1 Kolinhlian 9 - Chahta Holisso Holitopa 1886

¹ Apostel sia keyu ho̱? yuka keyu sia keyu ho̱? pin Chitokaka Chisʋs Klaist a̱ pisa li tuk keyu ho̱? Chitokaka hʋsh ibai achʋfa ka yʋmmʋt na hʋchi atahli li tuk mak keyu̱?

² Inla yokʋno im apostel sia keyu hok mak heto, hʋchishno yokʋno hʋchim ʋbanumpeshi sia mʋhlishke: Chitokaka hʋsh ibai achʋfa kak osh ʋbanumpeshi si ʋlhtoka hatuk a̱ isht a̱hlichi hʋchia hoke.

³ Kʋna hosh ik yimmot si a ponaklo tuk yʋmma im afalaminchi li ka ilʋppak oke;

⁴ Impa, micha nan ishko ita tuklo kʋt isht a pim ʋlhpiesa keyu ho̱?

⁵ Ohoyo pin tek a̱ ilauelit a̱ya kʋt, apostel inla ʋhleha, mikmʋt Chitokaka itibapishi ʋhleha, micha Sefas aiena ka chohmit pim ohoyo, pin tek a̱ ilauelit il a̱ya hi ʋt pim ʋlhpiesa keyu ho̱?

⁶ Yohmikmʋt Banabas ita tuklo li kak bano hosh ke toksʋlo ka hi ʋt pim ʋlhpiesa keyu ho̱?

⁷ Kʋta hosh kaniohmi hoh kia itotinowa kʋt ilap inli hosh nan i̱ kʋnia ho̱? kʋta hosh pa̱kʋpi a hollokchi ya̱ ikbi tuk ʋt, yʋmma nan ai ʋni ka ai ʋpa keyu ho̱? keyukma kʋta hosh nan ʋlhpoba apistikeli kʋt anonti nan ʋlhpoba ya̱ i̱ pishukchi ya̱ ik ishko ka hinla̱?

⁸ Hatak o̱ chohmit ilʋppa puta ka achi li ho̱? ʋba nan ʋlhpisa yak kia yʋmmak inli ho̱ achi ak inli keyu ho̱?

⁹ Wak toksʋli yʋmmʋt na nihechi ka, Itakha ya̱ chik takcho kashke, achi hosh Moses i̱ nan ʋlhpisa ya̱ holisso hoke. Chitokaka yʋt wak toksʋli ya̱ nan im atahli ho̱?

¹⁰ Yohmi ka pishno ak illa puyulla hatuk mak o̱ achi tok o̱? pishno puyulla mʋhli hatuk mak o̱ ilʋppʋt holisso hatuk: yohmi ka kʋna hosh yakni patʋffi kʋt, nawaya pisa he ahni hosh yakni patʋffashke; mikma nan isht ilai yukpa pisa he ahni hosh kʋna kia nanihechi kʋt, na pisa he ahni tuk ak o̱ ibai isha hi oke.

¹¹ Nana kʋt shilombish imma ko̱ e hʋchim a hokchi hatuk okma, nana kʋt haknip ahalaia imma e hʋchim ai ʋma chi̱ ka, nana kʋt a fehna ho̱?

¹² Inla yʋt ilʋppa hʋch ibai isha hi ʋt ʋlhpesa hokma, pishno yokak heto isht a pim ʋlhpiesa keyu ho̱? yohmi kia nana ʋlhpesa ahnit ilʋppak ash o̱ isht kil il apelacho hatuk: amba Klaist im ʋbanumpa ha̱ kil ataklammo ka chi̱ kʋt, nana moma ka ik yʋmohmí il ahni hoke.

¹³ Kʋna kia nana kʋt holitopa imma kak o̱ isht ʋtta kʋt, yʋmmʋt nana kʋt tempel a̱ ai immi hak o̱ ai ʋpa; mikma kʋna hosh alta ya̱ nan isht ai ʋtta kʋt, yʋmmʋt alta ya̱ nan ai ibai ishi ka hʋch ik ithano cho?

¹⁴ Yʋmmak inli ho̱ chohmit kʋna hosh ʋbanumpa isht anumpuli kʋt, yʋmmʋt ʋbanumpa ha̱ ai isht il apelacha hi o̱, Chitokaka yʋt apesa tok.

