1 Mi̱ko 1 - Chahta Holisso Holitopa 1886

¹ Mihma mi̱ko Lewi ʋt sipoknit taiyaha, nitak in lauʋt taiyaha tok; mihma anchi isht ompohomo kia, libisha he keyu tok.

² Yohmi ma in tishu ʋhleha hʋt, A̱ shahli mi̱ko ya̱ ohoyo himita hatak haleli keyu yo̱ i̱ hoyashke; mikma mi̱ko ya̱ itikba hikia cha, heh ahnit sholashke, micha chi apota na, a̱ shahli mi̱ko ʋt libishashke.

³ Yohmi ho̱ ohoyo himita pisa aiokli ho̱ Islael aiasha fullota moma ka a hoyo mʋt, Shunamait ohoyo Abishak ahayuchi cha, mi̱ko ya̱ isht im ʋla tok.

⁴ Mihma ohoyo himita yash osh pisa aiokli fehna tok; mihmʋt mi̱ko ya̱ heh ahnit shoyuli cha, nana isht im ahanta tok: yohmi kia mi̱ko ʋt ik ithano tok.

⁵ Yohmi ma Hakkilh ushi Atonichah ʋt ile chahʋchit, Ʋno ak osh mi̱ko la chi̱ hoke, achi tok: mihmʋt tʋnʋp itichanʋlli puta, micha issuba om binili ʋhleha, micha hatak pokoli tahlapi aiena tikba malela chi̱ ka il atahli tok.

⁶ Mihma i̱ki ʋt nitak nana kia, Nanta katiohmi ho̱ ish yʋmihchi cho? achit im alʋmmi keyu hatok: micha hatak pisa achukma tok; Absalom iakaiya ho̱ ishki ʋt sholi atok.

⁷ Atuk o̱ Seluiah ushi Choab, micha Abiahla naholitompa isht ʋtta ya̱ it im anumpuli tok: mihma Atonichah ya̱ iakaiyʋt okla cha, apelʋchi tok.

⁸ Yohmi kia Satok naholitompa isht ʋtta, micha Chehoiata ushi Benaiah, micha Nahlan hopaii, micha Shimei, micha Lei, micha hatak hlampko chilita ʋhleha aiena Lewi apehʋt a̱sha ʋt Atonichah ya̱ ik ibafo̱ko tok.

⁹ Mihma Atonichah ʋt chukfʋlhpoa, micha wak, micha wak ilhpitʋt nia aiena ho̱ Sohelelh tʋli ya̱ bili̱ka, yʋmmʋt En‐lokel ituma ya̱ ai ʋbi mʋt, itibapishi ʋhleha moma, mi̱ko ushi ʋhleha, micha mi̱ko in tishu ʋhleha, Chutah hatak ʋhleha moma ka im anoli tok.

¹⁰ Amba Nahlan hopaii, micha Benaiah, micha hatak hlampko chilita ʋhleha, micha itibapishi Solomon aiena kʋno ik im anolo tok.

¹¹ Yʋmohmi ma Nahlan ʋt Solomon ishki Balh‐sheba ya̱ im anumpulit, Atonichah Hakkilh ushi ʋt mi̱ko ka chik haklo tuk oh cho? mihma Lewi pi̱ shahli ʋt ik ithanoshke, achi tok.

¹² Yʋmohmi hoka inta! himak a̱ chim asilhha lishke, nana ak chi̱ miha na chishno chim ilhfiopak, micha chiso Solomon im ilhfiopak ita tuklo ka ish hlakofichashke.

¹³ Ia cha, chukowʋt mi̱ko Lewi ya̱ im ona cha, A̱ shahli, mi̱ko ma! chin tishu ohoyo ha̱ anumpa kʋllo il onochit ish i̱ miha kʋt; Chiso Solomon ak osh siakaiyʋt mi̱ko cha, ʋm ai ombinili holitompa ya̱ ombinili pulla hi a̱ is sʋm achi tok keyu cho? yohmi hokak o̱ nanta katiohmi ho̱ Atonichah ʋt mi̱ko cho? ish im achashke.

¹⁴ Yakeh! mi̱ko ya̱ it im anumpulit isht ish anta itinta̱kla ma, ʋno ak kia chiakaiyʋt chukowa lish, chim anumpa ha̱ ai a̱hlichi lashke, achi tok.

