ʋla tok keyu, micha pisa tok keyu himak nitak a̱ ant ʋhli hoke.

¹³ Mihma mi̱ko Solomon ʋt Sheba i̱ mi̱ko ohoyo hash nana ho̱ ahnit asilhhakma moma ima mʋt, mi̱ko chohmit aieninchit ima tok: yohmi ma filema cha, iʋt ilap i̱ yakni ak inli ho̱ in tishu ʋhleha aiena kʋt ona tok.

¹⁴ Mihma afʋmmi achʋfa ho̱ tʋli holisso lakna ʋt Solomon a̱ im ʋla kʋt, weki kʋt tʋli holisso lakna talent tahlepa hannali cha pokoli hannali akucha hannali tok.

¹⁵ Mikma hatak nan itatoba ʋhleha, micha nabalama itatoba ʋhleha, micha Alabia i̱ mi̱ko ʋhleha, micha ilap i̱ yakni pehlichi ʋhleha aiena ka, im ai ishi tuk ʋt im aiena tok.

¹⁶ Mihma mi̱ko Solomon ʋt tʋli holisso lakna lʋllit, telihpa chipunta tahlepa tuklo ho̱ ikbi tok: telihpa achʋfakma tʋli holisso lakna shekel tahlepa hannalit ia tok.

¹⁷ Micha telihpa tahlepa tuchina tʋli holisso lakna lʋlla yo̱ ikbi tok: telihpa achʋfakma tʋli holisso lakna weki tuchinʋt ia tok: mihma mi̱ko ʋt Lebanon yakni haiaka chuka ak o̱ ashachi tok.

¹⁸ Micha mi̱ko ʋt ai ombinili holitompa chito yo̱ elefant noti isht ikbi cha, tʋli holisso lakna achukma i̱ shahli ho̱ lapalichi tok.

¹⁹ Ai ombinili holitompa ʋt atuya ahabli hannalikma, ai ombinili holitompa a̱shaka paknaka et lumbo tok: micha ai ombinili tahlala̱ka shakba ai onʋtola yʋt asha ma, koi chito tuklo hosh shakba ai onʋtola ya̱ apotoʋt hieli tok.

²⁰ Micha atuya ahabli hannali ka in tʋnnʋp achʋfa, micha ai in tʋnnʋp achʋfa ka koi chito auahtuklo kʋt hieli tok: apehlichika kanima ka yʋmma chohmi hosh toba kʋt iksho tok.

²¹ Mihma mi̱ko Solomon ai ishko ʋt tʋli holisso lakna yokma, Lebanon yakni haiaka chuka nan aiʋlhto puta kʋt tʋli holisso lakna a̱hli tok: tʋli hʋta yosh toba kʋt iksho: Solomon i̱ nitak a̱ nana isht ik ahobo tok.

²² Mi̱ko ʋt Hilam i̱ peni hochito kohta shali takla Hlashish peni hochito kohta shali hosh okhʋta ha̱ im aiasha tuk okʋt: Hlashish peni hochito ʋt afʋmmi tuchinakma himonna ha ʋlʋt, tʋli holisso lakna, micha tʋli hʋta, micha elefant noti, micha hatak shaui puta, micha okchanlus chito puta aiena ka isht ʋla beka tok.

²³ Yʋmohmi ho̱ mi̱ko Solomon ʋt imi̱la̱yak chito, micha hopoyuksa aiena kʋt mi̱ko moma yakni paknaka aiasha ka i̱ shahli tok.

²⁴ Mihma yakni moma kʋt Chihowa ʋt chu̱kʋsh fohki tuk o̱, hopoyuksa ka i̱ haponaklo bʋnnʋt Solomon nashuka ya̱ hoho̱yo tok.

²⁵ Mihma ʋlhpisa ho̱ afʋmmi hosh afʋmmikma hatak puta kʋt nahʋlbina nan aiʋlhto tʋli hʋta, micha nan aiʋlhto tʋli holisso lakna, micha nafohka, tʋnʋp a̱ya i̱ nahalupa, micha nabalama, micha issuba puta, micha issuba haksobish falaia puta aiena ka isht im ʋla tok.

²⁶ Mihma Solomon ʋt tʋnʋp itichanʋlli puta, micha issuba ombinili puta aiena ka itahobit taiyahli tok; micha tʋnʋp itichanʋlli tahlepa auahushta, micha issuba ombinili tahlepa sipokni auahtuklo hosh im a̱sha, yʋmma tʋnʋp itichanʋlli aiasha tʋmaha holihta, micha mi̱ko aiʋtta Chelusalem aiena kak o̱ ashachi tok.

²⁷ Micha mi̱ko ʋt Chelusalem a̱ tʋli hʋta ya̱ apaknʋchi kʋt tʋli chohmichi mʋt, chuahla ya̱ apaknʋchi kʋt bihi holba okfa aiasha kak o̱ chohmichi tok.

²⁸ Mihma Solomon a̱ issuba puta, micha linen ponola ha̱ Echip a̱ ai isht im ʋla tok: mihma mi̱ko im itatoba ʋhleha hʋt linen ponola ha̱ aiilli ʋlhpisa ho̱ ishi tok.

²⁹ Micha tʋnʋp itichanʋlli achʋfa kʋt tʋli hʋta ʋt shekel tahlepa hannalikma, issuba achʋfa kʋt tahlepa achʋfa cha pokoli tahlapi ho̱ Echip a̱ kohchʋt minti tok: micha yohmi ho̱ Hittait okla i̱ mi̱ko moma, micha Silia i̱ mi̱ko ʋhleha ha yʋmmak osh isht i̱ kohcha tok.