1 Kolinhlian 7 - Chahta Holisso Holitopa 1886

¹ Yʋmohmi ka nana ka hʋs sa̱ holissochi tok imma kak oke. Hatak ʋt ohoyo ha̱ ik potolo kak osh im achukma hoke.

² Yʋmohmi kia itin luma̱ka iksho ka chi̱ kak o̱, hatak moma kʋt ilap tekchi ak inli ho̱ ieshikma, anonti ohoyo moma kʋt i̱ hatak ak inli ho̱ ieshashke.

³ I̱ hatak ʋt ohoyo ha̱ isht ai im ʋlhpesa ka imashke: mikma tekchi atuk ak kia i̱ hatak a̱ mihinlohimchashke.

⁴ Tekchi ʋt ilap haknip ak o̱ immi ho̱ keyu, amba i̱ hatak ak oke; mikma i̱ hatak ak kia mihi yo̱ chohmit ilap haknip a̱ immi keyu, amba tekchi ak oke.

⁵ Isht im ai ʋlhpiesa hatuk ash hʋch ik it im esho kashke, amba anumpa ilbʋsha hʋsh anumpuli fehna chi̱ hosh chekosi itin takla yo̱ hʋsh it im ahni hok mak ashke; atuk osh nan isht il ai oktambli ik hʋchim iksho ki̱ Setan ʋt imomaka hʋchi pisa hinla ka, atuklant hʋsh it im onashke.

⁶ Yohmi kia ʋno nana ʋm anukfila hosh ilʋppa isht hʋchim anumpuli lishke, yohmi kʋt nana isht ʋm ʋlhpisa tuk keyu hoke.

⁷ Hatak puta kʋt ʋno ak inli chiyuhma he ak o̱ ahni lishke. Yohmi kia hatak moma kʋt Chihowa i̱ nan hʋlbina ya̱ isht im ʋlhpiesa cha, achʋfa kʋt ilʋppak o̱ isht ai im ʋlhpiesakma, anonti inla yʋt yʋmmak o̱ isht im ʋlhpiesa yoke.

⁸ Yʋmohmi ka nan ik itauwayo ki̱sha, micha i̱ hatak illi ʋhleha aiena kʋt, Ʋno ak inli chohmit ma̱ya hinla hokmʋto, im achukmʋshke, achi lishke.

⁹ Yohmi kia okla il oktampla he keyu mʋto, okla itauwayashke: itauwaya kak osh lua hi a̱ im i̱ shahli hoke.

¹⁰ Anonti itauwaya ʋhleha hokʋno im apesa lishke; yohmi kia ʋno ak keyu, amba Chitokaka yak oke; Tekchi atuk ʋt i̱ hatak atuk a̱ ik i̱ filʋmmo kashke.

¹¹ Yohmi kia anonti tekchi atuk ʋt filʋmmi hokmʋto, inla ik auwayo hosh antashke: keyukmʋt i̱ hatak atuk ash o̱ i̱ kanʋt i̱ falamashke; mikma i̱ hatak ʋt tekchi a̱ ik kancho kashke.

¹² Yohmi ka inlaka yano ʋno ak osh anumpuli li, Chitokaka yak keyu; iloh itibapishi kʋna kia tekchi ik yimmo, yohmi kia yʋmmak ash o̱ awant anta kʋt im achukmakma, yʋmma ik kancho kashke.

¹³ Anonti ohoyo hʋt i̱ hatak osh ik yimmo, yohmi kia yʋmmak ash awant anta kʋt im achukmakma, yʋmma ik kancho kashke.

¹⁴ I̱ hatak ʋt ik yimmo yʋt tekchi atuk pulla mak o̱ isht im a kashofa yoke; mikma tekchi nan ik yimmo yʋt i̱ hatak atuk mak o̱ isht im a kashofa voke; yʋmmak keyukma hʋchim ʋlla yʋt ik kashofo ka he tuk; amba himak ano holitopa hoke.

¹⁵ Yohmi kia ik yimmo yʋt filʋmmi hokmʋt, filʋmmit a̱yashke. Yʋmma chohmi hokʋno il itibapishi yokmá, pin tek okmá, nana hash osh i̱ yuka he keyushke; yohmi ka Chihowa hʋto iti̱ nanaiya he ak o̱ pi atokli tuk oke.