¹⁵ Yohmi kia ilʋppa puta kash achʋfona kia isht il apelachi li tuk keyu: yohmi mʋt nana kʋt ʋm ai yʋmohma chi̱ kʋt ilʋppa puta kash holissohonchi li tuk keyu: kʋna kia nan isht il a holitopa li ya̱ ik ahobalecho ka he atuk a̱, illi kak osh achukma kʋt yʋmma ʋm i̱ shahliskke.

¹⁶ Ʋbanumpa isht anumpohonli li hoh kia, nan isht il aholitopa la hi ʋt ik sʋm iksho kamohmishke: nana kʋt ai ʋlhpiesa mak osh si onʋtuyula hoka; a̱hli, ʋbanumpa ha̱ isht anumpohonli li keyukmʋt, nan ʋm a palʋmmi hoke.

¹⁷ Ahni li hok mak osh ilʋppa yʋmohmi li hokmʋt, nan ʋlhtoba kia ieshi li hoke; amba ak ahno hok mak osh ilʋppa yʋmihchi li hoh kia, ʋbanumpa isht ai ʋtta hi okʋte si ʋlhtokowa hatuk oke.

¹⁸ Yohmi ka nanta hosh nan isht ʋm ʋlhtoba yo̱? a̱hli, ʋbanumpa ho̱ isht anumpohonli li kʋt, Klaist im ʋbanumpa hash nan ak ai illecho ka chi̱ hatuk; yokmi hokʋt ʋbanumpa isht ʋm ai ʋlhpiesa hatuk a̱ ak ʋlhpesacho ka hi o̱ keyushke.

¹⁹ Achʋfona kia i̱ yuka sia keyu, yohmi kia i̱ shahlichit asitʋbi la chi̱ kʋt, ʋno ak inli hosh moma ka il im i̱ yukahanchi li hoke.

²⁰ Yohmi hokʋt Chu okla ha̱ asitʋbi la chi̱ kʋt, Chu okla hokʋno Chu ak inli ho̱ toba li hatuk; mihmʋt kʋna hosh nan ʋlhpisa ya̱ ai i̱ nutaka atuk a̱ asitʋbi la chi̱ kʋt, nan ʋlhpisa ya̱ ai i̱ nutaka hokʋno nan ʋlhpisa ai i̱ nutaka ak inli ho̱ toba li hatuk;

²¹ Kʋna hosh nan ʋlhpisa a keyu ka asitʋbi la chi̱ kʋt, nan ʋlhpisa a keyu hokʋno nan ʋlhpisa a keyu ak inli ho̱ toba li hatuk; yohmi kia nan ʋlhpisa ik im ikshot Chihowa ik im antio ka hi o̱ keyu, Klaist i̱ nan ʋlhpisa yosh onʋtuyula hoka.

²² Ik hlampko ya̱ asitʋbi la chi̱ kʋt, ik hlampko hokʋno ik hlampko ak inli ho̱ toba li hatuk; yohmi kʋt ik kaniohmi kia kanimi ka okchalinchi la chi̱ kʋt, hatak moma ka nana moma ka in toba li hoke.

²³ Yohmi kʋt ʋbanumpa ha̱ hʋch ibai ishi la chi̱ kʋt, ʋbanumpa pulla kak o̱ ilʋppa yakohmi li hoke.

²⁴ Kʋna hosh ai itin timi̱ya ai yihlepa chi̱ hatuk okʋt, moma kak osh yihlepa kia, nan isht a holitopa hi okʋno achʋfa bano hosh ishi chatuk a hʋch ik ithano cho? Nan isht a holitopa hi ya̱ hʋsh isha chi̱ kʋt, yʋmmak inli ho̱ chohmit hʋsh malelashke.

²⁵ Yohmi ka hatak moma kʋt i̱ shahlicha he ahnit ile lushummi hokʋto, yʋmmʋt nana moma ka il ai oktampli hoke. Yohmi kʋt iachuka okpula hi o̱ isha chi̱ kʋt, okla ilʋppak o̱ yakohmi hoke: pishno yokʋto nan okpula he keyu kak oke.

²⁶ Yʋmohmi hoka ik im ai ono keyut, yakohmit malihinli lishke: kʋna hosh mahli ho̱ ihi̱sso ho̱ chohmi keyut, itihimbi lishke.

²⁷ Yohmi kʋt sa haknip imaiyachi li, yohmi mʋt yukahanchi lishke: yʋmmak keyukmʋt ik kaniohmi kia inla ya̱ ʋbanumpa isht im anumpohonli li haya tuk ʋt, ʋno ak inli kak osh ak ai a̱hlo ka hinla hoke.