¹⁵ Mihma Balh‐sheba ʋt mi̱ko ya̱ ibachukowʋt anusi aboha ya̱ chukowa tok: mihma mi̱ko ʋt sipokni fehna tok: mihma Shunamait ohoyo Abishak ʋt mi̱ko ya̱ nana isht im ahanta tok.

¹⁶ Mihma Balh‐sheba ʋt mi̱ko ya̱ im akachunoli cha, aiokpʋchi tok. Mihma mi̱ko ʋt, Nanta ho̱ ish ahni cho? achi tok.

¹⁷ Mihma, A̱ shahli ma! chishno ʋt chin tishu ohoyo ha̱ anumpa kʋllo il onochit chin Chitokaka Chihowa pulla ka isht is sa̱ mihʋt, Chiso Solomon ak osh siakaiyʋt mi̱ko pulla cha, ʋm ai ombinili holitompa ya̱ ombinila hi oke, ish ahanchi tok.

¹⁸ Yohmi tok okak o̱ himak a̱ yakeh! Atonichah ak osh mi̱koshke; mihma himak a̱, a̱ shahli mi̱ko chia hʋt chik ithanoshke.

¹⁹ Micha wak, micha wak ilhpitʋt nia, micha chukfʋlhpoa aiena ka lauachit ʋbi cha, mi̱ko ushi ʋhleha moma, micha Abiahla naholitompa isht ʋtta, micha tʋshka chipota i̱ kʋpitʋni chito Choab aiena ka im anoli tok: yohmi kia Solomon chin tishu hano ik im anoloshke.

²⁰ Mihma a̱ shahli mi̱ko ma! kʋna hosh iakaiyʋt a̱ shahli mi̱ko im ai ombinili holitompa ya̱ ombinila chi̱ ka ish im anola chi̱ ho̱, Islael moma i̱ holhponayo ʋt chishno ak o̱ chi onʋtoyulʋshke.

²¹ Yʋmmak keyukma yakohma hi oke, a̱ shahli mi̱ko ʋt i̱ki ʋhleha ta̱kla nusikma, ʋno micha sʋso Solomon ita tuklo kʋt nan i̱ sanali pi holhtina hi oke.

²² Atuk o̱ yakeh! mi̱ko ya̱ im anumpulit isht anta moma ma, Nahlan hopaii ʋt ant chukowa tok.

²³ Mihma mi̱ko ya̱ im anolit, Yakeh! Nahlan hopaii yoke, achi tok. Micha ant chukowʋt mi̱ko itikba ʋla mʋt, mi̱ko itikba ya̱ akachunolit nashuka ya̱ aka pit ishit hlipia tok.

²⁴ Mihmʋt Nahlan ʋt, A̱ shahli mi̱ko ma! Atonichah ak osh siakaiyʋt mi̱ko cha, ʋm ai ombinili holitompa ya̱ ombinila chi̱ hoke, ish achi tuk oh cho?

²⁵ Himak nitak a̱ ia cha, wak, micha wak ilhpitʋt nia, micha chukfʋlhpoa aiena ka lauachit ʋbi cha, mi̱ko ushi ʋhleha moma, micha tʋshka chipota i̱ kʋpitʋni ʋhleha, micha Abiahla naholitompa isht ʋtta ya̱ im anolishke: mihma yakeh! itikba ya̱ impʋt, micha ishkot ai asha cha, Chitokaka yʋt mi̱ko Atonichah ya̱ okchalinchashke, okla ahanchi hoke.

²⁶ Amba ʋno, ʋno fehna chin tishu sia, micha Satok naholitompa isht ʋtta, micha Chehoiata ushi Benaiah, micha chin tishu Solomon ano ik im anoloshke.

²⁷ A̱ shahli mi̱ko ʋt nana ilʋppa yʋmihchi tuk okak osh kʋna hosh a̱ shahli mi̱ko ya̱ iakaiyʋt im ai ombinili holitompa ya̱ ombinila hi a, chin tishu ha̱ chik i̱ haiakʋcho tuk oh cho? achi tok.

