1 Kolinhlian 15 - Chahta Holisso Holitopa 1886

¹ Yʋmohmi ka itibapishi ʋhleha ma! ʋbanumpa yʋmmak o̱ hʋchim anumpohonli li yʋmma hʋsh ishi tuk osh, anonti mihi yo̱ anukfoyukʋt hʋsh ma̱ha̱ya ka, yʋmmak inli ho̱ hʋch im anohonli lishke:

² Yʋmmak o̱ hʋchi ai okcha̱ya, nana ka isht hʋchim anumpuli li tuk a̱ ithaiyanʋt hʋsh ieshi hokmʋt, nana ka ik onancho keyut hʋchi yimmi hatuk okmʋt.

^3-4 Holisso Holitopa nana achi tok mak o̱ nana pim ai ashʋchika puta kak o̱ Klaist ʋt kaniohmit isht ai illi; yohmi cha yʋmmak ash ot hollopi tuk osh, anonti nitak ont atuchina ma Holisso Holitopa nana achi tok mak o̱ yʋmmak ash ot anonti tani tok, yʋmmak o̱ ʋno ak kia si anukfoyuka hatuk osh, mihi yo̱ tikbanli hʋchim anohonli li tuk oke.

⁵ Mihma yʋmmak ash ot Sefas a̱ i̱ haiaka, yohmi mʋt auah tuklo kash i̱ haiaka tok.

⁶ Yohmi ha ya tuk osh himona achʋfa yʋmmak ash osh itibapishi tahlepa tahlapi ont ia ka i̱ haiaka tok: yʋmmak atok a̱ akashampa laua kʋt okcha̱ya na ant himakʋshke, yohmi kia kanimi kʋto nusit akakoha tok.

⁷ Yohmi ha yo̱ yʋmmak ash ot Chemis a̱ i̱ haiaka tok; yohmi mʋt apostel ʋhleha hash mominchit i̱ haiaka tok.

⁸ Yohmi mʋt moma ont ishtaiyopi ka ai ʋlhpiesa keyu ho̱ chohmi, ʋno ak kia yʋmmak ash ot a̱ haiaka tok.

⁹ Apostel ʋhleha moma ik alauwo sia, yohmi kʋt apostel hohchifa he si ʋlhpesa keyu, Chihowa in chʋch a̱ ilbʋshali li tok okʋt.

¹⁰ Yohmi kia Chihowa nan isht i̱ kana pulla ho̱ kanima a hikia li kʋt yʋmmak o̱ hikia sia mak oke; mikmʋt yʋmma nan isht i̱ kana yʋmmʋt si anukfoyuka kʋt ik ai ono ke tuk keyu hoke: yohmi hokʋt toksʋli hoyubli kʋt yʋmmak ash moma ka i̱ shahlichi li: yohmi kia ʋno ak keyu, amba Chihowa nan isht i̱ kana mihi yosh a sʋbai achʋfa kak atuk oke.

¹¹ Yʋmohmi hoka ʋno yak okmá, keyukmʋt yʋmmak okmá, e nana hosh yʋmihchit il anumpohonli ma, yʋmohmit hʋchi yimmi hatuk oke.

¹² Yohmi ka Klaist yʋmmʋt illit falamʋt tani tuk ʋt isht anumpa hokma, katiohmi ho̱ hʋsh kanimi kʋt illit falamʋt tana hi ʋt iksho, hʋsh achi cho?

¹³ Yohmi ka illit falamʋt tana hi ʋt iksho hatuk; yohmi hokma Klaist ʋt ik tano ki tok oke.

¹⁴ Yohmi ka Klaist ʋt ik tano ki tok; yohmi hokma ʋbanumpa isht il anumpuli ka isht ai achukma he keyu, mikma nan isht hʋchi ai yimmi ka yʋt isht ai achukma he keyu ak inli hoke.

¹⁵ A̱hli, yohmi ka Chihowa isht atokowa ik a̱hlo il otʋni noke: Chihowa yʋt Klaist a̱ tanichi tok a̱ isht il atokoli tok okʋt: yʋmmak ash ik tanicho ke tok, illi yʋt falamʋt tana he keyukma.

¹⁶ Illi yʋt tana he keyu, yohmi hokma Klaist ʋt ik tano ki tok oke.

¹⁷ Yohmi ka Klaist ʋt ik tano kitok okma, na hʋchim ai yimmi ka yʋt ik ai a̱hlo; na hʋchim ai ashʋchi ka hʋsh a hikia momʋshke.

¹⁸ Yohmikma kʋna hosh akakohʋt Klaist a̱ iba nusi tuk ʋhleha yʋmmʋt aiokpuloka mak oke.

¹⁹ Okcha̱ya ilʋppak bano kak osh Klaist a̱ il ai okcha̱ya chi̱ il anukchieto hatuk okmʋt, pilbʋsha kʋt hatak moma ka il i̱ shahlishke.

