1 Kolinhlian 5 - Chahta Holisso Holitopa 1886

¹ Itin luma̱ka yʋt hʋch itin takla ya̱ a̱sha kʋt anoho̱wa fehna hoke; yohmi ka kʋna kia i̱ki tekchi atuk a̱ itauwaya, nan itin luma̱ka chohmi kʋt Chentail okla ak kia ai yʋmohmi fehna chatuk keyu hoke.

² Yohmi ka kʋna hosh na yakohmi ka yʋmihchi tuk ʋt hʋch itin takla ya̱ a filʋmma chi̱ ka, ik hʋchi nukha̱klo kish, isht hʋsh ile fehnʋchishke.

³ Sa haknip okʋno isht a hʋchi̱ filʋmmi li mʋhli; yohmi kia sa shilombish okʋno isht hʋch ibafo̱kʋt hʋch itin takla ahanta li ka chohmit, kʋna hosh na yakohmi ka yʋmohmi tuk mihi yo̱ nana im apesa li ma̱shkoshke.

^4-5 Kaniohmi ho̱ pin Chitokaka Chisʋs Klaist i̱ hohchifo ho̱ isht itʋnahʋt hʋsh chi̱yakma, sa shilombish ʋt a hʋch iba foyuka na pin Chitokaka Chisʋs Klaist nan isht im ai a̱hli pulla hatuk mak o̱, kʋna hatuk ash haknip isht ai im ilbʋsha tok osh Chitokaka Chisʋs Klaist i̱ nitak ʋla hokʋno imi Shilombish okʋto okcha̱ya chi̱ ka, Setan ak o̱ hʋsh im issashke.

⁶ Nan isht hʋsh ilauata ka ik achukmoshke. Nan isht shatʋmmi iskʋtinosi kia na yʋmmʋska moma ka yʋmmichi ka hʋch ik ithano cho?

⁷ Yʋmohmi ka ik yʋmmo hʋchia hokʋt, na yʋmmʋska himona mak o̱ hʋchia ha chi̱ kʋt, nan isht shatʋmmi tikba yash isht ile filʋmmichit hʋsh kanchashke. Klaist ʋt na pim ʋbanʋblit ont ia yʋt ʋlhtobʋt illi tok oka.

⁸ Yomohmi hoka impa holitopa isht kiloh ai ashá; yohmi kʋt nan isht shatʋmmi tikba yash o̱ keyu, mikmʋt isht iti̱ nukkilli, micha nan ik ai ʋlhpeso aiena ka isht shatʋmmi yak o̱ keyu, amba nan ilahobi keyu hosh ai a̱hli i̱ pʋska ik shatʋmmo yak ashke.

⁹ Itin lu̱maka ʋhleha ha̱ hʋch ik itiba chʋfo ka chi̱ ho̱, holisso ha̱ hʋchi̱ holissochi li tuk oke.

¹⁰ Yohmi kak osh yakni ilʋppa ai itin luma̱ka ʋhleha, mikmʋt nan anushkunna atampa ʋhleha, micha na wehpuli ʋhleha, mikmʋt na holbʋt toba aiokpʋchi ʋhleha aiena ka hʋch ik itʋpeho kʋmohma he ak atok keyu; yohmi hokmʋt yakni ya̱ hʋsh a kohcha he ak osh hʋchim ʋlhpesa hoka.

¹¹ Yohmi tok kia kʋna hosh itibapishi hohchifo hatuk ʋt itin luma̱ka, keyukmʋt nan anushkunna atampa, keyukmʋt na holbʋt toba aiokpʋchi, keyukmʋt inla isht itukhlakafa, keyukmʋt oka homi ishko, keyukmʋt na wehpuli okmá, nana hokʋno hʋch ik itibai achʋfokmʋt, yʋmma chohmi kash impa kia hʋch ik itibai impo ka hi o̱ himak a hʋchi̱ holissochi lishke.

¹² Kʋna hosh iksa ibafohka yatuk keyu yʋmmak kia nanta ho̱ isht im apesa la he ʋlhpesa ho̱? iksa ibafohka yʋmmak atuk okʋno hʋsh im apesa keyu ho̱?

¹³ Amba kʋna hosh iksa ibafohka keyu hokʋno Chihowa yosh nan im apesa yoke. Yʋmohmi hoka hatak nan ashʋchi yʋmmak ash ai il i̱ filʋmmichit hʋsh kanchashke.