²⁸ Yohmi ma mi̱ko Lewi ʋt afalamichit, Balh‐sheba ya̱ hʋs sa̱ hoyashke, achi tok: mihma mi̱ko ya̱ ant iba chukowa cha, mi̱ko itikba ya̱ hikia tok.

²⁹ Mihma mi̱ko ʋt anumpa kʋllo il onochit, Chihowa yʋmmak osh ʋmi shilombish ai itikonofa puta a hlakofihinchi chatuk ʋt okcha̱ya pulla ka,

³⁰ Anumpa kʋllo il onochit, Islael in Chitokaka Chihowa pulla ka ishit chi mihʋt, Chiso Solomon ʋt siakaiyʋt mi̱ka he, micha si ʋlhtobʋt ʋm ai ombinili holitompa ya̱ ombinili pulla hi oke, achi li tok; yohmi tok okʋt himak nitak a̱ yʋmihchi la chi̱ pulla hoke, achi tok.

³¹ Yohmi ma Balh‐sheba ʋt nashuka ya̱ aka pit isht akachunoli cha, mi̱ko ya̱ aiokpʋchi tok; micha, A̱ shahli mi̱ko Lewi ʋt okcha̱ya na biliashke, achi tok.

³² Mihma mi̱ko Lewi ʋt, Satok naholitompa isht ʋtta, micha Nahlan hopaii, micha Chehoiata ushi Benaiah aiena ka hʋs sa̱ hoyashke, achi tok. Mihma mi̱ko itikba ya̱ okla ʋla tok.

³³ Mihma mi̱ko ʋt, Chi̱ shahli in tishu ʋhleha ha̱ pehlichi cha, sʋso Solomon a̱ ʋm issuba haksobish falaia yash ombinilichi cha, Kihon a̱ isht hʋsh onashke.

³⁴ Mikma Satok naholitompa isht ʋtta, micha Nahlan hopaii ita tuklo kʋt yʋmmak ash o̱ nan ahʋmmit Islael i̱ mi̱ko isht ai atokolashke: micha ishtpu̱fa ya̱ olachit, Chitokaka ʋt mi̱ko Solomon a̱ okchalinchashke, hʋsh achashke.

³⁵ Yohmikma iakaiyʋt hʋsh minti na ʋlʋt, ʋm ai ombinili holitompa ya̱ om binilashke; yʋmmak osh si ʋlhtobʋt mi̱ko ya chi̱ hoke: micha yʋmmak Islael micha Chutah aiena ka i̱ mi̱ko ya chi̱ ho̱ atokoli li tuk oke, im achi akinli tok.

³⁶ Mihma Chehoiata ushi Benaiah ʋt mi̱ko ya̱ im afalamichit, Amen; a̱ shahli mi̱ko in Chitokaka ʋt yʋmmak o̱ achi ak inlashke.

³⁷ Chihowa ʋt a̱ shahli mi̱ko ya̱ ibafoyuka chatuk ʋt chiyuhmit Solomon a̱ ibafoyuka cha, im ai ombinili holitompa ya̱ chitoli kʋt a̱ shahli mi̱ko Lewi im ai ombinili holitompa ya̱ i̱ shahlichashke, achi tok.

³⁸ Yohmi ho̱ Satok naholitompa isht ʋtta, micha Nahlan hopaii, micha Chehoiata ushi Benaiah, micha Chelehlait ʋhleha, micha Pelehlait ʋhleha aiena kʋt ia cha, Solomon a̱ mi̱ko Lewi im issuba haksobish falaia ya̱ ombinilichi cha, Kihon a̱ isht ona tok.

³⁹ Mihma Satok naholitompa isht ʋtta ʋt tabenakel a̱ lapish bila ʋlhto ya̱ ai ishit kohchi cha, Solomon a̱ nan ahʋmmit atokoli tok: mihma ishit pu̱fa ya̱ okla olachi tok: mihma okla moma kʋt, Chitokaka ʋt mi̱ko Solomon a̱ okchalinchashke, ahanchi tok.

⁴⁰ Mihma okla moma kʋt et iakaiyʋt minti mʋt, oskula puta olachit yukpa fehna hosh na yukpa tok; yohmi ma ola kak o̱ yakni ʋt winakʋchi tok.

