1 Kolinhlian 3 - Chahta Holisso Holitopa 1886

¹ Yohmi ka itibapishi li ʋhleha ma! Shilombish anukfoyuka ho̱ chohmichit hʋchim anumpohonli la he keyu, amba haknip nan ai ahnit Klaist ibai achʋfa ʋllo̱si yo̱ hʋchi chohmichi lishke.

² Pishukchi yo̱ isht hʋch ipeta li tok, ilhpak kʋllo atok keyu; tikba kamo isht a hʋchim ʋlhpesa tok keyu kʋt himonasi ak kia, isht a hʋchim ʋlhpesa keyu momʋshke.

³ Haknip nan ai ahni hʋchia moma hoka iti̱ potʋnno, micha itachowa anonti iti̱ filamohli aiena kʋt hʋch itin takla aiasha hoka, haknip nan ai ahni mak o̱ hʋchia moma, micha hatak im anukfila yo̱ chohmit hʋsh itʋnoho̱wa keyu̱?

⁴ Hʋsh kanima kʋt, Ʋno ʋto Pal ai achʋfa sia; anonti inla mʋt, Ʋno ʋto Apollos ai achʋfa sia, hʋsh achi hokʋt haknip nan ai ahni hʋchia mak o̱ keyu̱?

⁵ Yohmi ka kʋta hosh Pal okmá, anonti kʋta hosh Apollos o̱? amba ʋbanumpa isht ʋtta yʋmmak atuk mak o̱ hʋsh moma ka Chitokaka yʋt hʋchi anukfohki tuk mak o̱, hʋchi vimmi tuk oke.

⁶ Hatak moma kʋt yohma he mak o̱ Chitokaka yʋt apesa tok o̱, Ʋno ak osh na‐hokchi li tok, Apollos ʋto oka on hlali tok; amba Chihowa yokʋto offochi hatuk oke.

⁷ Yohmi ka kʋna hosh hokchi, mikma kʋna hosh oka isht o̱n hlali hokʋto na kanihma he keyu, amba Chihowa yʋmmak osh offochi yoke.

⁸ Yohmi ka kʋna hosh na hokchi, anonti kʋna hosh oka isht o̱n hlali ita tuklo kʋt itibai achʋfa yoke: yohmi ka moma kʋt ilap na toksʋli isht ai ʋlhpiesʋt ʋlhtoba ak illa ho̱ isha hi oke.

⁹ Chihowa immi hosh itiba toksʋli ʋhleha pia hoke. Chihowa nan im ahollokchi hʋchia, micha aboha Chihowa hʋt atahli tuk mak o̱ hʋchia hoke.

¹⁰ Chihowa hʋt ilap nan isht i̱ kana yʋmma ʋma tuk mak o̱ aboha ikbi imponna hopoyuksa yo̱ chohmit in tolahpi ya̱ bohli li hatuk, mihma inla yosh yʋmmak ash o̱ ai itʋbʋni hoke. Yʋmohmi hoka hatak moma kʋt kanimihchit yʋmmak ash o̱ ai itʋbʋni kʋt ahah! ahnashke.

¹¹ Intolahpi yʋmmʋt Chisʋs Klaist, yʋmmak osh itola ha ya, hatak nana hosh inla ya̱ bohla he keyu hoka.

¹² Yohmi ka hatak kʋna kia intohlapi ilʋppa pakna ya̱ tʋli holisso lakna yokmá, tʋli hʋta yokmá, tʋli ai ʋlbi chito yokmá, iti yokmá, hʋshuk okmá, onush ʋpi yokmá, nana ho̱ isht itʋbʋni tuk okmá;

¹³ Nana ʋlhtaha tuk aiyuka kʋt otaiyana hi oke: nitak yʋmmak osh otʋnincha he, luak o̱ isht otaiyana hi oka; yʋmohmi ka hatak a̱ im a toksʋli aiyuka kʋt kaniohmi hatuk oh kia, luak osh imomaka pisa hi oke.

¹⁴ Yʋmmak ash pakna ai itʋbʋni tuk a̱ hatak nana hosh atoksʋli tuk ak o̱ ik okpulokma, mihi yosh nan ʋlhtoba ya̱ isha hi oke.

¹⁵ Kʋna hosh atahli tuk a̱ lua hokma, yʋmmak osh i̱ kʋniʋt ilbʋsha hi oke: yohmi kia ilap okʋto okchaya he, yohmi kia luak o̱ a hlopulli kak inli ho̱ chohma hi oke.

¹⁶ Chihowa in tempel hʋchia, yohmi hatuk o̱ Chihowa imi Shilombish ʋt hʋchia chukʋt anta ka hʋch ik ithano cho?

¹⁷ Kʋna kia Chihowa in tempel a̱ litehlikma, mihi yo̱ Chihowa hʋt ishit kancha he; Chihowa in tempel ʋt holitopa yoka, tempel yʋmmak o̱ hʋchia hoke.

¹⁸ Kʋna kia ik ile haksecho kia. Hʋchi kanima hosh yakni ilʋppa hopoyuksa ho̱ ilahobikmʋt, yʋmmʋt hopoyuksa chi̱ kʋt yakni ilʋppa ik ahobo yo̱ ik tobá,

¹⁹ Yakni ilʋppa isht im a hopoyuksa yokʋto Chihowa ya̱ isht ik im ahobo yoka. Yʋmmak okʋt hopoyuksa ya̱ ilap nan isht imponna ak inli ho̱ isht ishi yoke, achi hosh holisso tok oka.

²⁰ Mihmʋt anonti atuklanchi mʋt, Chitokaka yʋt hopoyuksa im anukfila puta, yʋmmʋt ai a̱hli ik ono ka ithaiyana hoke, achi tok.

²¹ Yʋmohmi hoka kʋna kia hatak puta ho̱ isht ik ilauato kia, nana moma kʋt hʋchimmi hoka;

²² Pal ak okmá, keyukmʋt Apollos, keyukmʋt Sefas, keyukmʋt yakni ilʋppa, keyukmʋt ilhfiopak okcha̱ya, keyukmʋt nan illi, keyukmʋt nana kʋt himonasi a̱sha, keyukmʋt nana kʋt a̱sha he moma kʋt hʋchimmi yoke.

²³ Mikma hʋchishno ʋto Klaist immi hʋchia; mikma Klaist ʋt Chihowa immi hoke.