²⁰ Yohmi ka himak ʋno Klaist ʋt illit falamʋt tani tok, micha kʋna hosh nusi tuk ʋhleha yʋmmak ash nan ʋni ʋmmona mak o̱ toba hoke.

²¹ Hatak puyulla hatuk mak o̱ nan illi hʋt a̱ya tok, hatak pulla kak o̱ illit falamʋt tani ʋt a minti tok.

²² Alʋm atok puyulla mak o̱ momʋt illi ka, yʋmmak inli ho̱ chohmit Klaist pulla atuk mak o̱ momʋt falamʋt okcha̱ya yo̱ toba hi oke.

²³ Yohmi kia hatak moma kʋt ilap nan isht im ai ʋlhpiesa kak a hi oke: Klaist ak osh nan ʋni ʋmmona hoke: i̱ himmak o̱ Klaist immi hatuk ʋt, yʋmmʋt mintikma, tana hi oke.

²⁴ Mikma apehlichika, nan ʋlhtoka, micha nan im ai a̱hli aiena ka ai akshochi ha yosh apehlichika ya̱ yʋmmak ash ot I̱ki Chihowa mak o̱ ibbak fohka hi oke; yohmik mak o̱ ai ʋhli hʋt ʋla hi oke.

²⁵ Yʋmmak okʋt mi̱kot ahanta pullʋt, in tʋnʋp ʋhleha moma ka ilap iyi nuta ashachi ha ya hi oke.

²⁶ Tʋnʋp ishtaiyopi mak osh yʋmmʋt ont ik ai iksho ka chi̱ kʋt nan illi ak oke.

²⁷ Nana moma ka yʋmmak ash ot iyi nuta ya̱ ashachi tok oke. Yohmi ka nana puta kʋt yʋmmak ash ai i̱ nutakʋshke, yʋmmʋt achi kia, nana moma ka yʋmmak ash ai i̱ nutakʋchi tok ilap ak bano hosh keyu kʋt otaiyanishke.

²⁸ Yohmi ka nana moma kʋt yʋmmak ash o̱ ai i̱ nutakʋt taha, yohmik mak o̱ Ushi ilap ak kia nana moma ka ai i̱ nutakʋchi tok yʋmmak ash o̱ ai i̱ nutaka he; yohmi ho̱ Chihowa ya̱ moyuma kʋt nana moma ka isht ai okpahanchit isht im antia hi oke.

²⁹ Yʋmmak a he keyukma; illi tuk ak o̱ ʋlhtoba hosh baptismo tuk, yʋmmʋto nanta ho̱ katiohma hi o̱? illi yʋt tana he keyu kʋmohmi hokma; nanta katiohmi ho̱ illi atuk pulla ka isht a baptismo hatuk o̱?

³⁰ Mikma nanta katiohmi ho̱ hʋshi kanʋlli moma ka isht a pi̱ palʋmmi ya̱ il a hikia cho?

³¹ Nan isht ilaiyukpa yʋmma hʋchishno pulla hatuk mak o̱ pin Chitokaka Klaist Chisʋs isht im ai eshi li kak osh ai a̱hlichit anohonli li mʋt, nitak moma ka sahanlishke.

³² Hatak o̱ chohmit nampoa nukshopa puta ka Efesʋs ak o̱ ai itihimbi li tuk ʋt, illi yʋt tani keyukma, nanta hosh isht ʋm ai achukma hinla ho̱? onnaha ya̱ hʋp illa chi̱ hokʋt, impʋt, nan ishkot keho ma̱yá.

³³ Hʋch ik ile haksecho kashke: nan ik ʋlhpeso a chukulbi yokʋto im anukfila achukma puta tuk a̱ im okpʋni voke.

³⁴ Yohma he ai ʋlhpiesa hoka oh okcha, micha na hʋch ik ashʋcho kashke; kanimi kʋt Chihowa nan isht im ithaiyana ik im iksho hoka. Hʋchi hofahya chi̱ ho̱ ilʋppa hʋchim anumpuli lishke.

³⁵ Yohmi ka katiohmi hosh illi yʋt tani ho̱? mikmʋt haknip ʋt katiohmi ho̱ yʋmmak ash ot i̱sht kohcha ho̱? hatak kanimi kʋt acha hi oka.

³⁶ Im anukfilla iksho chia ma! nana ka ish hokchi tuk a̱ illi yo̱ keyukmʋt, yʋmmak ash ot okcha̱ya yo̱ keyu hoke.

³⁷ Mikma nana ish hokchi kʋt nan ʋpi yʋmmak a hi o̱ ish hokchi keyu, amba onush okmá, keyukmʋt nihi inla yokmá, nana kia nihi ak bano hoke:

³⁸ Yohmi ka Chihowa yʋt yohmi ai ahni mak osh, nan ʋpi ya chi̱ ka ima hoke; mikmʋt nihi moma kʋto ilap im ʋpi ya chi̱ ka ima hoke.

³⁹ Nipi moma kʋt nipi mihi achʋfa keyu hoke; yohmi ka hatak nipi ʋt inlak ma, inla mʋt nampoa nipi, inla mʋt nʋni nipi, inla mʋt hushi nipi yak oke.

