1 Kolinhlian 4 - Chahta Holisso Holitopa 1886

¹ Klaist in tishu ʋhleha, micha, nan a̱hli Chihowa hʋt otʋninchi tok puta nan im apesʋchi ʋhleha mak o̱, chiyuhmichit hatak puta kʋt isht pi anukfillashke.

² Anonti nan apesʋchi ʋhleha nan isht im ʋlhpisa kʋt hatak yʋmmʋt ai a̱hla hi ak oh chatuk oke.

³ Yohmi kia hʋchishno, keyukmʋt hatak inla nana kia nana ho̱ isht hʋs sʋm anukfillit hʋsh apesa kia, ʋno yokʋto yʋmmʋt ʋm iskitinosi fehna hoke; a̱hli ʋno ak inli kʋt isht il anukfillit nan apesa li keyu hoke.

⁴ Ʋno ak inli kʋt nana ho̱ isht il akostininchi li keyu kʋt; yohmi kak osh ilʋppak o̱ isht si ai ʋlhpiesa hi o̱ keyu; amba kʋna hosh nan isht si anukfillit apesa hokʋto Chitokaka yak oke.

⁵ Yʋmohmi hoka Chitokaka yʋt ik lo ki̱sha ka tikbalinchit nan isht anukfillit hʋch ik apeso kashke, yʋmmak osh ai okhlilika ya̱ nana kʋt a luma puta tuk a̱ otʋninchikmʋt, anonti chu̱kʋsh im anukfila puta hatuk ma haiakahancha hi oke; yʋmohmi ha ya hatak moma kʋt nana ai isha he ʋlhpesa tuk ʋt Chihowa ya̱ im ai isha hi oke.

⁶ Yohmi ka itibapishi li ʋhleha ma! yʋmma puta kash hʋchishno pulla hatuk mak o̱, ʋno, mikmʋt Apollos, ita tuklo li kak o̱ isht il onochi li: yohmi ka nana kʋt holisso tok a̱ i̱ shahlichit hatak o̱ isht ik hʋchim anukfilo hosh pishno ak o̱ hʋsh pim ai ithʋnashke; yohmi hosh hʋsh achʋfona kia achʋfa ka ish ile fehnʋchit, anonti achʋfa ka hʋch ik i̱ sanalo kashke.

⁷ Kʋta hosh hʋch iti shashohlichit hʋchim apesa tok o̱? Nanta ho̱ ish i̱shi hosh yʋmma chik habeno tok o̱? yohmi ka ish habena hatuk mʋt, nanta katiohmi ho̱ chik habeno ke tuk ak inli ho̱ chohmit isht ish ilauata cho?

⁸ Himak ano na hʋchi fihopa, himak ano na hʋchin laua, ik piksho ho̱ mi̱kot hʋsh ma̱yʋshke; yohmi ka hʋsh mi̱ko hatuk o mʋhli hokbano ahni li, yʋmmak atuk mʋno pishno ak kia e hʋch iba mi̱ka he atuk.

⁹ Illa he isht im ʋlhpisa kak o̱ chohmit ʋbanumpeshi ishtaiyopi pishno a̱ Chihowa hʋt pi atokoli tuk a̱ ʋm ahoba hoka; yakni moma, mikmʋt enchil ʋhleha, mikmʋt hatak puta itikba a yopissa e toba tok oka.

¹⁰ Klaist atuk mak o̱ ik pi ahobo ma, amba hʋchishno ʋto Klaist a̱ isht hʋchi a hopoyuksa hoke: ik pi hlampko ma, amba hʋchishno ʋto hʋchi hlampkoshke: hʋchi holitopa ma, amba pishno ʋto ik pi holitoposhke.

¹¹ Pi hohchaha̱fot, pi tukshihinla, micha haknip bieka, mihma pi pʋsaha̱ha; yohmi ho̱ ai ʋtta a̱hli yʋt ik pim iksho na ant himakʋshke.

¹² Mihmʋt pishno pibbak ak inli ho̱ isht toksahanli hosh ont pi a hoyublishke. Isht pi atukhlakaha̱fa kia, i̱ kanʋt il anumpohonlishke: pi̱ palʋmihinchi kia, ʋlhpiesa il ahnishke.

¹³ Ik ahobalot na pi achi kia, i̱ kana hosh il im anumpohonlishke; yakni pakna im a liteha ak inli ho̱ a pi chiyuhmi, mikma nana moma isht liteha chukʋlhpʋsh ak o̱ e chiyuhmi na ant himakʋshke.

¹⁴ Hʋchi hofahyali la he osh ilʋppa puta ka holissochi li keyu, amba ʋm ʋlla a̱ holitopa hʋsh chiyuhmi kʋt ahah! hʋsh aha̱na chi̱ kak o̱ hʋchi̱ miha lishke.

¹⁵ Klaist nan isht ithʋnanchi tahlepa sipokni pokoli hosh hʋchim ai asha hoh kia, hʋch i̱ki ʋt ik lauwoshke; Klaist Chisʋs osh nan apelʋchi ho̱ ʋbanumpa pulla ho̱ isht hʋchi tobachi li tuk oke.

¹⁶ Yʋmohmi hokʋt hʋs siakaiya hi a̱ hʋchi̱ miha lishke.

¹⁷ Ilʋppa yakohmi kak o̱ Timohliʋs, sʋso a̱ holitopa, Chitokaka im ai a̱hlit achukma ya̱ pit hʋchi kanchi li ka, mihi yosh kanima moma iksa a hiohli puta ka Klaist isht abʋchit, nana a kaniohmi li puta ka anolit hʋchi anukfohkicha hi oke.

¹⁸ Yohmi ka ak hʋchim ono ka he im ahobʋt, hʋsh kanimi kʋt isht hʋsh ilefehcʋchishke.

¹⁹ Yohmi kia Chitokaka yʋt ʋlhpesa ahnikma, chekosi hʋchim ona la chi̱ hoke: yohmi kʋt ilefehnʋchi ʋhleha hatuk yʋmmak ash im anumpa hak a chi̱ keyu, amba nan ai a̱hli yak o̱ ithana la chi̱ hoke.

²⁰ Chihowa im apehliechika yokʋt anumpa ho̱ keyu, amba nan isht ai a̱hli yak oke.

²¹ Nanta ho̱ hʋsh ahni̱? fuli yokmá, keyukmʋt i̱ hullo, micha chu̱kʋsh im anukfila yohbi hokmá, nanta ho̱ ieshi hosh hʋchim ona la chi̱ cho?