¹⁶ Tekchi chia ma! chi̱ hatak a̱ ish okchalinchikmá nana chi̱ kʋt nanta ish ithana cho? mikma hatak chia ma! chi tekchi a̱ ish okchalinchikmá, nana chi̱ kʋt katiohmit ish ithana cho?

¹⁷ Yohmi kia Chihowa hʋt kaniohmichit hatak moma ka i̱ hopehinla hatuk, Chihowa yʋt moma achʋfalechit atokoli tok; yohmi hoka yʋmmak o̱ ik ai itʋnowá. Yohmi ka chʋch hiohli moma ai yʋmohma chi̱ mak o̱ apihi̱sa lishke.

¹⁸ Kʋna kia hakshup tʋpa yʋt ʋbanumpa nukfohka ho̱? Yohmi hokmʋt hakshup ik tapo yo̱ ik tobo kashke. Kʋna kia hakshup ik tapo yosh ʋbanumpa nukfohka ho̱? yohmi hokmʋt hakshup tʋpa keyu kashke.

¹⁹ Hakshup tʋpa yokʋto nana keyu, mikma hakshup ik tapo yokʋt nana keyu, amba Chihowa i̱ nan ʋlhpisa holitohombli kak oke.

²⁰ Hatak moma kʋt kaniohmit antʋt ʋbanumpa anukfohka tuk ʋt, yʋmmak inli ho̱ anukfoyukʋt isht ahantashke.

²¹ Yuka chia hosh ʋbanumpa chi nukfohka ho̱? yohmi hokmʋt na yohmi chik ahno kashke; yohmi kia yuka keyu ish toba hinla hokmʋto, yʋmmak o̱ ish yʋmihchashke.

²² Kʋna hoh kia yuka hosh Chitokaka isht anukfoyukakma, mihi yosh Chitokaka immi yuka keyu hoke; yʋmmak ash inli ho̱ chohmit kʋna hosh yuka keyu yosh ʋbanumpa anukfohkakmʋt, mihi yosh Klaist in tishu yokʋt.

²³ Nan ai ʋlli yo̱ hʋsh ai ʋlbi hatuk; hatak i̱ yuka ho̱ hʋchia keyu kashke.

²⁴ Itibapishi li ʋhleha ma! hatak moma kʋt kanima yo̱ hikiʋt anukfohka tuk mʋt, Chihowa im antihi̱yʋt yʋmmak inli ho̱ antashke.

²⁵ Yʋmohmi ka ohoyo himithoa hatak haleli keyu ʋhleha imma kak a he tuk okʋno Chitokaka i̱ nan ʋlhpisa yʋt ik sʋm ikshoshke: yohmi kia ai a̱hla chi̱ hosh Chitokaka nan isht i̱ nukha̱klo ahayuchi tuk mak o̱, chohmit ʋno ʋm anukfila ha̱ ima lishke.

²⁶ Yohmi kia himonasi yokʋno nan isht palʋmmi ak atuk mak o̱ ilʋppak okʋt achukma, ahni li; na yakohmi ka hatak ʋt yohmi kak o̱ achukma, achi lishke.

²⁷ Tekchi a̱ ish a talaiyakchi ho̱? i̱ holhtoyufa he, chik ahno kashke. Chi tekchi a̱ ish i̱ holhtoyufa ho̱? tekchi a̱ chik hoyo kashke.

²⁸ Yohmi kia anonti ish itauwaya hokmʋt nana ish ashʋchi tuk keyu hoke: mikma ohoyo himita hatak haleli keyu yosh hatak auwaya hokmʋt, nan ashʋchi tuk keyu hoke. Yʋmohmi ak inli kia yʋmma chohmi kʋt haknip nan isht ik im ʋlhpieso ka he; yohmi kia hʋchi̱ kanʋt nana kaniohma hi okʋno ak hʋchim anoloshke.

²⁹ Yohmi ka itibapishi li ʋhleha ma! ilʋppak o̱ achi lishke: nitak ʋt ik falaio yosh takanli hoke; tekchi im a̱sha ʋhleha yatuk ʋt, ik im iksho chiyuhmashke.