⁴⁰ Ʋba imma na haknip ilaiyuka, aka imma na haknip ilaiyuka aiena kʋt ai asha hoke: yohmi kia ʋba imma isht im a holitopa yokʋto achʋfa, mikma inla mʋt aka imma nan isht im a holitopa yak oka.

⁴¹ Hʋshi yʋt nan isht im a holitopa yʋt achʋfa, inla mʋt hʋshi ninak a̱ya nan isht im a holitopa, anonti inla mʋt fochik puta isht im a holitopa yʋt a̱sha hoke; isht a holitopa hokʋno fochik achʋfa kʋt fochik inla ya̱ it im inla hoke.

⁴² Illit falamʋt tani kʋt yʋmmak inli ho̱ chiyuhma hi oke. Toshba hi osh holloho̱kchi tuk ʋt, ik toshbo ka hi osh taiyani hoke.

⁴³ Ik holitopot holloho̱kchi tuk ʋt, holitopa hi osh taiyani hoke: ik hlampkot holloho̱kchi tuk ʋt, nan ai a̱hlahe mak osh taiyani hoke.

⁴⁴ Ilhfiopak haknip holloho̱kchi tuk ʋt, shilombish imma haknip osh taiyani hoke. Ilhfiopak haknip, mikmʋt shilombish imma haknip ita tuklo kʋt a̱shʋshke.

⁴⁵ Yʋmohmi kak o̱ hatak ʋmmona Alʋm ʋt shilombish okcha̱ya yosh toba tok; Alʋm ishtaiyopi kʋto Shilombish okchalinchi yo̱ toba tok, achi hosh holihi̱so hoke.

⁴⁶ Yohmi kia shilombish imma kak osh ʋmmona tuk keyu, amba haknip imma kak atok oke: atuk o̱ i̱ himmak o̱ shilombish imma kak atok oke.

⁴⁷ Hatak ʋmmona kʋt yakni yo̱ a toba hatuk osh, yakni imma kak oke. Hatak atukla kʋto ʋba minti Chitokaka ak oke.

⁴⁸ Yakni ai immi atuk ash o̱, chohmit kʋna hosh yakni ai immi hokʋto yʋmmak inli ho̱ chohmi hoke: mikma ʋba ai immi hokʋto, yʋmmak ash inli ho̱ chohmi hoke.

⁴⁹ Yohmi ka yakni ai immi kash o̱ holba ka iloh ieshi hatuk a̱, chohmit ʋba ai immi kash o̱ holba ka iloh iesha he ak inli hoke.

⁵⁰ Yohmi ka itibapishi li ʋhleha ma! nipi, micha issish ita tuklo kʋto Chihowa im apehlichika yʋt ai immi ha he ʋlhpesa keyu; mikma nan toshba hi okʋto nan ik toshbo ya̱ ai immi ha he ʋlhpesa aiena keyu hoke.

^51-52 Yakeh! nana a luma hatuk a̱ hʋch im anoli lishke; moma kak osh hʋpi nusa chi̱ keyu, amba ai ishtaiyopi isht pu̱fa yʋt nana olakma, yakosi itin takla, nishkin mochukli ai itin takla ho̱, moma kʋt inlʋt e toba hi oke: nana ola hʋt ohonla he, mikmak o̱ illi atuk ʋt ik toshbo ka hi osh tana he, mikma inlʋt e toba hi oke.

^53-54 Na toshba he ilʋppak ash osh nan toshba he keyu ho̱ isht a foyuka pulla he, mikma nan illa he ilʋppak ash osh nan illa he keyu ho̱ isht a foyuka he: yʋmohmi ha yok mak o̱, nan illi hash o̱ ont imaiyachi na ik ai iksho ka hi oke; ahanchi hosh holisso tok ʋt yʋmmak ash ot ont ai a̱hla hi oke.

⁵⁵ Nan illi ma! katima yak o̱ nan isht ish nʋhli yo̱? ahollopi ma! katima yak o̱ nan isht ish imaiyachi ho̱?

⁵⁶ Nan illi i̱ nan isht nʋhli ʋt nana ashʋchi ak oke; mikma nan ashʋchi isht imi hlampko yʋt nan ʋlhpisa yak oke.

⁵⁷ Yohmi kia hʋpin Chitokaka Chisʋs Klaist pulla ha tuk mak o̱ nan isht imaiyachi ya̱ Chihowa yʋt hʋp ima hoka, Chihowa ya̱ yak oke; im ai ahni lishke.

⁵⁸ Yʋmohmi hoka itibapishi li a̱ holitopa ʋhleha ma! hʋsh kʋllo cha ik hʋchi fitekacho kish, ʋlhtoba iksho ka hi osh Chitokaka hʋsh in toksʋli keyu kʋt hʋsh ithaiyana hokʋt, Chitokaka im atoksʋli ya̱ lauachit hʋsh toksahanlashke.