1 Kolinhlian 16 - Chahta Holisso Holitopa 1886

¹ Yohmi ka na yimmi a̱hli nan im itahobi imma hokʋno, chʋch Kaleshi a hiohli kak o̱ nana im apesa li tok a̱, chohmit hʋsh yʋmihchi ak inlashke.

² Ona li ha yo̱ nan itahobi kʋt ik ai iksho ka chi̱ ka, wek nitak ʋmmonakma achʋfa hʋsh aiyuka kʋt, Chihowa hʋt nan im ila̱yak a̱ ataiyahli ka, it ilauechit ishit hʋsh il im bohonlashke.

³ Atuk o̱ ona likma, kʋna ho̱ ʋlhpesa hʋsh ahni hokma, mihi yosh nana hʋsh habenʋchi tuk ash Chelusalem isht ona chi̱ ka, holisso ha̱ im atahli lish, pit yuhli lashke.

⁴ Yohmi kia ia li kak o̱ ʋlhpesa hinla hokma, yʋmmak ash ot si api̱hʋt ia chi̱ hoke.

⁵ Yohmi ka Masetonia yakni ya̱ a hlopulli li ha yosh, hʋchim ona la chi̱ hoke, Masetonia yakni ya̱ a hlopulli li mak okʋt.

⁶ Yohmikmʋt hʋch ibai anta la chi̱, a̱hli, hʋshtula yak kia hʋch ibai anta la chi̱ chishke; yohmi ho̱ anowa hopaki kanima yo̱ ia la chi̱ ka hʋs si apelʋcha hi oke.

⁷ Himonasi ya̱ nowʋt a̱ya li hokʋto, hʋchi pisa la he keyu; amba Chitokaka yʋt ik yohmi ahni hokma, ont hʋch ibai anta li̱ hopaka he keyu, ahni li hoke.

⁸ Yohmi kʋt Efesʋs ak o̱ anta li̱ Pentekost ai onak mak a chi̱ hoke.

⁹ Okhissa yʋt chito, mikmʋt ʋm ai a̱hla hi ʋt an tiwa, mikma a̱ sanali ʋt laua hoke.

¹⁰ Yohmi ka Timohliʋs ʋt ona hokmʋt, nukshopa ikshot hʋch iba takla anta chi̱ ka hʋsh pisashke: ʋno ʋt yʋmmak inli chohmit, yʋmmʋt Chitokaka im atoksʋli li ya̱ toksahanli hoke.

¹¹ Yʋmohmi ka kʋna kia ik shitelemo kashke: amba yʋmmʋt a̱yʋt ʋm ʋla chi̱ ka, i̱ kanʋt hʋsh apelʋchashke: itibapishi li ʋhleha ta̱kla ʋla hi a̱ hoyo li hoka.

¹² Il itibapishi Apollos okʋno iloh itibapishi ʋhleha ha̱ ai itʋpi̱hʋt hʋchim ona he ak o̱ ahni li fehna tuk; yohmi kia himonasi yokʋno ona hi ʋt ik ahno kʋmohmi tuk; yohmi kia ona he im ai ʋlhpiesa onakma, ona chi̱ hoke.

¹³ O̱kchʋt oh il apistikelí, ai yimmika ya̱ kʋllot ieshit hʋsh hikiashke, hatak a̱hli il otʋninchit, hʋsh hlampkashke.

¹⁴ Nana hʋsh a kaniohmi puta kʋt nan it i̱ hullo mak o̱ ik ai yʋmohmí.

^15-16 Stefanas in chuka chʋfa, yʋmmak osh Akaia ya̱ nan ai ʋni ʋmmona yosh, na yimmi a̱hli ʋhleha ha̱ apelʋcha chi̱ kʋt okla il im issa tok; yohmi ka itibapishi li ʋhleha ma! yʋmma chohmi, micha na piba toksʋli, micha toksʋlit hoyubli ayuka ka hʋsh im antia chi̱ ka, hʋch it i̱ kanʋt hʋchi atohno lishke.

¹⁷ Stefanas, micha Fatunatʋs, mikmʋt Akaikʋs aiena kʋt ai ʋla ka sai yukpʋshke; nana ka hʋch ik onancho ke tuk a̱ okla onanchit atahli hoka;

¹⁸ Sa chu̱kʋsh, micha hʋchishno aiena chu̱kʋsh a̱ okla yukpali hatuk: yʋmohmi hoka yʋmma chohmi ʋhleha ha̱ i̱ kanʋt hʋsh ithaiyanashke.

¹⁹ Asia yakni chʋch ma̱ya kʋt pit hʋchi aiokpʋchishke. Akuila micha Plissilla ita tuklo kʋt, ilap in chʋch ma̱ya ka aiena kʋt, Chitokaka ibai achʋfa hʋchia hoka pit hʋchi aiokpʋchi fehnʋshke.

²⁰ Itibapishi moma, kʋt pit hʋchi aiokpʋchishke. Su̱ksowa holitopa yo̱ hʋsh it aiokpʋchashke.

²¹ Ʋno Pal nan isht aiokpʋchi ka ʋno sʋbbak isht holissohonchi lishke.

²² Kʋna hoh kia Chitokaka Chisʋs Klaist a̱ holitobli keyukmʋt, mihi yosh Anahlema, Malanahla mak ashke.

²³ Hʋpin Chitokaka Chisʋs Klaist nan isht i̱ kana yosh hʋchi anukfoyukashke.

²⁴ Klaist Chisʋs ibai achʋfa hʋchia ka̱ nan isht i̱ hullo li yʋt mominchit hʋchi anukfoyukashke. Amen.