1 Kolinhlian 8 - Chahta Holisso Holitopa 1886

¹ Yohmi ka na holbʋt toba isht aiokpʋchit nana ka im issa tok imma hokʋno, nana ka iloh ithaiyana kʋt il ithanʋshke. Nan ithana yʋt ile chahʋchi, amba nan i̱ hullo yokʋto nan achukmali yoke.

² Yohmi ka kʋna kia nana ka ithana im ahoba hokmʋt, nana ka kaniohmit ithana he tuk ash osh ik ithano ki̱sha hoke.

³ Amba kʋna hosh Chihowa ya̱ i̱ hullokma, mihi yosh yʋmma im a holitopa hoke.

⁴ Na holbʋt toba puta isht aiokpʋchit nana ka im issa tok yʋmmak o̱ ʋpa hatuk imma tok okʋno, na holbʋt toba yʋt yakni pakna ya̱ nana ho̱ keyu; micha Chihowa inla yʋt iksho, amba achʋfa kak illa ka iloh ithanʋshke.

⁵ I̱ shahli hohchifo kʋt ai asha kʋt ʋba shutik ak okmá, keyukmʋt yakni pakna yak okmá, nana ho̱ ai asha kʋt, i̱ shahli hʋt laua cha, anonti chitokaka mʋt laua hoke.

⁶ Amba pishno yokʋno Chihowa achʋfa, I̱ki, yʋmmak osh nan ai ahni pulla ho̱ nana moma kʋt toba hoke; mikma pishno ʋt yʋmmak o̱ immi pia hi osh il in toba hoke; mikma Chitokaka Chisʋs Klaist achʋfa yʋmmak atuk mak o̱ nana moma kʋt ai asha, mikma pishno mʋt yʋmmak atuk mak o̱ il ai ashʋshke.

⁷ Yohmi kia nan isht ithaiyana yash hatak moyuma ka anukfoyuka keyushke: kanimi kʋt na holbʋt toba ya̱ nana ho̱ chohmichit isht ai i̱ yimmi cha, na holbʋt toba yash nana ho̱ im issa tuk ash o̱ yʋmmak o̱ ai ʋpʋt ma̱ya na ant himakʋshke: yohmi mʋt nan isht il ai akostininchi yʋt ik ono hatuk osh ai okpuloka hoke.

⁸ Yohmi ka il impa hatuk mak o̱ Chihowa hʋt pi ahninchi ho̱ keyu: il impa hoh kia, kaniohmit il i̱ shahli keyu hoka; mikmʋt kil impo kia kil a lauwo keyu hoke.

⁹ Yohmi kia ahah! hʋsh ahni na na hʋsh a kaniohma he ʋlhpesa ilʋppak ash ot kʋna hosh ik hlampko, yʋmmak ash o̱ ibetʋblichi yo̱ ik kaniohmi kia ik tobo kashke.

¹⁰ Kʋna chia hosh nana hash isht ithaiyana kia, na holbʋt toba in tempel anu̱kaka ya̱ ish ai impa na kʋna hosh chi piesakmʋt, yʋmmʋt nan isht il akostininchi hʋt ik hlampko hatuk okmʋt, na holbʋt toba nana ho̱ im issa tok yʋmmak ash o̱ ʋpa hi ʋt i̱ shahlit anukfohka keyu ka hinla ho̱?

¹¹ Yohmi ka nana ish ithana pulla tuk ash o̱ chitibapishi ik hlampko yʋmmak o̱ Klaist ʋlhtobʋt illi tok a̱ ai okpuloka chi̱ cho?

¹² Yohmi ka hʋsh itibapishi ʋhleha ha̱ yakohmiechit hʋsh im ashʋchi cha, nan isht il akostininchi ik hlampko yash hʋsh hotopali kʋt, Klaist ak o̱ hʋsh im ashʋchi hoke.

¹³ Yʋmohmi ka ilhpak ʋt itibapishi li ha̱ ibetʋblichi hokma, itibapishi li hash ak ibetʋblecho ka chi̱ kʋt, yakni ʋt talaia moma ka nipi nana kia ʋpa la he keyu hoke.