⁴¹ Mihma Atonichah, micha im annoa hosh apeha tuk aiena kʋt impʋt issa mʋt, haklo tok. Mihma Choab ʋt ishit pu̱fa ola ka haklo mʋt, Nanta katiohmi ho̱ tʋmaha holihta ya̱ nana ola shakapa ilʋppʋt yʋmohmi hoh cho? achi tok.

⁴² Atuk o̱ anumpulit isht anta moma ho̱ yakeh! Abiahla naholitompa isht ʋtta ushi Chonahlan ʋt ai ʋla tok: mihma Atonichah ʋt, Chukowá; hatak chilita nukwia iksho chia hokʋt, nan annoa achukma isht ish la hoke, im achi tok.

⁴³ Mihma Chonahlan ʋt afalamichit Atonichah ya̱, A̱hlishke, pi̱ shahli mi̱ko Lewi ʋt Solomon a̱ mi̱ko ikbishke.

⁴⁴ Micha mi̱ko ash osh Satok naholitompa isht ʋtta, micha Nahlan hopaii, micha Chehoiata ushi Benaiah, micha Chelehlait ʋhleha, micha Pelehlait ʋhleha aiena ka apelinchit pila na, mi̱ko im issuba haksobish falaia yash okla ombinilichishke:

⁴⁵ Mihma Satok naholitompa isht ʋtta, micha Nahlan hopaii ita tuklo kʋt Kihon ak o̱ nan ai ahʋmmit mi̱kochishke; mihma yʋmma ashʋt nayukpa hosh mintishke; yohmi ho̱ anonti tʋmaha holihta ʋt winihʋchishke. Shakapa ilʋppak o̱ hʋsh haklo tuk oke.

⁴⁶ Micha Solomon ʋt apehlichika ai ombinili holitompa ya̱ ombinili akinlishke.

⁴⁷ Micha yohmi ma mi̱ko in tishu ʋhleha hʋt pi̱ shahli mi̱ko Lewi ya̱ im ʋla cha, anumpa yukpali onochit, Chihowa ʋt Solomon hohchifo ha̱ holitoblichi kʋt chi hohchifo ha̱ i̱ shahlichashke, micha im ai ombinili holitompa ya̱ chitoli kʋt chim ai ombinili holitompa ya̱ i̱ shahlichashke, okla achishke: mihma mi̱ko ʋt in topa binilit il akachunoli tuk oke, im achi tuk.

⁴⁸ Mihma mi̱ko ʋt yak achit, Islael in Chitokaka Chihowa, yʋmmak osh himak nitak a̱ ʋm ai ombinili holitompa ya̱ ombinila chi̱ ka ʋma kʋt holitopashke, sa nishkin akinli kʋt pihi̱sʋshke, achi akinli tuk oke, im achi tok.

⁴⁹ Mihma im annoa atuk moma Atonichah ya̱ apehʋt aiasha tuk ʋt nukshopa cha, wakaya mʋt, hatak ʋt i̱ hina aiyukali kʋt iʋt taha tok.

⁵⁰ Mihma Atonichah ʋt Solomon pulla kak o̱ nukshopa mʋt, wakayʋt ia cha, alta lapish puta ka ont hoklit ishi tok.

⁵¹ Atuk o̱ Solomon a̱ im anolit, Yakeh! Atonichah ʋt mi̱ko Solomon a̱ i̱ nukshopʋshke: yakeh! alta lapish puta ka hoklit ishi cha, Solomon mi̱ko ʋt in tishu ha̱ bʋshpo falaia isht ʋba he keyu kʋt himak nitak a̱ anumpa kʋllo il onochit a̱ mihashke, achishke, achi tok.

⁵² Mihma Solomon ʋt, Hatak ʋlhpiesa chiyuhmit a̱ya hokmʋt, pa̱shi achʋfa kia aka itula he keyu: amba na haksi ʋt atakalit haiaka hokmʋt, illa hi oke.

⁵³ Yohmi ma mi̱ko Solomon ʋt pit hoyo na, alta ont ai ishit okla isht ʋla tok. Mihma ʋlʋt mi̱ko Solomon a̱ il im akachunoli tok: mihma Solomon ʋt, Chin chuka ya̱ iá, im achi tok.