1 Kolinhlian 6 - Chahta Holisso Holitopa 1886

¹ Hʋsh kanimi kʋt inla ya̱ nana hʋsh iti̱ kaniohmikmʋt, nan ik ʋlhpeso itikba yo̱ ont nana hʋchim ʋlhpisa hi osh hʋsh ahni cha, amba na yimmi ʋhleha itikba yokʋno keyu ka hinla hatuk o̱?

² Na yimmi ʋhleha hʋt yakni moma nan im apesa hi a̱ hʋch ik ithano cho? yohmi ka yakni a̱ nan hʋsh im apesa hi okmʋt, nana kʋt iskʋtinosi hokʋno hʋsh apesa he hʋchi ʋlhpesa keyu ho̱?

³ Enchil ʋhleha ha̱ nan iloh im apesa hi a̱ hʋchik ithano cho? yohmi hokʋt okcha̱ya ilʋppa nana im a kaniohmi yokak heno il i̱ shaiyahlichi fehna hinla keyu ho̱?

⁴ Yohmi ka okcha̱ya ilʋppa nana im a kaniohmi yo̱ nan isht hʋchim ʋlhpisa chi̱ hokmʋt, kʋna hosh iksa im a holitopa keyu mihi yosh na hʋchim apesa chi̱ ka, hʋsh atokoli chatuk oh cho?

⁵ Hʋchi hofahya chi̱ ho̱ hʋchim anumpuli lishke. Hatak hopoyuksa kʋt hʋch itin takla ya̱ iksho ho̱? achʋfa kia itibapishi ʋhleha nan iti̱ kaniohmi ka im apesa he keyu kʋt iksho ho̱? yohmi ho mʋhli ho̱?

⁶ Yohmi kia itibapishi achʋfa kʋt itibapishi atuk a̱ anumpa onochi cha, nan ik yimmo ʋhleha itikba yo̱ nana im ʋlhpisa chi̱ kʋt oho̱nʋshke.

⁷ Yomohmi hoka himonasi kia anumpa itonochit nan im ʋlhpisʋt hʋsh ma̱ya hokʋt, nana hʋsh ashʋchi fehnʋshke. Nanta katiohmi ho̱ nan ik ʋlhpeso ka hʋchi onocha he hʋch ik im ahno hosh? nanta katiohmi ho̱ nana ka ik ʋlhpesachot hʋchim isha hi a̱ ʋlhpesa hʋchik im ahno hosh?

⁸ Yohmi keyu, amba hʋch itibapishi ak kia ai ʋlhpiesa keyu ho̱ na hʋsh im ishi kʋt, nan hʋsh ashʋchi hoke.

⁹ Ik ʋlhpeso ʋhleha hokʋt Chihowa im apehlichika yʋt ai immi ha he ʋlhpesa keyu ka hʋch ik ithano cho? hʋch ik ile haksecho kashke; itin luma̱ka ʋhleha, naholbʋt toba aiokpʋchi ʋhleha, micha nakni haui ʋhleha, micha nakni haui ʋhleha, micha nakni bi̱ka iti hauichi ʋhleha,

¹⁰ Micha hu̱kopa ʋhleha, micha nan anushkunna atampa ʋhleha, micha oka homi ishko ʋhleha, micha inla isht itukhlakafa ʋhleha, micha na wehpuli ʋhleha, aiena hokʋno Chihowa im apehlichika yʋt ai immi toba he ʋlhpesa keyu hoke.

¹¹ Yohmi ka hʋsh kanimi kʋt yʋmma chohmi hʋchia hatuk oke. Yohmi tuk kia hʋchi ahchifa hatuk, mihmʋt hʋchi kashofa hatuk, yohmi kʋt Chihowa imi Shilombish pulla ho̱ Chitokaka Chisʋs i̱ hohchifo ho̱ isht a hʋchi ʋlhpiesa hoke.

¹² Nana puta kʋt isht ʋm ai ʋlhpesa, yohmi kia nana puta kʋt isht ʋm ai achukma keyu; nana puta kʋt isht ʋm ai ʋlhpesa, yohmi kia yʋmma kanima kak oh kia i̱ yuka la he keyu hoke.

¹³ Il impa hʋt takoba yak o̱ immi hoh chatuk oke, mikma takoba yato ilimpa hak o̱ ai immi hoh chatuk oke: yohmi kia yʋmmak ash o̱ it aieninchit Chihowa hʋt ikshokecha chi̱ hoke. Yohmi ka haknip okʋt haui yak o̱ ai im ʋlhpisa keyu, amba Chitokaka yak oke: yohmikma Chitokaka yʋt haknip a̱ nan im atahli yoke.

¹⁴ Yohmi kʋt Chihowa hʋt Chitokaka ya̱ tanichi hatuk okʋt anonti pishno a̱ ilap nan isht im ai a̱hli yo̱ isht pi tanicha he ak inli hoke.

¹⁵ Yohmi ka hʋchi haknip ʋt Klaist a̱ ai it immi ha̱ hʋch ik ithano cho? yohmi hatuk a̱ Klaist a̱ ai it immi hash ishi lish, anonti haui yo̱ ai it immichi la chi̱ cho? ik yʋmohmo pullashke.

¹⁶ Yakeh! kʋna hoh kia haui yo̱ ibafohka kʋt, yʋmmʋt haknip achʋfa ka hʋch ik ithano cho? tuklo tuk kia haknip achʋfa toba hi oke, achi hoka.

¹⁷ Amba kʋna hosh Chitokaka ak o̱ ibafokkakmʋt, shilombish achʋfa hoke.

¹⁸ Haui ya̱ ili filʋmmichit hʋsh m lelashke. Kʋna kia nan ai ashʋchika moma ka yʋmihchi hokʋto, haknip okʋno nana kanihchi keyu hoke: amba kʋna hosh itin luma̱ka hokʋto, ilap haknip ak inli ho̱ okpanit nan ashʋchi hoke.

¹⁹ Yakeh! hʋchi haknip ʋt Shilombish Holitopa mihi yosh hʋchi afo̱ka, yʋmmak osh Chihowa a minti ho̱ hʋsh ieshi, yʋmmak o̱ in tempel hʋchia hosh, hʋchishno ak inli kʋno keyu kʋt hʋch ik ithano cho?

²⁰ Nan ai ʋlli ho̱ isht hʋsh ai ʋlhtoba hatok: yʋmohmi hokʋt hʋchi haknip, micha hʋch imi shilombish, yʋmmak okʋt Chihowa immi hoka, Chihowa ya̱ isht hʋsh holitoblashke.