³⁰ Mikma kʋna hosh yaiya kia, yaiya tuk keyu chiyuhmashke; mikma kʋna hosh yukpa kia, yukpa tuk keyu chiyuhmashke; mikma kʋna hosh chumpa kia, ik esho ke tuk chiyumashke.

³¹ Mikma kʋna hosh yakni ilʋppa nan isht ai ahanta kia, ik ʋlhpesachot ahanta ik chiyuhmo kashke. Yakni ilʋppa nana a kaniohmi yokʋto ont ikshot i̱hi̱ya hoka.

³² Yohmi hoka nan isht im anukfilʋt ik hʋchi komunto ka he ak o̱ hʋchim ai ahni lishke. Kʋna hosh itauwaya keyu hokʋto, kaniohmit Chitokaka ya̱ yukpala chi̱ kʋt, nana kʋt Chitokaka ai immi hak o̱ anukfihinli hoke.

³³ Amba kʋna hosh itauwaya yokʋto, kaniohmit tekchi a̱ yukpala chi̱ kʋt, nana kʋt yakni ai immi hak o̱ anukfihinli hoke.

³⁴ Hatak im a̱sha, mikmʋt ohoyo himita hatak haleli keyu hokʋto, it im inla hoke: ohoyo hatak auwaya keyu hokʋto ilap haknip, micha im anukfila ita tuklo ka isht ik ashʋcho ka chi̱ kʋt, nana kʋt Chitokaka ai immi hak o̱ anukfihinli hoke: amba hatak im a̱sha yokʋto, kaniohmit i̱ hatak yukpala chi̱ kʋt, nana kʋt yakni ai immi hak o̱ anukfihinli hoke.

³⁵ Yohmi ka hʋchishno isht ai hʋchim ʋlhpesa hi o̱ ilʋppa anumpuli lishke: yohmi kʋt nan isht ataklʋma yo̱ isht hʋchi onochi la chi̱ hatuk keyu; amba nana kʋt ai ʋlhpiesa kak atuk; yohmi ka nan isht fitekʋchi ik im ikshot, Chitokaka ya̱ im antihi̱yʋt nan isht hʋsh im ahantashke.

³⁶ Yohmi ka hatak kʋna hosh ilap ushetik hatak haleli keyu hatuk a̱ ilap inli hosh ik ʋlhpesalo kʋt anukfillikmʋt, yʋmmak ash osh hofantit taha ha ya tuk okma, anonti yʋmohma he ʋlhpesa hoka, nana ho̱ i̱ki ash osh ahnikmʋt nanashʋchi keyu hokʋt, yʋmihchashke: yohmi ho̱ hatak auwayashke.

³⁷ Yʋmohmi kia yʋmohma he ʋlhpesa keyu hokmʋno, i̱ki ash osh ilap chu̱kʋsh isht ile kʋllochit ilap nan ahni hosh a̱hlicha hinla hosh, anonti yakohmashke, ahnit ilap chu̱kʋsh a̱ anukfoyuki hokmʋt, ushetik hatak haleli keyu kash ot imoma hosh im anta he ahnikmʋt, ʋlhpesa ho̱ yʋmihchi hoke.

³⁸ Yʋmohmi hoka kʋna hosh ushetik hatak haleli keyu ha̱ hatak auwayʋchi kʋt ʋlhpesa ho̱ yʋmihchi hoke; yohmi kia kʋna hosh ushetik hatak haleli keyu ya̱ hatak auwayachi keyu kak osh, ʋlhpesa kʋt i̱ shahli ho̱ yʋmihchi hoke.

³⁹ I̱ hatak ʋt okcha̱ya moyuma ka tekchi ʋt nan ʋlhpisa pulla ho̱ isht a talaiyakchi hoke; yohmi tuk kia i̱ hatak ash osh illi hokmʋno, Chitokaka immi kʋna hoh kia ahnikmʋt, auwaya hi ʋt i̱ holhtofa hoke.

⁴⁰ Yohmi ka Chihowa imi Shilombish ʋt a si anukfoyuka ak inli ka ʋm ahoba hoka, ʋno ʋm anukfila ha̱ yʋmmak ash osh iakaiyʋt peh anta hokmʋt, yʋmmʋt yukpa kʋt i̱ shahli hoke.